Ўзбекистоннинг Буюк Британиядаги сайёҳлик брендининг элчиси Софи Ибботсон пандемия даврида Ўзбекистонда туризмни тиклаш бўйича амалий тавсиялар билан ўртоқлашди. Uzbekistan.travel сайтида Софи Ибботсон видемурожаатининг тўлиқ матни келтирилган.

2020 туризм саноати учун ҳалокатли йил бўлди. Covid-19 пандемияси туфайли нафақат Ўзбекистон, балки бутун дунё инқирозга юз тутди. 2021 йилда туризмда босқичма-босқич тикланишини кўрамиз. Ҳозир биз ички туризм соҳасида ишлаяпмиз ва умид қиламанки, йил охиригача биз бутун дунёдаги биринчи хорижий сайёҳларни кутиб оламиз.

Бунинг учун нима қилиш керак? Аввало, йил давомида бутун туризм соҳасини босқичма-босқич тиклашга тайёргарлик кўришимиз ва соҳани ривожлантириш учун қилаётган ишларимизга амин бўлишимиз керак. Бу муҳлат бу соҳада узоқ муддатли ва барқарор тикланиш учун асос яратади.

Экотуризмга эътибор

Ҳозирги кунда туризм индустриясининг дунё бўйлаб экотуризм йўналишига қизиқиши ортиб бораётганини кўриб турибмиз. Экотуризмни ривожлантириш Ўзбекистон туризм саноати учун анча қўл келади. Биринчидан, яхши экологик шароитлар ва хавфсиз инфратузилма одамларни очиқ ҳавога олиб чиқади, очиқ жойлар, жумладан, тоғлар, ўрмонлар, водийлар ва чўлларни тез-тез зиёрат қилиш имконини беради.

Зиёрат туризми учун имкониятлар

Бугунги кунда Ўзбекистон туризмининг аксарият қисми Буюк Ипак йўли йўналишида жойлашган шаҳарлардан мерос бўлиб қолмоқда.

Ўйлайманки, Ўзбекистон ҳукумати бунга алоҳида эътибор қаратаётгани учун эмас, балки бутун дунёда зиёрат сафарига қизиқиш ортиб бораётгани учун ҳам бу йил зиёрат туризми соҳасида катта ўсишни кўрамиз. Жумладан, мусулмон сайёҳлари минг йиллик ислом маданий мероси билан боғланиб, Ўзбекистонга тез-тез шундай саёҳатлар уюштиришни истайдилар. Мусулмон сайёҳлар мамлакатга сафари давомида намоз ўқишни ва ҳалол таом тайёрланадиган жойларда овқатланишни истайдилар. Бундай имкониятлар Ўзбекистонда мавжуд.

Хавфсиз туризм

Ўзбекистонда тиббий туризмга ҳам қизиқиш катта. Хусусан, қўшни мамлакатлардан келган сайёҳлар Ўзбекистонга юқори сифатли тиббий ёрдам, шунингдек, соғлом дам олиш учун келишни истайди. Шундай экан, соғлом фаол саёҳат, курорт рекреациясини ривожлантириш, Ўзбекистонда сайёҳлар баҳраманд бўла оладиган табиий булоқларни кашф этишга катта эътибор қаратиш лозим.

Мен сиз билан гаплашмоқчи бўлган охирги мавзу маҳаллий туризм инфратузилмасига сармоя киритишдир. Covid-19 хавфсиз бўлиши учун Ўзбекистондаги ҳар бир бизнес истиқболдаги инфратузилмани ўзгартириши керак. Туристлар дам оладиган жойларда, хоҳ меҳмонхона, хоҳ меҳмонхона, хоҳ ресторан, ҳатто аэропортда барча санитария-гигиена шароитлари яратилганлигига ишонч ҳосил қилишлари керак. Ҳамма нарса ўзларини хавфсиз ҳис қиладиган тарзда ташкил этилиши керак.

Бизга маълумки, 2019 йилда Ўзбекистонга 6,7 миллионга яқин сайёҳ ташриф буюриб, Ўзбекистонни энг яхши сайёҳлик маскани сифатида эътироф этди. Ўзбекистон учун айни порлоқ келажакни орзиқиб кутаман. Биз фақат сабр қилишимиз керак.

Ўзбекистон мусулмонлари идораси матбуот хизмати

Жорий йилнинг январь ойи ўрталарида  бахтсиз ҳодиса сабаб, пойтахтимизнинг Юнусобод тумани «Бободеҳқон» маҳалласида жойлашган учта хонадон аланга ичида қолади. Олов хонадон эгаларининг уйлари билан бирга, бор-будини, кийим-кечак ва ҳатто ҳужжатларини ҳам кулга айлантиради.

Мазкур ҳолатдан хабар топган Вақф фонди мутасаддилари томонидан 29 январь куни “Обод хонадон” акцияси эълон қилиниб, 18 февралга қадар зарур бўлган 90 миллион сўм маблағ йиғилди.

Бугун, Вақф хайрия жамоат фонди раҳбари Яҳё қори Абдураҳмонов, «Бободеҳқон» маҳалласига ташриф буюриб ушбу хонадон эгаларининг ҳар бирига 30 миллион сўмдан жами 90 миллион сўм хайрия маблағлари ва озиқ овқат-маҳсулотларини топширди.

Уйи қайта қурилаётганидан хурсанд бўлган 84 ёшли Абдували бобо: “Вақф фонди ходимлари, хайрия қилган ва ҳисса қўшган барча инсонлардан Аллоҳ рози бўлиб, ўйлаган эзгу ниятларига етказсин”, дея дуо қилди.

 “Қисқа фурсатда, маҳалламиз аҳолиси ва саховатпеша ватандошларимиз томонидан, кўплаб моддий ёрдамлар, озиқ овқат маҳсулотлари ҳамда қурилиш моллари эҳсон қилинди. Аксарият кишилар манзилларингизни Вақф фонди ходимларидан олдик деб айтишди. Маҳалламиз номидан фонд ходимлари ва эҳсон соҳибларига ташаккурлар изҳор этамиз”, деди, «Бободеҳқон» маҳалла фуқаролар йиғини раиси Дилмурод Бекмуҳаммедов.

Вақф фонди мазкур акцияда иштирок этган барча саҳоватпеша  ватандошларимизга ўз миннатдорлигини билдиради.

Вақф хайрия жамоат фонди матбуот хизмати

Тошкентда "Терроризм, экстремизм ва радикализмга қарши курашишда ёшларнинг ўрни" мавзусида халқаро анжуман бўлиб ўтди.

Ушбу анжуман ўтказилиши ҳақида сайтимизда хабар берган эдик. 

Анжуман Ўзбекистон Республикаси Ёшлар ишлари агентлиги, Ташқи ишлар вазирлиги, БМТнинг Ўзбекистондаги ваколатхонаси, Тараққиёт дастури, Гиёҳванд моддалар ва жиноятчиликка қарши курашиш бўйича бошқармаси, шунингдек, ЕХҲТнинг Ўзбекистондаги лойиҳалари координатори, Осиёда ҳамкорлик ва ўзаро ишонч чоралари бўйича кенгаш, Германия халқаро ҳамкорлик жамияти (GIZ) каби халқаро ташкилотлар ҳамкорлигида ташкил этилди.

Тадбирда ушбу тузилмаларга аъзо мамлакатлар ёшлари ўртасида терроризм, экстремизм ва радикализмга қарши курашишга эътиборни янада кучайтириш, шунингдек, биргаликда самарали фаолият олиб боришга доир масалалар муҳокама қилинди.

ЎзА хабарига кўра, тадбирда иштирок этган Ўзбекистон Республикаси Бош вазири ўринбосари Азиз Абдуҳакимов давлатимиз раҳбари ташаббуси билан 2021 йил – Ёшларни қўллаб-қувватлаш ва аҳоли саломатлигини мустаҳкамлаш йили деб эълон қилинганини қайд этаркан, шу муносабат билан қабул қилинган Давлат дастурида ёшларнинг жамиятдаги ўрнини мустаҳкамлашга алоҳида эътибор қаратилганини таъкидлади. Сўнгги уч йилда мамлакатимиздаги олий таълим муассасалари сони 60 фоизга ошиб, айни дамда 116 тага етгани ҳам ушбу йўналишда амалга оширилаётган ислоҳотлар самарасидир.

Анжуманда, шунингдек, онлайн тарзда Туркий тилли давлатлар ҳамкорлик кенгаши Бош котиби Бағдат Амреев, ОҲИЧК Котибияти Ижрочи директори Қайрат Сарибай, МДҲ Ижроия қўмитаси Раиси – Ижрочи котиби Сергей Лебедев, БМТ Бош котиби ўринбосари Владимир Воронков ва бошқа қатор нуфузли халқаро тузилмалар масъул вакиллари ҳам сўзга чиқишди.

– Бугунги кунга келиб ер юзида истиқомат қилаётган қарий 8 миллиард кишининг 2,3 миллиарди ёшлар, – дейди А.Абдуҳакимов. – Ўзбекистонда 30 ёшгача бўлган ўғил-қизлар мамлакат аҳолисининг 55 фоизини, яъни 18 миллион нафарини ташкил этади. Шу маънода кўпгина давлатларда экстремизм, терроризм ва радикализм каби ғоявий таҳдидларнинг ёшлар онгига салбий таъсири бошқа хавфли омилларга нисбатан бирмунча юқори. Халқаро ҳамжамият, хорижий ва минтақавий ташкилотлар томонидан жаҳон миқёсида ушбу хатарларга қарши курашиш борасида муайян ишлар олиб борилмоқда. Табиийки, айни йўналишда маълум маънода ижобий натижаларга ҳам эришилмоқда.

Видеоконференция дастуридан ўрин олган мавзулар бўйича 4 та шўъба йиғилишида халқаро экспертлар, хорижий мамлакатлар кузатувчилари терроризм, экстремизм ва радикализмга қарши самарали курашиш бўйича ўз тажрибалари билан ўртоқлашди.

Ўзбекистон мусулмонлари идораси матбуот хизмати

Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Умайя ибн Бистом айтади: «Бир аёл Юнус ибн Убайднинг олдига ёпинчиқ кўтариб келиб, «Мана шуни сотиб олинг», деди. «Қанчага сотасан?» деди у. Аёл: «Беш юзга», деди. Юнус «Бу ёпинчиқ бундан қимматроқ туради-ку?» деди. Аёл: «Унда олти юзга», деди. Юнус унинг бундан ҳам қимматроқ туришини айтди. Шу тариқа ёпинчиқнинг нархи мингга етди. Кейинроқ Юнус шундай деди: «Унга саховат қилиб, яна беш юз бердим».

Аллоҳнинг чегараси

Саллом ибн Абу Мутиъ айтади: «Юнуснинг (нафл) намозу рўзалари кўп эмас эди. Лекин Аллоҳга қасамки, агар у Аллоҳ таолонинг ҳадларига келиб қолса, албатта тўхтар эди».

«Солиҳлар гулшани» китобидан

ОЗ-ОЗ ЎРГАНИБ ДОНО БЎЛУР...

*   *   *

Заҳируддин Муҳаммад Бобур хазиналари

*   *   *

МУБАЙЯН ВА НАСРИЙ БАЁНИ

*   *   *

ИЙМОН-ЭЪТИҚОД  КИТОБИ

*   *   *

НАЗМ

Кимки дўзахқа тушса кофирдин,

Чиқмагай жовидон ўшал ердин.

Ҳар азобеки эл тасаввур этар,

Дўзахийларға ул азоб етар.

Тушса гар мўъмин жаҳаннамға,

Гунаҳича қолур ўшал ғамға.

Ё шафиъе шафоъат эткай анга,

Манзиле жаннат ичра еткай анга.

Ё Худо анга маҳз лутф этгай,

Андин ул меҳнату алам кетгай.

Кимки мўъмин борур бу оламдин,

Қутулур, билки, жовидон ғамдин.

Гунаҳича агарчи ранж етар,

Лек охир биҳишт сари кетар.

НАСРИЙ БАЁН

Дўзахнинг сифати баёни

Кофирлардан  кимки  дўзахга  тушса,  у  ердан  абадий  чиқмайди. Одамлар тасаввур қиладиган ҳар қандай азоб бўлса, дўзахийларга ўша азоб етади.

Агар мўъмин киши жаҳаннамга тушса, қилган гуноҳи миқдорича ўша ғам-азобда қолади. Ёки бир шафоъатчи зот унга шафоъат қилиб, кейин унга жаннат ичра бир манзил тегади.

Ёки Аллоҳ таъоло унга соф ва холис лутфу марҳамат қилиб, ундан у меҳнат – ғам ташвиш ва алам, азобу уқубат кетади (ва жаннатга киради).

Кимки бу оламдан мўъмин ҳолида ўтса, билгинки, у абадий ғамдан қутулади. Гарчи унга ўз гуноҳи миқдорича ранж-азоб етса ҳам, лекин охири жаннат томон боради.

ИЛОВА. Бақара сураси, 161-162-оятлари (маъноси): “Шубҳасизки, (оятларимизга ва ҳукмларимизга қарши) куфрга кетиб, кофир ҳолида ўлганлар (борки) – Аллоҳнинг, фаришталарнинг ва барча инсонларнинг лаънати ана ўшаларга бўлур. (Улар) шу (лаънатланган) ҳол ичра абадий қолурлар. Уларнинг азоблари енгиллатилмас, юзларига назар ҳам қилинмас” (“Файзул-Фурқон”).

ИЗОҲ. Мўъминларнинг охир-оқибат жаннатга киришларига далил ушбу ояти каримадир; Марям сураси, 72-оят маъноси: “Кейин муттақий бўлган (ибодат ва итоат билан гуноҳлардан сақланган) кишиларни қутқарурмиз (жаннатга киритурмиз). Золимларни эса у ерда тиз чўккан ҳолларида қолдирурмиз”.

Энг охирида дўзахдан чиқиб,

жаннатга кирадиган киши

Имом Молик, Ибн Умардан (розияллоҳу анҳумо) ривоят қилдилар: “Энг охирида (дўзахдан чиқарилиб) жаннатга кирадиган киши Жуҳайна қабиласидан Жуҳайна исмли бир кишидир. Жаннат аҳли (бир-бирларига): “Жуҳайнада энг аниқ хабар бор, ундан сўранглар-чи: “(Дўзахда гуноҳкор мўъминлардан) азоб кўраётган бирор киши қолдими?” – дейдилар. У: “Йўқ (бошқа қолмади)”, деб жавоб беради” (“Ромузул-аҳодис”, I, с.4:1; Дороқутний, Хотиб, “Таърих”).

Насрий баён ва шарҳ муаллифи:

Мирзо КЕНЖАБЕК