Дунё давлатларида энг тантанали нишонланадиган байрам  бу – мустақиллик куни. Негаки, айнан мустақиллик кунида миллат тарихида янги саҳифа очилади. Аллоҳ таолонинг ҳисобсиз неъматлари ичида юртимиз мустақиллиги халқимиз учун чинакамига буюк неъмат бўлди.

Яратганнинг ҳисобсиз неъматлари ҳақида Қуръони каримда шундай баён қилинади:

وَآتَاكُمْ مِنْ كُلِّ مَا سَأَلْتُمُوهُ وَإِنْ تَعُدُّوا نِعْمَتَ اللَّهِ لَا تُحْصُوهَا

Ва  У  сизга  барча  сўраган  нарсаларингиздан  берди.  Агар  Аллоҳнинг неъматларини санасангиз, саноғига ета олмассизлар.

Бу ояти каримани Доктор Муҳаммад Ротиб Нобулусий қуйидагича шарҳлаган:

“Бу ояти каримада нозик бир маъно бор. У ҳам бўлса, Биз бир неъматнинг яхшилик ва баракаларини санашга бутун ҳаётимизни сарфласак, ҳисобига ета олмаймиз. Бир неъматнинг ҳикматларини ҳисоблашга қодир эмас эканмиз, демак, аввало, унинг шукридан ожиз қолган бўламиз. Шунингдек, нафақат ушбу неъматга шукр қилишдан ожиз қоламиз, балки бир дона неъматнинг яхшиликларини ҳисоблашга қудратимиз етмайди”.   

Дарҳақиқат, мустақилликни сабаб қилиб Аллоҳ таоло биз саноғига ета олмаган неъматларни берди. Энг асосийси, жамиятимиз мусулмонлари эътиқод эркинлигига сазовор бўлдилар. Тўғри, собиқ тузумнинг қонунчилигига кўра, эътиқод эркинлиги белгилаб қўйилган бўлса-да, амалда ҳаммани бир партия ва бир ғояга бирлаштириш ва иймон эътиқодидан иложи борича узоқда ушлаб туриш чоралари кўрилгани ҳеч кимга сир эмас. Ҳатто Ўрта Осиёдаги мусулмон уламоларини даҳрийлар қириб ташлаб, оддий аҳоли динсизлашиб бўлди, энди деган фикрга келган эканлар.

2017-21 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясига муқаддас динимизнинг софлигини асраш, аждодлар илмий меросини пухта ўрганиш ва уларнинг номини абадийлаштириш масалалари ҳам киритилди. Бунинг натижаси ўлароқ, шу йилга келиб, ўнта ўрта махсус ислом билим юрти ва Тошкент ислом институти ўқув даргоҳлари қаторига Бухоро шаҳрида “Мир Араб” олий мадрасаси қўшилди. Ушбу таълим масканига эллик нафар биринчи қалдирғоч талабалари ўқишга қабул қилинди. Шунингдек, Сурхондарё вилоятида Ўзбекистон мусулмонлари идораси муассислигида Имом Термизий халқаро илмий-тадқиқот маркази очилиб, ўз фаолиятини бошлади ва Тошкентда Ўзбекистон Республикаси Вазирлар Маҳкамаси ҳузурида Ўзбекистондаги Ислом маданияти маркази очилди. Қолаверса, Самарқандда Имом Ал-Бухорий номидаги халқаро тадқиқот маркази ва бошқа шундай илмий марказлар ташкил қилиш режаси ишлаб чиқилмоқда. Қолаверса, бу йил таълим диний таълим муассасаларида квоталар сони оширилди. Ҳаж 2017 дастури бўйича бу йилги ҳожилар сони 5700 гача оширилди. Иккинчи жаҳон уруши фахрийлари ҳаж сафарига президент ҳисобидан юборилди. Фахрийларга ҳаж амалларни бажаришда янада қулайлик яратиш учун уларга алоҳида ҳамроҳлар, ишчи гуруҳи ва шифокорлар жалб этилди. Шунингдек, бу йилги умра зиёратчилари сони ҳам етти мингдан ўн минггача зиёда қилинди. 

Демак, динимиз йўлида олиб борилган ишларнинг самараси юқори. Албатта, бу неъматларга шукр қилиш ҳар биримизнинг бурчимиз ҳисобланади. Зеро, бир ҳадиси шарифда шундай баён қилинган:

عن أنس بن مالك رضي الله عنه قال: قال رسول الله صلى الله عليه وسلم: " ما أنعم الله على عبد نعمة فقال: الحمد لله، إلا كان الذي أعطاه أفضل مما أخذ "

Анас ибн Молик розияллоҳ анҳудан ривоят қилинган ҳадиси шарифда Расулуллоҳ соллаллоҳу алайҳи васаллам шундай айтадилар: “Аллоҳ таоло бандага бир неъматни берганда, банда “алҳамдулиллаҳ” (Аллоҳга ҳамд бўлсин деб шукр қилар экан) дер экан, олганидан яхшироқ неъмат беради” (Ибн Можа ривояти).

Юқоридаги ҳадиси шарифдан биламизки, неъматларга қанча шукр қилсак Аллоҳ таоло уларнинг зиёдаси билан берар экан. Шундан келиб чиқиб, мустақиллик ва унинг ортидан келган тинчлик неъмати Яратганнинг буюк неъматларидан эканини ҳис этишимиз лозим. Зеро, бу неъмат ўз-ўзидан қўлга киритилмаган. Юртимизнинг фахрий уламоларидан бири билан суҳбатлашиб ўтирганимизда шундай деган эдилар: “Мустақиллик, масжидга бемалол бориб намоз ўқиш ва диний билим юртларида фарзандларимизнинг таълим олиши ўз-ўзидан рўёбга чиқмаган. Собиқ иттифоқ тузумида инсонлар шундай катта давлатнинг парчаланиб, унинг таркибидаги давлатлар мустақил мамлакатлар бўлиб кетади, деб ҳеч ким ўйламаган. Янада аниқроғи, одамлар онгига уни дунёда чексиз қудратли давлат деб сингдирилар эди. Шундай бўлса-да улуғ уламоларимиз ноумид бўлмадилар, уларнинг кечалари таҳажжуд намозларида йиғлаб қилган дуолари ижобат бўлиб Аллоҳ бизга мустақиллик берди”.

Мустақиллик йилларида халқимизнинг муқаддас дини исломга муносабати ўзгарди, асрлар оша элимизнинг онгу шуурига, қалбига сингган бебаҳо диний қадриятлар қайта қарор топиб, ёруғликка юз тутди. Виждон эркинлигининг таъминланиши, ибодатларнинг эмин-эркин адо этилиши юртимизда инсон қадри ва эътиқоди нақадар олий қийматга эга эканини яна бир бор исботлади.

Ҳар йилги анъанага мувофиқ, 2017 йил 24 август куни халқимиз учун меҳр-шафқат, саховат ва мурувват, қаноат ва шукроналик рамзи бўлган муборак Қурбон ҳайитининг маънавий-руҳий ҳаётимиздаги алоҳида ўрни ва аҳамиятини эътиборга олган ҳолда, жамиятимизда меҳр-оқибат, ўзаро ҳурмат ва ҳамжиҳатлик муҳитини янада мустаҳкамлаш, эл-юртимизга хос бўлган эзгу фазилатларни, миллий-диний қадриятларимизни асраб-авайлаш ва улуғлаш мақсадида Ўзбекистон Республикаси Президенти томонидан қабул қилинган Қарорда Қурбон ҳайити байрамини жойларда миллий анъана ва урф-одатларимизга мос равишда ўтказиш билан боғлиқ аниқ чора-тадбирлар амалга оширилди.

Шундай экан, унинг қадрига етиб, асраб авайлашга барчамиз масъулмиз. Кириб келаётган қўшалоқ байрамни барчамизга қутлуғ қилиб, доимо осмонимиз мусаффо бўлиб туришини Ўзи таъминласин!

З.МИРСОДИҚОВ,

“Кўкалдош” ўрта махсус ислом билим юрти мудири

Айни кунларда бутун дунё мусулмонлари қатори ўзбекистонлик ҳожилар ҳам ҳаж ибодатини адо этмоқда. Юртдошларимиз сафида Иккинчи жаҳон уруши қатнашчиларининг борлиги барчанинг эътиборини тортмоқда. Бу ҳақда ЎзА хабар берди.

Президентимиз Шавкат Мирзиёев ташаббуси билан бу йил 72 нафар Иккинчи жаҳон уруши қатнашчиси имтиёзли равишда ҳаж сафарига юборилди. Тўқсондан ошиб, юз билан юзлашган пиру бадавлат нуронийларимизнинг ҳар бирига алоҳида шифокор ва оила аъзоларидан бир киши ҳамроҳ қилиб бириктирилди. 

Бу Саудия Арабистони жамоатчилигида, ҳажга келган бошқа давлатлар вакилларида катта қизиқиш уйғотди. Ўзбекистонда уруш ва меҳнат фахрийларига кўрсатилаётган ғамхўрлик ҳақида маҳаллий матбуот нашрларида қатор мақолалар чоп этилди. 

Масалан, “Уккоз” газетасида “Уруш қаҳрамонлари”, “Макка” газетасида “Иккинчи жаҳон уруши қатнашчилари ҳожилар” сарлавҳали мақолалар эълон қилинди. 

“Уруш қаҳрамонлари” мақоласида бундай дейилади: 

“Уруш қаҳрамонлари”. Уларни ўз юртида шундай аташади. Уларга алоҳида ғамхўрлик кўрсатилади. Ҳар йили 9 май – Хотира ва қадрлаш куни улар учун байрамлар ташкил этилади. Ўзбекистон Президенти Шавкат Мирзиёев уларга катта ҳурмат-эътибор кўрсатиб, бепул даволаниш, барча қулайликларга эга бўлган уй-жойлар бериш, томорқа ажратиш ва автомобиллар ҳадя этиш каби хайрли ишлар қилмоқда". 

“Уккоз” газетасининг махсус мухбири Намим Ҳаким “Ўзбеклар фахри” Гитлерга қарши фронт жабҳаларидан Арофат майдонига етиб келди” сарлавҳаси остида бир неча боболаримиз ҳаётини ҳикоя қилди. 

"Бундан 26 йил аввал мустақилликка эришган Ўзбекистонда бугунги кунда 1 минг 300 га яқин уруш фахрийси яшайди. Уларнинг ёши 90-108 атрофида. Одамлар уруш қатнашчиларини “Ўзбеклар фахри” деб эъзозлайди. Зеро, улар фашистлар армиясини тор-мор этишга улкан ҳисса қўшган. Берлингача бориб, душман устидан ғалаба қозонишда ўрнак кўрсатган ва ғалаба кунига етиб келган.

72 йил аввал тугаган бу урушда қатнашган кўпчилик вафот этди. Улардан жуда озчилиги ҳозир ҳаёт. Биз уларнинг тарихий ҳикояларини баён қиламиз, дейилади мақолада. 

“Ленинград қамалидан омон чиққан аскар”

"Уруш фахрийси Йўлдош Турғунов 1941 йили Андижон вилояти Шаҳрихон туманидан кейинчалик номи Санкт-Петербургга айлантирилган Ленинград фронтига жўнаб кетди. 95 ёшли отанинг таъкидлашича, душман қўшинлари шаҳарни қарийб икки йил қамал қилган. Ленинград қамалининг тугаши Иккинчи жаҳон урушида туб бурилиш ясаган ва душман қўшинлари тор-мор бўлишни бошлаган. 

Фахрий жангчи Турғунов уруш қаҳрамонларидан бири сифатида туғилган ватанига қайтди. Оилали бўлиб, уч ўғил ва тўрт қиз улғайтирди. 76 набира ва эвара унинг атрофида парвона. У етмиш йил ҳажга боришни орзу қилиб яшади. Йўлдош Турғуновнинг узоқ кутилган орзусини Ўзбекистон Президенти рўёбга чиқарди. 

У ўзбек урф-одатига биноан бизни табассум билан кузатди. Тилида эса ҳаж фарзини адо этиш учун катта ёрдам берган Ўзбекистон Республикаси Президенти ҳақига дуолар қилди". 

“Чавандоз 72 йилдан сўнг ҳаж зиёратида”

"Уруш фахрийси Зулумбой Мадраҳимов Сталинградда немис қўшинларини тор-мор этган жангчилардан. Фронтда уни чавандоз дейишарди. Ваҳоланки, у алоқачи бўлиб хизмат қилган. Ўз бурчига шу даражада фидойи эдики, душман минаси тушган жойдаги алоқа симларини улаш учун узоқ масофаларга эмаклаб борарди. Кейинчалик ҳайдовчилик қилди, пулемётчи бўлди. 

Зулумбой сафдошлари билан бирга 1945 йилда Берлингача борди. Ҳозир 96 ёшда. Она Ватанига қайтгани ва уйланганига 70 йилдан ошди. У шу йиллар давомида ҳаж қилиш умиди билан яшади. Бу йил унинг орзулари амалга ошди. Отахон Маккаи Мукаррамага етиб келганидан буён хурсандчилигидан ва Байтуллоҳни тавоф қилган вақтдан бошлаб юрак муолажаси учун мўжалланган дориларини ичишни ҳам унутди. У ўзини соғлом ҳис қилмоқда, юраги эса бир маромда урмоқда. 

Зулумбой Мадраҳимовнинг жасоратини мустақил Ўзбекистон муносиб тақдирлади. Отахон ҳаётидан мамнун. Давлати эътиборида, невара-чеваралари ардоғида яшамоқда. Улар бобоси билан фахрланади". 

“Уруш фахрийси ҳаж қилиш учун уч маротаба ўлимдан омон қолди”

"106 ёшли Иброҳим Убайдулло уч маротаба ўлимдан омон қолган. Урушда махфий операцияни амалга ошириш учун кетаётганда душман самолёти уларни ўққа тутади. Шунда жангчилардан фақат ўзи омон қолганини билиб Оллоҳга ҳамдлар айтади. 

Навбатдаги муҳим топшириқдан жамоаси олдига қайтганида фақат унинг тирик қолганини кўриб командир ундан шубҳаланади. Уни сўроқ қилиб турганида душман яна ўққа тутади. Немис мергани командирни ярадор қилади. Иброҳим Убайдулло иккинчи маротаба ўлимдан қутулиб қолади. 

"Оллоҳ таоло менга узоқ умр бериб, муқаддас жойларни зиёрат қилиш ҳамда Арофатда туришни насиб қилди", дейди Иброҳим ота. 

Ёши улуғ уруш фахрийси ўзбекистонлик ҳожилар билан Маккага келди. Ўзига, кексаларга кўрсатилган ғамхўрлик учун Президентини, давлатини дуо қилмоқда", дейилади газетада. 

Бундай мақолалар кўп. Уларда Ўзбекистонда ислом дини ривожига катта эътибор қаратилаётгани, бу соҳада илмий-тадқиқот марказлари бунёд этилаётгани, мусулмонларга барча шароит яратилаётгани таъкидланган. 

Ватанимиз мустақиллигининг 26 йиллиги ва Қурбон ҳайити кенг нишонланаётган шу кунларда Саудия Арабистонида ҳаж амалларини бажараётган зиёратчиларимиз кўнглида эса шукроналик. Мамлакатимизга тинчлик-осойишталик, халқимизга фаровонлик тилаб дуолар қилишмоқда.


www.uzbekistan24.uz | http://uzbekistan24.uz/uzk/yangiliklar/9/2023/

Президентимиз Шавкат Мирзиёев 2017 йил 21 апрель куни Тошкент шаҳрининг Олмазор туманига ташрифи чоғида Имом Термизий жомеъ масжидини реконструкция қилиш бўйича топшириқ берган ва Ҳазрати Имом (Хастимом) мажмуасида Ислом маданияти марказини ташкил этиш таклифини билдирган эди. 

Давлатимиз раҳбарининг 2017 йил 23 июндаги “Ўзбекистон Республикаси Вазирлар Маҳкамаси ҳузурида Ўзбекистондаги Ислом маданияти марказини ташкил этиш чора-тадбирлари тўғрисида”ги қарори ижроси доирасида кенг кўламли ишлар амалга оширилмоқда. 

Шавкат Мирзиёев 1 сентябрь куни Ҳазрати Имом (Хастимом) мажмуасида бўлиб, мазкур марказ лойиҳаси билан танишди. 

Мамлакатимизда муқаддас динимизни, уламоларимизнинг бой меросини ўрганиш, тарихий обидаларни асраб-авайлашга алоиҳида эътибор қаратилмоқда. Самарқандда Имом Бухорий халқаро илмий-тадқиқот маркази ташкил этилмоқда, Шеробод туманидаги Абу Исо Муҳаммад Термизий, Қарши туманидаги Абул-Муъийн Насафий зиёратгоҳлари ва бошқа қадамжоларда қурилиш-таъмирлаш ишлари бажарилмоқда. 

Бу каби хайрли ишлар юртдошларимиз ва халқаро жамоатчилик томонидан кенг қўллаб-қувватланмоқда. Шуларни инобатга олиб, давлатимиз раҳбари Ислом маданияти маркази номини Ислом цивилизацияси маркази, деб ўзгартириш таклифини билдирди. 

Лойиҳага кўра, ушбу марказда академия, кутубхона, архив ва қўлёзмалар фонди ташкил этилиб, уларни бугунги Ўзбекистон заминидан етишиб чиққан буюк мутафаккирлар ва уламолар томонидан асос солинган илмий ва диний мактабларга доир юртимизда ва чет элларда сақланаётган қадимий қўлёзма ва тошбосма китоблар, тарихий далил ва ҳужжатлар, археологик топилмалар, осори-атиқалар, шу йўналишдаги замонавий илмий-тадқиқот ишлари, видео ва фото ҳужжатлар билан бойитиш, 300 ўринли конференция зали барпо этиш кўзда тутилган. 

Биз аждодларимиз билан доимо фахрланиб келганмиз, деди давлатимиз раҳбари. Шундай экан, ўзимиз ҳам уларга муносиб бўлишимиз керак. Ташкил этилаётган марказда ҳам бунинг учун барча шароитларни яратиш, етук олимларни жалб қилиш лозим. Мазкур соҳага оид адабиётларни жамлаш, чет элларда бўлса, юртимизга олиб келиш чораларини кўриш зарур. Бундан ташқари, мамлакатимиздаги диний йўналишдаги тўққизта ўрта махсус ва иккита олий таълим муассасаси ҳам марказ ихтиёрига ўтказилади. Бу ерда сабоқ берадиган ўқитувчилар билими ва савиясига алоҳида эътибор қаратиш даркор. 

Шавкат Мирзиёев марказ қурилиши бўйича тақдим қилинган лойиҳага алоҳида эътибор қаратди. 

Бу марказ бизнинг ислом дини тарғиботидаги юзимиз бўлади. Шундай экан, унинг ташқи кўриниши, бу ерда ишлатиладиган қурилиш материалларига ҳам эътибор қаратиш лозим. Одатдаги, кўзимиз ўрганиб қолган лойиҳалардан воз кечиб, янги шакл ва дизайн топишимиз керак, деди давлатимиз раҳбари. 

Лойиҳаларда марказ қурилиши муносабати билан бошқа жойга кўчириладиган аҳоли учун барпо этиладиган янги замонавий уй-жойлар ҳақидаги маълумотлар ҳам ўз аксини топган. 

Президентимиз давлат ва жамоат ташкилотлари, Мусулмонлар идораси раҳбарияти, имом-хатиблар, маҳалла фаоллари билан суҳбатлашди. 

president.uz |   http://www.president.uz/uz/lists/view/983

Юртимизда муборак Қурбон ҳайити кўтаринки руҳ ва ўзгача шукуҳ билан кутиб олинди. Бу улуғ айёмда мўмин-мусулмонлар бир-бирларини байрам билан қутлаб, муборакбод этдилар. Шундай дориломон кунларга етказган Аллоҳ таолога шукроналар айтиб, дуолар қилинди.