www.muslimuz
Қуръон ила сафар
Аввал, юртимиздаги қироат илми олимларидан энг машҳури бўлган Алижон қори Файзуллоҳ Махдум ўғлининг “Қуръон қалб шифоси” мавзусидаги туркум маърифий суҳбатларини muslim.uz сайтида намойиш этиш ҳақида хабар берган эдик.
Ушбу лойиҳамиз муқаддимасида мусулмон дунёсида машҳур бўлган, энг нуфузли қори устозлар чиқадиган «Аҳлул Қуръан» телеканалида намойиш этилган Алижон қори Файзуллоҳ Махдум ўғлининг таржима ҳоли тўғрисидаги маълумотларни эътиборингизга ҳавола этамиз.
Маълумот ўрнида, «Аҳлул Қуръан» («Қуръон аҳли») канали — Қуръони каримни ўргатиш, унга хизмат қилиш, Қуръон ихлосмандларининг унга бўлган муҳаббатини ошириш, Қуръон ахлоқи билан хулқланишга чорлаш, Қуръонни ёйиш орқали динни етказиш жараёнларини амалга ошириш ва бу билан «Мендан бир оят бўлса ҳам етказинглар!» деган муборак ҳадиси шарифга амал қилишга қаратилган сунъий йўлдош орқали намойиш этиладиган телеканалдир.
Ушбу каналнинг мақсадлари:
1. Одамларга Аллоҳ азза ва жалланинг Китобини севдириш.
2. Қуръонни ўрганиш ва ўргатишга қизиқтириш.
3. Қуръони каримга хизмат қилиш услубларини ривожлантириш.
4. Қуръон ҳофизларини халққа кўрсатиш, танитиш, икром қилиш, жамият орасида обрў-эътиборларини юксалтириш.
5. Одамларнинг Қуръонни тушуниш салоҳиятини, онгини ўстириш.
6. Одамларни Қуръонга боғланиш, нафсни поклаш ва Қуръони ҳаёт кечиришга ундаш.
7. Қуръон эъжозлари ва хоссатан, унинг илмий эъжози ҳақида инсонларга маълумотлар тақдим этиш.
Каналнинг мақсадларини амалга оширишда қуйидаги омиллар ишга солинади:
1. Саҳиҳ тиловат ва қироатларда моҳир, пухта бўлган қироат устозларининг ҳаёт йўлларини намойиш этиш.
2. Қуръон таълимига ихтисослашган турли ўқув курслари, марказлар фаолияти ҳақида ҳикоя қилиш.
3. Гўзал овоз соҳибларининг тиловатларини бериб бориш.
4. Қуръони карим таълими бўйича янги-янги услублар билан халқни таништириб бориш.
5. Қуръони карим мусобақалари ҳақида маълумот берувчи репортаж ва кўрсатувлар бериб бориш.
6. Қуръон ҳофизлари, хусусан, кичик болалар орасидаги ғаройиб қориларнинг маҳоратларини халққа намойиш этиш.
7. Катта устозларнинг Қуръонни ўрганиш ва ўргатиш борасидаги тажрибаларидан халқни хабардор қилиш.
8. Қуръони каримга ҳар куни амал қилиш бўйича йўл-йўриқ ва кўрсатмалар, кунлик дастурларни тақдим этиб бориш.
9. Қуръонга муҳаббатли болалар, аёллар, ишчилар ва бошқа шахсларнинг дил сўзларини эшиттириш.
Ушбу видео-суҳбатни қуйидаги тамоша қилишингиз мумкин.
Tas-ix: https://mover.uz/watch/yBe5CfDm/
Youtube: https://youtu.be/f_DkO_KfOrA
Ўзбекистон мусулмонлари идораси Матбуот хизмати
“Ҳаж-2019”: гуруҳ раҳбарлари учун йиғилиш ўтказилди
Жорий йилнинг 25 июнь куни Тошкент шаҳридаги “Шайх Зайниддин” жоме масжидида “Ҳаж-2019” мавсумида зиёратчиларга хизмат кўрсатувчи гуруҳ раҳбарлари учун йиғилиш бўлиб ўтди.
Унда Тошкент шаҳри ва Тошкент вилояти, Сирдарё, Жиззах ҳамда Самарқанд вилоятлари зиёратчиларига хизмат кўрсатувчи жами 44 нафар гуруҳ раҳбари қатнашди.
Мазкур тадбирда Дин ишлари бўйича қўмита масъул ходимлари М.Йўлдошев, Д.Бабаджанов, ЎМИ Халқаро алоқалар бўлими мудири М-А.Шакиров, тиббиёт гуруҳи раҳбари А.Саатов томонидан Ҳаж мавсуми давомида ўзбекистонлик зиёратчиларга хизмат кўрсатувчи гуруҳ раҳбарларига керакли тавсия ва маслаҳатларни беришди.
Шуниндек, йиғилишда гуруҳ раҳбарларининг бурч ва масъулиятлари, ҳаж ибодатининг рукнлари, зиёратчиларнинг ибодатини мукаммал ташкил этиш чоралари, сафарга жўнаб кетиш ҳамда Саудия Арабистонидаги ташкилий ишлар ҳақида атрофлича маълумот берилди.
Ўз навбатида, гуруҳ раҳбарларига сафар билан боғлиқ ҳужжат ишлари, гуруҳдаги зиёратчиларнинг паспорт ва бошқа ҳужжатларини юритиш қоидалари борасида ҳам керакли эслатмалар берилди.
Гуруҳ раҳбарлари учун ташкил этилган мазкур тадбирда, яна бир муҳим жиҳатга алоҳида эътибор қаратилди. Яъни, зиёратчиларнинг соғлиғини муҳофаза қилиш, доимий равишда уларга ўз саломатликларини асраш борасида муҳим кўрсатма ва маслаҳатлар бериб туриш кераклиги таъкидланди.
Йиғилиш якунида мутасаддилар гуруҳ раҳбарлари томонидан берилган барча саволларга батафсил жавоб бердилар.
ЎМИ Матбуот хизмати
"Энг маърифатли имом-2019" кўрик танловининг дастлабки босқичи бошланди
Жорий йилнинг 24 июнь куни Ўзбекистон мусулмонлари идорасининг 2019 йил 11 мартдаги буйруғига асосида Самарқанд вилояти вакиллиги тасарруфидаги 285 та масжид имом-хатиби ва имом-ноиблари ўртасида “Энг маърифатли имом-2019” кўрик танловининг шаҳар ва туман босқичи ўтказилди.
Кўрик танлов Ўзбекистон мусулмонлари идораси Самарқанд вилояти вакиллиги томонидан тузилган ҳайъат аъзолари – Хайрулло Саттаров (вилоят бош имом хатиби ўринбосари) – ҳайъат раиси, Ёқубжон Мансуров (вилоят бош имом хатиби ўринбосари) – ҳайъат раиси ва Сарвархўжа Бобоев (вилоят вакиллиги мутахассиси) – ҳайъат аъзоси ҳамда Ҳасан Темиров (вилоят вакиллиги мутахассиси) – котиби иштирокида ўтказилди.
Кўрик танлов якуний натижалари бўйича шаҳар ва туман босқичида қуйидаги имом-хатиб ва имом-ноиблар “Биринчи” ўринни эгалладилар:
Самарқанд шаҳар “Хўжа Абду Дарун” жоме масжиди имом-хатиби Махмудов Зафар;
Самарқанд тумани “Хўжа Ахрори Валий” жоме масжиди имом-хатиби Б.Шарипов;
Тайлоқ тумани “Жумабозор” жоме масжиди имом-хатиби С.Абулсаидов;
Жомбой тумани “Кўктўнли бобо” жоме масжиди имом-хатиби Н.Хидиров;
Булунғур тумани “Сариқипчоқ” жоме масжиди имом-хатиби М.Жомонқулов;
Пахтачи тумани “Болғали” жоме масжиди имом-хатиби М.Бердиев;
Нарпай тумани “Нақшбандий” жоме масжиди имом-ноиби С.Саламов;
Иштихон тумани “Зарбанд” жоме масжиди имом-хатиби М.Раббимов;
Қўшработ тумани “Ғойиб ота” жоме масжиди имом-хатиби С.Тўхташов.
“Иккинчи” ўринни эгалладилар:
Самарқанд шаҳар “Лоҳутий” жоме масжиж имом-хатиби Ў.Умирқулов;
Самарқанд тумани “Хожи Домла Яхши” жоме масжиди имом-хатиби У.Нормуродов;
Тайлоқ тумани “Хўжа Сакко” жоме масжиди имом-хатиби Ж.Норбутаев;
Жомбой тумани “Иброҳим ота” жоме масжиди имом-ноиби У.Жўраев;
Булунғур тумани “Ғиштли ота” жоме масжиди имом-хатиби Х.Кулиев;
Пахтачи тумани “Қораминос” жоме масжиди имом-хатиби М.Саттаров;
Нарпай тумани “Суфи Зийрак” жоме масжиди имом-хатиби Ш.Махмудов;
Иштихон тумани “Оққўрғон” жоме масжиди имом-хатиби Б.Қўлдошов;
Қўшработ тумани “Қийқим” жоме масжиди имом-хатиби Э.Абдувоҳидов.
“Учинчи” ўринни эгалладилар:
Самарқанд шаҳар “Дамариқ” жоме масжиди имом-хатиби Н.Абдуманнонов;
Самарқанд тумани “Имом Аъзам” жоме масжиди имом-хатиби И.Рўзиев;
Талоқ тумани “Гадой Қушчи” жоме масжиди имом-хатиби И.Ибодуллаев;
Жомбой тумани “Ушун тепа” жоме масжиди имом-хатиби И.Хидиров;
Булунғур тумани “Исори Ўроқли” жоме масжиди имом-хатиби В.Сайдуллаев;
Пахтачи тумани “Ғойиб ота” жоме масжиди имом-хатиби Э.Боқиев;
Нарпай тумани “Кўк ота” жоме масжиди имом-хатиби А.Шукуров;
Иштихон тумани “Бойлата” жоме масжиди имом-хатиби Э.Тўхтаев;
Қўшработ тумани “Қовунчи” жоме масжиди имом-хатиби А.Ахмедов.
Имом-хатиб ва имом-ноиблари ўртасидаги “Энг маърифатли имом-2019” кўрик танловининг шаҳар ва туман босқичи давом этмоқда.
Ўзбекистон мусулмонлари идораси Матбуот хизмати
ТОШКEНТ МАСЖИДЛАРИНИНГ ТУНГИ ТАРОВАТИ
Суратлар муаллифи Шаҳзод Шомансур
ЎМИ Матбуот хизмати
Каъба деворлари ёнида янги Макка декларацияси қабул қилинди
Маккада бўлиб ўтган “Қуръон ва Суннат матнларида мўътадиллик қадриятлари” халқаро анжуманида иштирок этган уламолар Макка декларациясини қабул қилишди.
Каъба деворлари ёнида, Ислом умматининг етакчи олимлари, унинг энг йирик муфтийлари иштирокида қабул қилинган бу баёнотда, иштирокчилар ушбу тарихий ҳужжатда келтирилган асосий тамойиллар: одамлар келиб чиқишининг бирлиги ва тенглиги, ирқчилик аломатларини намоён қилишдан бош тортиш, жамиятда диний ва маданий хилма-хиллик мавжудлиги, барча илоҳий динлар келиб чиқишининг ягоналигини тасдиқлашади.
Ҳужжатда таъкидланганидек, "цивилизацион мулоқот – бу бошқалар билан тўғри ўзаро тушунишга эришиш, ўзаро муомала қилиш нуқталарини топиш ва биргаликда яшашнинг қийинчиликларини бартараф этишнинг энг яхши усули". Унда инсонларнинг ва маданиятларнинг ўзаро йўқ қилинишининг олдини олишда муваффақиятли ҳамкорлик учун халқаро иттифоқ тузиш зарурлиги таъкидланади.
Конференция иштирокчилари таъкидлашича, "мусулмонлар инсониятни ноёб ва бой тажриба билан бойитди, бугунги кунда ахлоқий, ижтимоий ва экологик инқирозлар шароитида, глобаллашувнинг салбий томонлари ахлоқий қадриятларнинг етишмаслигига олиб келадиган бир пайтда улар инсониятга жуда кўп ижобий нарсаларни киритиши мумкин".
Islam.ru билдиришича, декларацияда терроризм, адолатсизлик ва зулм, исломофобия феноменига қарши кураш, буюк Яратувчининг инъоми сифатида табиатни асраб-авайлаш, ижтимоий фойдали фаолиятни рағбатлантириш, исломий таълим тизимини ривожлантириш, Аллоҳ томонидан тайинланган чегараларга мувофиқ аёларнинг ҳуқуқ ва имкониятларини кенгайтиришга алоҳида эътибор қаратилган.
Декларацияни ниҳоясида конференциянинг барча иштирокчилари олий даражали форумни ташкил этгани учун Саудия Арабистони қироли, икки муқаддас масжид ходими Салмон ибн Абдул-Азиз Ал Саудга миннатдорчилик билдирадилар.
Ўзбекистон мусулмонлари идораси Матбуот хизмати
Янгиликлар
