Куала-Лумпурдаги элчихонамиз кўмагида Ўзбекистон туризм ва спорт вазирлиги вакиллари Малайзия Ислом сайёҳлик маркази (Islamic Tourism Centre – ITC) томонидан "Crescent Rating" халқаро агентлиги билан ҳамкорликда ташкил этилган "Малайзия – мусулмон туризми учун манзил" (Muslim-Friendly Malaysia) мавзуси бўйича вебинарда иштирок этди, деб хабар бермоқда "Дунё" ахборот агентлиги.

Элчихонага кўра, тадбир давомида пандемиянинг туризм соҳасига таъсирини юмшатиш ва соҳани тиклаш истиқболлари, чегараларнинг очилиши сайин мусулмон туризм бозорининг салоҳиятини очиш, сегмент ва "ҳалол саёҳат" стандартларини ишлаб чиқиш бўйича тажриба алмашишни йўлга қўйиш масалалари, жумладан, ҳалол маҳсулотларнинг мавжудлиги ва ибодат қилиш учун шароитлар мавжудлиги муҳокама қилинди.

Бундан ташқари, тадбир давомида 2015 йилдан бошлаб «Crescent Rating» агентлиги томонидан ҳар йили тузилган Global Muslim Travel индексида анъанавий тарзда биринчи ўринни эгаллаб келаётган Малайзиянинг зиёрат туризми соҳасидаги тажрибаси юзасидан фикр алмашилди.

Шунингдек, Ўзбекистонда зиёрат туризмини тарғиб қилиш бўйича тизимли чора-тадбирлар, шунингдек, мамлакатнинг бой ислом меросини халқаро миқёсда ўрганиш ва оммалаштириш бўйича кенг кўламли ташаббуслари туфайли 2021 йилда Республика мусулмон туризмининг глобал индексида 6 поғона кўтарилиб, 16-ўринни эгаллагани қайд этилди.
Ислом туризми маркази 2009 йилда ташкил этилган бўлиб, Малайзия туризм, санъат ва маданият вазирлигининг таркибий бўлинмаси ҳисобланади. Марказ мезбон мамлакатда Ислом туризмини ривожлантириш бўйича маслаҳат органи вазифаларини бажаради.

Ўзбекистон мусулмонлари идораси матбуот хизмати

Бугун, 3 август куни Мир Араб олий мадрасасида кундузги таълим йўналиши бўйича кириш имтиҳонининг Ақоид-фиқҳ ва Ўзбекистон тарихи фанларидан тест синовлари бўлиб ўтди. Уни олий мадраса ректори Ҳайдархон домла Йўлдошхўжаев кириш сўзи билан очиб берди.

Дастлаб, абитуриентлар карантин чора-тадбирларига мувофиқ, олий мадраса ҳовлисидаги имтиҳон ўтказиладиган парталарга жойлаштирилди. Кириш имтиҳони қорининг Қуръон карим тиловати ва устозларнинг хайрли дуолар билан асосий тадбирлар бошланди.

Шундан сўнг Ўзбекистон мусулмонлари идораси Таълим ва илмий-тадқиқот бўлими бошлиғи Салоҳиддин Шерхонов, қабул ҳайъати аъзолари, абитуриентлар ва ота-оналар гувоҳлигида тест саволлар китоби ва жавоблар варақаси солиниб, муҳрланган махсус қоплар очилди.

Кейин тест материаллари абитуриентларга тарқатилиб, Ақоид-фиқҳ ва Ўзбекистон тарихи фанларидан тестларни ечиш учун 2 соат вақт ажратилди, варақаларни тўлдириш ва бўяшга 10 дақиқа вақт қўшиб берилди.
Тест синовларини Дин ишлари бўйича қўмита, Ўзбекистон мусулмонлари идораси ва қабул ҳайъати аъзолари кузатиб, назорат қилди.

Маълумот учун, 2021-2022 ўқув йили учун кундузги таълим бўйича Мир Араб олий мадрасасига 114 нафар йигит ва 25 нафар аёл-қиз абитуриент ҳужжат топширган.

Эслатиб ўтамиз, мандат натижалари 4 август куни эълон қилинади.

Ижодий имтиҳон жараёнларини https://www.facebook.com/mirarab.uz саҳифаси орқали онлайн узатилди.
Мир Араб олий мадрасасига кириш имтиҳони натижалари (мандат), муассасадаги таълим жараёнлари ва соҳадаги сўнги янгилик, мутахассисларнинг ўткир мақолаларини mirarab.uz сайтидан билиб олишингиз мумкин.

Ўзбекистон мусулмонлари идораси матбуот хизмати

Риё — иш ва ҳаракатларни кўрсатмоқ, бир яхшиликни ёки амални Аллоҳнинг розилиги учун эмас балки, инсонларнинг мақтови учун қилишдир. Бу ҳаракатларни амалга оширган инсонга риёкор дейилади.

Риё — инсонлар орасида руҳий таъсир, шон-шуҳрат, моддий фойда учун қилинади. Дунёга оид бу каби моддий ва маънавий фойдаларни қўлга киритиш учун, динга бўлган ҳурмат ва эътиборни ишлатиш, риёнинг энг ёмон шаклидир. Бундай ҳаракатлар ҳийлакорлик ва ёлғончиликдир.

Риёкор — кишининг сўз ва ҳаракатларидаги самимиятсизликлари, бошқа инсонлар томонидан қисқа вақтда билинади. Бу инсонларга ҳеч ким ишонмайди. Риёнинг ҳаммаси ахлоқсизлик бўлгани каби, ибодатларда риёкор бўлиш энг катта ахлоқсизликдир.

Расулуллоҳ соллаллоҳу алайҳи васаллам:

«Албатта сиз учун энг қўрқадиган нарсам, кичик ширк, яъни риёдир» деганлар (Термизий ривоят қилган).

Ибодат Аллоҳ учун қилинади. Аллоҳнинг розилигидан бошқа бир мақсад учун ибодат қилиш, Аллоҳнинг розилигини ўртадан олиб ташлайди. Кўрсатиш ва фойда тушунчаси билан Қуръон ўқиш, намоз ўқиш, рўза тутиш, закот бериш, ҳажга бориш, садақа бериш ибодатларни хабата, яъни бекорга чиқаради.

Аллоҳ таоло бу ҳақда Ўзининг каломида шундай марҳамат қилади:

«Эй иймон келтирганлар! Садақаларингизни миннат ва озор бериш билан, молини Аллоҳга ва охират кунига иймон келтирмаса ҳам кишиларга риё учун нафақа қилганга ўхшаб бекорга кетказманг. У мисоли бир устини тупроқ босган силлиқ тошга ўхшайди. Бас, кучли ёмғир ёғса, силлиқ бўлиб қоладир. Касб қилганларидан ҳеч нарсага қодир бўлмаслар» (Бақара сураси, 264-оят).

Шу ҳолда, Аллоҳнинг буйруғини ва розилигини ўйлаб эмас, диндор кўриниш учун ибодат қилиш, олим ва билимли дейишсин, дея илм билан машғул бўлиш, саҳий деб номланиш учун закот ва садақа бериш, риёдан иборат ёмон ҳаракатдан бошқа бир маъно ифода қилмайди.

Расулуллоҳ соллаллоҳу алайҳи васаллам бундай деганлар:

«Шубҳасиз риё ширкдир» (Ибн Можа ривоят қилган).

Аллоҳга ва инсонларга қарши ўзини самимий тутиб риёдан узоқ туриш, иложи бўлса, ибодатларни яширин қилиш, Аллоҳнинг розилигини инсонларнинг мақтовига, истагига, қўрқувига қарши танлаш ҳар бир мусулмоннинг тамойилидир.

Интернет манбалари асосида тайёрланди

Дарҳақиқат, инсон ҳар хил тушлар кўради. Баъзи тушлар яхши бўлса, баъзи тушлар ёмон бўлади. Инсон кўрган тушини таъбирини билишни хоҳлайди. Хўш, тушни қандай таъбир қилиш керак?

Ҳар қандай туш яхшиликка йўйиб таъбир қилиниши лозим. Маълумки, туш раҳмоний ё шайтоний, яхши ёки ёмон бўлади. Шу билан бирга яна тушнинг яхши ёки ёмон бўлиши уни қандай таъбир қилишга ҳам боғлиқдир. Агар кўрилган туш яхшилик томон таъбир қилинса, туш яхши бўлади.

Бу ҳақда Имом Дорамийдан ривоят қилинган ҳадисда айтилишича, бир аёл уч марта келиб, Пайғамбаримиз соллаллоҳу алайҳи васалламга: “Эрим тижорат билан кетган, ўзим ҳомиладорман, тушимда уйимнинг устуни синибди, ғилай бир бола туғибман”, деб мурожаат қилади. Пайғамбаримиз соллаллоҳу алайҳи васаллам унга:“Эринг сафардан қайтади, солиҳ бир фарзанд туғасан”, деб унга кўрган тушини яхшиликка йўйиб таъбир қиладилар. Орадан вақт ўтиб аёл яна тушининг таъбирини сўраш учун Пайғамбаримиз соллаллоҳу алайҳи васалламнинг ҳузурларига келади. Фақат бу сафар аёл туш таъбирини Пайғамбаримиз соллаллоҳу алайҳи васалламнинг аёллари, мўминларнинг онаси Оиша розияллоҳу анҳодан сўради. Оиша розияллоҳу анҳо унга кўрган тушидан келиб чиқиб, эрининг вафот этишини, фожир бир бола туғишини айтиб, тушини таъбир қиладилар. Буни эшитган Пайғамбаримиз соллаллоҳу алайҳи васаллам: “Эй Оиша! Ундай дема! Мусулмон кишининг тушини таъбир қилсангиз, яхшиликка таъбир қилинг. Чунки туш эгаси қандай таъбир қилса, шундай бўлади”, дедилар.

Демак, ҳамиша тушларимизни яхшиликка йўйиб таъбир қилиб, уни ёмонликка йўйишдан сақланайлик!

Р. Акбаров,

Ўзбекистон мусулмонлар идораси

Қашқадарё вилояти вакиллиги ходими.

Бугун, 2 август куни Мир Араб олий мадрасасида Араб тилидан ижодий имтиҳон бошланди. Уни олий мадраса ректори Ҳайдархон домла Йўлдошхўжаев кириш сўзи билан очиб берди. Сўнг қорининг Қуръон карим тиловати ва устозларнинг хайрли дуолар билан асосий тадбирлар бошланди.

Ижодий имтиҳон бошида Ўзбекистон мусулмонлари идораси Таълим ва илмий-тадқиқот бўлими бошлиғи Салоҳиддин Шерхонов Дин ишлари бўйича қўмита Диний-маърифий таълим муассасалари билан ишлаш бўлими бошлиғи Бобомурод Рустамов, қабул ҳайъати аъзолари иштирокида ижодий имтиҳонни ўтказиш тартиби, белгиланган қоидаларни тушунтирди. Кейин эса абитуриентлар ва ота-оналар гувоҳлигида имтиҳон билетлари солинган ва муҳрланган махсус қоплар очилди.

Шундан сўнг абитуриентлар карантин талаблари асосида олий мадрасаси биноси имтиҳон учун ажратилган айвон қисми жойга киритилиб, муҳрланган конвертлардан бирини танлаб, билет саволларига тайёрланиш учун парталардан жой олмоқда. Маълум вақтдан сўнг абитуриентлар имтиҳон олувчи ўқитувчилар олдида билет саволларига жавоб беришмоқда.

Имтиҳон жараёнларини Дин ишлари бўйича қўмита, Ўзбекистон мусулмонлари идораси, институт қабул ҳайъати аъзолари ва турдош ташкилот вакиллари кузатиб, назорат қилмоқда.

Маълумот учун, 2021-2022 ўқув йили учун кундузги таълим бўйича Мир Араб олий мадрасасига 114 нафар йигит ва 25 нафар аёл-қиз абитуриент ҳужжат топширган.

Эслатиб ўтамиз, эртага, 3 август куни Олий мадрасада Ақоид-фиқҳ ва Ўзбекистон тарихи фанларидан тест синови бўлиб ўтади.

Мандат натижалари эса 4 август куни эълон қилинади.

Ижодий имтиҳон жараёнларини https://www.facebook.com/mirarab.uz саҳифаси орқали онлайн кузатиб боришингиз мумкин.

Мир Араб олий мадрасасидаги имтиҳон, муассасадаги таълим жараёнлари ва соҳадаги сўнги янгилик,
мутахассисларнинг ўткир мақолаларини mirarab.uz сайтидан билиб олишингиз мумкин.

Ўзбекистон мусулмонлари идораси матбуот хизмати