18 июнь куни Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедовнинг Бухоро вилоятига сафарлари якунланиб, Самарқанд вилояти бўйлаб давом эттирилди.
Мутасаддилар Самарқанд вилояти бош имом-хатиби Зайниддин домла Эшонқулов ҳамроҳлигида Каттақўрғон туманидаги “Қаландархона” жоме масжиди фаолияти билан танишдилар.
Маълумки, Каттақўрғон туманида жойлашган “Қаландархона” жоме масжидида намозхонлар учун қулай шарт-шароитлар яратиш мақсадида, сўнгги йилларда қурилиш ишлари жадал суратларда амалга оширилмоқда. Муфтий ҳазратларининг Самарқанд вилоятига ташрифлари доирасида “Қаландархона” жоме масжидида амалга оширилган ишлар билан яқиндан танишдилар, намозхонлар учун яратилаётган шарт-шароитларни кўздан кечирдилар ва ўзининг бир қатор маслаҳат ва тавсияларини бериб ўтдилар.
Муфтий Усмонхон Алимов ҳазратлари ушбу жоме масжидда намозхонлар билан бўлиб ўтган мулоқотда муҳтарам Президентимиз бошчиликларида барча соҳалар қатори диний-маърифий йўналишда ҳам кенг кўламли ислоҳотлар амалга оширилаётганига урғу бериб, мана шундай улуғвор ишлардан кўзланган асосий мақсад халқимизни рози қилиш ҳамда аҳоли манфаатларини таъминлаш эканини алоҳида қайд этдилар.
Муфтий ҳазрат сўзларида давом этиб, бу кунларнинг қадрига етиш, Давлатимиз Раҳбари ташкил этиб бераётган шарт-шароитлар учун миннатдорлик билдириш, Парвардигорга ҳамду санолар айтиш ва дуолар қилиш даркорлигини сўзладилар.

Ўзбекистон мусулмонлари идораси Матбуот хизмати

Аввал хабар берганимиздек, Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов Бухоро вилоятига сафарлари асносида Қуръони карим мусҳафини Бухоро ёзувида битилаётган табаррук нусхаси билан яқиндан танишдилар.
Илоҳий каломнинг ушбу нусхаси ҳаттот Муҳиддин домла Нўъмонов томонидан кўчирилмоқда. Мазкур мусҳафнинг ўлчами 60 см./40 см. бўлиб, Бухоро услубида ёзилмоқда. Ушбу хат Мир Убайдий Бухорий томонидан амалиётга жорий этилган бўлиб, ўзига хослиги ва чиройлилиги билан ҳудди Мадинаи мунаввара нашри каби алоҳида ажралиб туради.
Қуръони карим оятлари матнлари, саҳифаларининг безаклари ҳам қўлда ишланмоқда. Мусҳаф саҳифалари қаймоқ ранг бўлиб, турли рангли нақшлар билан жило берилган. Расмий Усмонийда Мир Убайдий Бухорий ёзувида битилаётган ушбу Қуръони карим мусҳафи ишларининг ярмидан кўпи бажарилган. Мазкур хат ишлари охирига етказилганда, яъни Қуръони каримни кўчириш ишлари якунлангандан сўнг ушбу мусҳаф ҳақида тўлиқ маълумот кенг оммага тақдим этилади.
Ташриф якунида ҳаттот Муҳиддин домла Нўъмоновнинг яқинда вафот этган волидаи муҳтарамаси руҳига бағишлаб, Қуръони карим оятлари тиловат қилиниб, муфтий ҳазратлари томонидан таъзия изҳор қилинди.

Ўзбекистон мусулмонлари идораси Матбуот хизмати

Коронавирус пандемияси туфайли бу йилги ҳаж мавсуми юзасидан Саудия Арабистони шу кунга қадар якуний қарорни эълон қилмади. Хабарларга кўра, айни пайтларда вазият баҳоланаётгани ва якуний қарор яқинда қабул қилиниши кутилмоқда.
Бироқ, 10 нафарга яқин давлатлар Саудия Арабистонидан келадиган хабарни кутиб ўтирмай, ўз фуқаролари учун бу йилги ҳаж сафарини бекор қилди. Шулардан бири – энг йирик мусулмон аҳолига эга бўлган Индонезия бўлса, қолганлари Малайзия, Сенегал, Нигерия ва Сингапур, Ҳиндистон ҳамда Европа ва Жанубий-Шарқий Осиёнинг баъзи мамлакатлари ўз зиёратчиларининг ҳаёти ва соғлиғини ҳимоя қилиш мақсадида «Ҳаж–2020» мавсумини ташкил қилмаслик ҳақида қарор қабул қилдилар.
Ҳукуматлар бундай қарорга келишларининг асосий омиллари сифатида давлатлар ўз фуқаролари соғлиғи учун масъул экани, бугунги мураккаб шароитда уларнинг соғлиғини сақлаш жуда мушкуллиги ҳамда ҳажга борадиганларнинг аксари кексалар бўлгани боис улар касалликка чалиниш эҳтимоли жуда юқорилиги билан изоҳлаганлар.
Таъкидлаш лозимки, Саудия Арабистонида айни вақтдаги эпидемиологик вазият мураккаблигича қолмоқда, шу жумладан коронавирусга чалинган беморлар сонининг ортиб бораётгани, ҳар куни ўртача 3800-4500 нафар кишида коронавирус аниқланаётгани ва 40-45 та ўлим ҳолати қайд этилаётгани ҳаж сафарини ташкил этиш масаласида ҳар бир давлатни чуқур ўйлантириб қўймоқда.

Ўзбекистон мусулмонлари идораси Матбуот хизмати

عن جندب بن عبدالله رضي الله عنه قال: قال رسول الله ﷺ: قال رجل: والله لا يغفر الله لفلان، فقال الله: من ذا الذي يتألى عليَّ أن لا أغفر لفلان؟ إني قد غفرت له، وأحبطت عملك” رواه مسلم.

Жундуб ибн Абдуллоҳ розияллоҳу анҳу ривоят қилиб айтадилар, Расулуллоҳ саллаллоҳу алайҳи васаллам дедилар: “Бир киши - Аллоҳнинг номи билан қасам ичиб айтаманки, фалончини Аллоҳ таоло кечирмайди, деди. Шунда Аллоҳ таоло: Ким у Менинг номимдан фалончини кечирмаслигимга қасам ичаётган. Билиб қўйки, Мен уни кечирди ва сенинг амалларингни бекор қилдим, деб айтди” (Имом Муслим ривояти).
Ушбу ҳадиснинг маъносидан бир нечта муҳим масалалар келиб чиқади:
Биринчи: Мусулмон киши ҳеч қачон бирор кимсага гарчи ҳазиллашиб бўлсада, Аллоҳ сени ҳеч қачон кечирмайди, Аллоҳ сени жаннатга киргизмайди, Аллоҳ сени дўзахга солади, деб қатъий қасам ичиб айтиши жоиз эмас. Чунки, бундай дейиш Аллоҳнинг номидан, ўзига маълум бўлмаган гапларни гапириш ҳисобланади. Бизнинг ҳеч қачон бирор кимсани Аллоҳнинг раҳматидан ноумид қилишга, Унинг марҳаматидан тўсишга ҳаққимиз йўқ. Шунингдек, бирор кимсани жаннатга кириши ёки дўзахга тушиши ҳақида қатъий гапира олмаймиз. Фақат, Расулуллоҳ саллаллоҳу алайҳи васаллам жаннатга кириши ҳақида башорат берган кишилар бундан мустаснодирлар.
Имом Бухорий ривоят қилган ҳадисда айтилишича, Абус Соиб Усмон ибн Мазъун разияллоҳу анҳу вафот этганида Расулуллоҳ саллаллоҳу алайҳи васаллам унинг олдига кирдилар. Ёнида Уммул Ало разияллоҳу анҳу ўтирган экан. Шунда у: Эй Абус Соиб, Сизга Аллоҳнинг раҳмати бўлсин. Мен сизга гувоҳман, Аллоҳ таоло сизни икром қилади, деди. Бу гапни эшитган Расулуллоҳ саллаллоҳу алайҳи васаллам: Сен қаердан билдинг, Аллоҳ таоло уни икром қилганини, - дедилар. Ота-онам сизга фидо бўлсин, Ё Расулаллоҳ, билмадим, деди Уммул Ало. Шунда Расулуллоҳ саллаллоҳу алайҳи васаллам: Усмонга ажали келди, Аллоҳга қасам, мен унга яхшиликни умид қиламан. Аммо, Аллоҳга қасамки, мен Аллоҳнинг расули бўлатуриб ҳолим нима бўлишини олдиндан билолмайман, дедилар. Шундан кейин Уммул Ало: Аллоҳ номига қасам ичиб, бундан кейин абадул абад бирорта кимса ҳақида бундай демайман, деди. Уйқусида Усмонни кўрди, у томонга чашма оқиб борар эди. Расулуллоҳ саллаллоҳу алайҳи васалламнинг ҳузурларига бориб кўрган тушини айтиб берган эди, Расулуллоҳ саллаллоҳу алайҳи васаллам: сен кўрганинг унинг амалидир, дедилар.
Иккинчи: Солиҳ киши ҳеч қачон гуноҳкор одамга нисбатан таҳқир назари билан, ўзига эса, мағрурланиб қарамаслиги керак. Бу ҳалокатга элтадиган энг ёмон ҳолатдир. Эҳтимол, бу обид банда у осий бандага нисбатан паст назар билан боқиб, уни таҳқирлаш орқали ўзининг солиҳ амаллари билан мағрурланиб, ужб ва кибрга берилиб кетади. Шунинг учун ҳам ҳикматда шундай дейилган: хорлик ва синиқликни келтирган маъсият, ужб ва кибрни пайдо қилган тоатдан яхшироқдир.
Учинчи: Одамларни Аллоҳнинг тоатига чақиришни истаган мусулмон киши улар билан муносабатда чиройли услубни қўллаши лозим. Яъни, мақсади уларнинг қалбларидан ўрин олиш бўлмоғи керак. Зинҳор, уларнинг пешвосига айланишни мақсад қилмаслиги керак.
Тўртинчи: Мусулмон киши зинҳор ҳеч бир инсонни бутун борлиқни қамраб олган Аллоҳнинг раҳматидан ноумид қилмаслиги керак. Чунки, осий банда қачонки тавба ва раҳмат эшиги унинг учун ёпиқ деб, тушкунликка берилиб қолса, аламидан яна гуноҳ қилишда давом этади. Балки, аввалгидан ҳам кўпроқ ва каттароқ жиноятларни қилишдан қайтмайди. Бу борада қуйидаги ривоят бизларга ибрат намунасидир. Тўқсон тўққизта жонни ноҳақ ўлдирган шахс тавба қилишни истаб дин илмидан хабари йўқ бир обиднинг олдига боради. Ундан тавба қилса тавбаси қабул бўлиши ёки бўлмаслиги ҳақида сўрайди. Табиийки, жоҳил обид унинг қилган гуноҳларини катта санаб, тавбаси қабул бўлмаслигини айтади. Бу гапни эшитган қотил обидни ҳам ўлдиради ва ҳисобни юзтага етказади.
Валлоҳу аълам биссавоб.

Ўзбекистон мусулмонлари идораси Фатво ҳайъати