Бугун эрта тонгдан минглаб юртдошларимиз муборак Қуръони Каримни харид қилиш учун навбатда туришибди.

Хабарингиз бор, шу йилнинг март ойида Қуръони Карим китоби “HILOL NASHR” нашриёт-матбааси томонидан “Дорус-салом” нашриётининг расмий рухсати билан аслий нусхаси асосида, Ўзбекистон мусулмонлари идораси ҳамкорлигида чоп этилган эди.

Вазирлар Маҳкамаси ҳузуридаги Дин ишлари бўйича қўмита Мусҳафни 50 минг нусхада чоп этишга рухсат берган. Дастлабки нашр қилинган 10 минг нусха китоб нашриётнинг 7 та дўкони, шунингдек, ҳудудлардаги ҳамкор китоб дўконларига белгиланган ягона нархи – 31 минг сўмдан сотиш шарти билан тарқатилди ва сотувга чиққан кунидаёқ сотиб тугатилди.

Нашриёт директори Абдулваҳид Саттиев ҳар икки ярим ойда Мусҳафи шариф 10 минг нусхадан чоп этилишини таъкидлаган эди.

Мусҳафи шарифнинг навбатдаги 10 минг нусхаси босмадан чиқарилди. Бугун, 5 июль куни эрта тонгдан Тошкент шаҳридаги “HILOL NASHR” нашриёт-матбаа босмахонаси олдида аҳоли гавжум. Минглаб юртдошларимиз муборак Қуръони Каримни харид қилиш учун навбатда туришибди. Талаб юқори бўлгани боис ҳар бир хонадон учун биттадан Мусҳафи шариф сотилмоқда. Нарх ўзгармагани ҳам маълум қилинди.

ЎМИ Матбуот хизмати

Аллоҳ таоло бандаларини бундай огоҳлантиради: “Мўминаларга ҳам айтинг, кўзларини (номаҳрам эркаклардан) қуйи тутсинлар ва авратларини (зинодан) сақласинлар! Шунингдек, (одатда) кўриниб турадиган бошқа зийнатларини кўрсатмасинлар ва рўмолларини кўкраклари узра тушириб олсинлар... Барчангиз Аллоҳга тавба қилингиз, эй мўминлар! Шояд, (шунда) нажот топсангиз” (Нур сураси, 31-оят).

 Аёлларнинг юзи, икки кафти (ва баъзи бир ривоятларда икки оёғининг тўпиғидан пасти)дан ташқари бутун бадани авратдир. Ушбу ояти карималарга мувофиқ, аёлларга баданидаги аврат жойларини тўсадиган кийим кийиши фарздир. Барча ибодатларни қандай амалга ошириш, қай миқдорда, қандай кўринишдалигини Аллоҳ таоло Қуръони каримда умумий тарзда баён этган. Пайғамбаримиз (соллаллоҳу алайҳи ва саллам) ана шу умумий ҳукмлар борасида таълим бериб, либосга оид ҳукмларни ҳам батафсил тушунтирганлар.

Ҳозирги кунда либосда хаддан ошишлик яққол кўзга ташланади. Масалан, баъзи ўзбек қизларининг кийими авратини ўндан бир қисмини зўрға ёпиб юрганини кўриб кайфиятингиз бузилади. 

Рўмол – ўзбекнинг шаъни ва ғурури. Мусулмоннинг ҳақиқий ифтихори. Аёлнинг эркаклар кийимидан фарқ қиладиган томони ҳам унинг рўмоли ва кийимининг узунлигидир.

Набий (соллаллоҳу алайҳи ва саллам) айтдилар: “Эй Асмо! Агар аёл ҳайз ёшига етса, ундан бу ва мана бугина кўриниши жоиз бўлади”, дедилар ва юз ҳамда икки кафтга ишора қилдилар (Абу Довуд ривояти).

Бошқа бир ҳадисда келтирилишича, Расулуллоҳ (соллаллоҳу алайҳи ва саллам): “Аллоҳ ҳайз кўрувчи – ҳайз ёшига етган (яъни, балоғатга етган) аёлнинг намозини фақат рўмол билангина қабул қилади”, дедилар (Имом Бухорий ва Имом Муслим ривоятлари).

Ибн Аббос (розияллоҳу анҳу)дан ривоят қилинади: “Набий (соллаллоҳу алайҳи ва саллам) ўзини эркакка ўхшатиб юрувчи аёлларни лаънатладилар” (Имом Бухорий, Имом Термизий, Абу Довуд ва Имом Насоий ривоятлари).

Ойша (розияллоҳу анҳо) онамиз ҳузурига бир гуруҳ аёллар келиб: “Аёлларнинг бўяниши, тилла зирак, билагузук каби тақинчоқларни тақиши ва нафис кийимларни кийиб юриши тўғрисида нима дейсиз?”, деб сўрашганда, Ойша (розияллоҳу анҳо): “Эй, аёллар! Ҳаммангизнинг муаммоларингиз бир хил. Аллоҳ таоло сизларга барча зийнатни ҳалол қилди. Фақат очилиб-сочилиб кўринмасангиз бас”.

Либосни жумладан, рўмолни Аллоҳ фарз қилишидан сабаб аёлларни бегоналар, номаҳрамлардан тўсиш ва гуноҳлардан тийиш учундир. Ҳар бир ёмонлик, ноқулайлик ва муаммолар аслида ўз гуноҳларимиз эвазига келади.

Бундан бир неча йиллар олдин рўмол ўраган қўшниларим билан мени маҳалла идорасига чақиртиришди. Ҳаммамиз суҳбатдан ўтдик. Мен буни огоҳлик, юртимиз тинчлиги йўлида қилинган бир саъй-ҳаракат деб қабул қилдим. Ҳеч қандай ортиқча савол беришмади. Аммо турмуш ўртоғимни маҳалла оқсоқоли ёнига чақириб: “Дўхтир, сизни яқин олиб огоҳлантиряпман, аёлингизнинг рўмолини ечтирмасангиз, қамалишингиз ва ортиқча маш-машаларга учрашингиз мумкин”, деб кўплаб мисоллар келтириб, саросимага туширибди. Турмуш ўртоғим уйга келганларидан кейин: “Қамалиб кетишни истамайман, рўмолингни ечасан”, деб қатъий қарорини айтдилар. Мен эса: “Қўрқманг, ҳеч ким сизни рўмолим учун қамамайди. Бу шунчаки гап-сўзлар. Барибир рўмолимни ечмайман. Агар сизга жиддий зарар етишидан қўрқсангиз, мендан ажралинг, шунда барчасидан қутуласиз”, дедим. Мени бироз койидилар-да, сўнгра умуман бу мавзуга қайтмадилар.

Ҳаётим давомида “ўша ёлғон даъво” қилувчилардан-да кўпроқ синовларга дуч келганман, Аллоҳга беадад шукрки, рўмолим бошимда, ҳеч ким рўмолимни тортиб олгани йўқ. Шу жараёнда имони заиф инсонлар нафақат рўмолларини ечишди, балки намоз ва рўзаларини ҳам унутиб, сочларини ҳар хил бўёқларга бўяб, ўзларини ўзлари йўлдан оздиришди. Аслида ўзимизнинг миллий кийимларимиз ҳам қулай, динимиз аҳкомларига ҳам ҳар томонлама мос келади.

Бир онахоннинг эътирофини мисол келтирсам: “Бир куни жамоат транспортида кетаётсам, ўрта ёшли эркак, тўсатдан гап бошлади. Кўринишимдан норози кайфиятда бўлгани шундоқ сўз оҳангидан билиниб турарди. “Ҳайронман, шундай кенг, катта рўмолни ўраб нима қиласиз, шу сизга ёқадими, опа?” деб савол берди. Мен шунда сизга-чи, ёқадими, дедим. Шунда у: “Йўғе, нималар деяпсиз, асло” деб елкаларини силкитиб қўйди. “Биз бу кийимни номаҳрам эркаклар худди шундай баҳо бериши учун кийганмиз”, деган жавобимга: “Узр опа, мен буёғини ҳисобга олмабман”, деб ўнғайсизланиб, кейинги бекатда шоша-пиша тушиб кетди”.

Аслида барча фаҳш ишларнинг боши аёлларнинг очиқ-сочиқ, беҳаё кийинишларидан, ўзгаларга қоматини кўз-кўз қилишидан кўпаяди, деб ўйлайман. Кенгроқ либос ва рўмол аслида аёлларнинг иффати, ҳаёси, назокатини ғаразли назарлардан ҳимоялайди.

Бу кичик, лекин натижаси улкан муаммога қарши курашишда асосий куч ота-онадир. Таассуфки, ота-оналарнинг эътиборсизлиги ва лоқайдлиги сабаб баъзи қизларимизнинг кийиниши шарм-ҳаё чегарасидан йироқлашган.

Ёшларнинг кийиниши борасида юзага келаётган ҳаёсизликка биз катталар: “Ахир ота-онаси шундай кийинтириб қўйгандан кейин бизга нима?” деб қараш билан ўзимизни оқлолмаймиз. Зеро, Пайғамбаримиз Муҳаммад (соллаллоҳу алайҳи ва саллам): “Жоним қўлида бўлган Зотга қасамки, яхшиликка буюрасиз ва ёмонликдан қайтарасиз ёки бўлмаса Аллоҳ таоло устингизга бир балони юборадики, ундан кейин қанча дуо қилсангизда дуоингиз қабул бўлмайди”, деганлар (Имом Термизий ривояти).

Демак халқ орасида яхшиликларни ёйиш, ёмонликларнинг олдини олишга ғайрат қилиш лозим бўлади. Аксинча, ҳеч кимнинг биров билан иши бўлмаса, ҳар ким ўзи билан ўзи овора бўлса, бундай ҳолда Аллоҳ таоло ҳам биздан юз ўгиради, дуоларимиз қабул бўлмайди.

Деярли ҳар куни бир хил манзаранинг гувоҳи бўламан. Роса тиқилинч бўлган автобусда ярим яланғоч кийинган қиз-жувонларнинг аҳволи жуда ачинарли. Калта юбка кийган қизларга тиқилиб турган эркаклар уларнинг авратини томоша қилишади. Бу эса беҳад хатарли ва ҳалокатли оқибатларга сабаб бўлиши аниқ.

Биз ҳаммамиз мўмина-муслималармиз. Кўча-кўйда ўз юриш-туришимиз билан ўзгаларга етарлича намуна бўлишимиз даркор. Бизга яратиб берилаётган шароитлардан мамнуниятлик ила хаддан ошмаслик даражасида фойдаланиб, ўзимизни ва ўзгаларни ислоҳ этишда, айниқса, кийиниш борасида чиройли ўрнак бўлайлик. Аллоҳ таоло Қуръони каримда бандаларини шундай огоҳлантиради: “Эй, аҳли китоблар! Динингизда ҳаддан ошмангиз ва олдиндан адашган ва кўпларни адаштирган ҳамда тўғри йўлдан чалғиганларнинг ҳавойи нафсларига эргашмангиз!” (Моида сураси, 77-оят).

Тарихда момоларимиз енги ва этаги калта кийим кийиб ёки рўмолсиз юрмаганлар. Бошдан фаришталарни қочирмаслик мақсадида ҳозирда ҳам бувижонларимиз бошларини ним очган ҳолда сочларини тарайдилар. Бунинг ҳам ўзига яраша ҳикмати бор, албатта.

Хусусан, Хотира майдонида она ҳайкали сиймосига назар солсангиз, ибо-ҳаё билан кийинган ҳақиқий ўзбек аёлини кўрасиз. Бундай кийимда аёлга бегоналарнинг ғаразли нигоҳи ҳеч қачон қадалмайди.

Нилуфар БОЗОРБОЙ қизи

Инсонни гўзал суратда яратиб, қаддини расо қилган, дилини иймон нури билан зийнатлаб, тилига нутқ ато этган ва жамики маxлуқотидан афзал қилган Аллоҳ таолога ҳамд бўлсин.

            Аллоҳ инсон қалбини илмлар хазинаси билан тўлдириб, уни раҳмат пардаси билан ёпди. Сўнгра инсон ботинни зоxирга таржима қиладиган тил билан қувватлантирилди. Ёпилган парда кўтарилди, тил ҳақни деди, нутқ равон бўлди. Бу эътибор, бу фазлдан марғуб тилдан фақат шукроналар сочилди.

            ТИЛ - Аллоҳнинг улуғ неъмати, ажибу латиф санъатидир. Гарчи у жисман кичик бўлса хам итоати туфайли топадиган савоби ёхуд итоатсизлиги туфайли содир этадиган гуноҳи жуда катта. Чунки, куфр хам, иймон  хам фақат тил гувоҳлигида аён бўлади. Куфр ва иймон эса тоат ва исённинг бошланиш ҳудудларидир.

            Шу билан бирга ҳар қандай борлиқ ёки йўқлик, маълум ёки номаълум нарсанинг барчаси тил воситасида изоҳланади ва ҳар қандай ҳолатда ўша нарсага тил ўзининг исботи ёки инкори билан рўбарў келади. Кимки тилнинг жиловини бўш қўйиб юборса, шайтон уни миниб олади, жар ёкасига ҳайдаб, халокатга судрайди. Одамлар тиллари “эккан ҳосил” лар туфайли жаҳаннамга юзтубан қулайди. Фақат шариат билан жиловланган тилгина бу офатдан нажот топади.

            Бас, шундай экан, тил дунё ва оxиратга фойдаси бор нарсани гапирсин. Хозир ё келажакда зарари тегадиган нарсани гапиришдан тийилсин. Нима мақтовга, нима мазамматга сабаб бўлишини билганидан сўнг, гарчи оғир бўлса ҳам, билганига амал килсин. 

            Тил туфайли жуда катта xатарлар етади. Бундан сақланишнинг ягона йўли жим юришдир. Шунинг учун шариатимиз жим юришни мақтайди ва жимликка ундайди. Пайғамбаримиз (с.а.в) айтган эдилар: “Жим юрган киши нажот топади” Термизий ривояти.

            Яна Расулуллоҳ (с.а.в): “Жим юриш - хикмат. (Аммо) бунга амал килувчилар кам” деган эдилар.    

 “Расулуллоҳ сўралди: Одамларнинг жаннатга киришга нима кўпроқ сабаб бўлади? 

– тақво ва гўзал xулқ, дедилар.

   Дўзаxга киришларигачи?

– иккита бўшлик: оғиз ва фарж, дедилар. Расулуллох (с.а.в)”

“Оғиз” дейилганда тил ва қорин назарда тутилган. Чунки, оғиз-тилнинг макони. Шунингдек, қоринга тушадиган нарса хам факат оғиз орқали ўтади.

Абдуллох Сакафий дейди: “Расули акрамга шундай дедим:

– Эй Аллохнинг Расули, махкам ушлашим керак бўлган нарсани айтинг.

– Роббим Аллох дегин, сўнг тўғри бўл, дедилар.

– Эй Расулуллох, мен учун нимадан кўпроқ xавфланасиз? Сўрадим. Тилларини

ушладилар,   

   сўнгра:

– Мана бу! Дедилар.”

Расулуллоҳ (с.а.в) нинг шундай деганлари Саид ибн Жубайрдан ривоят қилинади: “Одам боласи эрталаб уйқудан уйғонган пайтда, жасадининг барча аъзолари уйғонади ва улар тилга айтишади: “Орамизда сен Аллоҳдан (кўпрок) қўрқ! Чунки, сен тўғри бўсанг, биз тўғри бўламиз. Сен эгри йўлга кетсанг, биз хам эгри йўлга кетиб коламиз”.

Расулуллоҳ (с.а.в) дедилар: “Сўзлаётган тил борки, албатта, унинг олдида Аллоҳ турибди. Бас, нима деяётганини англаган киши Аллоҳдан қўрқсин”.

Исо алайҳиссалом: “Ибодат ўн қисмдир. Шундан тўққистаси жим юришда ва биттаси одамлардан узлатда” деди.

Расули акрам дейдилар: “гапи кўп одамнинг йиқилиши кўп. Йиқилиши кўп одамнинг гуноҳи кўп. Гуноҳи кўп одам жаҳаннамга лойикдир”.

            Тил билан бировни ғийбат қилиш харом қилинди. Чунки, унда биродарининг нуқсонини, агар ўзи эшитса, xафа бўладиган бирор камчилигини ўзгага билдириш бор. Шунингдек, кимнидир қоралаш маъноси яширинган барча феллар – киноями, имо-ишорами, кўз қисишми, хатда ёзишми, xуллас, шу мақсадни англатадиган барча ҳаракатлар ғийбат худудига киради ва у xаромдир.

“Айтилишича, қабр азоби уч қисм: бири ғийбат, бири чақимчилик, бири бавлдан эҳтиёт бўлмаслик туфайлидир”.

Ҳасан Басрий дейди: “Аллоҳга қасамки, ғийбат мўмин кишининг динига таом жасадга етганидан ҳам тезрок таъсир қилади”.

Абу Xурайра дейди: “Биродарингизнинг кўзига тушган заррани кўрасиз-у, жонингизга туташаётган оловни кўрмайсиз”.

Абдулла Авлоний ўз мисраларида шундай ёзади: “Агар журму гуноҳ бўлсин десанг оз, тилингни сақла ғийбатдан қишу ёз”.

Умар розияллоҳу анҳу шундай марҳамат қиладилар: “Аллоҳ таолонинг зикрини маҳкам тутинг, чунки у шифодир. Одамларни гапиришдан сақланинг, чунки у дардддир”

            Аллоҳ таоло барчаларимизни ўз ҳидоят йўлида бардавом килсин.

Манбалар асосида Хўжаобод тумани

“Етти чинор” жоме масжиди имом  ноиби Муҳаммадқуддус Абдулманнон тайёрлади.

Бугун, 5 июль куни Нурсултон Назарбоевнинг таклифига кўра, Ўзбекистон Республикаси Президенти Шавкат Мирзиёев Қозоғистонга сафар қилади. Бу ҳақда "uznews.uz" хабар берди.

Шавкат Мирзиёевнинг 6 июль куни Остона шаҳрининг ташкил топишининг 20 йиллигига бағишлаб ўтказиладиган байрам тантаналарида иштирок этиши айтилмоқда.

Эслатиб ўтамиз, 4 июль куни Шавкат Мирзиёев Нурсултон Назарбоевнинг таваллуд айёми билан табриклаган эди.

ЎМИ Матбуот хизмати

Саволларга Ўзбекистон мусулмонлари идораси Фатво ҳайъати жавоб беради.

Савол: Ассалому алайкум ва раҳматуллоҳу баракотуҳ! Жуда кўп мусулмон халқимиз чет элда ўқиш ва ишда юришади. Улар мусулмон бўлмаган халқлардан совға ёки пул олса бўладими?

Жавоб: Ва алайкум ассалом. Ҳадяни олиш жоиз.

Савол: Ассалому алайкум устозлар! Ишим нақд пул билан боғлиқ. Қўлимдан жуда кўп нақд пуллар ўтади. Жуда кўп одамлар бозордан чорва моллари, қишлоқ хўжалик маҳсулотлари, полиз экинлари ва сабзавотлар сотиб олиш мақсадида пластик картасидаги пулларини 5%-7% бўлса ҳам пул қилиб беришимни сўрайди, лекин бу ишни ҳалол эмас деб эшитганман. Сизларнинг фикрингиз қандай? Бу касб билан шуғуллансам бўладими, ахир бу маҳсулотлар ҳеч қайси бозорда пластик картага сотилмайди-ку?

Жавоб: Ва алайкум ассалом! Бу иш ҳаромдир, рибодир. Тенгма-тенг миқдорда нақд қилиб бермаслигингиз шариатда гуноҳ-рибо, қонунда жиноятдир.

Савол: Ассалому алайкум, қадрли устозлар, олиб бораётган ишларингизга Аллоҳим ажру савобини барокотли қилиб берсин. Саволим шундан иборатки, ўғлимнинг исмини Муҳиддин деб қўйганмиз, бу исм Қуронда борми, бор бўлса маъносини айтсангиз ёки ўғлимнинг исмини Мухриддин деб ўзгартирсам бўладими? Мухриддиннинг ҳам маъносини айтсангиз.

Жавоб: Ва алайкум ассалом! Муҳйиддин исми "Динни жонлантирувчи" деган яхши маънода. Ҳужжатига Муҳиддин ёзилиб қолган бўлса ҳам, Муҳйиддин деб чақиринглар. Бу исм Қуръонда зикр қилинмаган. Ҳар бир яхши маъноли исм Қуръонда зикр қилинган бўлиши шарт эмас.

Барча жавобларга ўтиш