Ўзбекистон Президенти сайлов жараёнини ёритиш учун юртимизга келган Франциянинг «Musulmans en France» онлайн-нашри бош муҳаррири Жан-Мишель Брун Ўзбекистон Ислом цивилизацияси марказида бўлиб, мажмуда амалга оширилаётган ишлар билан танишди, деб хабар бермоқда «Дунё» АА мухбири.
Меҳмонларга марказ Ўзбекистон Президенти Шавкат Мирзиёев ташаббуси ва ғояси асосида қад ростлаётгани ҳақида сўзлаб берилди. Ислом цивилизацияси марказининг қурилиш тарихи, бўлимлари, ташкилий тузилмаси, асосий мақсад ва вазифалари, аждодларнинг бой илмий меъросини сақлаш ва ёшларга етказиш борасидаги ишлар ҳақида батафсил тақдимот ўказилди.
Жан-Мишель Брун қабул ва тақдимот учун миннатдорлик билдириб, бу муҳташам марказни, унинг олдига қўйилаётган улкан ва эзгу ғояларни бутун дунёда, жумладан Францияда ҳам кенг ёйиш заруриятини айтиб ўтди. Франциялик меҳмон, шунингдек, марказнинг ички қурилиши, Беруний глобуси, Улуғбек обсерваторияси, Донишмандлар уйи каби экспонатлар билан танишди.
Мулоқот давомида Францияда Ўзбекистон зиёрат туризмини кенг тарғиб қилиш, Ислом цивилизацияси маркази фаолияти ҳақида туркум мақолалар, фоторепортажлар тайёрлаш ва эълон қилиш бўйича ҳамкорлик алоқаларини йўлга қўйиш юзасидан келишиб олинди.

Ўзбекистон мусулмонлари идораси Матбуот хизмати