Шу йил 5 июль, душанба кундан бошлаб бу йилги ҳаж мавсуми тугагунига қадар Макка Мукаррамадаги Масжидул Ҳаром ва унинг атрофидаги ҳудудга ҳаж зиёратига рухсатсиз киришга уринган кишилар 10 минг Саудия риёли (2 666 AҚШ доллар) миқдорида жаримага тортилади.

Муқаддас қадамжоларга Мино, Муздалифа ва Aрафот водийлари киради. Агар жиноят икки марта содир этилса, жарима миқдори ҳам икки баравар кўпаяди, дейилади САП ИИВ хабарида. Вазирлик барча фуқаролар ва аҳолини бу йилги Ҳаж мавсуми кўрсатмаларига қатъий риоя қилишга чақирди. Хавфсизлик хизмати ходимлари эса Масжидул Ҳаром ва муқаддас қадамжоларга олиб борувчи барча йўл ва пунктларда ҳуқуқбузарликлар олдини олиш ва қоидабузарларга жарима солиш мақсадида вазифаларини бажаради, деб таъкидлади.

ЎМИ Халқаро алоқалар бўлими

Исҳоқжон домла Бегматов

Яратганнинг фазлу инояти билан, Ўзбекистон мусулмонлари идораси тизимидаги масжидлар сони яна биттага кўпайди.

Янги масжид Сурхондарё вилояти, Жарқўрғон туманидаги Бобур маҳалласида жойлашган. Унга “Хожа Самандар Термизий” номи қўйилди.

Ушбу жоме Сурхондарё вилояти Адлия бошқармаси томонидан давлат рўйхатидан ўтказилиб, бу тўғридаги гувоҳнома масжид ходимларига топширилди.

Аллоҳ таоло ушбу масжид қурилиши ва очилишига сабабчи бўлган ва унга ҳисса қўшган инсонлардан рози бўлсин! Халқимизга янги масжид муборак бўлсин!

Маълумот учун, шу билан Республикамизда масжидлар сони 2092 тага, Сурхон воҳасида эса 123 тага етди.

Ўзбекистон мусулмонлари идораси матбуот хизмати

ЎМИ матбуот хизмати

Ўзбекистон – ҳуқуқий демократик давлат. Шу боис юртимиз фуқароларининг барча ҳуқуқлари қатори виждон эркинлигининг ҳуқуқий кафолатлари ҳамда унинг амалиётда тўла-тўкис таъминланишини эътиборга олиш зарур. Зеро, диний эътиқод бу фуқароларнинг нозик туйғулари бўлиб, унинг ўзига хос ҳассос жиҳатлари мавжуд.

Куни кеча муҳтарам Президентимиз Шавкат Мирзиёев Ўзбекистон Республикасининг “Виждон эркинлиги ва диний ташкилотлар тўғрисида”ги Қонунини имзолади. Қонун расимй эълон қилинган кундан кучга кирди.

Янги қонун аввалгиларидан анча такомиллашган, энг муҳими, виждон эркинлиги борасидаги инсон манфаатлари ва ҳуқуқий кафолатлари қамраб олинган. Чунончи, янги қонун билан диний таълим муассасаларида диний таълим берувчиларга марказий органнинг алоҳида розилигини олиш талаби, диний ташкилотни рўйхатдан ўтказиш учун нотариал тасдиқланган ҳужжатларни тақдим этиш тартиби, диний ташкилотни тузишда маҳалла фуқаролар йиғинлари розилигини олиш талаби бекор бўлди.

Шунингдек, диний ташкилотларни рўйхатдан ўтказиш тартиби ҳам енгиллаштирилди, яъни:

– диний ташкилотни тузиш учун ташаббускорларнинг сони 100 нафардан 50 нафарга қисқартирилди;

– диний ташкилотни тузиш ҳақидаги йиғилиш ўтказилгандан кейин 6 ой мобайнида (амалда 3 ой) адлия органига мурожаат қилиш ҳуқуқи мустаҳкамланди;

– тақдим этиладиган ҳужжатлар сони қисқарди;

– рўйхатдан ўтказиш билан боғлиқ хизматлар тўлиқ электрон кўринишда амалга оширилиши жорий этилди;

– диний ташкилотни рўйхатдан ўтказиш учун тақдим этилган ҳужжатларни кўриб чиқишнинг 3 ойлик муддати 1 ой этиб белгиланди;

– рўйхатдан ўтказишни рад этиш асослари аниқ белгиланди.

Янги қонунда фуқароларнинг жамоат жойларида ибодат либосларида юришларига йўл қўйилмаслигига оид чеклов бекор қилинди.

Таъкидлаб жоиз, мамлакатимиз аҳолисининг мутлақ кўпчилиги ислом динига эътиқод қилади. Виждон эркинлиги борасида бошқа динлар ва диний ташкилотлар фаолияти ҳам қонун асосида бир хил белгиланди ва воқеликда шундай ижро қилинади.

Виждон эркинлиги – бу фуқароларнинг хоҳлаган динга эътиқод қилиш ёки ҳеч қайси динга эътиқод қилмаслик бўйича кафолатланган конституциявий ҳуқуқидир.

Ислом дини бирор инсонни динга зўрлаб киритишга, ўз эътиқодини бошқаларнинг хоҳишига қарши ўлароқ тиқиштиришга йўл қўймайди. Бу ҳақда Аллоҳ таоло бундай марҳамат қилади: «Агар Раббингиз хоҳласа эди, Ер (юзи)даги барча кишилар ёппасига имон келтирган бўлур эдилар. Бас, Сиз одамларни мўмин бўлишларига мажбур қиласизми?!» (Юнус сураси, 99-оят).

Бош Қомусимизнинг 31-моддасида: “Ҳамма учун виждон эркинлиги кафолатланади. Ҳар бир инсон хоҳлаган динига эътиқод қилиш ёки ҳеч қайси динга эътиқод қилмаслик ҳуқуқига эга. Диний қарашларни мажбуран сингдиришга йўл қўйилмайди”, деб белгилаб қўйилган.

Бу Қуръони каримнинг Бақара сураси 256-ояти мазмуни билан ҳамоҳангдир. Аллоҳ таоло марҳамат қилади: «Динда зўрлаш йўқ, зеро, тўғри йўл янглиш йўлдан ажрим бўлди. Бас, ким шайтонни (ёхуд бутларни) инкор этиб, Аллоҳга имон келтирса, демак, у бузилмас, ишончли ҳалқани тутибди. Аллоҳ эшитувчи ва билувчидир», дейилган.

Ояти кариманинг нозил бўлишига ушбу воқеа сабаб бўлган: «Мадиналик Абул Ҳусайн деб аталувчи бир мусулмон киши насроний динидаги икки ўғлини ислом динини қабул қилишга мажбур этган. Лекин улар кўнишмаган. Шунда ота ва ўғиллар бу муаммони ҳал қилиб бериш учун Пайғамбаримиз соллаллоҳу алайҳи ва салламга мурожаат қилишган. У зот ўғилларини Исломга мажбуран киритишдан отани қайтарганлар” (“Мадорик ат-танзил ва ҳақоиқ ат-таъвил”).

Барча замон ва маконларда турли дин ва миллатларга мансуб аҳоли орасида ўзоро тотувликнинг мавжудлиги барқарор ривожланиш омили ва кафолатларидан бири бўлиб келган. Бу эса, ўз навбатида, жамиятда ҳаётий муҳим бўлган ҳуқуқларнинг, хусусан, диний эркинликларнинг таъминланганлигига ва миллий ўзига хос маданиятларнинг ҳимояланганлигига асосланган.

Хулоса қилиб айтганда, “Виждон эркинлиги ва диний ташкилотлар тўғрисида”ги янги қонунда диний-маърифий соҳада олиб борилаётган кенг кўламли ислоҳотларнинг изчил давоми сифатида ҳар бир инсоннинг виждон эркинлигини таъминлаш учун қулай шарт-шароитларни яратишга, ҳуқуқни қўллаш амалиётига аниқликлар киритишга алоҳида эътибор қаратилган. Бу эса, 130 дан зиёд миллат ва элат яшаётган Ўзбекистонда миллатлараро тотувлик, диний бағрикенгликни таъминлашда муҳим ҳуқуқий асос бўлиб хизмат қилади.

Жасурбек домла РАУПОВ,

Тошкент вилояти бош имом-хатиби