muslim.uz
Ундан нима қолди?
Расулуллоҳ соллаллоҳу алайҳи ва салламнинг уйларида қўй сўйилди. У зот гўштни садақа қилиб юборишни буюриб, уйдан чиқиб кетдилар. Қайтиб келгач, Оиша розийаллоҳу анҳодан: “Қўйнинг қаери қолди?” деб сўрадилар. Оиша розийаллоҳу анҳо: “Фақат қўл қисми қолди”, деди. Шунда Расулуллоҳ соллаллоҳу алайҳи ва саллам: “Ҳаммаси қолиб, фақат қўли кетибди-да”, дедилар (Имом Термизий ривояти).
Бу буюк инсоннинг буюк жавоби! Расулуллоҳ соллаллоҳу алайҳи ва саллам доимо инсонларга дунёнинг охират экинзори эканини таъкидлар эдилар. Бугун фақат экиш бор, ҳосил олиш йўқ. Охиратда эса, ҳосил олиш бор, экиш йўқ!
Пайғамбар алайҳиссалом турли услуб ва ифодалар билан дунёнинг фонийлиги, охиратнинг боқийлигини инсонлар онгига сингдиришга ҳаракат қилар эдилар. Юқоридаги суҳбат ҳам барча оилада бўлиб турадиган эр-хотиннинг рўзғор чиқими ва овқат ҳақидаги сўзлари эди. Набий соллаллоҳу алайҳи ва саллам ана шу оддий суҳбатни гўзал бир дарсга айлантирдилар! У киши Оиша онамиз розийаллоҳу анҳодан дунё саволини сўрадилар:
– Қўйнинг қаери қолди?
Оиша онамиз ҳам дунё жавобини бердилар:
– Фақат қўл қисми қолди!
Оиша розийаллоҳу анҳонинг жавобларидан сўнг Расулуллоҳ соллаллоҳу алайҳи ва саллам дарров муҳим бир охират дарсини бердилар:
– Қўлидан бошқа ҳамма жойи қолибди!
Қўлимизда турган мол бизники эмас. У баққолники, бензин қуйиш шаҳобчасиники, электр идорасиники, кийим сотувчиники, новвойхонаники, дорихонаники... Жумладан, меросхўрларники ҳам. Ҳақиқий молимиз қиёматда топиш учун бугун Аллоҳнинг ҳузурида заҳира қилаётганимиздир!
Қўйнинг қўли еб тугатилади. Аммо ундан чиқарилган садақа Аллоҳнинг ҳузурида сақланиб, Ўзининг карами билан эътибор берадиган охиратдаги “банк”да сақланади!
Шу ҳақда Расулуллоҳ соллаллоҳу алайҳи ва саллам: “Ким ҳалол топганидан бир дона миқдорича садақа қилса – ҳолбуки, Аллоҳ фақат ҳалолини қабул қилади – Аллоҳ уни ўнги билан қабул қилади. Сўнгра уни эгаси учун худди бирингиз ўз тойчоғини ўстирганидек парваришлайди. Ҳатто у тоғдек бўлиб кетади”, деганлар (Имом Бухорий ривояти).
“Банк” ва заҳиранинг ажойиблигини қаранг! Аллоҳнинг розилигини истаб қилинган хурмо миқдоридаги садақангизни Ҳақ таоло қабул қилгандан кейин ўстирар экан. Тасаввур қилинг: охират кунида қилган садақангизни худди тоғ каби катталашиб кетган ҳолда топасиз!
Султон Сулаймон Қонуний ўлим тўшагида ётганида атрофидагиларга: “Агар вафот қилсам, қўлимни тобутдан чиқариб қўйинглар. Инсонлар кўрсинки, султон дунёдан икки қўли бўш ҳолатда кетмоқда!”. Азиз, газетхон садақа қилайлик, зеро, кафаннинг чўнтаги йўқ!
Абдулқодир ПОЛВОНОВ
тайёрлади
Саудияда ноёб Қуръонлар кўргазмаси ўтказилди
18 апрель куни бўлиб ўтган Халқаро ёдгорликларни ва тарихий жойларни асраш кунини нишонлаш учун қирол Абдулазиз жамоат кутубхонаси пайшанба куни Ар-Риёдда ислом ва араб маданиятининг бой тарихини намойиш этадиган ноёб муқаддас Қуръонлар кўргазмасини ўтказди.
Islam.ru хабарига кўра, коллекция 267 та Қуръон ва 20 та қимматли музей нусхасидан иборат бўлиб, уларнинг аксарияти ҳижрий 10-13 асрлар оралиғида, яъни эрамизнинг 15-19 асрлари оралиғида ёзилган.
Кутубхонада ноёб тангалар ва хаттотлик санъатини қўшганда араб ва ислом мероси тасвирланган бошқа коллекциялар ҳам мавжуд.
Кўргазмада тақдим этилган ноёб Қуръон 30 варақдан иборат. Биринчи фолиант ёрқин ранглар ва олтин сувдан фойдаланган ҳолда гул нақшлари билан безатилган.
Қолган саҳифалар бутунлай зарҳал қилинган ва ён рамкаларда милодий 1240 ёки милодий 1824 йилларда яратилган насх хати билан рангли ва зарҳал гул нақшлари мавжуд.
1025 ҳижрий ёки 1616 милодий Рамазон ойида Каъба қаршисида Маккада ёзилган Ал-Фотиҳа сурасидан тортиб то Нас сурасигача бўлган яна бир тўлиқ Қуръон коллекциянинг бир қисми ҳисобланади.
Шунингдек, турли хил гулли безаклар билан ҳинд Қуръонлари, шунингдек, хитой, кашмир ва мамлук ишлаб чиқаришидаги ажойиб намуналар мавжуд.
Ўзбекистон мусулмонлари идораси матбуот хизмати
Сохта даъватчиларнинг такфир масаласига раддия (аудио)
Муҳаммад Аюб Фахриддинов
Корхоналар ўртасида ўтказилган танлов натижалари маълум бўлди
Ўзбекистон мусулмонлари идораси томонидан “Ҳаж – 2022” ҳамда “Умра – 2022” зиёратчилари учун нимча (камзул) ва сумка тайёрлаб берувчи корхона ва ташкилотлар ўртасида очиқ танлов эълон қилинган эди.
Жорий йил 18 апрель куни Ўзбекистон мусулмонлари идорасида “Ҳаж – 2022” ҳамда “Умра – 2022” зиёратчилари учун нимча (камзул) ва сумка тайёрлаб берувчи корхона ва ташкилотлар ўртасида мазкур маҳсулотларни етказиб бериш бўйича очиқ танлов бўлиб ўтди.
Якуний натижага кўра, соҳанинг малакали мутахассисларидан иборат танлов ҳайъати “Ҳаж – 2022” ва “Умра – 2022” зиёратчилари учун нимча (камзул) ва сумка тайёрлаб берувчи корхоналар орасида белгиланган талабларга ҳар томонлама жавоб берувчи муносиб ташкилот сифатида “Almiva” МЧЖ танлаб олинди.
Мазкур очиқ танловда қатнашиб, ўз хизматларини таклиф этган барча корхона ва ташкилот вакилларига миннатдорчилик билдирамиз.
Ўзбекистон мусулмонлари идораси
Қадр кечасининг 7 та аломати
1. Қадр кечасида сокинлик ҳукм суради. Атроф мусаффо, ёруғ, худди сукунатга ўралган ёғдули ой чарақлаб тургандек бўлади.
2. Осмондаги юлдузлар учмайди, бошқа жисмлар қалтис ҳаракат қилмайди. Касалликлар пайдо бўлмайди.
3. Ҳаво мўътадил бўлади, жуда иссиқ ҳам, жуда совуқ ҳам бўлмайди.
4. Эрталаб қуёш қизариб, тоғарага ўхшаш, ёғдуси жуда заиф бўлиб уфқдан бош кўтаради. Сабаби ўша тун ва кунда кўп фаришталар ерга тушиб-чиқиб туриши оқибатида қуёш нурларини ҳам тўсиб қўяди.
5. Қадр кечасида ёмғир-қор ёғмайди, ёғса ҳам ўта майин ва ёқимли бўлади. Шўр сувлар чучук бўлади.
6. Дарахтлар ўз шохларини ерга эгилтириб туради.
7. Ўша куни шайтонлар чиқишига йўл қўйилмайди.
Абдувоҳид Ўрозов тайёрлади
Мақолалар
