Матнни oлий тоифали сухандон Шуҳрат Қаюмов ўқиган

“Экстремистик ғояларни  инкор қилишда шаръий далиллар”

Мутаассиблар томонидан далил келтиришнинг бузуқ талқинлари

Далил келтириш услуби борасидаги умумий қарашлар

Дарҳақиқат, саҳобаи киромлар шариати исломиянинг барча ҳукмларини расул алайҳиссаломнинг ўзларидан ўрганар  эдилр. Маълумки,  улар расул алайҳиссаломга яқин авлод бўлиб у зотнинг мақсад-муддаоларини яхши тушунар ҳамда кўрсатма ва иршодларидан рози бўлар эдилар. Шунинг учун ҳам  шариатнинг кўрсатмаларини бажаришда улар учун далил келтиришнинг ҳожати бўлмас эди. Расул алайҳиссаломнинг вафотларидан кейин кўплаб саҳобалар жойларда илм-маърифат ёйиш учун турли шаҳарларга тарқалдилар.  Улар борган ерларида турли шароит ва ҳодисаларга  дуч келар, уларга ҳам ечим кўрсатиш зарурати туғилар эди.  Саҳобаларнинг ҳар бири саволларга Китоб ва Суннатдаги билими доирасида жавоб берар эдилар. Улар   масалаларни ечиш давомида Китоб ва Суннатдан жавоб тополмасаларгина ўз фикрлари билан ижтиҳод қилганлар. Улар ҳам ўз ижтиҳодларида  расул алайҳиссаломнинг шаръий ҳукмларга иллат (сабаби) сифатида жорий қилган асосларини қўллар эдилар.

Турган гапки саҳобаларнинг фикрлари ҳам ўзаро ихтилофли бўлиб бунинг бир қанча сабаблари мавжуд. Уларнинг орасида айримлари эшитмаган ҳадисни бошқалари эшитган бўлар эди. Ёки маълум бир набавий кўрсатмани  қайсидир саҳоба умумий рухсатга таъвил қилса, бошқа бир саҳоба уни мустаҳаблик (бажариш савобли амаллар) даражасига таъвил қилар эди. Ёки ҳар бир саҳоба расул алайҳиссаломдан кўрган воқеа-ҳодисаларнинг изоҳини ўз билим даражаларида шарҳлар эдилар. Шунингдек шаръий ҳукмларнинг иллати(сабаби) ва яна бошқа томонлари борасида ҳам ижтиҳодий ихтилофларга борар эдилар. 

Кейинчалик тобеинлар замонига  келиб улар Китоб ва Суннатга эргашиш билан саҳобаларга эргашиш орасини умумлаштирдилар. Тобеин алломаларимизнинг ҳар бири мустақил мазҳабга айландилар. Мазкур тобеинлар ўзларидан кейин пайдо бўлган машҳур фиқҳий мазҳабларнинг шайх ва пешволари эди. Улар саҳобаи киромлар нақл қилган, асослаб берган манҳаж (йўл)ни келтирдилар. Мужтаҳид алломаларимиз далил келтириш услубларини ҳам мазкур тобеинлардан ўрганиб натижада ҳар бири ўзлари яшаб турган вақт ва замон руҳидан келиб чиқиб уларни янада такомиллаштирдилар. Масалан имом Абу Ҳанифа раҳимаҳуллоҳ Иброҳим ан-Нахаъий ва у кишининг атрофидаги тобеинларга эргашиб деярли уларга хилоф қилдилар. Аммо мисол тариқасида олсак оҳод хабарларни қабул қилиш шарти каби айрим масалалардагина улар (тобеинлар)нинг йўлига хилоф иш тутдилар. 

Имом Молик раҳимаҳуллоҳ эса тобеинлардан Робиъату ар-Рой, ибн Умарнинг хизматкори Нофиъ ва Зуҳрийларга эргашдилар. Шунингдек, саҳобаи киромларнинг ўзларигача етиб келган фатволарини ва тобеин ва табаъа тобеинларнинг фатволарини нақл қилдилар. Айниқса саййидимиз Умари одил, ибн Умар ва Оиша онамиз каби кибор саҳоба ва саҳобиялар ҳамда Саъид ибн Мусаййаб каби улуғ тобеинларнинг фатволарига эргашдилар. Уларни ривожлантириб бойитдилар.

Имом Шофеийга келсак у муҳтарам зот Мадинаи мунаввара уламоларидан таълим олдилар. Имом Моликнинг “Муватто” китобларини ёдлаб ундан ривоятлар қилдилар. Бир қанча вақт имом Моликни ҳузурларида қолиб у зотдан фиқҳ илмини ўргандилар. Кейинчалик ироқликлар фиқҳини ўрганиб Муҳаммад ибн Ҳасаннинг китобларини (Абу Ҳанифанинг шогирди)  ўргандилар. Имоми Шофеий раҳимаҳуллоҳ янги фиқҳга асос солдилар. Чунки имом Шофеий икки буюк мазҳаб Ҳанафий ва Моликий мазҳаблари пайдо бўлган замонда яшаганлар. Ушбу ҳар икки мазҳабнинг усул (бирламчи) ва фуруъ (иккиламчи) қоидаларини умумлаштириб ривожлантирдилар. Мазкур ҳар икки мазҳабни ўрганиб чиқар эканлар истинбот ва далилларга таяниш қоидаларидан келиб чиқиб айрим масалалар борасида уларнинг фикрини қабул қилмадилар. Шунингдек имоми Шофеий аҳли ҳадис (ҳадисларга таянувчилар) ва аҳли рой (фикрга таянувчилар)ларнинг ҳам мазҳабларини ўрганиб чиқдилар. Ўз услубларига таянган ҳолда Ироқ ва Мадина мадрасасини бирлаштирдилар. Имом Шофеийнинг мазкур услубий қўлланмалари ҳадисларнинг ишончлилик борасидаги илмий асосга тўлақонли мувофиқ келади. У зот мана шу қўлланмаларида саҳоба ва тобеинлар томонидан келтирилган жуда кўп маълумотларни тўпладилар. Кейинчалик имоми Шофеий ўз мазҳабларига хос бўлган “усул”(фиқҳшунослик асослари)  йўналишига асос солдилар ва кўплаб фақиҳларнинг  ёқлаш ва эътирофларига сазовор бўлдилар. Шундан сўнг у зотнинг мазҳаблари дунёнинг турли ўлкаларида тарқала бошлади.  

Имом Аҳмад ибн Ҳанбалга келсак, у зот Бағдодда яшаганлар. Имом Шофеийнинг қўлларида таълим олдилар. Бошланғич таълимни имом Абу Ҳанифанинг шогирдлари имом Абу Юсуфдан олдилар. Ҳадис илмини гўдаклик чоғларидаёқ Ҳашим ибн Баширдан ўргандилар. Кейинчалик яманлик Абдурраззоқ ибн Ҳамом Санъонийдан ҳам ҳадис илмини ўргандилар. У зотнинг ҳам далилларни асослаш қоидалари саҳоба ва тобеинларнинг йўлига эргашишдан айро эмас эди. Ибни Бадрон “мадҳал” китобида айни шуни такидлаб ўтган. Шариат ҳукмлари борасидаги истидлол (далиллар ёрдамида асослаб бериш) қоидалари исломнинг дастлабки давридаёқ илмий дастур сифатида юқорида айтиб ўтилган тартибда юзага келган эди. Айни мазкур қоидалар мазҳаб алломаларининг заҳматли меҳнатлари эвазига ривожланди, такомиллашди. Аллоҳ таоло уларни ўз раҳматига олсин.

(давоми бор)

“Экстремистик ғояларни  инкор қилишда шаръий далиллар” китобидан.

Таржимон: Тоҳир Воҳид

Расулуллоҳ соллаллоҳу алайҳи васаллам аёл ўз эрига мутлақо итоат қилиши шарт эканини уқдирганлар.

Баъзи инсонлар «Ё, Расулуллоҳ, рухсат беринг, сизга сажда қилайлик», – деганларида: «Ислом динида бир кишининг иккинчи кишига сажда қилиши мутлақо мумкин эмас. Исломда бундай нарса йўқ!», – деганлар.

Аммо исломиятдан олдин ўтган халқларда одамлар бир-бирига сиғиниш, чўқиниш учун эмас, ҳурмат эҳтиром маъносида сажда қилишарди. Масалан, фарзанд отасига сажда қиларди. Жумладан, Юсуф алайҳиссаломнинг ота-она ва ака-укаларини Мисрга келтиришганда, ҳурмат юзасидан ва ака-укалари узр сўраш мақсадида баравар сажда қилишган эди...

« – Исломда инсонга сажда қилиш йўқ, агар бўлганида, аёлларнинг эрларига сажда қилишларини буюрган бўлардим», – деган ҳадиснинг маъносидан ҳам аёл киши эрига бутунлай итоат қилиши лозимлиги англашилади...

Эри қай пайтда аёлини ёнига чақирса, аёл албатта итоат қилиши ва ҳар қандай ишни тўхтатиб, эрининг ёнига бориши шарт. Шунингдек, эркакнинг ҳам аёлига нисбатан масъулияти борлигини айтганлар. Бу нарса аёлларнинг қадр-қиммати топталган, эркакларники ниҳоятда баланд бўлган ўша пайтда адолатли бир қонун эди...

Жумладан, аёл кишининг еб-ичиши, кийиниши ва уй-жой билан таъминланиши учун эркак масъул, бу эркакнинг зиммасида... Оилани моддий жиҳатдан таъминлаш эркакнинг вазифаси... Ҳатто бирор сабабдан аёл боласини эмизишни хоҳламаса, эмизадиган энага топиб, боласини улғайтириш ҳам эркакнинг бурчи, вазифаси...

Ислом дини оилада мана шундай бир мувозанатни қарор топтиради... Эр-хотиннинг бир-бирига нисбатан вазифаларини белгилаб берган. Эркак куч-қувватли деб, аёлни эркак тарафидан эздирмайди; эркакка ортиқча юк юклаб, аёлни ахлоқсиз ва беор бўлишига ҳам йўл қўймайди...

Бугунги жамиятларда ҳам шундай ҳолатларни кузатамиз. Масалан, мана шу Олмонияда аёллар ўта ахлоқсиз, беҳаё бўлиб кетишган деб ҳисоблайман. Яъни, ўзларини эркаклар билан тенг ҳуқуқли деб билишади... Ислом динида бундай эмас, оилада эркак ва аёлнинг ўз ўрнини мувозанат ва адолат билан белгилаб берган...

"Ислом ва ахлоқ" китобидан олинди

Америка мусулмонлари бу йилги сайловда тарихга кирди: исломга эътиқод қўйган АҚШ фуқароларининг рекорд сони Президент сайловларида иштирок этди.
Америка Ислом алоқалари бўйича Кенгаш ҳисоботига кўра, мусулмон сайловчиларнинг рекорд сони сешанба куни сайлов участкаларига боришган, уларнинг 70% демократик партиядан номзод Жо Байденга овоз берган.
"Улар жамоатимизнинг фуқаролик фаоллигини ўзгартирувчи Америка мусулмонлари янги авлодининг бир қисми ҳисобланади", - дейди Ҳуқуқий таълим сиёсий ахборот маркази Ижрочи директори Муҳаммад Миссури.
Ислам.ру хабарига кўра, бундан ташқари, беш нафар демократ номзод Висконсин, Флорида ва Делавер мусулмон штатларида давлат қонунчилик идораларининг биринчи вакиллари бўлиб тарихга киришди.
"Давлат ассамблеясига сайланган биринчи мусулмон бўлиш, албатта, қизиқ. Мен бунинг учун миннатдор бўлган бир имкониятдир", - деди Висконсин штатидан АҚШ Конгресси палатасига кирган биринчи мусулмон Самба Балде. "Бу иш бу ерда ва бутун дунёда исломофобиянинг шиддатли юксалишига қарши курашнинг муҳим қисмидир".

Ўзбекистон мусулмонлари идораси матбуот хизмати

Шайх Фаридуддин Атторнинг “Илоҳийнома” асарида келтирилган “Подшо ва узук” ҳикояси гўё бир жавоҳирдир. Келинг, шу ҳикоят мазмунидан баҳраманд бўлайлик. 

“Бир пайтлар жаҳон қўрғонида бир комил шоҳ яшар эди. Бутун халқ унинг ҳукмига ҳозир турар, сабаби, ул шоҳ адолатда назири йўқ инсон эди. Мулки бисотининг эса ҳисоби ҳадсиз, яна атрофида илму ирфон аҳллари, номдор олимлар ҳам кўп. Кунларнинг бирида уларни олдига чақирди:

Чақирди бир куни олдига султон,

Деди: Шу кунлари ҳолим паришон.

Кўнгилга тушди орзу ногаҳондин,

Вале билмасмен ул келмиш қаёндин?

Яъни, шоҳ ҳолининг паришонлигидан шикоят қилди. Кўнглига келган орзуни баён қилди. Зеро, паришонлиги шунда тарқаса:

Ясанглар бир узук поку мукаррам,

Ки ҳар вақт ғам чекиб, қайғуга ботсам,

Анга кўз ташлабон, дилшод бўлай мен,

Аламдин, қайғудин озод бўлай мен.

Подшоҳ ҳакимларга бир узук ясашни буюрди, токи ул узукка кўз ташлаган дам кўнгли шодликка тўлиб, аламу қайғулардан озод бўлсин. Ёки иқболдан кўнгли шодликка тўлиб кетса, шу узукка боқиб маъюс бўлсин...

Ҳукмдорнинг талаби оғир эди. Олиму ҳакимлар ундан муддат сўрадилар. Узоқ фикрлашдилар, ўйладилар, бу мушкул ишни бажариш чорасини излаб “қон ютдилар”. Охири бир қарорга келдилар:

Ниҳоят бирлашиб, азм айладилар,

Узук бунёдига жазм айладилар.

Узукка бир ёзувни кўрдилар эп,

Анга нақл этдилар: “Бул ҳам ўтар”, деб...

Ҳа, оқилу доно ҳакимлар узукка “Бул ҳам ўтар” деган ёзувни нақш қилдилар.

Ҳар бир инсоннинг “келмоқ” ва “кетмоғ”и Яратганнинг измида. Келганлар ҳамиша кетмоқни эсда сақласинлар.

Ҳаётда бахту иқбол кулиб боқса – шоду хуррам кунларда бунинг ўткинчи эканини ёдда сақласинлар-да, ҳаддан ошмасинлар. Бойлик, бахт, иззату обрў топганда мағрурланиб, ўзларини йўқотиб қўймасинлар. Аксинча, қайғуга ботган, бошларига ғам-алам келган кунларда эса тушкунлик ботқоғига ботмасдан, сабр қилиб, яхши кунлар орзусида яшаб “бул ҳам ўтар” десинлар.

Подшоҳни тинчлантирган, бизни ўйлантирган ҳикматнинг интиҳоси қуйидагича: .

Магарким бул жаҳон ўтгувчидир, бас,

Ва барча ул жаҳон кетгувчидир, бас.

Тиларсен, ул жаҳонни, ғам-алам ют,

Бориб Иброҳим Адҳам илкини тут.

Хулосада Иброҳим Адҳамнинг ҳаёти мисол келтирилаётгани бежиз эмас. Маълумки, Иброҳим Адҳам дунё ҳақиқатини англаб етгач, подшоҳлик тожини ечиб, дарвешлик жандасини кийган эдилар.

Фаридуддин Аттор раҳимаҳуллоҳ ўз ҳикоясида инсониятга уқтирмоқни истаган “Бул ҳам ўтар” ҳикматига содиқ ҳолда яшаб ўтганлар.

Дилором КАРИМОВА,

филология фанлари номзоди, доцент

“Ҳидоят” журналининг 2020 йилдаги 1-сонидан олинди