Қорақалпоғистон Республикасининг энг чекка ҳудудларидан бири бўлган, Нукус шаҳридан 450 км узоқликда жойлашган Қўнғирот туманидаги «Қорақалпоғистон» қишлоқ фуқаролари йиғинида “Бердақ бобо” жоме масжиди давлат рўйхатидан ўтказилиб, ўз фаолиятини бошлади.

29 декабрь куни мазкур масжидининг очилиш маросими бўлиб ўтди. Маросимда Қорақалпоғистон мусулмонлари қозиёти қозиси Шамсиддин домла Бауатдинов, Қорақалпоғистон Республикаси Вазирлар Кенгаши Раиси ўринбосари Р.Сапарбаев, Қорақалпоғистон Республикаси Адлия вазирлиги бўлим бошлиғи А.Отеўлиев, имом-хатиблар ва маҳалла фуқаролари иштирок этди.

Қишлоқ аҳолисининг интилишлари ва ҳаракатлари натижасида маҳаллий ҳомийлар, аҳолининг яқиндан берган кўмаги билан барча қўлайликларга эга масжид бунёд этилди ва масжидга қорақалпоқ халқининг классик шоири Бердақ шоирнинг номи берилди.

Мазкур ҳудуд аҳолисининг қувончлари чексиз, шундай масжид қурилишига сабабчи бўлганлардан рози. Эслатиб ўтамиз «Бердақ бобо» жоме масжиди Қорақалпоғистондаги 61-масжид, 60-масжид «Рахматуллаҳ мақсым» Чимбой туманида, 59-масжид «Сафар ота» Шўманай туманида очилган эди.

Ўзбекистон мусулмонлари идораси матбуот хизмати