Жорий йилнинг октябрь ойида Ўзбекистон Республикаси Президенти Шавкат Мирзиёевнинг ташаббуслари ва раҳнамоликларида бир неча йиллардан буён ота-оналарининг хатолари туфайли ўзга юртларда сарсон-саргардонликда яшаган ўзбекистонлик болалар "Меҳр-2" инсонпарварлик операцияси натижасида юртимизга қайтарилди. Улар учун давлатимиз томонидан барча шарт-шароитлар имкониятлар яратилмоқда.
Ўзбекистон мусулмонлари идораси раиси, муфтий Усмонхон Алимов ҳазратлари, "Вақф" хайрия жамоат фонди раҳбари Искандар Халилов, Вазирлар Маҳкамаси ҳузуридаги Дин ишлари бўйича қўмита раҳбари Абдуғофур Ахмедов ҳамда бошқа мутасадди ташкилот ва идоралар вакилларидан иборат гуруҳ Сурхондарё вилоятининг Бойсун ва Денов туманларида истиқомат қилаётган, Суриядан қайтарилган болаларнинг яшаш манзилларига ташриф буюрдилар. Уларнинг ташрифи катта шодиёнага айланиб кетди. Болаларни ўз тарбиясига олган боболари ва яқин қариндошлари, болаларнинг ҳаёт тарзи, яшаш шароитлари билан танишиш билан бирга болажонларга совға-саломлар етказилди.
Шундай хайрли ишларнинг мантиқий давоми сифатида "Вақф" хайрия жамоат фонди томонидан ватанга қайтарилган болалар ҳолидан хабар олиш мақсадида хайрия тадбири ўтказилди. Болажонларга хайрияпарвар ҳомийларимиз томонидан тақдим этилган китоблар, ўйинчоқлар, озиқ-овқат маҳсулотлари улашилди.
Ўзбекистон мусулмонлари идораси Матбуот хизмати
