Энг яхши дўст сизга Аллоҳни эслатиб турувчи инсондир. Айни кунларда, таассуф бўлсинким, ёшлар ўртасида нотўғри ва динимизга хилоф бўлган ишлар урфга кириб бормоқда. Шу боис биз дўстларимизга, диндошларимизга ўз тавсияларимизни билдириб ўтмоқчимиз.
Дўстим, ёшлигингдан Аллоҳ таолонинг ибодатида қоим бўл. Чунки ёшинг ўтган сари кучдан қолиб, ҳақ амрлари сенга ортиқча юкдек туюлишни бошлайди. Сен бу билан Раҳмоннинг ғазабини қўзғатиб, шайтонни қувонтирган бўласан.
Дўстим, одамлар ичида кибр қилма. Шунда сен яхши амалларни кўпроқ қилгувчи ва ибодатга бақувватроқ бўласан. Мабодо, ўзингни энг олим ёки тақводор деб билсанг, оз амалингни ҳам кўп санайсан ва туғёнга кетасан. Сен ўқиб юрган намозинг, тутган рўзанг, қилаётган яхшиликларинг билан асло ҳаволанма. Ўнг қўлинг берган нарсани чап қўлинг кўрмасин.
Дўстим, Аллоҳ таоло инсонни улуғ қилди, яъни Одам яратилганда фаришталар унга сажда қилди ва шу билан мукаррам бўлди. Лекин банданинг ўзи шайтонга бош эгиб хор бўлди. Агар Роббингнинг олдида манзалатинг улуғ бўлишини истасанг, у буюрган йўлдан юр, у қайтарган йўлдан қайт.
Дўстим, ёшликдан илм ўрганишга ружу қўй. Чунки сен қилаётган ҳар қандай гуноҳ иш жоҳиллик сабабидандир. Физика ҳақида фақат физик, математика ҳақида фақат математик, биология ҳақида фақат биолог, география ҳақида эса фақат географ сўзлайди. Лекин навбат динимизга, исломга келганда ҳамма «закий», «уламо», «авлиё»га айланади қўяди. Ваҳоланки, улардан «алиф»ни сўрасангиз, «калтак» дейди. Уламоларнинг наздида, билим олишга икки жиҳат тўсқинлик қилади: мутакаббирлик ва меъёрдан ортиқ уятчанглик.
Дўстим, Аллоҳ таоло харом қилган ишларга ҳаргиз қўл урма. Кўчадан ўтиб кетаётган қиз-аёлларга қиё боқишни ҳатто ҳаёлинга ҳам келтирма. Ахир, сенинг ҳам синглинг, опанг, онанг бор-ку. Ёки кимдирлар уларга шаҳват тўла кўзлари билан қарашини хоҳлайсанми? Албатта, йўқ. Шундай экан, сен ўзингни харомдан сақласанг, Роббинг оилангни сақлайди. Буни ҳаргиз унутма.
Айтар сўзларимиз шулар эди. Бу тавсияларимизни ўзинг учун дастуриламалга айлантириб олсанг, иншааллоҳ, ҳаётинг бунданда гўзалроқ бўлади.
Аллоҳ таоло айтилган сўзларга сиз-у бизни амал қиладиган тақводор бандаларидан қилсин!
ЎзЖОКУ 1 босқич талабаси Ҳабиб Жўрабоев
