muslim.uz
Ўзбекистон вакиллари "Arabian Travel Market – 2021" сайёҳлик кўргазмасида
Дубайда сўнгги 18 ой ичида халқаро туризм соҳасида дунёдаги биринчи оммавий тадбир — «Arabian Travel Market-2021» (АТМ-2021) халқаро сайёҳлик кўргазмаси иш бошлади, деб хабар бермоқда «Дунё» АА.
«Саёҳат ва туризмнинг янги даври» шиори остида ўтаётган ушбу халқаро тадбирда дунёнинг 62 мамлакати, жумладан, Ўзбекистон, БАА, Саудия Арабистони, Италия, Германия, Кипр, Миср, Озарбайжон, Беларусь, Арманистон, Индонезия, Малайзия, Жанубий Корея, Мальдив ороллари, Филиппин, Таиланд, Мексика ва бошқа мамлакатлар компаниялари қатнашмоқда.
Таъкидлаш керакки, мазкур кўргазмада Марказий Осиё минтақасидан фақат Ўзбекистон ўзининг алоҳида стенди билан иштирок этмоқда.
Туризм ва спорт вазирлиги, «Анур тур», «Долорес тур» компаниялари, «Хайят» меҳмонхонаси ва бошқа сайёҳлик ташкилотлари вакиллари томонидан ташкил этилган Ўзбекистон стенди бўлажак сайёҳлар ва кўргазма ташкилотчиларининг эътиборини тортмоқда.
Кўргазма доирасида БАА ва Яқин Шарқдан Ўзбекистонга сайёҳлар оқимини кўпайтириш, миллий сайёҳлик брендини тарғиб қилиш масалалари юқорида қайд этилган сайёҳлик компаниялари вакиллари иштирокида муҳокама қилинди.
Кўргазма 19 майга қадар давом этади.
Ўзбекистон мусулмонлари идораси матбуот хизмати
Иброҳим алайҳиссаломнинг дуоси ва Исмоил алайҳиссалом (Аудио)
ЎМИ матбуот хизмати
Муфтий ҳазратлари Афғонистон делегациясини қабул қилди
Кеча, 18 май куни Ўзбекистон мусулмонлари идораси раиси, муфтий Усмонхон Алимов ҳазратлари Афғонистон Ислом Республикаси Миллий ярашув олий кенгаши раиси маслаҳатчиси Муҳаммад Муҳсин Донеш жаноблари бошчилигидаги делегацияни қабул қилдилар.
Мулоқот давомида муфтий Усмонхон Алимов ҳазратлари Афғонистон уламоларини ташриф билан қутлаб, икки давлат ўртасидаги ҳамкорлик алоқаларини ривожлантириш, қардош халқ ўртасидаги дўстлик ришталарини мустаҳкамлаш борасида амалга оширилаётган ишлар тўғрисида сўз юритдилар. Ўзбекистон ҳукумати ва халқи Афғонистонда доимо тинчлик бўлиши тарафдори экани ва бу йўлда қўлидан келган барча саъй-ҳаракатларни амалга ошириши, экстремизмга қарши курашда уламоларнинг ҳамкорлигини ривожлантириш ҳар томонлама манфаатли экани, бундай ишлар бундан кейин ҳам давом этишини таъкидладилар.
Муҳаммад Муҳсин Донеш самимий қабул учун миннатдорлик билдириб, икки халқни муштарак илдизлар бирлаштириб туриши, охирги йилларда дўстони алоқалар ривожланиб бораётгани ҳақида сўзладилар. Шунингдек, ушбу ташрифдан мақсад икки давлат уламолари ҳамкорлигини ривожлантириш, экстремизмга қарши кураш ишларида алоқаларни мустаҳкамлаш, диний соҳа ходимлари ўртасида ўзаро тажриба алмашиш эканини қайд этдилар.
Шунингдек, учрашувда Балҳ вилояти ҳаж ва вақф бошқармаси бошлиғи Маҳмуд Донешжу Муҳаммад Бунёд сўз олиб, Ўзбекистон замини қадимдан Ислом дини тамаддуни маркази бўлиб келгани, Мовароуннаҳр ва Балҳ уламоларининг асарлари 200 дан зиёд мамлакатда ўқитилиши, уларнинг илмий мероси тараққиёт учун замин бўлишини таъкидладилар.
Учрашув давомида меҳмонлар Ўзбекистонда диний соҳадаги ишлар, хусусан, масжид-мадрасалар фаолияти, илмий марказлар ва ихтисослашган мактаблар ишлари ҳақида эшитиб, жуда ҳам қувонганлари, Ислом динининг мўътадил ғояларини халққа етказилиши ўзининг ижобий самарасини бераётгани, қадимда Ўзбекистон замини Ислом динининг сиймоси, уламолари эса дин пешвоси бўлгани, бугунги кунда ҳам Ўзбекистон ана шу йўлдан кетаётганини яна бир бор тасдиқладилар.
Дўстона ва самимий руҳда ўтган учрашув давомида муҳокама этилган мавзуларда ҳамкорлик қилиш бўйича ўзаро келишиб олинди.
Ўзбекистон мусулмонлари идораси матбуот хизмати
Альбир Крганов: Ўзбекистондаги ислоҳотлар дунёдаги обрўли давлатлар қаторига қўшилишга хизмат қилади
Россия мусулмонлари кенгаши раҳбари, Москва муфтийси Альбир Крганов «Дунё» АА мухбирига берган интервьюда Ўзбекистонда тарихий ва маънавий-маърифий меросни асраб-авайлаш, аҳолининг диний амалларни эмин-эркин бажариши учун шарт-шароитлар яратиш, ўзбек халқининг миллий ва диний-маърифий қадриятлари, шу жумладан, ислом динининг инсонпарварлик ғояларини ёш авлодга етказиш борасида қилинаётган ишлар ҳақида ўз фикр-мулоҳазаларини изҳор қилди.
– Россия ва Ўзбекистон алоқаларининг мустаҳкамлиги, мамлакатларимиз диний-маърифий ташкилотлари ўртасидаги ўзаро ишонч ва муносабатларнинг юқори даражада экани, бизга берган барча неъматлари учун Аллоҳ таолога шукроналик билдираман, - деди А.Крганов. - Ўзбекистон мусулмонлари идораси ва Россия мусулмонлари маънавий ассамблеяси ўртасида ҳамкорлик бўйича битим имзоланган. Ушбу ҳужжат доирасида мана бир неча йилдирки Рамазон ойида ўзбекистонлик қорилар Россия масжидларида Қуръонни хатм қилмоқдалар.
Биз ислом мазмун-моҳиятини чуқур ўрганиш учун Ўзбекистон билан ўзаро алмашинувларни фаоллаштираяпмиз. Россияликлар Ўзбекистон ўқув юртлари, жумладан, Ислом академияси ва бошқа исломий олий ўқув юртларида таҳсил олмоқда. Ўзбекистонлик имомлар ва талабалар эса Булғор ислом академияси ва бошқа олий таълим масканларида ўқиётгани ҳам қувонарлидир.
Ўзбекистон диний ташкилотлари билан доимий алоқаларимиз мавжуд. Хусусан, Ўзбекистон мусулмонлари идораси раиси, муфтий, ҳамкасбимиз ҳурматли Усмонхон Алимов билан яқин мулоқот ўрнатганмиз. У киши билан бугун ислом оламида юз бераётган вазият ҳақида мунтазам фикр алмашиб турамиз. Алҳамдулиллаҳ, ўзбекистонлик муҳтарам зотнинг яхши маслаҳат ва насиҳатлари биз учун ҳамиша жуда фойдали бўлиб келмоқда. Биз бу муносабатларни жуда қадрлаймиз.
Ўзбекистонда диний ва давлат идораларининг яқин ҳамкорлиги натижасида мамлакатда анъанавий ислом, ҳанафий ақидаси ва Мотуридий таълимотини мустаҳкамлашга қаратилган маърифий лойиҳалар амалга оширилмоқда. Бу муборак заминда ислом динининг дунёга машҳур бўлган буюк алломалари яшаб ўтганлар, улар шу ерга дафн этилганлар. Ўзбек диёридан Имом Бухорий, Нақшбандий ва исломнинг бошқа муҳтарам улуғ зотлари етишиб чиққан.
Бугунги кунда Ўзбекистон раҳбарияти улуғ аждодлар қолдирган бебаҳо таълимотни ёшларга етказиш бўйича барча чораларни кўрмоқда. Буюк алломаларнинг асарларини замондошларимизга етказиш бўйича кенг кўламли ишлар қилинмоқда, кўплаб китоблар чоп этилмоқда.
Президент Шавкат Мирзиёевнинг мамлакатда ислом анъаналарини тиклаш ва мустаҳкамлашда кўрсатаётган кўмагини миннатдорлик билан қайд этишни истардим. Яқинда Ўзбекистонда Шайх Муҳаммад Содиқ Муҳаммад Юсуф номларида масжид қуриб, мусулмонларга топширилди. Шунингдек, яна бир нечта янги масжидлар бунёд этилди. Биз мамлакатингиздаги бу ижобий янгиликлар ва ўзгаришларни кузатиб, қувонч ҳиссига тўлмоқдамиз.
Ўзбекистонда давлат ташкилотлари ва диний идоралар ўртасидаги муносабатлар конструктив руҳда ва юқори савияда қурилган. Вазирлар Маҳкамаси ҳузуридаги Дин ишлари бўйича қўмита раҳбарияти ва бошқа мутасаддилар ўта мутаносиб ва тизимли иш олиб бормоқда.
Уруш ҳудудларидан Ўзбекистон фуқароларини қайтариш бўйича тизимли ишлар олиб борилаётгани катта эътирофга лойиқ. Бу одамлар ўз айбларини англади, Оллоҳ олдида ҳам, қонун олдида ҳам тавба қилди. Бугун давлат уларни рад этмади, чунки улар Ўзбекистон фуқароларидир. Мамлакат уларни яна ўз бағрига олмоқда, тинч ва осойишта ҳаёт учун шароит яратмоқда. Умид қиламанки, бу ака-укаларимиз ва опа-сингилларимиз давлат томонидан кўрсатилаётган инсонпарварлик кўмагини яхши англайди.
Мамлакатингизда ижтимоий масалаларни қўллаб-қувватлаш ва аҳолига ёрдам бериш борасидаги ишлардан яхши хабардормиз. Диний мазмундаги китоблар чоп этилмоқда. Уларни электрон ва рақамли ахборот воситаларида, қоғозда, китоб форматида ўқиш муҳим. Тошкент, Самарқанд ва Бухорода қатор олий ўқув юртлари ташкил этилди. Яратилаётган бундай имкониятлар учун барчамиз Аллоҳга шукр қилишимиз керак.
Ўзбекистонда диний-маърифий соҳада қилинаётган ишлар республикани дунёдаги обрўли давлатлар қаторига қўшишга ва минтақадаги муҳим марказга айлантиришга хизмат қилмоқда.
Ўзбекистон мусулмонлари идораси матбуот хизмати
Қирқ ёш бандага Аллоҳдан юборилган элчидир
Қирқ ёшда бўлсанг ёки яқинлашган бўлсанг ёхуд ундан ўтган бўлсанг билгинки, биргина қирқ ёшни Қуръон алоҳида дуо билан хослагандир. Аллоҳ таоло “Токи у камолга етиб, қирқ ёшга кирганида: «Роббим Ўзинг менга ва ота-онамга берган неъматларингга шукр қилишимга ва сен рози бўлган солиҳ ишларни қилишимга илҳом бергин. Ва менинг зурриётларимни ҳам солиҳлардан қилгин. Албатта, мен тавба қилдим ва албатта, мен мусулмонларданман», деди" деган. У ўтган умр учун шукр, келажак учун дуо ва Ислом динига мансубликнинг эълонидир. Уламолар мазкур дуонинг барча учун, айниқса қирқ ёшга етганлар учун ўта аҳамиятли дуо эканини таъкидлайдилар. У амаллар қабул бўлишининг сабабларидан биридир. Чунки бу оятдан кейинги оятда Аллоҳ таоло “Ана ўшаларнинг энг яхши амалларни қабул қилиб, ёмонликларини ўтиб юборурмиз. Улар жаннат эгаларидандир” дейди.
Асарларда “Ким қирққа кирган бўлса энди у охират бозорига кирибди” деган ривоят келади.
Эй қирққа кирганлар, бу ёғига ўзингизни охиратга тайёрланг. Ҳадисларда умматнинг ёши кўп ҳолларда олтмиш билан етмиш орасида бўлиши айтилган. дейди.
Асарларда “Ким қирққа кирган бўлса энди у охират бозорига кирибди” деган ривоят келади.
Эй қирққа кирганлар, бу ёғига ўзингизни охиратга тайёрланг. Ҳадисларда умматнинг ёши кўп ҳолларда олтмиш билан етмиш орасида бўлиши айтилган. “Умматимнинг етмишга борадиган камдир”.
Қирқ ёки элликдан ўтган инсон билиши керакки, қолган умр ўтганидан кўра камроқ бўлишининг эҳтимоли юқоридир. Ўтгани ҳам қандай тез кетди, а? Кўз очиб юмгунча. Ўтгани кўз очиб юмгунча кетган бўлса ва қолгани ундан камроқ бўлса, у қанчалик тез ўтаркин? Қарабсизки, тупроқ остидасиз. Қирққа кирган инсонга огоҳлик қўнғироғи чалинди. Ундан қирқ ёз, қирқ қиш, қирқ баҳор ва қирқ куз ўтиб кетди. Ушбу ёшда умрининг ярми ўтиб инсон қуйидаги осон бўлмаган саволларга рўбару келади.
Ҳаётда муваффақиятга эришдингми?
Иш ва касбингдачи?
Оилавий ҳаётдачи?
Асосийси, Раббинг билан алоқангда нималарга эришдинг?
Ҳаётни етмиш, саксонга кирганлардан сўранг. “Туш кўргандекман. Кечагина ўйнаб юрган бола эдим. Бугун ўрилишга тайёрман. Учрашув куни яқин” деган жавобни оласиз.
Тўқсонга кирган инсоннинг вафотини кўриб қирқ ёки эллик ёшли одам бизга ҳали бор деб ўйлайди. Атрофидан қанчаси кетганини ҳис қилмайди. Барча нима биландир овора. Емоқ, ичмоқ билан. Касби кор ва ризқ билан. Хотин ва болалар билан. Тижорат ва сафарлар билан. Уй ва машиналар билан. Ваҳоланки, ўзи сезмаган ҳолда умри тугаб бормоқда.
Масалан, ўн кунлик сафарга борсангиз, еттинчи кундан қайтишни ўйлай бошлайсиз. Ишларни тезроқ битириш, билет олиш ва совға салом танлаш хаёлингизни банд қилади. Демак, еттинчи кунда ўйлар тамоман акс тарафга ўзгаради. Қирққа етганлар қайтиш тадоригини кўринг! Ҳақиқий жасорат ўлимдан қочиш эмас, унга тайёр туриш. Қачонгача ахир? Унга бурилиш вақти келмадими? Тавба ва истиғфор вақти келмадими? Қирққа кирганингда ҳам Раббингга қайтмасанг қачон қайтасан?
Қирқ ёш бандага Аллоҳдан юборилган элчидир. У “Эй бандам! Учрашув онлари яқинлашди. Учрашувга тайёрмисан” демоқда”.
Муҳаммад Ротиб Нобулсий раҳимаҳуллоҳ
Таржимон Ҳабибуллоҳ Жўрабоев, ТИИ ўқитувчиси