Яратганга шукрки, бугунга келиб юртимизда фаолият кўрсатаётган масжидлар сони икки мингдан ошиб кетди. Аҳоли гавжум яшаётган жойларда янги масжидлар қурилиши давом этаётир, таъмир талаблари эса замонавий андозалар асосида таъмирланиб, чиройли ҳолатга келтирилмоқда. Намозхонлар эса бундай кўркам ва шинам масжидларда ибодатларини роҳатланиб адо этаётганидан мамнун.

Ана шундай савобли ишларни давом эттириш йўлида бугун Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Ортиқбек Юсупов жойлардаги масжидлар ҳолатини яхшилаш, имом-хатиблар фаолиятини жадаллаштириш, мўмин-мусулмонларимизнинг талаб ва истакларини таъминлаш мақсадида Хоразм вилоятига ташриф буюрдилар. Қатор ислоҳот ва бунёдкорлик ишлари қизғин давом этаётган бир паллада бу ташрифдан мамнун бўлган хоразмликлар, вилоят уламолари, имом-хатиблар ва мўмин-мусулмонлар нуфузли меҳмонларни беҳад ҳурмат-эҳтиром билан кутиб олдилар.

Меҳмонлар дастлаб, Урганч шаҳридаги “Охун бобо” жоме масжиди қурилиши жараёни билан танишдилар. Ушбу масжидга 28 январь куни муҳтарам Президентимиз тамал тошини қўйган эдилар. Жума намозини шу ерда адо қилиб, намозхонлар билан яқиндан мулоқотда бўлдилар, уста ва қурувчи муҳандисларнинг меҳнатларига таҳсинлар айтдилар.

Ҳақиқатан, бундай эзгу ишга ҳисса қўшиш истагида бўлган бунёдкорлар ўз маҳоратларини ишга солиб, бор куч-ғайрати билан меҳнат қилмоқда. Зеро, масжид қуриш, уни обод қилишнинг савоби улуғ экани динимиз манбаларида баён қилинган. Пайғамбаримиз (соллаллоҳу алайҳи ва саллам) бундай марҳамат қилганлар: “Ким Аллоҳнинг розилигини истаб масжид қурса, Аллоҳ унга жаннатда қаср барпо қилади” (Имом Бухорий ривояти). 

Муфтий ҳазратлари бу каби хайрли ишлар ҳукуматимиз раҳбариятининг диний қадриятларга бўлган улкан эътиборининг натижаси эканини таъкидладилар. Зеро, бу борада ояти каримада ҳам қуйидагича таъкидланган: “Аллоҳнинг масжидларини фақат Аллоҳга ва охират кунига имон келтирган, намозни баркамол ўқиган, закот берган ва фақат Аллоҳдангина қўрққан кишилар обод қилурлар. Айнан ўшалар ҳидоят топувчилардан бўлишлари мумкин” (Тавба, 18).

Ушбу ояти каримадан ҳам масжидларни обод қилиш, уларни таъмирлаш юксак имон ва мустаҳкам эътиқод намойиши экани маълум бўлади.

Муфтий ҳазратлари ва Ортиқбек Юсупов жаноблари Урганч шаҳридаги “Имом Фахриддин ар-Розий” ислом ўрта махсус билим юртида ҳам бўлиб, талабларнинг ўқув жараёни ва ётоқхонадаги шароитлар билан танишдилар. Билим юртидаги шарт-шароитларни янада яхшилаш борасидаги таклиф ва мулоҳазаларини билдирдилар.

Шунингдек, Хива шаҳридаги “Паҳлавон Маҳмуд” қадамжосини зиёрат қилиб, зиёратгоҳ фаолияти билан яқиндан танишдилар.

Ўзбекистон мусулмонлари идораси

Матбуот хизмати

Албатта, Аллоҳнинг тавба қабул қилиши фақат ёмонлик (гуноҳ)ни билмасдан қилиб қўйиб, сўнгра тезлик билан тавба қилганлар учун (муқаррар)дир. Аллоҳ айнан ўшаларнинг тавбасини қабул қилур. Аллоҳ билгувчи ҳаким зотдир (Нисо, 17).

Мазкур оят мазмунидан гуноҳ қилган барча одамлар тавба қилса тавбаси қабул бўлиши тушунилади. Уламолар ҳар бир мўминга тавба қилиш фарз, деб ижмо қилганлар. Чунки Қуръони каримда бундай марҳамат қилинади: “Барчангиз Аллоҳга тавба қилингиз, эй мўминлар! Шояд, (шунда) нажот топсангиз” (Нур, 31).

Имом Мужоҳид (раҳматуллоҳи алайҳ) айтади: “Ким адашиб ёки қасддан Аллоҳга осий бўлса, гуноҳидан тийилмагунча жоҳил ҳисобланади”.

Банда тавба қилса, Аллоҳ таоло хоҳласа уни қабул қилади, хосламаса, қабул қилмайди. Банданинг тавбасини қабул қилиш Аллоҳ таолога вожиб эмас. Чунки Ҳақ таоло бутун махлуқотларни яратувчиси ва уларнинг моликидир. Шунинг учун, бирор нарсани Аллоҳ таолога вожиб бўлар,дейиш тўғри бўлмайди бироқ, Аллоҳ таоло, ваъдасини бажарадиган буюк Зотдир. Гуноҳкорларнинг тавбасини қабул қилиши ҳақида хабар берган. Қуръони каримда бундай марҳамат қилинади: “У бандаларидан тавбани қабул қиладиган, ёмонликларни афв этадиган ва қиладиган ишларингизн биладиган зотдир” (Шўро, 25). Бошқа оятда бундай дейилади: “Мен тавба қилган ҳамда имон келтириб, эзгу иш қилган, сўнгра тўғри юрган кишиларни, албатта, мағфират қилувчидирман”(Тоҳа, 104).

Ибн Аббос (розияллоҳу анҳу) оятдаги “тезлик”, деб таржима қилинган “қориб” сўзини: “Ўлим аломатидан олдин”, деб тафсир қилган. Ўлимдан олдин қилинган тавба дуруст бўлади. Чунки банда ҳаётлик чоғида умиди сўнмайди ва ёмон ишни тарк қилишг азму қарори бўлади. Шунингдек, қилган гуноҳ ва маъсиятларига надомат ва пушаймон қилишига имконияти бўлади. Ибн Умар (розияллоҳу анҳу)дан ривоят қилинади: “Набий (соллаллоҳу алайҳи васаллам): “Аллоҳ таоло банданинг ғарғара (руҳи ҳалқумига етган) пайтигача қилган тавбасини қабул қилади”, дедилар” (Имом Термизий ривояти).Бошқа ҳадисда бундай дейилади: “Расулуллоҳ (соллаллоҳу алайҳи васаллам): “Мўмин ўлимидан бир ой олдин тавба қилса, Аллоҳ таоло уни қабул қилади. Агар бир ойдан камроқ қолганда ёки ўлимидан бир кун аввал ёки бир муддат олдин тавба қилса, Аллоҳ таоло унинг тавба ва ихлосини билади, қабул қилади”, дедилар” (Имом Абу Нуайм ривояти).

Уламолар оятнинг “тезлик билан тавба қилганлар” қисмидан мурод ўлим вақтигача бўлган вақт эканига ижмо қилишган. Аллоҳ таоло бу муддатни “қориб” яъни, яқин деди. Чунки келадиган нарсаларнинг барчаси яқиндир. Бунда инсон умри қисқа эканига ишора қилинмоқда. Зеро ажал ҳар лаҳзада келиб қолиши мумкин. Шунинг учун, Аллоҳ таоло бандаларини тезлик билан тавба қилишга буюриб, уни қабул қилишга ваъда бермоқда.

Тавбанинг шартлари пушаймон бўлиш, гуноҳдан тийилиш ва келажакда уни қайта қилмасликка азму қарор қилишдан иборат.  Надомат ва пушаймонликсиз тавба бўлмайди. Чунки Пайғамбаримиз (соллаллоҳу алайҳи ва саллам): “Пушаймонлик тавбадир”, деганлар (Имом Аҳмад ривояти). Ким қилган ёмон амалига пушаймон бўлмаса, бу унинг ўша ишга рози эканига ишора бўлади.   

Тавба нажот арқони. Банда тавба билан нажот топади, қалби ва руҳини поклайди, Аллоҳ таолонинг муҳаббатига сазовор бўлади. Қуръони каримда бундай марҳамат қилинади: “Албатта, Аллоҳ (шунгача билмай йўл қўйган хатоларидан) чин тавба қилувчиларни ва обдон покланиб юрувчиларни севади” (Бақара, 222). 

Манбалар асосида

Баҳриддин ПАРПИЕВ тайёрлади

Бугун соат 6:50 да Тошкент ислом институтида Махсус сиртқи бўлимга ўқишга кириш учун ҳужжат топширган абитурентларга имтиҳон бошланди. Имтиҳонга Ўзбекистон мусулмонлари идораси раиси ўринбосари Иброҳим Иномов ва ЎМИ таълим ва кадрлар тайёрлаш бўлими мудири Жалолиддин Нуриддинов бошчилигидаги кузатувчи меҳмонлар ташриф буюрди.

Махсус сиртқи бўлим бевосита Президентимизнинг ташаббуси билан ташкил этилди.

Махсус сиртқи бўлимга Ўзбекистон мусулмонлари идораси раиси, муфтий Усмонхон Алимовнинг “Республикамизда фаолият юритаётган икки мингдан ортиқ жоме масжидларни олий диний маълумотга эга имом-хатиблар билан таъминлаш учун Имом Бухорий номидаги Тошкент ислом институтида уч йиллик Махсус сиртқи бўлим ташкил этиш мақсадида”ги (29-сентябрдаги 01А/092-сонли) буйруғи ижроси юзасидан ўн кун муддат ичида (1-10 октябрь кунлари) абутуриентлар қабул қилинди.

Махсус сиртқи бўлимга республикамизда фаолият юритаётган, камида беш йиллик стажга эга бўлган имом-хатиб, мадраса мударриси ва Имом Бухорий халқаро маркази ходимларидан иборат жами 181 нафар абитурент ҳужжат топширган. Шулардан 60 нафари 3 фан (ақоид, фиқҳ ва араб тили) бўйича имтиҳонлар асосида қабул қилинади. Ҳар бир фанга абитурентнинг жавоб беришига қараб 75,6 баллдан қўйилмоқда. Билет олган ҳар бир абитуриент жавоб беришдан олдин 20 дақиқа давомида луғатлардан фойдаланган ҳолда ўтириб тайёрланиши мумкин. Имтиҳон олиш учун Тошкент ислом университети, Тошкент ислом институти ва “Кўкалдош” ўрта махсус билим юртидан малакали мударрислар жалб этилган. Имтиҳон натижалари бўйича мандат 14 октябрь куни эълон қилинади. Махсус сиртқи бўлимга ўқишга кирган талабаларга дарслар ноябрь ойида бошланади.  

Ўзбекистон мусулмонлари идораси

Матбуот хизмати

Тошкент ислом институтида ташкил этилган Махсус сиртқи бўлимга 2017-18 ўқув йили учун 181 нафар абитуриент ҳужжат топширди.  

Бугун абитуриентлар “ақоид”, “фиқҳ” ва “араб тили” фанларидан ижодий имтиҳонлар топширишни бошлади.

Имтиҳон бошланишидан олдин Ўзбекистон мусулмонлари идораси раиси ўринбосари Иброҳим Иномов абитуриентларга Аллоҳ таолодан омад тилаб, қабул имтиҳонларини муваффақиятли топшириб, институт талабалари сафидан жой олиш бахтига мушарраф бўлишларини тилаб дуо берди.

Шунингдек, имтиҳон аввалида янги очилган Махсус сиртқи бўлим муҳтарам Президентимиз раҳнамолигида олиб борилаётган улкан ислоҳотларнинг таълим соҳасидаги намунаси экани алоҳида таъкидланди. Ўз навбатида ушбу сиртқи бўлим Ўзбекистон мусулмонлари идораси раиси, муфтий Усмонхон Алимов ҳазратларининг доимий эътиборида экани билдирилди.

Барча абитуриентларга омад тилаймиз. 

Ўзбекистон мусулмонлари идораси

Матбуот хизмати

Аллоҳга шукрки, юртимиздаги икки мингдан зиёд масжидларимиз кундан-кунга обод бўлмоқда. Янгидан-янги масжидлар қурилмоқда, кўплари таъмирланиб, чиройли ҳолатга келтирилмоқда. Намозхонлар бундай жоме масжидларда ибодатларини хотиржам адо этаётганларидан мамнунлар.

Мана шундай ишларни узвий давом эттириш йўлида бугун Ўзбекистон мусулмонлари идораси раиси, муфтий Усмонхон Алимов ҳазратлари жойлардаги масжидлар ҳолатини яхшилаш, имом-хатиблар фаолиятини жадаллаштириш, мўмин-мусулмонларимизнинг талаб ва истакларини таъминлаш мақсадида, Самарқанд вилоятига ташриф буюрдилар. Қатор ислоҳот ва бунёдкорлик ишлари қизғин давом этаётган паллада муфтий ҳазратларининг вилоятга ташрифи алоҳида маъно ва аҳамият касб этиб, самарқандлик уламолар, имом хатиблар ва мўмин-мусулмонлар томонидан алоҳида эҳтимом билан қарши олинди.

Муфтий ҳазратлари дастлаб, Ургут туманига ташриф буюриб, “Мерганча” маҳалласида қад ростлаётган туман марказий масжидининг янги биноси қурилиши жараёни билан танишдилар. Шунингдек, ушбу тумандаги “Домла Қурбон”, Самарқанд туманидаги “Имоми Аъзам”, Самарқанд шаҳридаги “Намозгоҳ” масжидларида олиб борилаётган қурилиш ва таъмирлаш ишлари билан яқиндан танишиб, бунёдкорлик ишларини замонавий ва миллий меъморчилигимизга мос шаклда амалга ошириш бўйича тавсиялар бердилар.

Таъкидлаш жоизки, қурилиш ишларига энг моҳир уста ва муҳандислар жалб этилган. Бундай эзгу ишга ҳисса қўшиш истагидаги қурувчилар ўз маҳоратларини кўрсатиб, бор куч-ғайрат ила меҳнат қилишмоқда. Зеро, масжид қуриш, уни обод этишнинг савоби улуғ экани Ислом манбаларида кўп баён қилинган. Бу ҳақда Анас ибн Молик (розияллоҳу анҳу)дан бундай ривоят қилинади: “Ким масжидда битта чироқ ёқса, ўша чироқнинг нури ўчгунича фаришталар у кишининг ҳаққига истиғфор айтиб турадилар”.

Дарҳақиқат, масжидлар ободлиги юрт ободлигидир. Зеро, масжидга ибодат қилиш учун келган кишилар она-Ватан тинчлиги, халқ осойишталигини сўраб, дуо қилишади. Бу мустажоб дуоларнинг шарофати ила Яратган юртимизни янада фаровон қилади.

Самарқанд вилоятида янгидан қад ростлаётган ушбу жоме масжидлар, мўмин-мусулмонларимиз учун жуда ҳам катта туҳфалар бўлади, иншоаллоҳ.

Зайниддин ЭШОНҚУЛОВ,

Ўзбекистон мусулмонлари идорасининг

Самарқанд вилояти вакили