Ўзбекистон Республикаси Президенти Ш.Мирзиёевнинг 2018 йил 5 январь куни Тошкент вилояти қилган ташрифида Зангиота зиёратгоҳида бўлиб, у ерда ўтган улуғларимиз, буюк алломаларимиз ёд этилди,  уларнинг ҳаққига Қуръон тиловат қилинди.

Мазкур ташриф давомида Юртбошимиз “Аждодларимиз, ота-оналаримиз, умуман олганда ўтганларимизга ҳурмат бажо келтириш, уларнинг қабрларини обод қилиш ҳар биримизнинг вазифамиздир” деб таъкидлаб ўтдилар.

Юртимиздаги бошқа зиёратгоҳларда ҳам ушбу мажмуа каби обод қилиш, одамларнинг келиб кетиши учун зарур шароитлар яратиш борасида ўз фикрларини билдирди. Бундай хайрли ишлар каттаю-кичик, хусусан ёшларнинг тарбиясида улкан аҳамиятга эга эканлиги алоҳида таъкидланди.

Президентимиз чақириқларидан руҳланган Имом Бухорий номидаги Тошкент ислом институти устоз ва талабалари жорий йилнинг 20-21 январь кунлари нинг ташаббуси билан “Аждодларимиз қабрларини обод қилиш ҳар биримизнинг вазифамиз” шиори остида муқаддас қадамжолар ва қабристонларда хайрия ҳашари ташкил этилди.

 Хайрия ҳашари доирасида институт Тошкент шаҳридаги Қаффол Шоший, Шайх Зайниддин, Чимир ота мақбаралари ҳамда “Тешикқопқа”, “Ғойиб ота”, “Чиғатой дарвоза”, “Шайх Зайниддин”, “Бешқўрғон”, “Чимир ота” қабристонларида ободонлаштириш ва тозалов ишлари амалга оширилди.

Аввало ҳар бир қабристонда зиёрат одобларига биноан мазкур масканларда дафн этилган буюк аждодларимиз  Қаффол Шоший, Шайх Зайниддин, Алихонтўра Соғуний, Ўзбекистон мусулмонлари идораси асосчилари ва муфтийлари Эшон Бобохон ибн Абдулмажидхон, Зиёвуддин ибн Эшон Бобохон, Шамсиддинхон Бобохонов, Шайх Муҳаммад Содиқ Муҳаммад Юсуф, Абдурашид қори Баҳромов, устозлар Ғуломқодир домла Мирзаёқубов, Салоҳиддин домла Муҳиддинов, Абдулазиз қори, Собиржон қори, Одилжон қори, Сайиднаби домла, Раҳматхўжа домла ва бошқа мўмин-мусулмонларга бағишлаб Қуръон тиловат қилинди, сўнгра ободонлаштириш ишларига киришдилар.

Зеро, улуғ зотларнинг қабрларини зиёрат қилаётган киши уларнинг қилиб ўтган улуғ ишларини, қолдирган буюк маънавий меросларини эслаб, ибрат олади ва ўша зотлар каби яшашга интилади. Имом Аҳмад ривоят қилган ҳадисда Расулуллоҳ (с.а.в.): “Қабрларни зиёрат қилинглар. Чунки бунда сизлар учун ибрат бордир”деганлар.

Қабристонни зиёрат қилиш инсонга дунё ташвишларини унутишга ёрдам беради. Имом Байҳақий ривоят қилган ҳадисда Расулуллоҳ (с.а.в.):

“Мен сизларни қабрларни зиёрат қилишдан қайтарган эдим. Кейин менга маълум бўлди (яъни, Аллоҳ томонидан буюрилди). Энди қабрларни зиёрат қилаверинглар. Чунки у қалбни юмшатади, кўзни ёшлатади ва охиратни эслатади” деганлар.

Қалби қаттиқ кишининг кўзига ёш келмайди. Бундай киши бошқаларга меҳр-шафқат кўрсатмайди. Демак, қабр зиёрати инсонлар ўртасида ўзаро меҳр-мурувватни кучайтирувчи воситадир.

Қабрларни зиёрат қилиш орқали зиёратчи мазкур фазилатлардан баҳраманд бўлса, маййитлар зиёратчиларнинг дуо ва истиғфорлари ҳамда тиловатлари савобидан баҳраманд бўладилар.

Демак, ота-оналар, ёр-биродарлар ҳамда улуғ зотларнинг қабрларини юқорида айтилган фазилатларга эришиш ва уларнинг руҳларини шод этиш мақсадида зиёрат қилинади.

 Халқимизда: “Бозоринг билан мозорингни обод тут” деган ажойиб бир мақол бор. Шундай экан эзгу амаллар аввало қабрларни обод қилишдан бошланади. Рамазон ва Қурбон ҳайитлари арафасида, 9 май “Хотира ва қадрлаш куни” муносабати билан юртимизнинг барча жойларида ободончилик ишлари, айниқса қабристонларимизни янада обод қилиш борасида қизғин ишлар қилиниши мустақиллик йилларида хайрли анъанага айланди.

Ўзбек халқи бу соҳада дунёга ўрнак бўлиб келаётган миллат десак муболаға бўлмайди. Айниқса мархумларни руҳини шод қилиб, улар ётган қабрларни обод қилиш борасида қолган халқлар биздан ўрнак олса арзийди.

Аммо афсуски, халқимиз орасида ота-онаси тирик бўла туриб, уларни қадрламаётганлар, вафот этган бўлса, уларни қабрини зиёрат қилиб, ҳақларига тиловати Қуръон қилмаётганлар ҳам учраб турибди. Зеро, ҳеч ким бу ҳаётда абадий қолмайди, ҳамма ҳам бир кун вафот этиб, борадиган жойи қабристон бўлади.

 Қабрларнинг усти ва атрофида гул ва майсалар чиройли бўлиб, ўсиб туриши гўёки марҳумлар ҳаққига истиғфор ва саловат айтиб тургандек бўлар экан.

Дарҳақиқат ислом дини мана шундай хайрли ишларга чақиради.

Маънавият-маърифат ва иқтидорли

талабалар билан ишлаш бўлими бошлиғи Ў.Собиров

Манба: http://islaminstitut.uz

Қозоғистоннинг Ақтўбе вилоятидаги фожиада юртдошларимиз ҳалок бўлгани муносабати билан хорижий мусулмонлари идоралари раҳбарлари, муфтийлар номидан Ўзбекистон мусулмонлари идораси номига ҳамдардлик мактублари келмоқда. Уларнинг айримларини эътиборингизга ҳавола этамиз.

Муҳтарам Ўзбекистон мусулмонлари идораси раиси,

муфтий Усмонхон Алимов ҳазратлари!

Меҳрибон ва Раҳмли Аллоҳ номи билан бошлайман,

2018 йил 18 январь куни Қозоғистонда йўловчи автобусининг ёниб кетиши оқибатида кўплаб мусулмон қардошларимиз вафот этганидан чуқур қайғу билан хабар топдим. Ҳазрати олийларининг ҳамда дўст ва қардош ўзбек халқининг ушбу буюк қайғусига турк миллати, айниқса Туркия Диёнат Бошқармаси жамоаси ўлароқ чин қалбдан шерикмиз.

Жаноби Ҳақ ҳеч бир ўлкага ва миллат халқининг бошига бундай оғир мусибат солмасин ва чуқур қайғу-аламли ҳодисаларни кўрсатмасин. Жаноби Ҳақдан юртларимизни самовий ва арозий бало-офатлардан Ўз ҳифзу ҳимоясида асрашини сўраб қоламан.

Ушбу муносабат билан турк халқи, ўз шахсим ва жамоа аъзоларим номидан Сиз ҳазрати олийлари орқали дўст ва қардош ўзбек халқига чуқур қайғуларим билан биргаликда таъзияларимни билдириб қоламан.

Ушбу қайғули офат оқибатида вафот этиб раҳмати раҳмонга эришганларга, Жаноби Ҳақдан раҳматлар, мусибатли хонадон аҳлларига ва барча яқинларига сабру жамийл тилаб қоламан.

Энг самимий қалб саломлари ва камоли эҳтиром ила,

Профессор, доктор Али ЭРБОШ

Туркия Диёнат ишлари Бошқармаси раиси

Ўзбекистон мусулмонлари идораси раиси,

муфтий Усмонхон Алимов ҳазратларига,

Ҳурмали Усмонхон ҳожи,

Қозоғистоннинг Оқтўба вилоятида рўй берган фожиали ҳодисада қурбон бўлган ўзбекистонликлар оиласига ва Сизга Қирғиз халқи ва ўз номимдан чуқур таъзиямни билдираман.

Аллоҳ таоло марҳумларни ўз раҳматига олсин ва уларнинг оила аъзоларига сабр берсин. Мазкур ҳодиса туфайли жабрланган ўзбекистонлик қардошларимизга Аллоҳ таоло шифои комил ато қилишини, тез орада соғайиб кетишларини жамоамиз билан Аллоҳ таолога дуолар қиламиз.

Бу мусибатни қирғиз халқи ҳамма мусулмонлар учун бирдек мусибат деб қаьул қилади.

Камоли эҳтиром билан,

Махсатбек ҳожи Тохтамишев,

Қирғизистон мусулмонлари идораси раиси, муфтий

Ҳамдардлик мактублари келишда давом этмоқда.

Ўзбекистон мусулмонлари идораси Матбуот хизмати

Довруғи оламга достон кўҳна Бухоро, қанчадан-қанча олиму уламолар, фозилу фузалолар, қорию қурроларни тарбиялаб, дунёга тақдим этган замин экани, инкор этилмас ҳақиқат.
Айниқса, ислом оламига машҳур ва маълум “Мир Араб” мадрасаси ва унда таълим олган толиби илмлар томонидан, бугунги кунда ислом таълимоти ва Қуръони карим зиёси дунёнинг турли мамлакатларида таратилмоқда.
Жорий йилнинг 20 январь кунидан бошлаб ушбу вилоятнинг бир неча туманларида мусобақанинг ҳудудий босқичлари бошланади. Сиз азизлар билан тўрт кун давомида Жиззах, Сирдаё ва Самарқанд вилоятларида хушовоз қорилар тиловатини тинглаб, роҳатландик.
Ўлкамизнинг ҳар бир ҳудудида ана шундай қориларнинг ўзига хос савти, оҳанги бор, албатта. Бухоро қорилари ҳам ўзларининг маҳоратлари билан жуда ҳам машҳур.
Эртага Бухоро туманидаги “Чаҳор Бакр” ва «Абдулходиқ Ғиждувоний» жомеларида Бухоро вилоятидаги Қуръон мусобақасининг ҳудудий босқичига оқ фотиҳа берилади. Ҳозирда тайёргарликлар жуда авжида, мусобақа muslim.uz сайти ва ижтимоий тармоқ саҳифаларида онлайн узатиб борилади.
Қуръонни қалбга жо айлаш, Каломуллоҳни яхши кўриш инсонни икки дунё саодатига етиштиради. Шундай экан, барча Қуръон ихлосмандларини эртага азим Бухорога таклиф этамиз, Қуръоний зиёфатга марҳабо, азизлар!

Ўзбекистон мусулмонлари идораси
Матбуот хизмати

Оламлар Раббиси, Аллоҳга ҳамду санолар бўлсин. Махлуқотларининг энг яхшиси Муҳаммад мустафо (соллаллоҳу алайҳи васаллам)га салавоту саломлар бўлсин. Аллоҳ таоло Набий (соллаллоҳу алайҳи васаллам)ни ҳақни инкор қилувчиларга ҳужжат, нубувват эшигининг хотимаси қилиб юборди. У зотнинг улуғ аҳлига, буюк саҳобийларига ҳамда тўғри йўл имомлари бўлмиш, хусусан, «Илм юлдузларда бўлса ҳам, албатта, форс ўғлонларидан чиққан кишилар уни олади», дея башорати берилган Абу Ҳанифа (раҳматуллоҳи алайҳ)га саломлар бўлсин.

Миллат барқарорлигини таьминлашда оила, ота-она ва фарзандлар  жамиятнинг асосий бўғини хисобланади. Мустақиллик йилларида биринчи Президентимиз ташаббуслари билан оилаларни мустаҳкамлаш, вояга етган ёш авлодни таьлим-тарбияси масалалари борасида давлат, жамият миқёсида кўплаб тадбирлар амалга оширилди.

Жамиятнинг ҳаётий фаолиятида оила институти улкан аҳамиятга эга экан, диний манбалар асосида унинг мустаҳкам омилларини аниқлаш, барқарорлигини таъминлаш,  уларнинг амал қилиш хусусиятлари бўйича илмий хулосалар ишлаб чиқиш муҳим аҳамият касб этади. Шу боис, оила мустаҳкамлигини сақлаб, унинг муқаддаслигини келажак авлод руҳига сингдириш бугунги куннинг долзарб вазифаларидан биридир.  Мамлакатимизда амалга оширилаётган бу каби ишларнинг барчаси халқимиз учун кўплаб манфаатлар хосил қилганлиги билан тарихнинг ўчмас саҳифаларида муҳрланиб қолди. Яхшилик қилиш ва фойда келтириб яшаш мўмин кишининг асосий сифатларидан биридир. Инсонларга манфаат етказишда Пайғамбаримиз (соллаллоҳу алайҳи васаллам) барчамизга ибрат ва намуна бўлганлар. У зот (соллаллоҳу алайҳи васаллам) ҳали  Пайғамбар  бўлмасларидан олдин ҳам муҳтожларга ёрдам берар, етимларнинг бошларини силар, чорасиз-бечораларни қўллаб қувватлар эдилар.

Муқаддас динимизда кишининг умумхалқ манфаати учун қилган барча амаллари энг савобли ишлардан саналади. Агар бу қилган ишлари унинг вафотидан кейин ҳам жамиятга манфаат ва фойда етказадиган бўлса, у ҳолда бу ишнинг савоби марҳумнинг номаи аъмолига ёзилишда давом этаверади дея марҳамат қилдилар.

Муҳтарам Президентимиз Шавкат Мирзиёев бошчилигида халқимизнинг яшаш шароитлари тубдан яхшиланган, янгидан-янги қулайликларнинг барпо этилганлиги ҳамда кўпгина соҳаларни тубдан ислоҳ қилинганлиги барчамизни бирдек қувонтирди. “Халқ билан мулоқот ва инсон манфаатлари йили”да  “Инсон манфаатлари ҳамма нарсадан улуғ”, деган олий ғоя устуворлик касб этиб, давлат ҳокимияти бошқарувида мутлақо янги тизим – Ўзбекистон Республикаси Президентининг Виртуал қабулхонаси, “Халқ қабулхона”лари ташкил этилди. Бу эса аҳолининг долзарб муаммоларини ҳал этишнинг самарали тизими бўлиб хизмат қилмоқда.

2018 йилни “Фаол тадбиркорлик, инновацион ғоялар ва технологияларни қўллаб-қувватлаш” йили деб номланиши ҳам инсон манфаатларининг жамиятимиз ҳаётининг барча соҳаларидаги ислоҳотларни ҳаракатга келтирувчи кучга айлантиради, иншааллоҳ. Чунки тадбиркорлик хусусида баҳс кетаркан, албатта, бунда бизга биринчи ўринда ўтган барча пайғамбарлар, салафи солиҳлар, буюк аждодларимиз кўз ўнгимизда намоён бўлади. Ўтган пайғамбарларнинг (алайҳиссалом) Бану Одам ичида олиб борган фаолиятларидан бири кишиларни амалга ва касб қилишга ундашдан иборат бўлган. Жумладан, анбиёларнинг афзали ва охиргиси Муҳаммад (соллаллоҳу алайҳи васаллам) ўзларининг муборак ҳадиси шарифларининг бирида қуйидагича марҳамат қиладилар: “Кишининг энг афзал меҳнати унинг қўл меҳнатидир. Агар ихлос қилса”, деганлар. Шу билан бирга, Ҳаким Термизий (раҳматуллоҳи алайҳ) ўз асарларида бу борада ривоят қилинган хадиси шарифлар ва саҳобаларнинг (розиялоҳу анҳу) қиссаларини келтиради.

Аҳли сунна вал жамоа мазхаби ақидасига кўра, Аллоҳ ризқларни Лавҳул маҳфузда Ўзи ирода қилган кайфиятда ва Ўзи ирода қилган вақтда собит қилгандир, дейилади.

Ҳаким Термизий (раҳматуллоҳи алайҳ) ризқ талабини тарк қилишга ҳужжат йўқлигини алоҳида таъкидлайди. Олим нотўғри фикр юритиб, “Ризқ ўз-ўзидан келаверади” деган фикр билан ризқ талаб қилмасдан, ўтириб олганларни туришга, ризқ талаб қилишга чорлаб, қуйидагиларни айтади: “Агар улар ўтирган бўлсалар, туришлари ва талаб қилишлари лозим. Ана шундагина тамадан, қалбнинг бузилишидан сақланади ва нафснинг фитнасидан ҳимояланадилар. Муҳтожлик уларни шубҳали нарсани олишга ва бойларга лаганбардорлик қилишга олиб бормайди”.

Ҳаким Термизий (раҳматуллоҳи алайҳ)нинг фикрича, ҳалол ризқ талаб қилиш ҳар қандай нафл ибодатдан афзалдир, деганлар.

Охир замон пайғамбари Муҳаммад (соллаллоҳу алайҳи васаллам) эса  чўпонлик ва савдогарлик қилганлар. Демак, ҳар бир кишига халолдан ризқ талаб қилиш ва зурриётларига ҳалол луқма едириш фарз экан.

Ҳозирги кунда муҳтарам Президентимиз ушбу янги йилни “Фаол тадбиркорлик, инновацион ғоялар ва технологияларни қўллаб-қувватлаш” йили деб номлашлари ҳам барчани ҳалол ризқ топишга тарғиб қилишдан бошқа нарса эмасдир. Биз инсонлар бундай имкониятдан тўғри фойдаланишимиз, юртимиз ободончилиги, халқимиз бойлиги ҳамда жамиятимиз барқарорлигига ўзимизнинг муносиб ҳиссамизни қўшмоқлигимиз лозимдир.

Пошшохон ЭШОНХОН қизи

Хадичаи кубро аёл-қизлар

ислом билим   юрти мударрисаси

ЎМИ Матбуот хизмати

АҚШда анъанага кўра, юқори лавозимга тайинланадиганлар муқаддас китоб билан қасам ичишади. Яқинда Қўшма штатларга Таълим вазири этиб тайинланган Атиф Карни ўз вазифасини бошлашдан олдин Қуръони карим билан қасам ичди. Бундай маълумотлар ва видео тасвирлар ижтимоий тармоқларда тарқалиб кетди деб хабар беради www.islamnews.ru веб портали.

Америка тарихида биринчи марта вазир Қуръони карим билан қасамёд қилди. “Ричмонд таймс” газетасининг маълумотига кўра, Карни демократ, харбий денгиз пиёда қўшинида хизмат қилган, сўнги пайтларда эса математика ўқитувчиси бўлиб ишлаган. Эслатиб ўтамиз, 2006 йил Миннесота штатидан Кит Эллисон АҚШ Вакиллар Палатасига сайланиб, биринчилардан бўлиб АҚШ асосчиларидан бири бўлган АҚШ президенти Томас Джефферсонга тегишли Қуръон билан қасам ичган эди.

Алишер Саттаров

тайёрлади

ЎМИ Матбуот хизмати