Бир неча йилдан буён хориж давлатлари диний идораларидан келган таклифлар асосида уламо ва қориларимиз чет мамлакатларда диний-маърифий тадбирларда иштирок этиб, таровиҳ намозларини адо этиб бермоқдалар.

Ана шундай қориларимиздан бири Тошкент шаҳридаги “Минор” масжиди имом ноиби Абдулбасир қори Камолов жорий йилда Россия Федерациясининг Москва шаҳридаги Москва мусулмонлари диний идораси ва Марказий регион "Москва муфтияти"да таровеҳ намозларида Қуръон хатмига ўтиб берди. Унда Москвадаги мўмин-мусулмонлар, хусусан, Москва муфтийси Албир ҳазрат Кирганов, ушбу шаҳарга ўқиш ва ишга борган ватандошлар иштирок этишди.

– Ўзбекистонлик Қуръон ҳофизи Рамазон ойида Москва мусулмонларини хатми Қуръон тиловати билан хурсанд қилди. Ўзбекистон Республикасининг масъул раҳбарлари ва муфтий Нуриддин ҳазрат Холиқназаровга Россия мусулмонлари диний ассамблеяси билан яқин ҳамкорлик қилганликлари учун чуқур миннатдорчилигимизни билдирамиз. Муфтийлик томонидан юборилган Камолов Абдулбасир ва қўшимча равишда таклиф этилган талабалар Муҳаммадсаид Солиқжонов ва Абдулғҳодий Исломжоновлар Москва мусулмонларига ташриф буюрганларида бир ой давомида таровиҳ намозларига Қуръони карим матнини тўлиқ ўқиб беришди. Улар ҳақли равишда мусулмонларнинг севгиси ва ҳурматини қозонишди. Абдулбасир Камолов байрам намозида мусулмонлар олдида нутқ сўзлаб, рус ва ўзбек тилларида Ўзбекистон муфтийсининг табрикномасини эълон қилиб, юртдошларимиз қалбидан жой олди. Мазкур фаолият муҳим ижтимоий-диний хусусиятга эга бўлиб, халқаро мулоқотни мустаҳкамлашга бебаҳо ҳисса бўлиб хизмат қилади.

Қардош мамлакатларимиз мусулмон умматини барпо этиш ва ривожлантириш, Ислом маърифатининг дастлабки асосларини тиклаш ва пайғамбаримиз Муҳаммад соллаллоҳу алайҳи ва салламнинг ҳақиқий таълимотларини оммалаштиришга қаратилган машаққатли ва баракали меҳнатингиз учун сизга раҳмат айтаман, – деб ёзади Албир ҳазрат Кирганов ўзининг ижтимоий тармоқдаги саҳифасида.

Шунингдек, Абдулбасир қори Камолов ва бошқалар томонидан ифтор дастурхони ва таровиҳ намозлари асносида йиғилганларга маърифий суҳбатлар қилиб берилди.

Ўзбекистон мусулмонлари идораси Матбуот хизмати

АҚШнинг Флорида штати Орлондо шаҳридаги Ал-Бухорий Ислом марказида Ўзбекистонлик имом-хатиблар мусофир ватандошларимиз билан бирга Рамазон ҳайити намозини адо этишди.

Ҳайит намози асносида уламоларимиз манфаатли мавъиза ва хайрли дуолар қилдилар.

Маълумот учун, АҚШдаги дипломатик ваколатхонамиз ташаббуси ва Ўзбекистон мусулмонлари идораси билан ҳамкорликда шу йилнинг 20 апрелидан 2 майга қадар ўзбекистонлик бир гуруҳ имом-хатибларнинг Америка Қўшма Штатларига ташрифи ташкил этилди.

Ушбу ташриф доирасида имом-хатиблар юртдошларимиз истиқомат қилаётган ва таҳсил олаётган Американинг 6 та шаҳрида бўлдилар. Хусусан, 20 апрель куни Вашингтон шаҳрига, 21 апрелда - Филаделфияга, 22 апрелда - Нью-Йорк, 23 апрель куни – Синсиннатига, 24 апрелда - Чикагога, 25 апрелда эса Орландога ташриф буюришди.

Мазкур вақт давомида Ўзбекистон мусулмонлари идораси вакилларининг ватандошлар, миллий диаспоралар етакчилари билан учрашувлари ҳамда маҳаллий масжидларда ислом динининг қадриятлари, радикализмга қарши курашиш, АҚШда яшовчи ўзбек ёшлари ўртасида экстремистик ғоялар тарқалишининг олдини олиш ҳақида маърузалар билан чиқишлар қилинди.

Ўзбекистон мусулмонлари идораси Матбуот хизмати

O'zbekiston24

2 май эрта тонгдан Сурхондарё вилоятидаги 124 та жоме масжидида муборак Рамазон ҳайити намози ўқилди.

Президентимизнинг жорий йил 30 апрелдаги “Рамазон ҳайитини нишонлаш тўғрисида”ги қарорига мувофиқ барча масжидларда мўмин-мусулмонларнинг эмин-эркин ибодат қилиши учун зарур шароит яратилди.

Термиз шаҳридаги Ҳаким ат-Термизий номли жоме масжиди ҳам субҳидамдан намозхонлар билан говжум бўлди. Ўзбекистон Мусулмонлари идорасининг вилоятдаги вакили Алиакбар Сайфуддинов қутлуғ айём муносабати билан йиғилган мусулмонларни байрам билан табриклади. Осуда, обод Ватанда тинч, хотиржам ибодат қилиш учун барча қулайликлар яратилгани ҳақида атрофлича сўз юритди. Маърузада Рамазон ҳайитининг фазилатлари, тарихи ва маънавий қадриятларига эътибор қаратилиб, бундай тинч, тўкин ҳаёт учун ҳар тонг шукрона айтиш лозимлиги таъкидланди. Эҳтиёжманд оилалар, кексалар ва беморларга меҳр кўрсатишнинг ажру-савоблари ҳусусида фикр юритилди.

Рамозон ҳайити амалларини бажарган юртдошларимиз бир-бирларини байрам билан табриклаб, мамлакатимизга тинчлик, файзу-барака, соғлик, омонлик тилаб дуога қўл очишди. Яқинлари ва эҳтиёжмандлар, беморлар холидан хабар олиб, ҳадялар улашишга йўл олишди.

Вилоятда байрам муносабати билан саховат тадбирлари давом этмоқда.

Холмўмин МАМАТРАЙИМОВ, 

ЎзА мухбири