Кеча, 25 февраль куни маҳаллий вақт билан 20:40 да Ақтўбе вилоятининг Хромтау туманидаги Жариқ посёлкаси яқинида “Самара – Чимкент” трассасида йўловчи автобуси иштирокида йўл-транспорт ҳодисаси содир бўлди.
ЙТҲ оқибатида ўзбекистонлик 7 фуқаро жароҳатланган. Бу ҳақда “Казинформ” ахборот агентлиги хабар берди.
Қозоғистонлик 35 ёшли “Мерседес” автобуси ҳайдовчиси Ақтўбе шаҳридан Хромтау шаҳри томон ҳаракатлана туриб, бошқарувни йўқотиб қўйган. Натижада 25 кишидан иборат йўловчи бўлган автобус йўл чеккасига чиқиб кетган.
“Автобус йўловчиларининг 7 нафари – Ўзбекистон Республикаси фуқаролари – турли жароҳатлар билан Хромтау шаҳридаги туман марказий шифохонасига ётқизилган. Улар катта бўлмаган жароҳат ва синишлар олган. Жабрланганлар ҳамон шифохонада”, дея хабар берган вилоят ички ишлар матбуот хизмати раҳбари Ерболат Саркулов.
ЎМИ Матбуот хизмати
