Ҳамдардлик мактублари

Ўзбекистон мусулмонлари идораси раиси, муфтий Усмонхон Алимов ҳазратларига укаси Исломхон Алимовнинг вафоти муносабати билан хорижий давлат муфтийлари номидан ҳамдардлик мактублари келмоқда. Уларнинг айримлари мазмунини эътиборингизга ҳавола этамиз.

Ўзбекистон мусулмонлари идораси раиси,
муфтий Усмонхон Алимов ҳазратларига,

Ҳурмали Муфтий ҳазратлари!
Укангиз Исломхон Алимовнинг вафоти ҳақидаги хабарни чуқур қайғу билан эшитдим. Шу муносабат билан шахсан ўз номимдан, Уламолар Кенгаши ва Қозоғистон мусулмонлари номидан Сизга чуқур таъзия билдираман. Аллоҳ таоло марҳумни Ўз раҳматига олиб, гуноҳларини мағфират этсин.
Ўзбек-қозоқ халқлари азал-азалдан бир-бирларига оға-инидир. Қадимдан қувончли ёки қайғули кунларида бир-биримизга елкадош бўлиб келаётган элмиз. Қозоғистон мусулмонлари Сизнинг бошингизга тушган мусибатга улуғ ажр-савоблар беришини Ҳақ таолодан сўрашмоқда. Дин хизматида бўлган Қозоғистондаги уламолар ва имом-хатиблар ҳам дуода бўлмоқда.
Ҳақ таоло Сизга ва марҳумнинг яқинларига чиройли сабр бериб, инингиз Исломхон Алимовнинг имонини саломат айлаб, жаннат хушхабари билан хушлантирсин.

Эҳтиром ила,

Қозоғистон мусулмонлари
идораси раиси, муфтий Серикбай ҳожи ОРАЗ

Ўзбекистон мусулмонлари идораси раиси,
муфтий Усмонхон Алимов ҳазратларига,

Ҳурмали Муфтий ҳазратлари!
Ўзбекистон мусулмонлари идораси раиси, муфтий Усмонхон Алимов ҳазратларига укаси Исломхон Алимовнинг вафоти муносабати билан Қирғизистон мусулмонлари идораси Уламолар Кенгаши ва шахсан ўз номимдан чуқур таъзия билдираман.
Бу фоний дунёдан боқий дунёга риҳлат қилган инингиз Исломхон Алимовни Аллоҳ таоло ўз раҳматига олиб, гуноҳларини мағфират айласин. Ётган жойларини жаннат боғчаларидан бир боғча айлаб, Охиратда жаннатдан муносиб жой берсин.
Ҳақ таоло Сизга ва марҳумнинг яқинларига чиройли сабр бериб, ортда қолган фарзанду аржумандларини солиҳлардан айласин. Қилган амалларини мақбул қилиб, имонларини саломат айласин.

Эҳтиром ила,

Қирғизистон мусулмонлари идораси
Уламолар Кенгаши раиси Ҳабибуллоҳ ҳожи Қодирбердиев

11 июль куни Ўзбекистон халқаро ислом академияси ҳузуридаги Малака ошириш марказининг Наманган вилояти минтақавий филиалида Ўзбекистон Республикаси Президентининг 2018 йил 16 апрелдаги “Диний-маърифий соҳа фаолиятини тубдан такомиллаштириш чора-тадбирлари тўғрисида” ги ПФ-5416 Фармони ва Ўзбекистон Республикаси Вазирлар Маҳкамасининг 2019 йил 14 январдаги 25-сонли Қарорига асосан малака ошириш ўқувлари бошланди.
Наманган вилояти минтақавий филиалида Фарғона, Андижон ва Наманган вилоятларидан ташриф буюрган диний соҳа ходимлари бир ой давомида Ислом тарихи ва манбашунослиги, қуръоншунослик ва ҳадисшунослик ҳамда фиқҳ ва калом илми каби йўналишларда ўз малакаларини оширадилар.
Бундан кўзланган асосий мақсад эса, диний соҳа ходимлари воситасида аждодларимизнинг Ислом ва жаҳон цивилизациясига қўшган бой диний-илмий меросини кенг тарғиб этиш ҳамда диний-маърифий ҳаётдаги янгиликларни жамоатчиликка етказиш учун зарур шароитларни яратишдир.
Шу билан бирга “Жаҳолатга қарши маърифат” ғояси остида диннинг асл таълимоти, эзгулик ғоялари, ўзаро ҳурмат, тинчликсеварлик ва бағрикенглик тамойилларини тарғиб этувчи ҳамда улар асосида ёшларни тарбияловчи кадрларнинг малакасини оширишдан иборатдир.

Акмалхон АҲМЕДОВ,
Наманган вилояти минтақавий филиали директори

Қуйида инсоннинг бошқа жонзотлардан устун туришига далолат қиладиган маълумотлар келтирилади:

Инсон – либос киядиган ягона жонзотдир. Бошқа жонзотлар кийимсиз юради.

Инсон – қуруқликда юриш учун уловга (машина ясаб, унга) мина оладиган ягона жонзотдир. Бошқа бирорта жонзот уловга минмайди.

Инсон – денгиз, уммонда юриш учун кема ясай оладиган ягона жонзотдир. Бошқа бирорта жонзот кема ясай олмайди.

Инсон – ҳавода учиш учун самолёт ясай оладиган ягона жонзотдир. Бошқа бирорта жонзот самолёт ясай олмайди.

Инсон – космосга чиқиш учун фазо кемаси ясай оладиган ягона жонзотдир. Бошқа бирорта жонзот космик кема ясай олмайди.

Инсон – гапира оладиган, тил ўргана оладиган, ўша тил орқали бошқалар билан гаплашиб, фикрини баён эта оладиган ягона жонзотдир.

Инсон – ёзишни ўрганиб, фикрини қоғозга тушира оладиган ягона жонзотдир. Бошқа жонзотлар қалам ушлашни, ёзишни билмайди.

Инсон — Қуръон ўргатилган жонзотдир.

Инсон — Дин деган омонатни зиммасига олган жонзотдир.

Инсон — энг гўзал суратда яратилган жонзотдир.

Инсон — пок нарсалар ризқ қилиб берилган жонзотдир.

Инсон — Аллоҳ таолонинг Ер юзидаги ўринбосаридир.

Аллоҳ таоло Ўзининг элчилари - расул ва набийларни инсонлардан танлаб олди.

Аллоҳ таоло Ўзининг Китобларини инсонларга нозил қилди.

Аллоҳ таоло инсонга «Бас, Мени эслангиз, сизни эслайман. Ва Менга шукр қилингиз, куфр қилмангиз» деган. Роббимиз бошқа бирорта жонзотга бу гапни айтмаган.

Аллоҳ таоло барча жонзотлар ва каттаю кичик нарсаларни инсоннинг хизматига бўйсундириб қўйган.

Нозимжон Ҳошимжон тайёрлади

Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Эй Аллоҳ! Барчамизга Байтингни тавоф қилишни, Пайғамбаримиз соллаллоҳу алайҳи васаллам ўпган ҳажарул асвадни ўпиб, муборак қадамларининг изи тушган йўлларда юришни насиб этгин! Омин!

*****

Сенга исён қилдик, Сен бизни сатр қилдинг.

Сени унутдик, Сен бизни унутмадинг.

Сенинг ғазабингни келтирадиган амал қилдик, Сен бизга раҳм қилдинг.

“Эй Аллоҳ, албатта, Сен Афувв, Каримсан. Афвни яхши кўрасан, бас, бизни афв этгин!”

*****

Имом Аҳмад ибн Ҳарб раҳимаҳуллоҳ шундай деганлар:

«Аллоҳга эллик йил ибодат қилдим. Уч нарсани тарк қилмагунимча ибодат ҳаловатини топмадим:

1. Одамларнинг розилигини тарк этдим, натижада ҳақни гапиришга қодир бўлдим;
2. Фосиқларнинг суҳбатини тарк этдим, натижада солиҳларнинг суҳбатини топдим;
3. Дунёнинг лаззатини тарк этдим, натижада охират ҳаловатини топдим».

«Сияру аъламин нубала» китобидан

*****

Эркак ўзининг жанозаси учун тобутда масжидга олиб кирилмагунча масжидга кирмай юраверадими?!

Аёлни кафанликка ўрашмагунча авратини беркитмай юраверадими?!

*****

Бир кунда беш марта таҳорат оладиган аёлнинг пардоз-андозга эҳтиёжи тушмайди!

*****

Бир киши Холид ибн Валид розияллоҳу анҳуни сўкди. Буюк саҳобий унга ўгирилиб қарадилар-да, «У сенинг саҳифанг, уни истаган нарсанг билан тўлдир» дедилар.

*****

Овозингни кўтарма, балки сўзларинг савиясини кўтар. Гулларнинг ўсишига сабаб бўладиган нарса ёмғирдир, момақалдироқ эмас.

Жалолиддин Румий раҳимаҳуллоҳ

*****

Уйланмоқчи бўлганингда, ўзингга: «Ушбу аёл мен у билан умр бўйи гаплашишни истаган аёлми?» деб савол бер.

«Тарих муҳрлаган сўзлар»

*****

Устозларимиздан бирлари: «Агар аёлим итоатсизлик қилса, дарҳол ўтириб истиғфор айтаман. Кейин Аллоҳнинг изни билан яна итоат қила бошлайди» деган эдилар.

*****

Эй Одам фарзанди, сен кунлардан иборатсан. Ҳар гал бир кун кетса бир қисминг ҳам кетган бўлади.

Ҳасан Басрий раҳимаҳуллоҳ

*****

Мени ёмон кўрганларни ёмон кўришга вақтим йўқ. Чунки мен, мени яхши кўрганларни яхши кўриш билан бандман.

Маҳмуд Дарвеш

*****

Таом узатган қўлингни тишлайдиган кимсалар одатда ўзларини тепадиган оёқдаги поябзални ялайдилар.

«Тарих муҳрлаган сўзлар»

*****

Пулингиз кўпайиб, бой бўлганингизда қариндошу яқинларингиз кўплигини билиб қоласиз.

*****

Бошқа миллатлар ўз миллати номини фахр билан тилга олади. Нега биз миллатимиз номини кўпинча “қовун туширганда”, хато содир бўлганда тилга оламиз? “Ўзбекчилик-да буёғи, ака” деймиз. Хато қилганимизда хатони ўзимизга нисбат беришни ўрганайлик, миллатимизга эмас. “Камчилигим бор-да”, “Малакам етишмади”, “Хато қилиб қўйдим. Албатта, тузатаман” каби услубда гапирилса ўринли бўларди. Бу миллат қанчадан қанча улуғларни етиштирган. Ўзи аслида миллат сўзини зарурат бўлмаса ишлатавермаган маъқул. Акс ҳолда, гап миллатчилик мавзусига ўтиб кетиши мумкин. Миллат номи ютуқни қўлга киритилган, зафар қозонилган, яхшилик содир бўлган ўринларда ишлатилса мақсадга мувофиқ бўлади.

(Бошқалар қандай фикрда билмадим. Мен шунақа деб ўйлайман)

*****

Интернет материалларидан тўплаб,

таржима қилувчи Нозимжон Иминжонов

2019 йилги Ҳаж мавсуми учун Ингушетия Республикаси аҳолиси сонидан келиб чиқиб 1400 нафар зиёратчи учун квоталанган ўрин ажратилган эди. Ушбу ўринлар тўлиқ қоплангани сабабли жорий йилги Ҳаж зиёратига 1400 нафар ингушетияликлар бориши маълум қилинган.

Ҳаж масалалари билан шуғулланувчи "Иман Тур" компанияси бош директори Ахмед Теркакиевнинг айтишича, зиёратчилар гуруҳи, тиббиёт ходимлари гуруҳлари аллақачон шакллантирилган. Зиёратчилар жорий йилнинг 30 июлидан 2 августига қадар бир нечта авиарейс орқали Саудия Арабистонига юборилади.

Зиёратчилар учун ўқув-семинарлари, танишув дарслари ташкил этилган.

Ўзбекистон мусулмонлари идораси Матбуот хизмати