Активлаштирилган кўмир таблеткалари инсон  саломатлигидаги қандай муаммоларни ҳал қилади?

Активлаштирилган кўмир — инсон организмини тозалашда дунёдаги энг қадимий ва оммавий услублардан биридир.

У минг йиллар давомида шарқ табобатида, хусусан хитой табобатида заҳарланишга қарши восита сифатида қўлланиб келган.

Бизнинг давримизда эса, бу восита алкогол ва гиёҳвандлик моддалари билан заҳарланишда биринчи ёрдам воситаси сифатида ишлатилади.

Детоксификация — активлаштирилган кўмирнинг ёлғиз шугина бўлмаган, бир қатор хоссаларидан энг асосийсидир.

Агар сиз овқат ҳазм қилиш жараёнини яхшилаш, холестерин миқдорини пасайтириш  ва ҳатто қартайишни секинлаштириш учун табиий восита излаётган бўлсангиз — активлаштирилган кўмир бу соҳада мислсиз воситадир.

Активлаштирилган кўмирнинг саломатлик учун

10 хил фойдали хоссалари:

1. Метеоризм ва қорин дам бўлишидан фойдали восита  
Қорин дам бўлиши ҳаммада ҳам содир бўлиб туради. Мутахассислар фикрича, ҳар бир киши суткасига 14 марта дамдан фориғ бўлиб туриши меъёрий-табиий ҳолат ҳисобланади. Лекин сизни метеоризм ёки оғриқли қорин дам бўлиши безовта қилаётган бўлса, бунда сизга активлаштирилган кўмир ёрдам беради.

Тадқиқотлар шуни кўрсатадики, овқат истеъмолидан олдин активлаштирилган кўмир таблеткалари истеъмол қилинганида,  ичакларда йиғилган газлар миқдори сезиларли равишда қисқаради.

2. Холестерин миқдорини пасайтириш

Холестерин миқдорининг кўпайиши юрак-қон томир касалликлари келиб чиқиш эҳтимолини икки баробарга кўпайтиради.

Бир ой мобайнида 8 г миқдордаги активлаштирилган кўмир таблеткасидан уч маҳал ичиб юрган кишиларда LDL-зарарли холестерин миқдори 41% га пасайганини, ва фойдали  HDL-холестерин эса, 8 % га кўпайганини тадқиқотлар исботлади.

3. Буйраклар саломатлигини асраш
Ҳар куни инсон буйраклари тахминан 115-140 литр қонни тозалаб беради, натижада  чиқинди ва ортиқча суюқликлардан иборат 1-2 литр пешоб ажратиб беради. Жигар билан биргаликда буйраклар Яратганнинг табиатдаги энг мукаммал тозалаб берувчи тизимини ташкил этади.

Лекин овқатланиш давомида шакар, туз, жониворлар оқсили, ёғлар ва турли консервантларни ҳаддан ташқари суистеъмол қилиш турли касалликлар ва буйрак фаолиятида етишмовчиликлар келиб чиқишига сабаб бўлиши мумкин.

Активлаштирилган кўмир пешоб, бошқа заҳарли ва зарарли суюқликларни организмдан чиқариб юбориши сабабли, бу фойдали табиий шифобахш восита буйраклар саломатлигини сақлашда беқиёс ёрдам беради.

4. Овқатланишдан содир бўлган заҳарланишни тезда баотараф қилиш

Овқатланишдан содир бўлган заҳарланиш ҳолати кишилар ўртасида кенг тарқалган ҳодиса — фақат биргина АҚШда ҳар йили кишилар ўртасида 48 млн заҳарланиш ҳолати қайд этилади.
Кўнгил айнишдан, ич кетишидан, қоринда бўладиган оғриқдан, овқатланишдан бўладиган заҳарланишдан сўнг йўқотиладиган кунлардан ҳимояланиш усулларидан бири бу — мазкур нохуш ҳолатлар кузатилганининг дастлабки лаҳзаларидаёқ активлаштирилган кўмир таблеткаларидан истеъмол қилиш.  Активлаштирилган кўмир истеъмол қилиш овқатланишдан кузатиладиган заҳарланишда ҳам тавсия этилади, чунки у токсин (заҳарли) моддаларни бартараф қилади.

5. Терининг майин ва юмшоқ бўлиш сири

Кир ва ёғ теридаги тешикчаларни бекитиб қўяди. Улар юз терисига салбий таъсир кўрсатиб, инсонни қаримсиқ қилиб кўрсатади, терини тозалаш учун ишлатиладиган замонавий воситалар эса, зарарли кимёвий моддалар билан тўйинтирилган.

 Активлаштирилган кўмир гўё магнит каби тери тешикчаларидан кир ва ёғларни сўриб олади, терини тоза, мусаффо ва юмшоқ ҳолга келтиради.

6. Ипакдек товланадиган сочлар 

Инсон терисининг кўркамлиги ва чиройига зарар етказувчи токсинлар, кир ва ёғлар сочларга ҳам ўз таъсирини кўрсатади, улар кўринишини нохуш ва кўримсиз ҳолатга олиб келади.

Активлаштирилган кўмир соч фолликуллари(тухум ҳужайра, соч илдизи тўқималари)ни тозалайди, уни ипакдек майин ва чиройли товланадиган қилади. Экологик зарарли химикатлардан иборат шампунлардан фарқли ўлароқ,     активлаштирилган кўмир 100 % экологик тоза, таббий моддалардан ташкил топган воситадир.

7. Тишларни садафдек оқартириш

Тиш чўткасига       активлаштирилган кўмирни майдалаб сепиб, ҳафтасига 2-3 марта тишлар ювилса, кифоя қилади. Активлаштирилган кўмир тиш эмалини тозалайди, тишлар сиртида пайдо бўлаётган кераксиз кир қатламини микроскопик зарралардан тозалаб, асл-мусаффо ҳолига келтиради.

8. Оғиздан ёқимли ҳид келиши

Оғиздан келадиган нохуш ҳиддан фориғ бўлишда ҳам активлаштирилган кўмир қўл келади. Бу нафақат нохуш ҳидни йўқотувчи восита, балки оғиз бўшлиғидаги кислота-ишқор мувозанатини меъёрига келтирувчи табиий воситадир, бу эса тиш ва милкларни ҳар хил касалликлар ва бактериялардан ҳимоялайди. Тишингизни активлаштирилган кўмир билан тозаланг, ҳаяжонланишга ўрин йўқ, у мазага эга эмас, қоралиги ҳам сизни ўйлантирмасин, оғизни ғарғара қилиб ювилганда кўмир ранги ҳам ювилиб кетади.

9. Эрта қартайишнинг олдини олиш

Активлаштирилган кўмир фаоллиги инсонни ёшартириши, тери ва сочларга чирой бериши, тишларни садафдек оқартириши билан чекланмайди. Активлаштирилган кўмир таблеткаларини мунтазам истеъмол қилиш соғлом ҳужайраларни ўлдириб, тананинг эрта қартайишига сабаб бўлувчи зарарли токсин ва шлакларни организмдан чиқариб юбориши илмий тадқиқотлар асосида исботланган.

10. Овқат ҳазм қилиш тизимини тозалаш

Сабзавот ва мевалардаги пестицидлар, ҳайвонни сўйилмасидан олдин уни семиртириш учун қўшиладиган гўштидаги гормонлар, ичимлик сувлардаги кимёвий моддалар  — биз ўта токсик шарт-шароитларда яшаяпмиз.

Бу зарарли моддалар инсон организми ошқозон-ҳазм тизимида  йиғилиб боради, бу эса, шамоллаш касалликларини келтириб чиқаради ва куч-қувватни кесади. Мустаҳкам соғлик ва яхши кайфият учун ошқозон-ичаклар ҳазм тизимини мунтазам тозалаб туриш лозим. Бу мақсадга эришишнинг энг яхши воситаси — активлаштирилган кўмир таблеткаларини истеъмол қилиш. Етти кун кўмир таблеткалари билан детоксификация (зарарли моддалардан организмни тозалаш) қилиш — сизнинг саломатлигингизни тиклашга асосдир. 

Жалолиддин Нуриддинов тайёрлади

31 октябрь 2017 йил

2017 йил 31 октябрь куни Малайзия Республикаси Жоҳор штати Дин ишлари бўйича қўмита раиси ўринбосари Яҳё Аҳмад бошчилигидаги 20 кишидан иборат делегация Ўзбекистон мусулмонлари идорасига ташриф буюрди.

Меҳмонларни Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раиси Ортиқбек Юсупов, Ўзбекистон мусулмонлари идораси раиси ўринбосари Шайх Абдулазиз Мансур ва Ўзбекистондаги Ислом цивилизацияси маркази директори Шоазим Минаваров қабул қилди.

Дин ишлари бўйича қўмита раиси О.Юсупов меҳмонларини ташриф билан қутлаб, Ўзбекистонда дин соҳасида амалга оширилаётган ишлар, турли миллат ва дин вакиллари ўртасидаги ўзаро ҳамжиҳатлик тўғрисида гапирди. Шунингдек, у ўз сўзида мамлакатимизда зиёрат туризмини ривожлантириш бўйича қилинаётган кенг кўламли саъй-ҳаракатлар тўғрисида алоҳида тўхталди. Малайзия делегацияси раҳбари Яҳё ибн Аҳмад жаноблари ҳам ушбу ташрифдан кўзланган мақсад, дўстона алоқаларни ривожлантириш ва уни янги босқичга олиб чиқиш эканини билдирди.

Шунингдек, меҳмон ўз сўзида, Ўзбекистон замини қадим-қадимдан азиз авлиёлар, олиму уламолар ватани экани, бу диёрдан Имом Бухорий, Имом Термизий, Баҳоуддин Нақшбанд каби улуғ зотлар етишиб чиққанини сўзлади. Шу нуқтаи назардан, Яҳё ибн Аҳмад малайзияликлар доимо руҳий озуқа оладиган ва инсон қалби таскин топиб, кишини маънавий юксалишига хизмат қиладиган Ўзбекистондаги мана шундай табаррук қадамжоларнинг зиёратига ошиқишларини алоҳида таъкидлаб ўтди.

Ўз навбатида Дин ишлари бўйича қўмита раиси О.Юсупов муҳтарам Президентимиз томонларидан мусулмон давлатлари, айниқса, Малайзия, Индонезия каби мамлакатлардан Ўзбекистондаги муқаддас қадамжоларга сайёҳларни жалб қилиш бўйича ишлар жадал кетаётганини алоҳида қайд этди. О.Юсупов сўзида давом этиб, туризм йўналишидаги ҳамкорликни ривожлантириш бўйича, ўзи қўмита раиси сифатида, Малайзия давлати бўйича Ўзбекистон томонидан масъул эканини таъкидлаб, ҳозирги кунда ушбу диёрдан юртимизга 5000 сайёҳ зиёратга келиши, келгуси йилларда бу кўрсатгични икки бараварга ошириш режаси борлигини маълум қилди. Шу нуқтаи назардан Малайзия томони билан тўғридан-тўғри ҳамкорлик қилиш ва бу борада жуда кўп имтиёзлар борлигини изоҳлади.

Шунингдек, малайзиялик умра ва ҳаж зиёратчиларига ўз сафарларини Ўзбекистон давлати орқали амалга ошириб, диёримиздаги исломий обидаларни зиёрат қилиш таклифи тақдим этилди.

 Мулоқотда Ўзбекистондаги Ислом цивилизацияси маркази директори Шоазим Минаваров сўз олиб, республикамиз аҳолиси Малайзия давлатини жуда яхши билиши, унинг шаҳарлари ва диққатга сазовор ерларига жуда кўп фуқароларимиз саёҳат уюштиришларини сўзлаб берди. Марказ директори Малайзия халқи меҳмондўст ва бағрикенг экани, бу давлатда бир неча  миллат ва дин вакиллари дўст-иноқ бўлиб яшаши кўпчиликнинг ҳавасини келтиришини алоҳида таъкидлади. Ҳозирги кунда Ўзбекистондан Малайзия давлатига бир ҳафтада иккита рейс амалга оширилаётгани, келгусида худди шундай иккита рейс Малайзиядан Ўзбекистонга амалга оширилиши мақсадга мувофиқ эканини, - Ш.Минаваров қўшимча қилди.

Учрашувда Президентимиз ташаббуси билан туризм йўналишига катта эътибор қаратилаётгани, Малайзия билан туризм йўналиши очилаётгани, диний обидаларга зиёрат қилиш борасида ҳамкорлик қилиш жуда яхши натижалар бериши ҳақида ҳам сўз борди. Шу жумладан, бу борада барча зарур тадбирларни уюштириш, чартер рейсларни ташкил этиш, зиёрат қилиш мақсадида келаётган сайёҳлар учун виза ва рўйхатдан ўтиш тартибларини соддалаштириш борасида Ўзбекистон томони тайёр экани маълум қилинди.

Малайзия делегация раҳбари Яҳё ибн Аҳмад самимий қабул, дўстона учрашув ва зиёрат туризми бўйича амалий таклифлар учун ўз миннатдорлигини билдирди.

Ўзбекистон мусулмонлари идораси

Матбуот хизмати

Бугун 31 октябрь куни Америка Қўшма Штатларининг Халқаро диний эркинликлар комиссияси раиси Даниель Марк, комиссия аъзоси Джон Рускай, комиссия тадқиқотчиси Эндрю Коран Блюз ва Америка Қўшма Штатларининг Ўзбекистондаги элчиси Памела Спратлен хоним Ўзбекистон мусулмонлари идорасига келадилар. Уларни Ўзбекистон мусулмонлари идораси раиси, муфтий Усмонхон Алимов ҳазратлари қабул қиладилар. Учрашувда билдирилган фикр-мулоҳазалар, таклиф ва ташаббуслар ҳақида кейинроқ батафсил маълумот берамиз.

Ўзбекистон мусулмонлари идораси
матбуот хизмати

Аввал хабар берганимиздек, 2017 йил 29–31 октябрь кунлари Москва шаҳрида бўлиб ўтаётган “Ислом ақидаси ва академик исломшунослик: ҳамкорлик ва ривожланиш истиқболлари” номли илмий-маърифий анжуманда Ўзбекистон вакиллари иштирок этишмоқда. Вакилларимиз чиқишларидан фотолавҳаларни эътиборингизга ҳавола этамиз.

Ўзбекистон мусулмонлари идораси
Матбуот хизмати

 Маккаи мукаррамадаги Масжидул Ҳаром масжиди махсус хавфсизлик хизмати вакили Самиҳ Суламининг айтишича, Зам-зам қудуғига туташган минтақалардаги янги объектларни ишга тушириш лойиҳасини бошлаш ва тавоф майдонидаги кенгайтириш ишларини якунига етказиш доирасида тавоф майдонининг катта бўлаги қисқартирилди. Натижада ҳаж ва умра хавфсизлик хизмати лойиҳани бажариш жараёнида тавоф майдонида издиҳомнинг олдини олиш ҳамда зиёратчиларнинг хавфсизлиги ва соғлигига аҳамият қаратиш мақсадида бир қатор зарур чораларни кўриб, режа тузишди. Ушбу режага кўра, тавофга кириш йўли Подшоҳ  Фаҳд эшигига олиб келувчи ер ости йўлларидан эскалатор воситасида Ҳарами шарифга кириш йўли орқали амалга оширилади. Зиёратчилар тавоф майдонидан саъй майдонига Фатҳ эшигидаги йўлак орқали ўтишади. Тавоф майдонидан  фойдаланишга фақат умра зиёратчилари учун рухсат берилади. Ҳозирда ер қавати ва биринчи қаватдаги тавоф айланаси майдончаси  умра зиёратчилари учун тайёрлаб қўйилди.

   Самиҳ Сулами байтуллоҳ зиёратчиларини ўз саломатликларини муҳофаза этишлари учун хавфсизлик масъуллари билан ҳамкорлик қилишга ва тегишли кўрсатмаларга риоя этишга чақирди.

Халқаро алоқалар бўлими ходими

Илёс АҲМЕДОВ

тайёрлади