Бугун, 13 декабрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари фуқароларнинг мурожаат, арз ва таклифларини эшитдилар.

Мазкур қабул давомида Бухоро, Жиззах, Навоий, Андижон, Қашқадарё вилоятлари ҳамда Тошкент шаҳридан келган фуқароларнинг масжидлар ҳолати, имом-хатиблар фаолияти, диний таълим, моддий ёрдам, даврий нашрлар тарғиботи ҳамда оилавий масалалар каби мурожаатлари тингланиб, уларнинг аксарияти ижобий ҳал этилди.

Жумладан, Муфтий ҳазратлари оилавий масалада келган фуқароларнинг муаммоларини эшитиб, уларга динимиз кўрсатмаси ва ҳаётий мисоллар асосида ваъз, насиҳат қилдилар. Натижада мазкур қабулдан кўнгиллари ёришиб, муаммолари бартараф бўлган ёш оилалар турмушини давом этиришларини билдириб, келгуси ҳаётлари мустаҳкам бўлиши учун хайрли дуолар олдилар. Шунингдек, фуқароларга шаръий масалалар ечими юзасидан тавсиялар, илмий-ижодий ҳамкорлик бўйича таклифлар ва моддий ёрдам сўраганларга белгиланган тартибда кўмак берилди.

Мана шундай самимий қабул ва ғамхўрликдан мамнун бўлган фуқаролар Ўзбекистон мусулмонлари идораси раҳбарияти томонидан кўрсатилган эътибордан кўнгиллари шод бўлди.

Бу каби қабул жараёнлари Ўзбекистон мусулмонлари идорасининг ҳудудлардаги вакилликлари ва барча жоме масжидларида ҳам ҳафтанинг ҳар чоршанба куни имом-домлалар томонидан амалга оширилмоқда.

Ўзбекистон мусулмонлари идораси
Матбуот хизмати