muslim.uz
Мулла Бозор Охунд мақбараси ҳақида биласизми?
Халқимизнинг табаррук масканларидан бири бўлган Наманган шаҳридаги ушбу мажмуа бугунги кунга келиб гўзал масканга айланган, дея хабар бермоқда «Дунё» АА.
Наманганга ташриф буюрсангиз, Лаббайтоға даҳасида жойлашган Мулла Бозор Охунд ёдгорлиги ўзининг чиройи, нақшинкор безаклари ва бетакрор қурилиш архитектураси билан ўзига мафтун қилади.
Мулла Бозор Охунд ёдгорлик мажмуаси 3 қисмдан иборат: масжид, асосий бино (хонақоҳ ва зиёратгоҳга кириш) ва дарвозахона. Ҳовлида диаметри 10 метр бўлган ҳовуз бор. У аста-секин 8 та ўттиз сантиметрлик қадам бўйлаб пастга тушади. Унинг асоси темир-бетон панеллардан иборат бўлиб, деворлар ва асосий кириш эшиги ноёб фигурали дизайнда пишиқ ғиштдан қурилган.
Жоме масжиднинг асосий катта хонаси - хонақоҳи ертўлали, пишиқ ғишт ва темир-бетон панелдан қурилган. Ўлчами 30×24 метр. Сатҳи 720 квадрат метр. Уч томони айвон. Устунлар ва пештоқига миллий безаклар берилиб, пишиқ ғиштдан тикланган. Ўлчами 36×6 метр ва 24×6 метр, сатҳи 576 квадрат метр. Асосий дарвозадан киришда қибла томонда айвонга туташ ҳолда 16 метрли мезана - минора пишиқ ғиштдан безакли қилиб тикланган.
Мажмуага ташриф буюрган зиёратчилар ва сайёҳлар, улуғ донишманд ҳаёти ва фаолияти ҳақида маълумотлар олиш билан бирга моҳир усталар маҳоратидан баҳраманд бўлади.
Маълумот учун, Мулла Бозор Охунд 16-аср охирида Наманган шаҳрида таваллуд топган. У киши Наманган мадрасаларида илм олган. Ўз даврининг фиқҳ, ҳадис, тарих, география, илми-ҳисоб, адабиёт, руҳиятшунослик билимларини мукаммал эгаллаган. Шунингдек, туркий, арабий ва форсийда ижод қилган.
Илмга ташналик алломани Туркистоннинг илму фан марказларидан бири - Бухорога бошлаб борган. Талабалик йиллари ошпазга шогирд тушиб, тирикчилик ўтказган. Бухорода донишманд олим Мирзо Баҳодир Бухорий билан танишган, ундан таълим олган.
Кейинчалик Ўрта ва Яқин Шарқ мамлакатлари бўйлаб саёҳат қилган. Қошғарнинг Хўтан, Ёрканд шаҳарларида бўлган. Маълумотларга кўра, Мулла Бозор Охунд 1668 йил Наманганда вафот этган.
Муқаддам у кишининг қабри устида мақбара ва мадраса бунёд этилган. Ушбу иншоотлар ХХ асрнинг 30-йилларида бутунлай бузиб юборилган эди. 1993 йилда мақбарани меъморий мажмуа сифатида қайта тиклаш тўғрисида қарор қабул қилинди. Қурилиш ишлари 1994 йилнинг 18 майида тугатилди. Уни Наманган бош меъмори Абдужаббор Абдуғаффоров бошчилигидаги ёш, иқтидорли меъмор Одилжон Қодиров амалга оширди.
Ўзбекистон мусулмонлари идораси матбуот хизмати
Мусулмон олима замонавий ракеталарникидан 10 баробар тез ҳаракатланадиган двигатель кашф қилди
АҚШ энергетика вазирлигининг Принстон Плазма физикаси лабораторияси (PPPL) олими Фотима Иброҳимий бир кун келиб инсонларни Марсга олиб чиқа оладиган янги термоядро ракетасини ихтиро қилди.
Ушбу двигатель ёрдамида Ердан Марсгача 55 млн км масофани икки кундан кам вақт ичида босиб ўтиш мумкин. Иброҳимийнинг термоядро двигатели космик кемани секундига 500 километрга – соатига 1,8 миллион километрга тезлаштира олади.
Mynamaz.ru маълумотларга кўра, Иброҳимий киритган янгилик зарраларни кўчириш учун электр майдонларидан фойдаланадиган замонавий ракета двигателларига қараганда 10 баробар тезроқ Қизил сайёрага космик қаҳрамонларни етказиб беради.
"Бу ғоя илк бор мен кеманинг устида ўтирганимда ва автомобилда газ чиқиши ва юқори тезликда чиқинди газ зарралари ўртасидаги ўхшашликлар ҳақида ўйлаётганимда 2017 йилда туғилган эди", - олимнинг сўзларидан иқтибос келтиради Dailymail нашри.
Ўзбекистон мусулмонлари идораси матбуот хизмати
РЎЗАНИНГ СУННАТ, МАКРУҲ ВА МУФСИДЛАРИ
– Рўза тутган кишига қандай ишларни қилиш суннат?
– Саҳарлик қилиш; субҳдан илгари рўзага ният қилиш; рўза билан нафсни ёмон ниятлардан тўхтатишни қасд қилиш; рўза бўлган ҳолда бефойда сўзлардан ҳамда ибосиз сўзларни гапиришдан ва эшитишдан ўзини сақлаш; киши билан уришмоқдан ва ҳар бир гуноҳ ишлардан ўзини тортиш; мумкин қадар зикр ва тасбеҳ ила ва ҳам Қуръон ўқимоққа машғул бўлиш; қуёш ботган вақтда шом намозини ўқимасдан илгари оғиз очиш суннатдир.
– Рўза тутган кишиларга қандай ишлар макруҳ ҳисобланади?
– Фойдасиз сўзларни сўзлаш; ибосиз сўзларни сўзлаш; одамлар билан ёқалашиш; ҳаммомга тушиш; сувга шўнғиш; таомни татиб кўриш; ўтар рўза, яъни бир кун кечгача рўза тутиб оғиз очмасдан иккинчи кун рўзасини давом эттириш каби ишлар макруҳ.
– Рўза тутган кишига қандай ишларни қилиш дуруст бўлади?
– Сотиб оладиган нарсаларни тил теккизиб татиб кўриш, зарур бўлганда таом чайнаб бериш, кўзига сурма тортиш, юзини мойлаш, мисвокдан фойдаланиш, қон олдириш, зулук солдириш, обдаста билан ғусл қилиш, совун билан покланиш дуруст бўлади, макруҳ эмас.
– Рўзани қандай нарсалар бузади?
– Кунжут қадар бўлса ҳам, таом ейиш; бир қатра бўлса ҳам, сув ичиш; эр билан хотиннинг якинлик қилиши рўзани бузади.
– Бир киши ўзининг рўза эканини била туриб ихтиёрий равишда рўзани бузадиган ишларни биринчи марта қилса, у киши нима қилиши лозим?
– Рўзасининг қазосини тутиши ва ҳам каффорат қилиши лозим.
"Ибодати исломия"дан.
Саудия Арабистони билан яна бир ҳамкорлик йўлга қўйилади
Ўзбекистон Саудия Арабистонига заъфарон савдосини йўлга қўйиши ҳақида хабар берган эдик. Бу савдо алоқалари кундан-кунга ривожланиб бормоқда жумладан, Ўзбекистон элчиси Улуғбек Мақсудов миллий маҳсулотларни Саудия бозорига экспортини кенгайтириш масалаларини муҳокама қилиш учун Саудия Арабистонининг “Edweiat” компанияси раиси Сулаймон Ас-Самарий билан учрашди.
Мамлакатимиз элчихонаси маълумотига кўра, “Edweiat” компанияси подшоҳликда табиий ва органик маҳсулотлар савдоси билан шуғулланади. Компания раҳбари Сулаймон Ас-Самарий эса Ўзбекистонда “Меҳригиё” бренди остида гиёҳлар ва табиий ўсимликлардан тайёрланган турли маҳсулотларни Саудия Арабистонидаги дилери этиб тайинланган.
“Меҳригиё” компанияси маҳсулотларига катта қизиқиш билан қараши бежиз эмаслигини Ас-Самарий таъкидлаб: “Компания кичик корхона шаклида ташкил етилган бўлиб, сўнг фитотерапия ва муқобил тиббиёт соҳаси мутахассислари саъй-ҳаракатларини бирлаштириш, замонавий фармацевтика ва қадимий Шарқ табобатининг илмий ютуқларини ўзида мужассам қилган. Ҳозирда ушбу бренд Ўзбекистоннинг ички бозорида ҳамда чет давлатларда саломатлик ва гўзаллик учун илғор маҳсулотларни тақдим этишга муваффақ бўлмоқда”, - деди у.
Мазкур соҳада Ўзбекистон билан ҳамкорлик қилаётганидан Саудиялик ишбилармон мамнун эканини ва у мамлакатимизга ташрифи давомида маҳсулот тайёрлаш жараёнини яқиндан кузатганини айтган. Мулоқотда дастлабки босқичда Ар-Риёд шаҳрида “Меҳригиё” маҳсулотлари савдоси учун махсус дўкон ташкил этилиши ва унинг очилиш маросимини ўзбек бренди асосчилари иштирокида ўтказилишини маълум қилган.
azon.uz