muslim.uz
"Овчи бува" зиёратгоҳи ҳақида биласизми?
Наманган вилояти Уйчи туманидаги "Овчибулоқ" зиёратгоҳи экотуристик салоҳиятга эга сўлим қишлоқда жойлашган.
Халқ орасида ушбу зиёратгоҳ ҳақида бир қанча ривоятлар мавжуд. Айтишларича, Нажд водийсидан таралган нур Фарғона водийси сари етиб кела бошлаган VI-VII асрларда саҳобалар ташрифи кузатилади. Шундай улуғ инсонлардан бири етти фарзанди билан бу муаззам диёрга келиб, кейинчалик турли ҳудудларга тарқалади.
ЎзА хабарига кўра, бирлари Шоҳимардонга, бошқалари Арслонбоб (Қирғизистон), Подшоота, Чодак, Сафедбулон, Балиқли мозор ва Овчибулоққа деган жойларга ўрнашади. Улар элга исломдан сабоқ бериб, деҳкончилик, чорвадорлик, ҳунармандчилик, боғбонлик билан шуғулланишган. Улардан бири Овчи бува эса овчи моҳир бўлган экан.
Бу жойлар ботқоқ ва тўқайзор бўлиб, бу ерда ичимлик суви бўлмаган. Овчи бува ўз ўлжасини овлаш учун ушбу ҳудудда узоқ қолиб кетар ва ташналикдан қийналарди. Бу масканга сув келиши ва атрофи обод бўлиши Овчи отанинг Ҳазрати Хизр билан кўришиши ва у суққан ҳассадан булоқ пайдо бўлиши билан боғланади.
XIX аср охирига қадар қалин ботқоқ, овчилик учун қулай жой бўлган ҳудудда 1930-1970 йилларда зовур қазилиб, экин жойларига айлантирилган. 1982 йилларда бу ерга иморатлар қурилди. 2010 йилдан кейин айвонлар бунёд этилди. Ҳозирда бу ерда қишлоқ тадбирлари, умумхалқ байрамлари, турли тантаналар ўтказиб келинмоқда.
Ўзбекистон мусулмонлари идораси матбуот хизмати
Расулуллоҳ соллаллоҳу алайҳи васаллам ҳаётларидан лавҳалар: Аллоҳ ва Унинг Расулига фидойилик (Аудио)
ЎМИ матбуот хизмати
Ўзбекистон – бутун турк дунёсининг маънавий-маърифий маркази
Мамлакатимизнинг Туркиядаги элчихонаси томонидан кеча Анқара шаҳридаги «Соҳибқирон» илмий-тадқиқот маркази билан биргаликда «Мустақиллик йилларида Ўзбекистонда диний-маърифий соҳадаги ислоҳотлар» мавзусида давра суҳбати ташкил этилди, деб хабар бермоқда «Дунё» АА.
Элчихонадан маълум қилинишича, тадбирда мустақиллик йиллари Ўзбекистонда диний-маърифий соҳада эришилган ютуқлар бўйича фикр алмашилди.
Туркиялик ҳамкорларга сўнгги йилларда Ўзбекистонда маънавий-маърифий соҳада амалга оширилаётган янгиланишлар ҳақида батафсил ахборот берилди.
«Соҳибқирон» илмий-тадқиқот маркази экспертлари мамлакатимизнинг буюк аждодларимиз илмий меросини асраб авайлаш, ёш авлодни эзгу инсоний ғоялар руҳида тарбиялаш, бузғунчи сохта диний қарашлар ва диний экстремизм кўринишлари тарқалишининг олдини олиш борасидаги бой ижобий тажрибасини юқори баҳолади.
Марказ раҳбари Масъуд Эмре Каракўсе Ўзбекистон – бутун туркий дунёнинг маънавий-маърифий маркази эканини таъкидлади. «Туркий оламнинг буюк маърифатпарвар олиму фузалолари Самарқанд, Бухоро, Хоразм, Фарғона каби муборак заминда етишиб, бутун дунёга илму ирфон нурини таратганлар, - деди у. - Имом Бухорий, Имом Термизий, Абу Мансур Мотуридий, Абу Муъин Насафий, Бурҳонуддин Марғиноний, Баҳоуддин Нақшбанд каби алломаларнинг ҳаёт йўли, бизга қолдирган мероси ҳам юқоридаги фикрни тасдиқлаб турибди».
Иширокчилар Ўзбекистонда сўнгги беш йилда ташкил этилган Имом Мотуридий халқаро илмий-тадқиқот маркази, Имом Термизий халқаро илмий-тадқиқот маркази, Ҳадис илми олий мактаби, Баҳоуддин Нақшбанд тасаввуф илмий мактаби каби илм даргоҳларининг соф ислом дини ривожи бўйича амалга ошираётган ишларини эътироф этди.
Маълум қилинишича, «Соҳибқирон» илмий-тадқиқот маркази тадқиқотчилардан бири - Чинор Ота буюк аждодимиз Хожа Аҳрор Валий ҳаёт йўли ва мероси ҳақида илмий-адабий китоб тайёрламоқда. Ушбу китоб Ўзбекистон мустақиллигининг 30 йиллиги арафасида нашр этилиши режалаштирилган.
Ўзбекистон мусулмонлари идораси матбуот хизмати
Бир ҳадиси қудсий шарҳи: "Бир яхшилик сабабли жаннатга кирувчилар"
Ҳадиси қудсийда бундай дейилади: “Аллоҳ таоло Довуд алайҳиссаломга: “Бир банда қиёмат кунида битта яхшилик билан келади ва Мен уни ўша яхшилик сабабли жаннатга ҳукм қиламан”, деб ваҳий қилди. Довуд алайҳиссалом: “Роббим! У банда ким бўлди?” дедилар. Аллоҳ таоло: “У мўмин биродарининг ҳожатини чиқариш учун саъй-ҳаракат қиладиган, ўша биродарининг ҳожатини чиқара оладими йўқми, бундан қатъий назар унинг ҳожати раво бўлишини хоҳлайдиган банда", деди” (Хатиб, Ибн Асокир ривоят қилишган).
Мазкур ҳадиси шариф мусулмонларни ўз биродарларининг ҳожатларини чиқариш, ғам-ғуссаларини енгиллатиш, орзу-умидларини амалга оширишда ҳамиша ҳаракат қилишга тарғиб қилиб, мана шундай хайрли ишларни қилишда ҳимматли бўлишга ундайди.
Бир оз тин олиб, ушбу ҳадисдаги Аллоҳ таолонинг: “Мен уни ўша яхшилик сабабли жаннатга ҳукм қиламан”, деган сўзини тааммул қилиб кўрсак, Аллоҳ таоло ўзгаларга яхшилик қилиш учун саъй-ҳаракат қилувчи мўмин бандага жаннатда ўзи хоҳлаган неъматларини бериши, ўша неъматлардан у истаганича фойдаланиш имтиёзига эга бўлишини, англаб етамиз.
Аллоҳ субҳанаҳу ва таоло ушбу ҳадиси қудсийда Довуд алайҳиссаломга ваҳий қилиб, “мўмин банда бу дунёда фақат Аллоҳ таолонинг розилиги учун, холис, эвазига бирор кишидан раҳмат умид қилмай солиҳ амал қилса, Аллоҳ таоло банданинг қилган яхшилиги учун мукофот ўлароқ Ўз ҳузурида жаннатнинг олий неъматлари ила ҳузурланиш имкониятини унга тортиқ қилади”, деб хабар қилмоқда. Во ажаб, Аллоҳ таоло бундай бандага тайёрлаб қўйган мартаба нақадар улуғ!
Аллоҳ таоло ушбу ҳадиси қудсийда мусулмон биродарларига яхшилик қилишни севадиганлар ва уларнинг эҳтиёжларини қондириш йўлида саъй-ҳаракат қиладиганлар учун шу дунёнинг ўзида уларга жаннат башоратини бермоқда. Аллоҳ таоло мусулмон биродарларининг эҳтиёжларини қондирадиган ёки эҳтиёжини қондиролмаса ҳам шу йўлда саъй-ҳаракат қиладиган кишиларга кўплаб мукофотлар тайёрлаб қўйгандир.
Расулуллоҳ соллаллоҳу алайҳи васаллам бизларни ушбу фазилатли ишни қилишимизга ундаб бундай деганлар: “Аллоҳ таоло баъзи инсонларни одамларнинг ҳожатлари учун яратди ва инсонлар ўз эҳтиёжларини қондиришда уларга мурожаат қилади. Ана ўша кишилар қиёматда Аллоҳ таолонинг азобидан омонда бўладилар” (Табароний ривоят қилган).
Ибн Умар ва Ибн Аббос розияллоҳу анҳумодан ривоят қилинади: Расулуллоҳ соллалоҳу алайҳи васаллам: “Ким биродарининг ҳожатида саъй-ҳаракат қилса, унинг бу ҳаракати ўн йил давомида эътикофда ўтиришдан яхшироқдир. Кимки Аллоҳнинг розилигини кўзлаб бир кун (масжидда) эътикоф ўтирса, Аллоҳ таоло у билан жаҳаннам ўртасида учта хандақ (чуқур)қилади, ҳар бир хандақнинг кенглиги машриқ билан мағрибнинг оралиғидан ҳам кенгдир”, дедилар.
Инсонларнинг эҳтиёжини қондириш кишини қиёматда Аллоҳ талонинг азобидан омонда қилади. Ҳеч кимга сир эмаски, эътикоф бандани Роббисига яқинлаштирадиган энг афзал ибодатлардан бири бўлиб, эътикоф ўтирувчи билан шайтоннинг васвасаси ўртасида тўсиқ бўлади. Бироқ, мусулмон биродарининг эҳтиёжларини қондириш йўлида саъй-ҳаракат қилиш унданда афзалдир.
Қарангки, Аллоҳ таоло баъзи инсонларни бошқа кишиларнинг ҳожатини чиқариш учун вазифадор қилиб қўйган. Модомики, улар ўзларининг зиммаларида ўзгаларнинг ҳақлари бор деб билар эканлар, уларга жаннат ваъда қилинмоқда. Шундай экан, муҳтож кимсалар уларнинг олдига такрор-такрор боришларидан малолланмасинлар.
Зеро, Аллоҳ азза ва жалла бошқа мусулмонларнинг ҳожатлари билан машғул бўлишлари учун уларга неъматлар ато қилгандир. Агар улар бу неъматнинг ҳаққини адо қилиб, ўз эгаларига топширсалар, Аллоҳ уларни неъмат ичра бардавом қилади ва барокатли қилади. Агар малоллансалар, Аллоҳ таоло улардан бу неъматини олиб қўяди, бошқа бандасига беради.
Расулуллоҳ соллаллоҳу алайҳи васаллам айтадилар: “Баъзи кишиларга Аллоҳ таоло неъмат ато қилганки, модомики улар мусулмонларнинг ҳожатини чиқаришда малолланмасалар, Аллоҳ таоло улардаги бу неъматни бардавом қилиб беради. Бордию, малолланадиган бўлсалар,неъматларини улардан олиб, ўзгаларга топширади”.
Дарҳақиқат, киши ўз ҳожатини қондиришга кучи етмай турган бир пайтда унинг кўнглига хурсандчилик сиғадими? Ана шундай паллада бирор ҳожатбарор рўпарадан чиқиб, ҳожатини раво қилса, қандай ҳолга тушади. Шубҳасиз, қалбини кучли ҳаяжон ва хурсандчилик қамраб олади.
Агар Аллоҳ таоло сизни мусулмонларнинг ҳожатларини чиқаришга муяссар қилган бўлса, бу сиз учун катта бахт ва улкан шарафдир. Чунки, мусулмон биродарининг қалбига хурсанчилик киргизиш Аллоҳнинг наздидаги энг афзал ва суюкли амалдир. Пайғамбаримиз Расулуллоҳ соллаллоҳу алайҳи васаллам: “Аллоҳга энг севимли банда одамларга кўпроқ манфаати тегадиганидир. Аллоҳ таолога энг маҳбуб амал мусулмоннинг қалбига хурсандчилик киргизишинг, ундан ғам ташвишларини аритишинг, зиммасидаги қарзини узиб беришинг, очлигини кетказишингдир. Мусулмон биродаримнинг ҳожатини чиқариш йўлида юришим масжидун набавийда бир ой эътикоф ўтиришимдан яхшироқдир. Ким ўч олишга қодир бўла туриб ғазабини ютса, Аллоҳ унинг қалбини қиёмат кунида ўзининг розилиги билан тўлдиради. Ким биродарининг ҳожати билан юриб, уни раво қилса, Аллоҳ қадамлар тоядиган кунда унинг қадамларини собит қилиб қўяди”, дедилар.
Мазкур ҳадисдан, модомики банда биродарининг ёрдамида бўлар экан, Аллоҳ таоло унинг ёрдамида эканлиги маълум бўлади.
Ё Аллоҳим, бизларни мусулмонларнинг ҳожатларини чиқарувчилардан қилгин ҳамда уларнинг қалбларига сурур киргизиш билан қиёмат куни Ўз розилигингни топишимизни насиб эт. Ё раҳимлилар раҳимлиси!
Ҳомиджон ИШМАТБЕКОВ,
Ўзбекистон мусулмонлари идораси раисининг биринчи ўринбосари
Мир Араб олий мадрасаси 57 нафар илк битирувчисига оқ фотиҳа берилди
Маълумки, Президент Шавкат Мирзиёев ташаббуси билан 2017 йили Мир Араб олий мадрасаси ташкил этилиб, унга илк бор талабалар 2017-2018 ўқув йилида қабул қилинган эди.
Шу йил 18 июнь куни ушбу олий таълим муассасаси биринчи қалдирғочларининг “Хатмона – 2021” битирув тадбири бўлиб ўтди. Унда Бухоро вилояти ҳокими ўринбосари Эркин Мажидов, Ўзбекистон мусулмонлари идораси раиси ўринбосари Ўткир Ҳасанбоев, Диний идора ходимлари, Бухоро вилояти бош имом-хатиби Жобир домла Элов ҳамда олий ва ўрта махсус ислом таълим муассасалари раҳбарлари иштирок этди.
Тадбирда вилоят ҳокими ўринбосари Э.Мажидов сўзга чиқиб, талабаларга келгуси ҳаётига муваффақиятлар тилади. Шунингдек, Ў.Ҳасанбоев меҳмон ва тадбир иштирокчиларига Муфтий Усмонхон Алимов ҳазратларининг битирувчи талабаларга йўллаган табрикларини ўқиб эшиттирди.
Шунингдек, сўзга чиққан нотиқлар таълим муассасаси битирувчилари, ўқитувчи, раҳбар ва ходимларни ушбу унутилмас кун билан табриклаб, илк қалдирғочларларга келажакда халқимиз учун самарали хизмат қиладиган ходимлар бўлиб етишини тилади.
Тадбирда иштирок этган ота-оналардан баъзилари таълим муассасаси раҳбарияти ҳамда дарс берган устоз-мураббийларга ўзларининг ташаккурларини билдирдилар.
Шу билан бирга, Мир Араб олий мадрасасининг биринчи битирувчилари “Хатмона” тадбири билан қутлаш учун дунёнинг турли жойларидан табрикномалар келмоқда. Жумладан, Мирс Араб Республикасининг “Ал-Азҳар” университети олими Жамол Ҳошимий, Туркиялик таниқли олим Доктор Ҳамза Бакрий, Туркиядаги “Мужаддид Маҳмуд афанди” Вақф фонди раҳбари Муҳаммад Кескин хўжа афанди каби бир қанча уламолар табрик йўллашди.
Маълумот учун, шу йил Мир Араб олий мадрасасини 2017-2021 йилларда таълим олган 57 нафар талаба тамомлади. Ушбу битирувчилар юртимиздаги жоме масжидларда имом-хатиб, имом-ноиби, диний таълим муассасаларида ўқитувчи-мураббий, ишчи-ходим бўлиб иш билан таъминланади.
Ўзбекистон мусулмонлари идораси матбуот хизмати