Аввал хабар берганимиздек, Тошкент ислом институти талабалар учун қишки таътил даври тасдиқланган ўқув режасига мувофиқ 2020 йил 28 декабрдан 2021 йил 11 январгача этиб белгилан эди.

Шу муносабат билан таътил даврида Тошкент ислом институти педагог-ўқитувчилар учун ўқув жараёнига оид меъёрий-ҳуқуқий ҳужжатлар, замонавий педагогик технологиялар ва методлар ҳамда ихтисослик фанлари бўйича ўқув семинари ташкил этилди.

Мавзуга доир: Олий маъҳадда талабалар билан қишки таътил олдидан қатор учрашувлар ўтказилди

Бугун, 28 декабрдан бошлаб, ўқув-услубий бўлим томнидан ташкил этилган Тошкент ислом институтида таълимни “Кредит-модуль тизимига ўтказиш, ўқув жараёнини рақамлаштириш ҳамда илмий салоҳиятни ошириш масалалари”га бағишланган 10 кунлик малака ошириш ўқув машғулотлари бошланди.

Семинарнинг биринчи дарсини ТИИ ректори У.Ғафуров ўтиб, мазкур ўқув машғулотларининг моҳияти, вазифалари ҳамда семинарнинг ташкилий масалалари тўғрисида маълумот берди. Ректор якунланаётган биринчи семестрдан сўнг бошланадиган навбатдаги ўқув семестрда амалга ошириши режалаштирилган ишлар, кредит-модуль тизимига ўтиш билан боғлиқ ўқув ва ташкилий масалалари ҳақида тўхталди.

Мавзуга доир: Олий таълимда кредит-модуль шакли: янги ўқув йилида талабаларни нималар кутмоқда?

Айни пайтда ўқув жараёнларида энг муҳим масалалардан ҳисобланган профессор-ўқитувчиларнинг илмий даража ва унвонларини ошириш, докторлик дессертацияларини ёқлаш, илмий тадқиқот мавзуларини кенгашларда тасдиқлатиш каби жараёнларга оид билимлар тақдим қилинди.

2020-2021 ўқув йили маълумотларига кўра, ТИИнинг “Ақоид ва фиқҳий фанлар”, “Ҳадис ва ислом тарихи”, “Таҳфизул Қуръон”, “Тиллар” ва “Ижтимоий фанлар” кафедраларида 2 та профессор, 74 та магистр, 7 та доцент, 17 та бакалавр даражасидаги ўқитувчилар фаолият юритмоқда. Рақамлардан кўриниб турибдики, институтда профессор-ўқитувчиларнинг илмий салоҳиятни ошириш борасида салмоқли ишлар амалга оширилган. Эндиликда эса, қолган ўқитувчиларнинг ҳам докторантурага кириши ёки мустақил ва эркин тадқиқотчи сифатида илмий ишларни бошлаши учун замин ҳозирланмоқда.

Мавзуга доир: Мударрисларимиз фан доктори илмий даражасига эга бўлишади

Ушбу ўқув йилида ТИИ ўқитувчиларидан Аҳмедов Сайқал, Аҳроров Ибодулла, Эркаев Маъмуржон мақсадли тарзда Ўзбекистон халқаро ислом академиясига докторантурага ўқишга кирди. Ҳасанов Улуғбек ва Мелиқўзиев Жаҳонгир эса имтиҳонлардан сўнг илмий иш қилиш учун докторлик тадқиқот ишларини бошладилар.

Таътил давомида ТИИ профессор-ўқитувчиларнинг ўқув, илмий, мутахассислик ва касбий салоҳиятини қўшимча равишда аниқлаш мақсадида IQ, ўзбек ва хорижий тиллар ҳамда информатика фанларидан тест синови ўтказилади. Институт ректор ҳар бир ўқитувчи йил давомида соҳаси ҳамда қизиқиш йўналиши бўйича китоблар мутолаа қилиши бўйича тавсиялар берди.

Ректор томонидан таътил давомида ўқитувчилар олдига ТИИ медиа марказида фанлари бўйича видеодарсликлар тайёрлаш вазифаси қўйилди. Шунингдек, ҳар бир кафедра ўқитувчилари ўз фанлари бўйича институт расмий сайтида нашр этиш учун, масалан, Ақоид, Фиқҳ, Тафсир, Сийрат, Ислом тарихи, Ҳадис ва Қуръони карим каби йўналишларда тизимли равишда илмий мақолалар бериб боришлари лозим.

Анъанавий таълим методлари ҳисобланган хатми кутуб, такрорлаш, савол-жавоб, ўқиб-таржима қилиш каби услублар бўйича илмий ишлар қилиш масаласи ҳам долзарблиги эслатиб ўтилди. Семинарда талабаларни маҳаллий фан олимпиадаларига, шунингдек халқаро Қуръон мусобақаларига тайёрлаш бўйича таклиф ва вазифалар берилди.

Дарс якунида иштирокчилар томнидан бир қатор таклифлар берилди. Илмий салоҳиятни ошириш мақсадида ўқитувчиларнинг докторлик даражасини олиш учун илмий мавзулар танлаб, муҳокамалардан ўтказишгача бўлган даврда нималарга аҳамият бериш кераклиги билан боғлиқ масалалар ҳақида маълумот олиш учун ушбу семинарда мутахассисларни жалб қилиш тавсия этилди. Мазкур семинарларга ЎзХИАдан хорижлик ўқитувчиларни жалб қилиш режалаштирилган.

Эслатиб ўтамиз, мазкур ўқув семинари 2021 йилнинг 9 январига қадар давом этади. Сайтимиз орқали ўқув курсларидаги энг муҳим мавзуларга бағишланган дарслар билан сизларни таништириб борамиз.

Бугун ўтган дарс машғулотларидан бири, “Кредит-модуль тизимига ўтиш  нима учун керак? Мақсад, моҳият ва афзалликлари” тўғрисида навбатдаги мақоламизда маълумот берамиз.

ТИИ Матбуот хизмати

Шу йил 25-30 декабрь кунлари мамлакатимиздаги 2079 та масжидда хайрия тадбирлари ўтказилади ва хуфтон намозидан сўнг Каломуллоҳ хатм қилинади.

Ушбу кунларда Аллоҳ Каломи 12 480 маротаба хатм қилинади. Шунингдек, иқтидорли имомлар Имом Бухорийнинг “Саҳиҳ”ини ҳам хатм қилишади.

Хайрия тадбирларини ўтказишдан аҳолининг кам таъминланган, ёрдамга муҳтож қатламини моддий қўллаб-қувватлаш мақсад қилинган. Шу муносабат билан қурбонлик маросимлари ташкил этилади.

Ўзбекистон мусулмонлари идораси ҳузуридаги “Вақф” хайрия жамоат фонди ҳар бир маҳаллада муҳтож оилаларга озиқ-овқат маҳсулотлари тўплами тарқатади. Бундан ташқари, жойлардаги “Меҳрибонлик”, “Саховат” ва “Мурувват” уйларида ош дастурхонлари ёзилиб, маиший техника воситалари тарқатилади.

Ўзбекистон мусулмонлари идораси матбуот хизмати

ОЗ-ОЗ ЎРГАНИБ

ДОНО БЎЛУР...

*   *   *

Заҳируддин Муҳаммад Бобур

хазиналари

*   *   *

МУБАЙЯН ВА

НАСРИЙ БАЁНИ

*   *   *

ИЙМОН-ЭЪТИҚОД  КИТОБИ

*   *   *

НАЗМ

Ҳар неким Тенгридин кетурса Расул,

Ҳар кишиким аларни қилса қабул,

Ул киши аҳли қибладур, билингиз,

Они кофир демакни бас қилингиз.

Гарчи кўб зулму кўб хато қилса,

Мубтадиъ бўлса, юз ҳаво қилса,

Ҳукм қилманг анинг шақоватиға,

Дўзахийлиғ битимангиз отиға.

Гар киши бўлса солиҳу обид,

Туну кун бўлса қойиму сожид,

Амрлар тарк қилмаса ҳаргиз,

Наҳйлар зоҳир этмаса ҳаргиз,

Ҳукм қилманг ани саъодатлиғ,

Демангиз ани жазм жаннатлиғ.

Магар ул ўнки, дўстдори Илоҳ,

Жаннатликларига бўлди гувоҳ.

Яна жамъени Ҳазрат олидин,

Бил мубашшар Набий мақолидин.

НАСРИЙ БАЁН

 Аҳли қиблани куфрда айбламоқ

жоиз эрмаслиги ҳақида

Ҳазрати Расулуллоҳ (алайҳссалом) Аллоҳ таъолодан нимаики келтирган бўлсалар, ҳар кишики уларни қабул қилса (яъни, иймон келтирса), билингки, у киши аҳли қибладир, уни кофир дейишни бас қилинг.

ИЗОҲ.  Демак,  бу  маънога  кўра,  эътиқоди  бузуқ  бўла  туриб, қиблага қарайдиган ҳар қандай кимса аҳли қибла эмас, балки ҳазрати Пайғамбар алайҳиссалом Аллоҳдан келтирган ҳамма нарсани чин иймон билан қабул қилган, аҳли суннат вал-жамоат йўлида бўлган киши аҳли қибладир.

(Насрий баён.) Гарчи кўп зулму кўп хато қилса ҳам, бидъатчи – ҳаддан ошувчи бўлса, юз кибру ҳаво қилса ҳам, уни шақоватга – бадбахтликка  (яъни  куфрга)  ҳукм  қилманг,  унинг  номини  дўзахий деб атаманг.

Агар  бир  киши  солиҳ  ва  обид  –  яхши  ва  ибодатли  бўлса, кечаю кундуз намозларда туриб, саждалар қилувчи бўлса, ҳаргиз  Аллоҳнинг  амрларини  (намоз,  рўза  ва  бошқа  амалларни) тарк этмаса, ҳаргиз манъ этилган ишларни содир қилмаса, уни ҳам (охиратда) саъодатли деб ҳукм қилманг ва қатъий жаннатлик деб айтманг.

Фақатгина Аллоҳнинг ҳабиби – севикли бандаси (ва Пайғамбари ҳазрати Муҳаммад алайҳиссалом) жаннатий деб гувоҳ бўлган (яъни, башорат берган) ўнта зот (ашараи мубашшара) қатъиян жаннатий деб айтилади (ва эътиқод қилинади).

Яна ул Ҳазрат (Пайғамбар алайҳиссалом)нинг хонадонларидан иборат жамоатни ҳам ҳазрати Пайғамбар алайҳиссаломнинг сўзлари билан жаннатий дея башорат берилган, деб билгин.

ИЗОҲ. Ашараи мубашшара, яъни жаннатий деб башорат қилинган ўнта зот қуйидагилардир: 1. Ҳазрати Абу Бакр Сиддиқ. 2. Ҳазрати Умар-ул-Форуқ. 3. Ҳазрати Усмон Зиннурайн. 4. Ҳазрати Алиййул-Муртазо. 5. Ҳазрати Талҳа. 6. Ҳазрати Зубайр ибн Аввом. 7. Ҳазрати Саъд ибн Абу Ваққос. 8. Ҳазрати Саъид ибн Зайд. 9. Ҳазрати Абдурраҳмон ибн Авф. 10. Ҳазрати Абу Убайда ибн Жарроҳ (розияллоҳу анҳум).

Аҳли байтларидан жаннатий бўладиган жамоат эса қуйидаги зотлардир: ҳазрати Ҳадича онамиз, ҳазрати Оиша онамиз, ҳазрати Фотима, ҳазрати Ҳасан, ҳазрати Ҳусайн, жаноб Расулуллоҳ алайҳиссаломнинг бошқа жуфти ҳалолллари (розияллоҳу анҳунна).

Насрий баён ва шарҳ муаллифи:

            Мирзо КЕНЖАБЕК

Саховат ва мурувватга йўғрилган тадбирлар халқимиз, юртдошларимизнинг ҳамжиҳатлигини янада мустаҳкамлаб, эртанги кунга ишончини оширмоқда.
Саховат тадбирлари Наманган шаҳридаги 70 нафар ўғил-қизлар тарбияланадиган 26-сонли Меҳрибонлик уйида ўтказилди. Муассасага “Вақф” хайрия жамоат фондининг телевизор, маиший техника воситаларидан иборат совғалари топширилиб, эҳсон дастурхони ташкил этилди. Тадбирда вилоят ҳокими Ш.Абдуразақов ва сектор раҳбари иштирок этдилар.
Ҳудди шундай тадбирлар Наманган шаҳридаги “Саховат” уйи ҳамда 300 нафар ногиронлиги бўлган фуқаролар истиқомат қиладиган Поп туманидаги “Мурувват” эркаклар уйида ҳам ўтказилди. Ушбу масканларга ҳам фонднинг совғалари топширилиб, эҳсон дастурхонлари солинди.
Айтиш мумкинки, бугун юртимизда муҳтарам Президентимиз ташаббуслари билан олиб борилаётган ислоҳотлар кўлами ниҳоятда кенг. Уларнинг самараси туфайли оддий одамларнинг ҳаётдан розилик даражаси ортиб бормоқда. Зеро, эртанги кунга ишонч, фидойилик, меҳр-мурувват, аҳиллик ва меҳнат – буюк мақсадларга етишнинг ягона, бирдан-бир йўлидир.

Наманган вилояти вакиллиги Матбуот хизмати