ОГОҲЛИК – ДАВР ТАЛАБИ

Гувоҳи бўлиб турганимиздек, баъзи жойларда табиий офат сабабидан, яна баъзи жойларда эса қирғинбарот уруш туфайли шаҳарлар вайрон бўлиб, аҳоли сарсон-саргардонликда кун кечирмоқдалар. Аллоҳ таолога беадад шукрлар бўлсинки, юртимизда тинчлик ва осойишталик неъмати сояси остида, ҳаётимиз осуда давом этмоқда.
Пайғамбаримиз Муҳаммад (с.а.в) марҳамат қиладилар “Икки неъмат борки, кўпчилик одамлар унинг қадрига етмайдилар. У сиҳат-саломатлик ва хотиржамликдир”.

Президентимиз Шавкат Мирзиёев ташабуслари билан диёримизда бунёдкорлик ишлари жадал суръатларда олиб борилиши натижасида шаҳарларимиз кун сайин чирой очиб бормоқда.

Дарҳақиқат, инсон огоҳ бўлсагина ўзининг келажагига ақл билан теран назар ташлайди, келиши ёки содир бўлиши мумкин бўлган фитна-фасод, хавф-хатарни олдини олиш ва бартараф қилиш ҳаракатида бўлади. Аксинча, ғофил, бепарво ва лоқайд бўлган кимса эса атрофида нималар бўлаётганига ҳам эътибор бермай, охир оқибат турли бало ва мусибатларга дучор бўлади. Шунинг учун ҳам Аллоҳ таоло ақл-фаросати ва онгини ишлатмайдиган, ўзининг ким эканлигини англаб етмаган, бугунги куннинг ҳузур-ҳаловати билан яшаб, эртаси ҳақида, Ватан тинчлиги, миллат осойишталиги ҳақида қайғурмайдиган кимсалар ҳақида шундай марҳамат қилади:

яъни: “Жаҳаннам учун жинлар ва инсонларнинг кўпчилигини яратганмиз. Уларда қалблар бор, (лекин) улар билан “англамайдилар”. Уларда кўзлар бор, (лекин) улар билан “кўрмайдилар”. Уларда қулоқлар бор, (лекин) улар билан “эшитмайдилар”. Ана ўшалар ҳайвонлар кабидирлар. Балки, улар (янада) адашганроқдирлар. Айнан ўшалар ғофиллардир”.

Тафсир китобларида ушбу оятдаги “англамайдилар”, “кўрмайдилар”, “эшитмайдилар” феъллари мажозий маънода айтилган бўлиб, бизни анашу ғофил кимсалардан бўлиб қолишдан ўзи асрасин. Пайғамбаримиз Муҳаммад (с.а.в) ҳаёт вақтларида асло вужудга келмаган, аммо келажак асрларда вужудга келиши мумкин бўлган, халқ ва миллатлар бирлиги ва осойишталигига таҳдид солувчи фитна-фасод, бузғунчиликлар ҳақида хабар бериб, огоҳ этган эдилар:

яъни: “Умматимдан қайси бири умматимга қарши чиқса, унинг яхши ва ёмонини фарқига бормаса, мўминига зиён тегишидан ўзини тиймаса, берган ваъдасига вафо қилмаса, у менинг умматим эмас!”.

Қурьони карим мўминларни диний эътиқоди ва миллатидан қатьий назар барча одамлар билан тинчлик-хотиржамликда яшашларини рағбатлантиради:

яъни: “…Бирор жонни ўлдирмаган ёки Ерда (бузғунчилик ва қароқчилик каби) фасод ишларини қилмаган инсонни ўлдирган одам худди ҳамма одамларни ўлдирган кабидир. Унга ҳаёт бахш этган (ўлимдан қутқариб қолган) одам эса барча одамларни тирилтирган кабидир”.

Демакки, динимизнинг тинчликка бўлган эътибори нечоғлик катта ҳамда бағри кенглик унинг негизидир. Инсон ўзидаги неъматнинг қадрини унинг устида мулоҳаза юритиш, шу неъматдан ўзгалар ҳам баҳраманд ёки бебаҳра эканлигини ўйлаб кўриш билан билади. Бу эса янада кўпроқ Аллоҳга шукр қилишга ундайди. Неъматнинг бардавом бўлиши, унинг шукри адо этилишига боғлиқдир. Баъзи неъматларнинг шукри тилда “алҳамду лиллаҳ” дейиш билан адо бўлса, бошқа хил неъматлар ҳам борки, уларнинг шукрини амалий тарздагина адо этиш мумкин. Тинчлик ана шундай амалий шукр талаб қиладиган неъматдир. Бу неъматнинг шукрини адо этиш барчанинг зиммасига фарздир. Кексалар тинчликнинг мустаҳкамлигини сўраб дуо қилишлари, ўрта ёшлилар ўзларининг ҳалол меҳнатлари, ёшлар эса уни асраш ва қадрига етиш борасида астойдил бел боғлашлари билан бу неъматнинг шукрини адо этган бўладилар.

Қуръони каримда марҳамат қилинади яъни: “…Эзгулик ва тақво (йўли)да ҳамкорлик қилингиз, гуноҳ ва адоват (йўли)да ҳамкорлик қилмангиз! Аллоҳдан қўрқингиз! Албатта, Аллоҳ азоби қаттиқ зотдир”, – деб марҳамат қилган.

Баҳоуддин Нақшбанд айтганидек:
Кўр кетар экан билмай истиқболда чоҳ,
Уни огоҳ этмасанг сендадир улуғ гуноҳ.

Жасур РАУПОВ
“Исломота”жоме масжид имом-хатиби

Бисмиллаҳир Роҳманир Роҳийм. Алҳамдулиллаҳи Роббил аламийн. Вассолату вассаламу ала Росулиҳи Муҳаммадин ва ала олиҳи асҳабиҳит тоййибийна тоҳирийн.

Анас ибн Молик розияллоҳу анҳудан ривоят қилинади: “Расулуллоҳ соллаллоҳу алайҳи васалламнинг (ансорий) саҳобаларидан бири Абу Муаллақ деган куня билан аталарди. У ўзининг ва бошқаларнинг моли билан савдо қиладиган тожир эди. Унинг вазифаси (ибодати) ва парҳези бор эди.

Бир куни савдо сафарига чиққанда, унга қуролланган ўғри йўлиқди ва: “Мато (буюм)ингни қўй, чунки, мен сени ўлдирмоқчиман” деди. Абу Муаллақ ундан: “Қонимни нега истайсан, ахир сенинг ишинг мол билан-ку?” деб сўради. Ўғри: “Мол меники. Мен фақат сенинг қонингни истайман” деди. Шунда Абу Муаллақ: “Агар мени ўлдирмасликдан бош тортадиган бўлсанг, у ҳолда менга имкон бер, тўрт ракат намоз ўқиб олай” деди. Ўғри: “Истаганингча ўқийвер” деди.

Абу Муаллақ розияллоҳу анҳу таҳорат олди, кейин намоз ўқиди. Охирги саждада: “Я Вадуд! Я Зал аршил мажийд! Я Фаъъаалу лима юрийд! Асъалука биъиззикаллазий лаа юром. Ва мулкикаллазий лаа юзом. Ва бинурикаллазий малаъа аркаана аршик. Ан такфияний шарро ҳазал лисс. Я Муғийс, ағисний! Я Муғийс, ағисний! Я Муғийс, ағисний!” деб дуо қилди.

Шу пайт от минган бир киши қўлидаги найзасини отнинг икки қулоғи ўртасида кўтариб олиб, кела бошлади. Келиб, найзасини ўғрига санчиб, уни ўлдирди. Кейин тожирга юзланди. Тожир ундан: “Сен кимсан? Аллоҳ сен сабабли менга ёрдам берди” деб сўради. У: “Мен тўртинчи осмондан келган фариштаман. Дуо қилганингда, осмон эшикларида қарсиллаш, гумбурлаш бўлди. Кейин иккинчи марта дуо қилганингда, осмон аҳлида шовқин бўлди. Кейин учинчи марта дуо қилганингда, “Қийинчиликка тушиб қолган кишининг дуоси” дейилди. Шунда мен Аллоҳдан ўғрини ўлдиришни менга топширишини сўрадим” деди. Кейин у: “Ҳурсанд бўл!” деди.

Анас розияллоҳу анҳу айтдилар: “Билгингки, ким таҳорат қилиб, тўрт ракат намоз ўқиб, ушбу дуолар билан дуо қилса, у қийналган киши бўлсин ёки қийналган бўлмасин, дуоси ижобат қилинади”. Ибн Абу Дунё раҳимаҳуллоҳ “Мужабид даъва” ва “Ҳаватифул жинон” номли китобларида келтирган.

Бу ривоятда келган дуо (“Я Вадуд! Я Зал аршил мажийд! Я Фаъъаалу лима юрийд! Асъалука биъиззикаллазий лаа юром. Ва мулкикаллазий лаа юзом. Ва бинурикаллазий малаъа аркаана аршик. Ан такфияний шарро ҳазал лисс. Я Муғийс, ағисний! Я Муғийс, ағисний! Я Муғийс, ағисний!”) Аллоҳнинг изни билан қийналган банданинг мушкули осон бўлишига сабаб бўлади.

Ривоятда келтирилган саҳоба бошларига мушкул иш тушганда нима қилдилар? Намозга киришдилар. Аллоҳга сажда қилиб, Ундан ёрдам сўрадилар. Чунки, у киши бундай қилишни Набий соллаллоҳу алайҳи васалламдан ўрганганлар. Зеро, Набий соллаллоҳу алайҳи васалламни бирор иш ташвишга солганда у зот намозга киришар, намоз ўқиб, Аллоҳдан ёрдам сўрар эдилар.

Бу ривоятлар намознинг шаъни, аҳамияти нақадар улуғ эканини кўрсатади.

Муҳим ишлардан яна бири – намозни хушуъ билан адо этишдир. Хушуъ – намоз ўқиётганингда Аллоҳдан бўлган қўрқувни ёки Унга бўлган муҳаббатингни қалбингда ҳозир қилиб, ҳис қилиб туришингдир.

Намозни хушуъ ила адо этишга ёрдам берадиган омиллардан бири киши ўқиётган намозини “Эҳтимол, бу менинг охирги намозимдир” деб ўқимоғидир.

Абу Айюб розияллоҳу анҳудан ривоят қилинган ҳадисда бир киши Набий соллаллоҳу алайҳи васалламнинг ҳузурларига келиб “Менга таълим беринг ва мухтасар қилинг” деди. Шунда Пайғамбар соллаллоҳу алайҳи васаллам унга: “Видолашувчи одамнинг намозидек намоз ўқи...” деганлар. Имом Аҳмад ва Ибн Можа ривоят қилишган.

Агар инсон намозни дунёдан кетаётган одамдек ўқиса, хушуъсини, одобларини ўрнига қўйиб, чиройли адо этишга ҳаракат қилади. Эҳтимол, ўша ўқиган намозидан кейин яна намоз ўқиш насиб қилмас.

Аллоҳ таоло Қуръонда “Мўминлар нажот топдилар. Улар намозларида  ўзларини камтар тутувчидирлар” деган (Муъминун сураси, 1-2-оятлар).

Оятдаги “камтар тутувчидирлар” калимаси арабчада “хошиъун” бўлиб келган. Бунинг маъноси “хушуъ қилувчилар” деганидир.

Агар саждада бўлсанг, дуони кўпайтир. Албатта, бу гап нафл намозларга тегишли. Нафл намоз ўқиётган одам сажда чоғида Аллоҳга ихлос билан дуо қилиши лозим. Чунки, банда саждада турганда Аллоҳга энг яқин ҳолатда турган бўлади.

Марфуъ ҳадислардан бирида айтилишича, “Пайғамбар соллаллоҳу алайҳи васаллам рукуъ қилсалар, рукуъларида “Аллоҳумма лака рокаъту ва бика аманту валака асламту хошаъа лака самъий ва басорий ва муххий ва изомий ва асабий” дердилар. Агар рукуъдан бошларини кўтарсалар, “Самиъаллоҳу лиман ҳамидаҳ Роббана валакал ҳамд милъас самавати ва милъал арзи ва милъа ма шиъта мин баъду” дер эдилар. Агар сажда қилсалар, “Аллоҳумма лака сажадту ва лака асламту сажада важҳия лиллазий холақоҳу ва соввароҳу фаҳсана сувароҳу ва шаққа самъаҳу ва басароҳу табарокаллоҳу аҳсанул холиқийн” дер эдилар”. Исҳоқ ибн Роҳавайҳ раҳимаҳуллоҳ Али ибн Абу Толиб розияллоҳу анҳудан ривоят қилганлар.

Бир куни саҳобалардан бирлари Набий соллаллоҳу алайҳи васалламнинг орқаларида намоз ўқиётган эди. Рукуъдан бошини кўтарганда “Роббана лакал ҳамд ҳамдан касийрон тоййибан мубарокан фийҳ” деди. Бундай ҳамд айтишни Пайғамбар алайҳиссалом ўргатмаган эдилар. Буни ўша саҳобанинг ўзлари айтган эдилар. Лекин мазкур саҳоба бу ҳамд шариатга мувофиқ келишини билганлари учун айтган эдилар. Намоз ўқиб бўлингач, Пайғамбар соллаллоҳу алайҳи васаллам “(Рукуъда) гапирган ким?” дедилар. Бояги саҳоба “Мен, эй Расулуллоҳ” дедилар. Набий алайҳиссалом у кишининг қилган ишларини инкор қилмадилар. “Нега мен қилмаган нарсани ўзингча қилдинг?! Агар ўша иш хайрли бўлганда, сендан аввал ўзим қилган бўлардим” демадилар. Балки у саҳобанинг қилган ишини тасдиқладилар ва унга “Мен ўттиздан ортиқ фаришталар ўшани қайси бирлари аввал ёзиб олиш учун шошаётганларини кўрдим” дедилар.

Яъни сен айтган калималарни биринчи бўлиб ёзиш мақсадида фаришталар мусобақа қилаётганларини, ёзиш учун шошаётганларини кўрдим, дедилар.

Аллоҳ таолодан бизга Ўзини зикр қилиш учун, Ўзига шукр қилиш учун ва Ўзига чиройли ибодат қилиш учун ёрдам беришини сўраймиз. Чунки, Аллоҳни зикр қилишга, Унга шукр қилишга ва Унга чиройли ибодат қилишга бизнинг ўзимизда куч-қувват йўқ. Фақат Роббимиз бизга куч-қувват берсагина, мазкур ибодатларни қиламиз. Вассаламу алайкум вароҳматуллоҳи вабарокатуҳ.  

Шайх Иброҳим Аккоснинг “Калимату хойр” кўрсатувидан Нозимжон Ҳошимжон таржимаси   

1. Меҳмонни ҳурмат қилиш.

Расулуллоҳ соллаллоҳу алайҳи васаллам: “Ким Аллоҳга ва охират кунига имон келтирган бўлса, меҳмонини ҳурмат қилсин. Ким Аллоҳга ва охират кунига имон келтирган бўлса, қўшнисига яхшилик қилсин. Ким Аллоҳга ва охират кунига имон келтирган бўлса, яхши сўз айтсин ёки жим бўлсин”, дедилар (Имом Байҳақий ривояти).

2. Меҳмонни очиқ юз ва ширин сўзлар билан кутиб олиш.

Умму Ҳонеъ розияллоҳу анҳо айтади: “Расулуллоҳ соллаллоҳу алайҳи ва салламнинг ҳузурларига келганимда: “Марҳабо! Хуш келибсиз! Эй Умму Ҳонеъ”, деб қарши олдилар” (Имом Бухорий, Имом Муслим ривояти).

Авзоъий раҳимаҳуллоҳ: “Меҳмоннинг ҳурмати унга очиқ юз билан хизмат қилишдир”, деган.

3. Меҳмондорчиликка тақводор, дину-диёнатли иинсонларни таклиф қилиш.

Абу Саид розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Фақат мўмин билан бирга (йўлдош) бўл. Таомингдан фақат тақводоргина тановул қилсин”, дедилар.

4. Меҳмонларни дастурхон олдида ёлғиз қолдирмай, ёнида гаплашиб ўтириш, бирга еб-ичиш.

Пайғамбаримиз соллаллоҳу алайҳи васаллам Оиша розияллоҳу анҳо онамизга: “Меҳмонинг билан ўзинг ҳам овқат егин, чунки меҳмон ёлғиз ўзи ейишдан ҳаё қилади”, деганлар (Имом Байҳақий ривояти).

5. Таомни ёши улуғлардан бошлаш, кейин ўнг томондагиларга узатиш.

Пайғамбаримиз соллаллоҳу алайҳи васаллам одамларга сув узатсалар: “Катталардан бошланг”, дер эдилар.

Агар меҳмонлар ёшда баробар бўлсалар, ўнг томондан узатилади.

6. Меҳмон бир луқма таом еганидан сўнг, ҳадеб “олинг”, “олинг” деб уни ейишга мажбурланмаслик.

7. Меҳмонни эшик олдигача кузатиб қўйиш.

Расулуллоҳ соллаллоҳу алайҳи васаллам: “Меҳмонни эшик олдигача кузатиб бориш суннатдир”, деганлар (Имом Байҳақий ривояти).

8. Мезбоннинг ҳақига дуо қилиш.

Набий соллаллоҳу алайҳи васаллам меҳмон қилган кишининг ҳақига дуо қилардилар:

اللهم بارك لهم فيما رزقتهم واغفر لهم وارحمهم

“Аллоҳумма барик лаҳум фийма розақтаҳум вағфир лаҳум ва арҳамҳум”

“Ё Аллоҳ, бу хонадон аҳлининг ризқига барака бер, уларнинг гуноҳларини мағфират қил ва уларга раҳм айла!” (Имом Муслим ривояти).

أللهم أطعم من أطعمني واسق من سقاني

“Аллоҳумма атъим ман атъаманий, васқи ман сақоний”

“Ё Аллоҳ, мени таомлантирган кишиларни Сен ҳам таомлантиргин, мени сув билан суғорган кишиларни сен ҳам сероб қилгин!”.

أفطر عندكم الصائمون وأكل طعامكم الأبرار وصلت عليكم الملائكة

“Афтара индакумус соимуна ва акала тоаъмакумул аброр ва соллат алайкумул малоика”

“Хонадонингизда рўзадорлар оғиз очсин, таомингизни яхшилар есин ва сизларга фаришталар салавот айтиб, ҳақингизга дуо ва истиғфор айтсин!” (Имом Абу Довуд ривояти).

Даврон НУРМУҲАММАД

тайёрлади

Ҳар бир ишни “Бисмиллаҳир-роҳманир-роҳийм” (Меҳрибон ва Раҳмдил Аллоҳнинг номи билан) — дея бошлайдиган мусулмон халқимиз дуо қилишни ҳам канда қилмайди.

Дарҳақиқат, баъзан дуога оддий ва одатий амал сифатида эътиборсиз қараймиз. Аслида дуо энг катта ибодат, банда ва Яратган ўртасидаги хос сирли мулоқот ҳамда катта руҳий тарбиядир. Ҳадиси шарифларда “Дуо ибодатнинг мағзидир”, дейилган. Чунки дуо қилувчи қўли, қалби ва умидларини осмонга кўтариб, ғурури ва кибрини ерга пасайтириб, Парвардигори қаршисида нақадар ожиз ва муҳтож эканлигини изҳор этиб, Унга муножот қилади.

Ҳаётда одамлардан қайта-қайта сўрайверилса, қанчалик саховатли бўлмасин, охир-оқибат малолланади. Аммо Аллоҳ таолодан қанча сўралса ҳам, малолланмайди. Аксинча, У зотга дуо қилмаган, ҳожатларини сўрамаган бандасидан ғазабланади.

Қуръони каримда Аллоҳ таоло бандаларига жуда яқин эканлиги, ҳатто қалбларидан ўтиб турган ўй-фикрларни ҳам билиб туриши ва дуо қилувчининг дуосини ижобат қилиши такрор-такрор эслатилган. Пайғамбаримиз Муҳаммад (соллаллоҳу алайҳи васаллам): “Албатта, Роббингиз ҳаёли ва карами кенгдир. У Зот бандаси Унга икки қўлини кўтариб дуо қилса, уларни бўш қайтаришдан ҳаё қилади” – дедилар.

Дуо қабул бўлиши учун аввало қалб уйғоқ, Яратганга боғланган, Унга муҳтожлигини изҳор этган ҳолатда дилдан чиқариб қилиниши лозим. Шунингдек, луқманинг ҳалол бўлиши, гуноҳ ва ёмон ишлардан узоқда бўлиш, савобли амалларни кўп қилиш ҳам кишининг дуоси қабул бўлиши сабабларидандир. Дуо қилаётганда кафтларни очиқ ҳолда кўтириб турилади, сўнгра уларни юзга суртилади.

Айниқса, саҳарда, азон айтилгандан кейин, намоздан сўнг, ёмғир ёққанда, сафарда, қалблар юмшаб турганда дуолар кўпроқ ижобат бўлади.

Азиз юртдошлар, бу катта имкониятдан қанчалик фойдаланяпмиз! Охирги марта қачон дилдан дуо қилдик, хатоларимизга тавба тазарру қилдик! Эл-юртнинг ҳақига дуо қиляпмизми? Бугун юртимизда катта ислоҳотлар, хайрли ишлар амалга оширилмоқда. Бу ишлар ўз-ўзидан бўлаётгани йўқ. Муҳтарам юртбошимиз бошчилигида қанчадан-қанча фидоий юртдошларимиз кун-у тун меҳнат қилишмоқда. Бу хайрли ишлар сизу биз учун, халқ учун, келажак авлодларимиз учун!

Бизчи? Бунга фақат томошабин бўлиб туришимиз керак эмас. Ўз масъулиятимизни ҳалол-пок, сидқидилдан бажариб, фарзандларимизни тарбиялаб, доимо эл-юрт ҳақига эзгу дуолар қилиб боришимиз шарт! Илоҳо, жонажон ватанимизга кўз тегмасин!

Дилмурод СУЛАЙМОНОВ
Гулистон тумани бош имом-хатиби

       Ислом динини халқаро миқёсда танилиши 628 йил  Муҳаммад соллаллоҳу алайҳи васалламни Макка мушриклари билан олиб борган, тарихда “Ҳудайбия” сулҳи номи  билан машҳур бўлган  шартномадан сўнг амалга оширилди. Исломни етказиш учун Пайғамбаримиз соллаллоҳу алайҳи васаллам турли атрофдаги давлат ва қабилаларга элчилар юборишни бошладилар. Подшолар муҳрсиз мактубларни қабул қилмаслиги маълум бўлгач, кумушдан узук ясатилиб, унга уч қатор қилиб Муҳаммад Аллоҳнинг элчиси деб нақш қилдириб ёздирилди ва шу узук билан мактубларга муҳр босилди. 7 ҳижрий йил Муҳаррам ойида олти нафар элчини атрофдаги катта давлатларга бир кунда юбордилар. Ушбу элчиларнинг барчаси ўзлари юборилган ўлкани тилини билишар эди. Биринчи элчи Амр ибн Умайя аз Зомирий бўлган. У Ҳабашистон подшоси Нажошийга Пайғамбаримиз соллаллоҳу алайҳи васаллам номларидан икки марта мактуб етказган. Мактубларнинг биринчисида  подшони исломга чақириб, Қуръон оятлари ёзилган. Маълумотларга кўра, мактуб Нажошийга етиб борганда, у мактубга ҳурмат бажо келтириб, исломни қабул қилган. Нажоший имкони бўлганда ўзи Пайғамбаримиз Муҳаммад соллаллоҳу алайҳи васалламнинг олдиларига келишини айтган. Ҳақиқатдан ҳам Нажошийни ўша вақтда имкони бўлмаган. Чунки Ҳабашистонда (Эфиопия) ўша вақтда сиёсий беқарорлик мавжуд бўлиб, Нажошийга қарши бўлган сиёсий кучлар унга қарши ҳарбий ҳаракатлар олиб боришаётган эди. Шундан сўнг у исломни қабул қилганлиги ҳақида мактуб ёзган.[1]    Иккинчи мактубда бўлса, Пайғамбаримиз соллаллоҳу алайҳи васаллам Абу Суфённинг қизи Умму Ҳабибага уйланмоқчи эканликларини   билдириб, Нажошийдан ушбу  никоҳда совчи бўлишини илтимос қилиб  мактуб юборган эдилар. Шунингдек мактубда Умму Ҳабиба билан бирга баъзи саҳобаларни биргаликда Мадинага юборишини сўраган эдилар.[2]   Умму Ҳабиба эри Убайдуллоҳ ибн Жаҳш билан Ҳабашистонга ҳижрат қилишган эди. Убайдуллоҳ насронийликни қабул қилиб, исломдан воз кечган ва кўп ўтмай вафот этган эди.

       Нажоший Пайғамбаримиз соллаллоҳу алайҳи васаллам номларидан Умму Ҳабибага тўрт юз динор миқдорида маҳр берган. Мусулмонларни Мадинага қайтиш харажатларини тўлиқ ўз зиммасига олган. Уларни ихтиёрига иккита кема топширган. Пайғамбаримиз соллаллоҳу алайғи васалламнинг мактубларини махсус қутида сақлаган.[3]

  Пайғамбаримиз соллаллоҳу алайҳи васаллам саҳобаларга қаерга юборсалар ана ўша ерга боришлари лозимлигини айтиб, Исо ибн Марям алайҳимассалом юборган элчилар яқинга бориб узоққа бормаганликларини айтганликлари ривоят қилинади.[4] Ибн Ҳишом ривоят қилишича, Набий соллаллоҳу алайҳи васаллам Ҳудайбиядан сўнг саҳобаларга: “Эй одамлар Аллоҳ таоло мени барчага раҳмат қилиб юборди. Ҳаворийлар Исо ибн Марямнинг буйруқларига хилоф иш тутганларидек  йўл тутманглар” дедилар. Саҳобалар ҳаворийлар нима қилишганини сўрадилар. Пайғамбаримиз соллаллоҳу алайҳи васаллам: “Исо алайҳиссалом уларни мен сизларни чақирган нарсага чақирган эди. Яқинга юборган кишилар рози бўлишди. Узоққа юборилганларга оғир келиб норози бўлишди. Шундан сўнг Исо алайҳиссалом Аллоҳга шикоят қилдилар. Дангасалик қилиб бош тортганларларнинг тили ўзгариб, юборилган миллатнинг тилига айланиб қолди”- дедилар. Саҳобалар Пайғамбаримиз соллаллоҳу алайҳи васалламга қаерга юборсангиз биз борамиз дейишди.[5] Расулуллоҳ соллаллоҳу алайҳи васаллам Абдуллоҳ ибн Ҳузофани Эронни подшоси Кисрога, Сулайт ибн Амрни Ямоманинг подшоҳи Ҳавза ибн Алига, Ало ибн Ҳазрамийни Ҳижрнинг подшоҳи Мунзир ибн Совийга, Амр ибн Осни Уммонни подшолари Жуланданинг ўғиллари Жайфар ва Уббодга, Диҳя ал Калбий Византия империяси императори Ҳирақлга, Шужоъ ибн Ваҳб ал Асадийни   Ғассонийлар подшоси Мунзир ибн Ҳорис ва яна бир Ғассонийлар подшоси Жабала ибн Айҳамга, Амр ибн Умайя аз Зомирийни Ҳабашистон подшоси Нажошийга, Ҳотаб ибн Абу Балтаъани Миср подшоси Муқовқисга юбордилар.[6] Барча элчилари Пайғамбаримиз соллаллоҳу алайҳи васалламнинг вафотларидан олдин Мадинага қайтишган. Фақат  Ало ибн Ҳазрамийгина кейин қайтган. У Пайғамбаримиз соллаллоҳу алайҳи васаллам вафот этганларида Баҳрайнда эди.[7]  Пайғамбаримиз соллаллоҳу алайҳи васаллам Яман аҳолисига йўллаган мактубларида яҳудий ва христианлардан исломни қабул қилганлар мусулмон ҳисобланиши, уларга мусулмонларга хос ҳуқуқ ва мажбуриятлар жорий этилиши, аксинча ўз дини яҳудийлик ёки насронийликда қоладиган бўлса, мусулмон бўлишга мажбур этилмай, жизя солиғи олиниши  айтилган эди.[8] Муҳаммад соллаллоҳу алайҳи васаллам Византия Эрон давлати императорларига мактуб юборган эдилар. Эрон подшоҳи мактубни ўқиб, йиртиб ташлагани ҳақида маълумотлар мавжуд. Византия императори бўлса, исломни қабул қилмаган бўлсада, элчига илиқ муносабатда бўлиб, мактубга ҳурмат кўрсатгани айтилади. Пайғамбаримиз соллаллоҳу алайҳи васалламга ушбу хабар етиб борганда, Форслар мактубни парчалагандек парчаланишини, Византия бўлса маълум муддат сақланиб қолинишини башорат қилганлар.[9]  Анас ибн Молик ривоят қилган ҳадисда ҳам юқоридаги мазмундаги маълумотлар мавжуд. Шунингдек ушбу ривоятда  Пайғамбаримиз соллаллоҳу алайҳи васаллам мусулмон бўлмаган Ҳабашистоннинг подшосига мактуб ёзганликлари ҳақида ҳам маълумот келтирилган.[10] Бир ривоятда Византия императори Сулаймондан кейин басмала билан бошланган мактубни биламайман деб, Макканинг ўша пайтда Византияда тижорат ишлари билан юрган, Қурайш раҳбарлари Абу Суфён ва Муғира ибн Шуъбани чақиртиради. Улардан Пайғамбаримиз соллаллоҳу алайҳи васаллам ҳақида сўраган. Савол-жавобдан сўнг у Муҳаммад соллаллоҳу алайҳи васаллам ҳақиқатдан ҳам пайғамбар эканлигини эътироф этиб, бир муддатдан сўнг қўл остидаги ерлар Пайғамбаримиз соллаллоҳу алайҳи васаллам  измига ўтишини башорат берганлиги ривоят қилинади. Бироқ у мулки қўлидан кетиб, амалдорлар унга қарши чиқишларидан қўрқиб исломни очиқ қабул қилмаганлиги айтилади. Машҳур Ҳабашистон подшоҳи Нажоший исломни қабул қилиб, саҳобаларни иззат икром билан меҳмон қилган, хавфсизликларини таъминлаган. Пайғамбаримиз соллаллоҳу алайҳи васалламга совға саломлар, кийимлар юборган. Унинг исми Асҳима бўлган. Ҳабашистон подшолари нажоший деб аталган. [11] 

     Муҳаммад соллаллоҳу алайҳи васаллам  Миср билан илк дипломатик алоқоларни еттинчи ҳижрий йилда Ҳотаб ибн Абу Балтаъани Мисрга элчи қилиб юбориш билан амалга оширганлар. Миср подшоларини араблар муқовқис деб аташган. Ўша пайтдаги подшонинг исми Журайж ибн Мино бўлган.

    Хулоса қилиб айтганда, Пайғамбаримиз соллаллоҳу алайҳи васаллам кўпгина давлат ва қабила раҳбарларига мактублар юборганлар. Улардан олтитасини бир кунда юборилгани саҳиҳ ривоятларда келтирилган. Ушбу мактубларни аксари Ҳудайбия сулҳидан сўнг еттинчи ҳижрий йилнинг бошида юборилган.

   Шубҳасиз ўша пайтда янги ислом давлатини қўшнилари катта давлатлардан Византия, Эрон, Ҳабашистон, Миср бўлган. Шунингдек, Арабистон ярим оролини турли томонларида амирлик ва подшоликлар бўлиб, улар катта давлатларга қарам бўлишган. Ушбу катта давлатлардан учтасининг аҳолиси насронийлик динига эътиқод қилган.  Шунингдек ушбу давлатларга қарам бўлган майда амирлик ва қабилаларнинг аксар аҳолиси  насроний динида бўлишган. Еттинчи ҳижрий йил мусулмонлар атрофдаги катта давлатлар тугул, кичик амирликларга ҳам таҳдид қилишга ҳарбий салоҳиятлари ожизлик қилиши ойдек равшан эди. Чунки улар бу пайтда ҳатто Маккага ҳам киришга қурбилари етмай сулҳ тузиб орқага қайтишга мажбур бўлишган эди. Шунга қарамай Пайғамбаримиз соллаллоҳу алайҳи васаллам аниқ ишонч билан бирваракайига ушбу давлатларнинг барчасини исломга чақирдилар. Ҳақиқатдан тарих давомида,  ушбу давлатларнинг барчаси мусулмонлар қўлига ўтди.

Фойдаланилган адабиётлар

[1] Ал Музий Абул Ҳажжож Юсуф. Таҳзиб ал камол фи асмаи ар рижал. –Байрут: Муассасату ар рисала, 3 т. -106 б.

[2] Ибн Ҳажар Аҳмад ибн Али ал Аъсқалоний. Таҳзиб ат таҳзиб. –Байрут: Дор ал фикр, — 27 б.

[3] Ибн Саъд Муҳаммад. Ат Табақот ал кубро. –Байрут: Дор Содир, 1 т. 1983.-258 б..

[4]Ўша асар. -264 б.

[5] Ибн Ҳишом Абдулмалик. Сийрат ан набий (с.а.в.), мухтасар сийрат ибн Исҳоқ. –Байрут:  Дор ал фикр, 3 т. -183 б. ,  Ат Табароний ал Ҳофиз Абул Қосим Сулаймон ибн Аҳмад. Ал Муъжам ал Кабир. –Байрут: Дор ал фикр, 8 т. -20 б.

[6] Ас Солиҳий Муҳаммад ибн Юсуф аш Шомий. Субул ал ҳуда вар рошад фи сийрати хойрил ибад. –Байрут: Дор ал кутуб ал илмийя, 11 т. -345 б.

[7] Ибн Ҳажар Аҳмад ибн Али ал Аъсқалоний. Фатҳул борий. –Байрут: Дор ал фикр, 8 т. — 128 б.

[8] Абу Убайд ал Қосим ибн Салом. Ал амвол. –Байрут: Дор ал фикр, -29 б.

[9] Ўша асар. -31 б.

[10] Муслим ибн Ҳажжож ан Найсобурий. Ас Саҳиҳ. –Байрут: Дор аш Шомия: 3 т. -297 б. 

[11] Абу Убайд ал Қосим ибн Салом. Ал амвол. –Байрут: Дор ал фикр, -32 б.

“Кўкалдош” ўрта махсус ислом билим юрти мударриси

Ахмедов Жалолиддин