muslim.uz
Муфтиятнинг хайрия бозори кам таъминланган оилалар таъминотини зиммасига олди
Бурса шаҳри (Туркия) да муфтият очган хайрия бозори кам таъминланган оилалар таъминотини зиммасига олди
Islam.ru маълумотларига кўра, бозорда, Османгази туманида эҳтиёжманд оилаларга озиқ-овқат маҳсулотлари ва ювиш воситалари берилмоқда.
Маҳаллий диний Бурса раҳбари Меҳмет Узуннинг айтишича, лойиҳа ёрдамида нон ва асосий озиқ-овқат маҳсулотларига муҳтож кишиларнинг эҳтиёжлари қондирилган.
Меҳмет Узуннинг айтишича,"маҳсулотимизни энг паст нархларда етказиб берадиган улгуржи савдо қилувчиларга ва бизнинг ёрдам чақириғимизга жавоб бераётганларга раҳмат айтаман".
Узуннинг айтишича, Қорабалчиққа яқин қишлоқ ҳудудига бориб, маҳаллий аҳоли хайрия бозорини ўргангач, эртасига муҳтожларга катта миқдорда зайтун, зайтун ёғи, гуруч ва булғори етказиб берган.
Усмонғози муфтиятининг бўлинма директори Чабан Чаглар, хайрия бозорига келган болалар учун китоб ўқиш кампаниясини уюштиришаётганини айтди: "Ота-оналари бу ерда молиявий эҳтиёжларини қондирар экан, болалар бу ерда қалблари учун озуқа олишини истаймиз".
Ўзбекистон мусулмонлари идораси матбуот хизмати
Ғийбат – биродарлик кўксига урилган ханжардир
Аллоҳ таоло бутун махлуқотларининг ичида инсонни мукаррам ва мукаммал қилиб яратди. Яхшидан ёмонни фарқлай олиши учун ақл берди, қалбидаги ва ақлидаги туйғуларини ифодалаши учун илоҳий лутф бўлган тил ато қилди.
Аллоҳ таоло бизга ҳар хусусда чиройли ва хайрли амаллар қилишимизни, хунук ва ёмон амалларнинг барчасидан узоқда бўлишимизга буюрди.
Аллоҳ бизларни қайтарган, дунё ва охиратимизга зарар келтирадиган ёмон амаллардан бири бу ғийбатдир. У Зот ғийбатнинг ўта жирканч иш эканини баён қилиб шундай деган: «... Баъзиларингиз баъзиларингизни ғийбат қилмасин. Сизлардан бирортангиз ўлган биродарининг гўштини ейишни яхши кўрадими? Ҳа, ёмон кўрасизлар. Аллоҳдан қўрқинглар!...» (Ҳужурот сураси, 12-оят).
Ғийбат – биродаримизнинг орқасидан унга хуш келмайдиган, эшитса ранжийдиган гапни гапиришимиздир.
Ғийбат – биродаримизнинг орқасидан гапириб, унинг обрўсини тўкиб қул ҳаққини ейиш ҳисобланади.
Ғийбат – ишонч ва аҳилликга, хузур ва муҳаббатга, бирлик ва баробарликка, биродарлик илдизига уриладиган бир болтадир. Инсонийликка хос бўлмаган, мўминга ярашмаган, хар ҳил фитналарга сабаб бўладиган ҳунук бир ҳислатдир. Зеро биз бир-биримизга иймон риштаси билан боғланган мўмин биродарлармиз. Бу биродарлик, бинодаги бирининг устига бири қўйилиб мустаҳкам барпо қилинган ғиштлар кабидир.
Биродаримизни ҳатто имо ишора билан ҳам қалбини оғритмаслигимиз бу биродарликнинг шартларидандир. Бу ҳақида имом Бухорий ва имом Муслим Абдуллоҳ ибн Амр розияллоҳу анҳумодан қилинган ривоятда Набий соллаллоҳу алайҳи васаллам: «Тили ва қўлидан мусулмонлар саломат бўлган одам ҳақиқий мусулмондир», деганлар.
Ғийбат динимизда ҳаром қилингани ва Ислом ахлоқига зид бўлгани учун ғийбатдан узоқ бўлишимиз ва ундан қочишимиз керак бўлади. Ҳозирги кунимизда ижтимоий тармоқлар орқали ҳам ғийбатлар, туҳматлар ўқиймиз ва кўрамиз. Ижтимоий тармоқларда мўмин биродарларимизнинг шахсияти, обрўси ва номуси ноҳақ поймол қилинади ва бошқаларга ҳам тарқатилади.
Абу Довуд Абу Барза Асламий розияллоҳу анҳудан қилган ривоятда: «Расулуллоҳ соллаллоҳу алайҳи васаллам шундай деганлар: «Эй тили билан иймон келтириб, қалбига иймон кирмаганлар жамоаси! Мусулмонларни ғийбат қилманглар, уларнинг айбини ахтарманглар! Ким уларнинг айбини ахтарса, Аллоҳ азза ва жалла унинг ўзининг айбини ахтаради. Аллоҳ кимнинг айбини ахтарса, уни уйининг ичидаёқ шарманда қилиб қўяди».
Имом Бухорий Абу Ҳурайра розияллоҳу анҳудан қилган ривоятда эса: «Расулуллоҳ соллаллоҳу алайҳи васаллам: «Ким Аллоҳга ва охират кунига иймон келтирган бўлса, яхши гап айтсин ёки жим турсин!», деганлар.
Тилимиздан фитна-фасод учун эмас ҳурмат ва иззат учун, ғийбат ва туҳмат учун эмас, муҳаббат ва садоқат учун фойдаланишимиз керак. Сўзларимиз нафрат, шубҳа-адоват учун эмас, аҳиллик, дўстлик, биродарлик учун васила бўлиши керак. У Кунда Аллоҳ таоло розилигига ва абадий неъматларга ақлига, қалбига, тилига ва бошқа аъзоларига эга бўлиб, мўминларга хос тарзда ҳаёт кечирадиганлар эришади. Аллоҳ таоло барчамизнинг қалбимизни ёмон хислатлардан покласин.
«Аллоҳим! Албатта, мен Сендан қулоғимнинг шарридан, кўзимнинг шарридан, тилим шарридан, қалбим шарридан ва манийимнинг шарридан паноҳ сўрайман» («Сунан» эгалари ривоят қилганлар).
Муҳаммад Али Муҳаммад Юсуф
Рамазон ойида Истанбулнинг Тақсим майдонидаги масжид очилади
Туркияда меъморлар Шефик Биркий ва Селим Даламан лойиҳалаштирган Тақсим майдонидаги масжид қурилиши якунланди, унинг пойдевори 2017 йилнинг 17 февралида қўйилган эди.
Масжид майдони 2,482 квадрат метр, барча бинолар майдони – 16 минг квадрат метрни ташкил этади.
Ҳозирда масжид ичкарисига нақш солиш жараёни якунланди. Масжиднинг меҳробини безаш ишлари давом этмоқда.
Islam.ru маълумотларига кўра, 99 фоиз қурилиш ишлари тўлиқ бажарилган масжид Рамазон ойида ибодат учун очилиши режалаштирилган.
Маълумот учун, бу ерда масжид қуриш ғояси ўтган асрнинг 50-йилларида пайдо бўлган. Ушбу ғояни 2014 йилдан бери мамлакатни бошқариб келаётган Туркия президенти Ражаб Тоййиб Эрдўған буни амалга оширишга муваффақ бўлди.
Ўзбекистон мусулмонлари идораси матбуот хизмати
Аллоҳ суйган ва ёмон кўрган маскан
عَنْ أَبِي هُرَيْرَةَ رَضِي اللهُ عَنْهُ، عَنِ النَّبِيِّ صَلَّى اللهُ عَلَيْهِ وَسَلَّمَ قَالَ: أَحَبُّ الْبِلَادِ إِلَى اللهِ مَسَاجِدُهَا، وَأَبْغَضُ الْبِلَادِ إِلَى اللهِ أَسْوَاقُهَا. رَوَاهُ مُسْلِمٌ.
Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Аллоҳга энг маҳбуб юртлар масжидлардир. Аллоҳнинг энг кўп ғазабига учраган юртлар бозорлардир», дедилар».
Муслим ривоят қилган.
Ушбу ҳадиси шарифдаги масжидлар ва бозорларга нисбатан айтилган васфлар уларда содир бўладиган ишлар юзасидан айтилган.
Одатда масжидларда Аллоҳга ибодат қилинади, тиловату зикр, ваъз-насиҳатлар бўлади, илм ўрганилади, мусулмонларнинг ахлоқ-одоби, тарбияси, руҳий-маънавий ҳолатини яхшилаш чоралари кўрилади. Умуман, икки дунё фойдасига оид ишлар бўлади.
Шунинг учун ҳам масжидлар Аллоҳ таоло энг яхши кўрган масканлардир. Шунинг учун ҳам масжид – Аллоҳнинг уйи, дейилади. Ҳар бир нарсанинг шарафи ўша нарсанинг эгасининг шарафига қараб бўлади. Аллоҳнинг уйи бўлишдан ортиқ шараф бўлиши мумкинми?!
Ҳадиси қудсийда Аллоҳ таоло қуйидагиларни айтади:
«Еримдаги уйларим масжидлардир. Ундаги Менинг зиёратчиларим масжидларни обод қилувчилардир. Бас, ўз уйида таҳорат қилиб, Мени Ўз уйимда зиёрат қилган бандага хушҳоллик бўлсин. Зиёрат қилинган зиёрат қилувчини икром этиши ҳақдир».
Демак, масжидларга кўпроқ боришимиз, уларда кўпроқ ибодат қилишимиз, Аллоҳга қурбат ҳосил қилишимиз лозим.
Масжидга боргач, у ерда кўзда тутилган нарсадан бошқа нарсалар билан машғул бўлиш яхши эмас. У ерда ношаръий ишлар, гап-сўзлар умуман бўлмаслигига ҳаракат қилишимиз шарт.
Бозорлар Аллоҳ таоло энг ёмон кўрган жойлардандир. Одатда у ерда ёлғон, алдамчилик, бировнинг молини ботил йўл билан ейиш каби ҳодисалар содир бўлади.
Исломда савдо-сотиқ ишларида ҳалол бўлишга қаттиқ тарғиб қилинади. Алдамчилик, бировнинг ҳаққини ейиш, ўзаро муомалаларда қаллоблик қилиш каби ишлар қаттиқ қораланади.
Ҳадисда бозорлар Аллоҳ таоло энг ёмон кўрадиган жой сифатида тилга олиниши ҳам шу жумлага киради. Бозор бозор бўлганлиги учун эмас, балки унда ҳаром-хариш, ношаръий ишлар кўп такрорланиб турганлиги учун шундай васфга эга бўлган. Шунинг учун мусулмонлар бозорларда доимо эҳтиёт бўлишлари керак. У ерларга кирганда ҳам, юрганда ҳам Аллоҳдан паноҳ сўраб юриш лозим.
«Ҳадис ва ҳаёт» китоби асосида тайёрланди
Афғонистонда Ўзбекистонда чоп этилган китоблар тақдимоти ўтказилди
Мамлакатимизнинг Кобулдаги элчихонасида Ўзбекистон-Афғонистон алоқаларини ривожлантириш бўйича “Йўл харитаси” ижросини таъминлашга оид давра суҳбати ўтказилди, деб хабар бермоқда “Дунё” АА. Унда Афғонистон Ҳаж ва дин ишлари вазири Муҳаммад Қосим Ҳалимий, вазирлик ходимлари, диний уламолар иштирок этди.
Тадбир давомида Ўзбекистонда чоп этилган Имом Бухорий ва Имом Термизий маънавий меросига бағишланган китоблар тақдимоти ўтказилди.
Ўзбекистонда диний соҳада амалга оширилаётган ислоҳотлар ва диний бағрикенгликни таъминлаш бўйича олиб борилаётган ишлар борасида батафсил маълумот меҳмонлар диққатига ҳавола этилди. Самарқанд шаҳрида бўлиб ўтган “Имом Бухорий меросининг ўзига хос хусусиятлари ва бугунги кундаги тарбиявий аҳамияти” мавзусидаги халқаро конференцияда Афғонистон делегациясининг иштироки борасида тайёрланган ҳужжатли фильм ҳам намойиш этилди.
Шунингдек, Дин ишлари бўйича қўмита ва Ўзбекистон мусулмонлари идораси раҳбарияти билан учрашувларда диний соҳада ўзаро ҳамкорлик алоқаларини ривожлантириш масалалари муҳокама этилгани таъкидланди.
Анжуман иштирокчилари Ўзбекистон заминида яшаб ўтган буюк муҳаддисларнинг ҳаёти ва мероси, Имом Бухорий халқаро маркази ва Ислом цивилизацияси маркази фаолиятини Афғонистон оммавий ахборот воситаларида кенг тарғиб қилиш, Ўзбекистонда ёш афғон мутахассислари учун “Ислом миниатюраси” йўналиши бўйича ўқув-амалий курслари ташкил этиш, Афғонистонлик уламолар вакилларидан иборат гуруҳларнинг Ўзбекистонга зиёрат туризми дастури доирасида сафарларини уюштириш ва бошқа йўналишлардаги ҳамкорлик истиқболларини муҳокама қилди.
Ўзбекистон мусулмонлари идораси матбуот хизмати