«Покистон ва Ўзбекистон муносабатларини икки мамлакат таҳлилий марказлари ҳамкорлиги доирасида тўлиқ қўллаб-қувватлайман», – дейди халқаро эксперт, Покистон Глобал ва стратегик тадқиқотлар маркази президенти Саид Холид Амир Жаффри. Бу ҳақда «Дунё» АА хабар бермоқда.

– Ўзбекистон ва Покистон ўртасида бугун жуда фаол ва мувофиқлаштирилган алоқаларни йўлга қўймоқда, - деди эксперт. – Покистон 1991 йилда Ўзбекистон мустақиллигини биринчилардан бўлиб тан олган давлатлардан ҳисобланади. Бироқ икки мамлакат ва икки халқ ўртасидаги алоқалар илдизи узоқ ўтмишга бориб тақалади.

Маълумки, ўзбек заминида Имом Бухорий, Имом Термизий, Ибн Сино, Мирзо Улуғбек ва бошқа даврининг буюк мутафаккир, аллома ва олимлар яшаб ўтган, уларнинг бебаҳо мероси Покистонга ҳам бевосита таъсир кўрсатган.

Ўзаро савдо-иқтисодий ҳамкорлик жадал суръатда ривожланмоқда. Сўнгги йилларда ушбу йўналишдаги кўрсаткич 4 баробарга ошгани таъкидланмоқда. Бу эса икки қардош давлат ўртасидаги муносабатларни янада кенгайтириш учун умумий манфаат ва салоҳият мавжудлигини кўрсатади.

Ўзбекистондан Покистонга келаётган делегациялар, шунингдек, Покистон делегацияларининг Тошкентга сафарлари тобора кўпайиб бораётгани савдо-сотиқни диверсификациялаш ва иқтисодий ҳамкорликнинг янги йўналишларидан фойдаланишга ундамоқда.

Яқинда Ўзбекистоннинг турли вазирлик ва идоралари вакиллари Карачи ва Гвадар денгиз портларининг минтақалараро лойиҳаларини амалга ошириш имкониятларини ўрганиш мақсадида Покистонда бўлди.

Куни кеча бўлиб ўтган онлайн-саммит Покистон учун ўта муҳим аҳамиятга эга. Зеро, у мамлакатимиз тарихида виртуал шаклда уюштирилган илк тадбир бўлиб, Исломобод бу борада илғор тажриба ўрганди.

Видео-анжуманда таъкидланганидек, Покистон ва Ўзбекистон ўзаро манфаатли ҳамкорликни кенгайтириш учун ҳам катта салоҳиятга эга.

Бундан ташқари, икки давлат минтақавий долзарб масалалар, хусусан, Афғонистон муаммосини ҳал қилишда фаол иштирок этмоқда, амалий таклифларни илгари сурмоқда. Тошкент ва Исломобод ушбу мамлакатда тинчлик ва барқарорлик ўрнатишга кўмаклашишга тайёр, бу эса минтақалараро савдо-иқтисодий ҳамкорликни кенгайтиришга имкон беради.

Шунингдек, Ўзбекистон ва Покистон ўртасида туризм саноатини ривожлантириш учун катта салоҳият мавжуд. Тармоқ компаниялари пандемиядан кейин ўзаро ҳамкорликни қайта тиклашмоқда. Покистонлик сайёҳлар зиёрат туризми йўналишида Ўзбекистонга фаол ташриф буюрмоқда.

Очиқ, дўстона ва конструктив муҳитда ўтган олий даражадаги онлайн-саммит Ўзбекистон ва Покистон ҳамкорлигини янада ривожлантиришга янги уфқлар ва имкониятлар очади.

Ўзбекистон мусулмонлари идораси матбуот хизмати

ЎМИ матбуот хизмати

Бақара – Мадинада нозил қилинган энг аввалги сурадир. Суранинг бошидаги тўрт оят мўминлар ҳақида, ундан кейинги икки оят кофирлар ҳақида ва улардан кейинги ўн уч оят мунофиқлар ҳақида нозил бўлган. Бақара сураси Қуръони каримдаги энг узун сурадир. Энг узун оят ҳам айнан мазкур сурада бўлиб, у қарз ҳақидаги 282-оятдир. Бу оят тўлиқ бир бетни ташкил этади. Бақара сурасини доим ўқиб юрган кишиларга Аллоҳнинг изни билан сеҳру жоду таъсир қилмайди.

Бақара сураси ўқилган уйдан шайтон қочади. Бу ҳақда Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: "Шайтон Бақара (сураси) ўқиладиган уйдан қочади", дедилар (Имом Муслим, Имом Термизий ривояти).

Абдуллоҳ ибн Масъуд розияллоҳу анҳу айтадилар: "Ким кечаси Бақара сурасидан ўн оят ўқиса, шайтон ўша кечада унинг уйига кирмайди" (Имом Доримий, Имом Байҳақий ривояти).

Шайтон Бақара сураси ўқилган ерга кира олмаслигини ўзи тан олиб айтган. Бу ҳақда Абу Ҳурайра розияллоҳу анҳудан ривоят қилинади: «Расулуллоҳ соллаллоҳу алайҳи васаллам мени Рамазон закотини қўриқлашга вакил қилдилар. Бир куни кимдир келиб, егуликдан ҳовучлаб ола бошлади. Мен уни тутиб олдим-да, "Аллоҳга қасамки, сени Расулуллоҳ соллаллоҳу алайҳи васалламга олиб чиқаман", дедим. У: "Мен муҳтож одамман, бола-чақам бор. Ниҳоятда муҳтожман", деди. Мен уни қўйиб юбордим.

Тонг отди. Набий соллаллоҳу алайҳи васаллам: "Эй Абу Ҳурайра, бу кеча асиринг нима қилди?" дедилар. "Ё Аллоҳнинг Расули, жуда муҳтожлиги, бола-чақаси борлигидан шикоят қилган эди, раҳмим келиб, қўйиб юбордим", дедим. У зот: "Билиб қўй, у сени алдабди. Ҳали яна келади", дедилар. Мен Расулуллоҳ соллаллоҳу алайҳи васалламнинг "Ҳали яна келади" деган сўзларидан унинг қайтиб келишини билиб, уни пойладим. У келиб, егуликдан ҳовучлаб ола бошлаган эди, уни яна тутиб олдим. "Сени Расулуллоҳ соллаллоҳу алайҳи васалламга олиб чиқаман", дедим. У: "Мени қўйиб юбор, мен муҳтожман, бола-чақам бор. Энди қайтиб келмайман", деди. Унга раҳмим келиб, қўйиб юбордим.

Тонг отди. Расулуллоҳ соллаллоҳу алайҳи васаллам менга: "Эй Абу Ҳурайра, асиринг нима қилди?" дедилар. Мен: "Ё Аллоҳнинг Расули, ниҳоятда муҳтожлиги, бола-чақаси борлигидан шикоят қилган эди, яна раҳмим келиб, қўйиб юбордим", дедим. У зот: "Билиб қўй, у сени алдабди. Ҳали яна келади", дедилар. Уни учинчи марта пойладим. Келиб, яна егуликдан ҳовучлаб ола бошлаган эди, уни тутиб олдим. "Энди сени Расулуллоҳ соллаллоҳу алайҳи васалламга албатта олиб чиқаман. Бу охиргиси. Сен қайтиб келмайман деб, учинчи марта қайтиб келяпсан", дедим. У: "Мени қўйиб юбор, Аллоҳ сенга манфаат берадиган калималарни ўргатаман", деди. "Нима у?" дедим. У: "Тўшакка ётганингда Оятул-Курсийни – "Аллоҳу лаа илаҳа илла ҳувал-Ҳайюл-Қойюм"ни оятнинг охиригача ўқигин. Шундай қилсанг, Аллоҳнинг даргоҳидан бир қўриқчи тонг отгунча тепангда туради ва шайтон сенга ҳаргиз яқинлаша олмайди", деди. Уни қўйиб юбордим.

Тонг отди. Расулуллоҳ соллаллоҳу алайҳи васаллам менга: "Бу кеча асиринг нима қилди?" дедилар. Мен: "Ё Аллоҳнинг Расули, Аллоҳ сенга манфаат берадиган калималарни ўргатаман деган эди, қўйиб юбордим", дедим. У зот: "Улар нима экан?" дедилар. "У менга: "Тўшакка ётганингда Оятул-Курсийни – "Аллоҳу лаа илаҳа илла ҳувал-Ҳайюл-Қойюм"ни оятнинг охиригача ўқигин. Шундай қилсанг, Аллоҳнинг даргоҳидан бир қўриқчи тонг отгунча тепангда туради ва шайтон сенга ҳаргиз яқинлаша олмайди", деди", дедим.

Шунда Набий соллаллоҳу алайҳи васаллам: "Билиб қўй, ўзи ғирт ёлғончи бўлса ҳам, сенга рост айтибди. Уч кечадан бери ким билан гаплашаётганингни биласанми, эй Абу Ҳурайра?" дедилар. "Йўқ", дедим. У зот соллаллоҳу алайҳи васаллам: "У шайтон эди", дедилар» (Имом Бухорий ривояти).

Бақара сураси ўқилган ерга фаришталар тушадилар. Абу Саид Худрий розияллоҳу анҳудан ривоят қилинади: «Усайд ибн Ҳузайр розияллоҳу анҳу тунда "Бақара" сурасини ўқиётган эди. Бир пайт ёнгинасида боғланган от ҳурка бошлади. У қироатдан тўхтади. От ҳам тинчланди. Яна ўқий бошласа, от ҳам безовталанар эди. Қироатни тўхтатса, яна жим бўларди. Ўша вақтда ўғиллари Яҳё от ёнида эди. От босиб олмасин деб, қироатни тўхтатиб унинг олдига бордилар. Ўғилларини отдан узоқроққа қўйгач, осмонга қарасалар, унда соябонларга ўхшаш, остида нур таратиб турган нарсалар бор экан. Тонг отгач, бўлган воқеани Расулуллоҳ соллаллоҳу алайҳи ва салламга айтиб бердилар. У зот алайҳиссалом: “Ҳузайрнинг ўғли, қироатингни давом эттиравермадингми?” дедилар.

Усайд розияллоҳу анҳу айтдилар: “Боламни от босиб қолишидан қўрқдим. У отнинг яқинида эди. Отдан узоқроққа қўйиб осмонга қарасам, у ерда соябонга ўхшаш, ичида чироғи бор нарсалар турган экан. Уйимдан чиқиб қарасам, йўқ бўлиб қолибди”.

Расулуллоҳ соллаллоҳу алайҳи ва саллам: “Улар нималигини биласанми?” деб сўрадилар. Усайд розияллоҳу анҳу: “Йўқ”, деди. Расулуллоҳ: “Улар овозингни эшитиш учун пастга тушган фаришталар эди. Агар тонггача ўқиганингда, одамлар ҳам уларни кўрган бўларди. Фаришталар ҳам улардан қочмас эди”, деб айтдилар».

Бақара сураси Қиёмат куни шафоатчи бўлади. Расулуллоҳ соллаллоҳу алайҳи васаллам: "Қуръонни ўқинглар. Чунки у қиёмат куни ўз аҳли учун шафоатчи бўлади. Икки ёритувчи нур – Бақара ва Оли Имрон сураларини ўқинглар. Зеро, бу иккиси қиёмат куни икки булут ёки бир гуруҳ саф-саф қушлар шаклида келиб, ўз соҳибларининг ҳожатини раво қилади. Бақара сурасини ўқинглар. Уни ўқиш барака, тарк этиш эса ҳасратдир", деганлар (Имом Муслим, Имом Доримий, Имом Аҳмад ривояти).

Расулуллоҳ соллаллоҳу алайҳи васаллам: "Ким Бақара сураси охиридаги икки оятни бир кечада ўқиса, кифоя қилади", дедилар (Имом Бухорий, Имом Муслим ривояти).

Ҳадисда келган “Кифоя қилади”дан қуйидаги маънолар келиб чиқади:

1. Барча ёмонликлардан сақланишга кифоя қилади.
2. Шайтоннинг ёмонлигидан сақланишга кифоя қилади.
3. Савоб олишга кифоя қилади.
4. Кечасини Қуръон қироати ила бедор ўтказишдан кифоя қилади.
5. Инсу жиннинг ёмонлигидан кифоя қилади.

Расулуллоҳ соллаллоҳу алайҳи васаллам: "Қуръон оятларининг саййиди Оятул курсийдир", деганлар (Имом Ҳоким ривояти).

Зубайд Абдураҳмон ибн Асваддан ривоят қилади: "Ким Бақара сурасини ўқиса, бунинг эвазига унга жаннатда тож кийдирилади" (Имом Доримий ривояти).

Даврон НУРМУҲАММАД

Юнусобод тумани ҳокими Жаҳонгир Иброҳимов тумандаги масжид имомлари иштирокида оилаларда ажримнинг олдини олиш масаласи юзасидан учрашув ўтказди. Бу ҳақда туман ҳокимлиги ахборот хизмати хабар берди.

Қайд этилишича, мажлисда ажримлар сонини камайтириш борасида бир қанча таклифлар киритилган. Жумладан:

Оила қуриш остонасидаги иккала ёшларни ҳам никоҳдан аввал имомлар томонидан 3 ойлик ўқув дарсларида ўқитиш;

Оила тушунчасини мактабдан бошлаб алоҳида дарс сифатида киритиш;

Aхлоқий жиҳатдан менталитетимизга тўғри келмайдиган телесериал ҳамда кинофильмларни эфирга узатмаслик каби таклифлар билдирилган.

xs.uz

Деҳқончилик улуғ ва шарафли касблардан бўлиб, у орқали халқимиз дастурхонлари, бозорларимиз расталари, тожирларимиз дўконлари хилма-хил, бир-биридан мазали мевалар билан безалиб туради.

Деҳқоннинг иймони мустаҳкам, қалби доимо Аллоҳга боғланган ва Роббига таваккули кучли булиши керак.Чунки деҳқон уруғни ерга экиб қолганини Аллоҳга топширади. Мўътадил об-ҳаво, ёмғир ва ҳосилни баракали бўлишини сўраб Аллоҳ талога дуо қилади. Деҳқон Роббимизнинг уруғни қандай ўстириб етиштиришига гувоҳ бўлади. Шу билан бирга Аллоҳнинг қудратини қалбида ҳис қилади.

Қурони каримда марҳамат қилинади: "Сизлар экаётган зироатларингизни (ўйлаб) кўрдингизми?! Уни сизлар ўндирурсизми ёки биз ўндирувчимизми?!" (Воқеа сураси, 63-64-оятлар). Қайси мўъмин инсон яхши ният билан экин экса, кўчат ўтқазса улуғ ажру савобга эга бўлади.

Жобир розияллоҳу анҳудан ривоят қилинган ҳадиси шарифда Росулуллоҳ соллаллоҳу алайҳи васаллам: "Қайси мусулмон экин экса, ундан ейилса унга садақа бўлади, ўғирлангани ҳам унинг учун садақадир, йиртқичлар егани ҳам унинг учун садақадир. Ўша экиндан бирортаси манфаат олса, унинг учун садақа бўлади", дедилар (Имом Муслим ривояти). Ҳадисдан кўчат экиш, деҳқончилик қилиш нечоғлик улуғ ва фазилатли касб экани маълум бўлади. Деҳқонга нафақат бу дунёда, балки вафотидан кейин ҳам унга савоб етиб туради.

Абул Ҳасан Мавардий "Дунё ва дин одоби"китобида: Касбларнинг асл устуни уч нарсага боғлиқ. Улар зироат, тижорат ва саноатдир. Менимча, деҳқончилик касбларнинг энг покизаси ва афзалидир" деганлар.

Деҳқончилик касби инсон яралиши биланоқ бошланган бўлиб Одам алайҳиссаломнинг суннатлари (йўли) дир. Одам алайҳиссалом ерни ҳайдаб, буғдой эккан. Ерни суғориб ҳосил етиштирган буғдойни янчиб хамир қориган. Одам алайҳиссалом ҳаётларида гўзал намуналар бор.

Расулуллоҳ саллаллоҳу алайҳи васаллам умматларини кўчат ўтқазиш ва экин экишга тарғиб қилганлар. Анас ибн Молик розияллоҳу анҳудан ривоят қилинади: Росулуллоҳ саллаллоҳу алайҳи васаллам: "Агар қиёмат бўлиб қолса ва бирортангизнинг қўлида хурмо дарахти бўлса уни экиб қўйсин", дедилар (Имом Аҳмад ривояти).

Ерга қадалган ҳар бир уруғ униб чиқиши билан бирга, то қуриганича Аллоҳ таолога тасбеҳ айтади. Буларни етиштирган деҳқон эса ўша айтилган тасбеҳ савобларидан насиба олиб савобга эга бўлади. Илоҳим бу йилги деҳқончилигу зироатларга, чорво моллари ва оби равонларимизга барака берсин.

Л.Исоев,
Шофиркон тумани "Саид Ато" жоме масжиди имом-хатиби