Ушбу суратда Ойдан келтирилган тупроқ намунаси кўриниб турибди. Тупроқни ўрганаётган олимлар “Бу парчада олимларни ҳайратда қолдирадиган ҳодиса бор” дедилар. Бу ҳодиса кечалари Ойнинг кучли ёруғлик таратиши ва бунга сабаб бўлувчи нарсалардир.

Ҳаммамизга маълумки, Ой ўзидан ёруғлик ишлаб чиқармайди, балки Қуёшдан келадиган ёруғлик ва иссиқликни Ерга қайтаради. Шунинг учун нурли диск бўлиб кўринади.  

Буни қарангки, Ой тупроғида Қуёш нурлари таъсирида электронлар пайдо бўлар экан. Қуёш нурлари Ой сиртига тушганда, унинг тупроғи электр заррачалари билан зарядланади. Бу эса тупроқнинг таъсирланишига, қўзғалишига ва Қуёш нурини кўпроқ ва кучлироқ қайтаришга сабаб бўлар экан. Бу ҳодисага Қуръони Карим бундан ўн тўрт аср олдин ишора қилган: 

 وَجَعَلَ الْقَمَرَ فِيهِنَّ نُوراً وَجَعَلَ الشَّمْسَ سِرَاجاً

“Ва улар ичида ойни нур ва қуёшни чироқ қилиб қўйганини кўрмадингизми?” (Нуҳ сураси, 16-оят).

Аллоҳ таоло бу оятда Ойни нур таратувчи, Қуёшни эса чироқ қилиб қўйганини айтган. Яъни Қуёш ўзидан иссиқлик ва ёруғлик ишлаб чиқаради ва атрофга ўша ёруғликни тарқатади. Ойга етиб келган ёруғлик эса Ерга нур бўлиб қайтади.  

Олимлар илм-фан тараққий этган ҳозирги асримизда аниқлаган илмий ҳақиқатга Қуръони Карим бундан 1400 йил олдин ишора қилиб, айтиб қўйгани Қуръон Аллоҳ таолонинг Каломи эканлигига ва Муҳаммад соллаллоҳу алайҳи васаллам Унинг ҳақ Пайғамбари эканликларига яққол далилдир!

Абдуддоим Каҳелнинг мақоласи асосида

Нозимжон Иминжонов тайёрлади

Бугунги кунда Ўзбекистон мусулмонлари идораси тасарруфида 11 та таълим муассасаси фаолият юритмоқда. Айни пайтда уларда 1864 нафар талаба таҳсил олмоқда. Таълим муассасаларини бу йил 342 та талаба битиради.

Битирувчиларни келгусида ўз ихтисослик йўналишлари бўййича диний-маърифий сохада хизмат қилишларини таъминлаш ёки таълимни кейинги босқичларида давом эттириш учун шарт-шароитларни яратиб бериш диний идоранинг асосий вазифаларидан биридир.  Куни кеча шу муносабат билан Тошкент ислом институти ва “Кўкалдош” ўрта-махсус ислом билим юрти битирувчи талабалари билан ўтказилган учрашувда талабаларнинг келгусидаги режалари, мақсадлари асосида тузиб чиқилган иш тақсимоти муҳокама қилинди.

Ёш кадрлар билан бирма-бир суҳбат олиб борилиб, масжидларда, таълим муассасаларида ёки диний идора тизимида ишлаш истаги бўлган ёш кадрларга керакли тавсиялар берилди. Сохада фаолият юритишнинг масъулияти тушунтирилди.

Бу йили Тошкент ислом институтини тамомлаётган  64 нафар битирувчиларнинг 24 нафари ЎМИ тасарруфидаги таълим муассасаларига, 36 нафари масжидларга имом-хатиб, имом ноиби вазифаларига ҳамда 4 нафари идоранинг турли бўлимларига ишга тақсимландилар. Яна ўн бир нафар талабанинг иш тақсимоти ўзларининг якуний қарорларига кўра белгиланади.

 “Кўкалдош” ўрта махсус ислом билим юртини эса жорий йилда  41 нафар талаба битиради. Битирувчиларнинг барчаси ўзи яшайдиган ҳудудга яқин бўлган масжидларга тақсимот қилинган. Таълимни кейинги босқичда давом эттириш истаги бўлган талабалар ўз ихтиёрларига кўра, ҳужжат топширадилар. 

Ўзбекистон мусулмонлари идораси Масжидлар бўлими

Бирлашган Араб Амирликларининг Шаржа амирлигида ташкил этилган исломий ботаника боғида Қуръон ва суннатда номлари зикр қилинган 50 хилдаги ўсимликлар етиштирилади.

Шу сабабдан ҳам ушбу боғ Ислом боғи деган ном олган. Мазкур боғ 2014 йилда Шаржа атроф-муҳитни ҳимоя қилиш уюшмаси томонидан ташкил этилган.

Ушбу боғдаги ўсимлик ва дарахтлар орасида зайтун, анжир, узум, анор, пальма, заъфарон, акация, хардал каби Қуръон ва суннатда зикр этилган 50 га яқин ўсимлик ва мевалар етиштирилди.

Бу ерда зиёратга келувчиларга Ислом динининг атроф-муҳитга қандай муносабатда бўлиши, шифобахш ўсимликларнинг хосиятлари ҳақида маълумотлар берилади. Шунингдек, Ислом ботаника боғида зиёратчилар учун барча шарт-шароитлар яратилган. Улар энг хушбуй ҳидли агар ва окалиптус дарахтларини томоша қилишлари мумкин.

Ўзбекистон мусулмонлари идораси Матбуот хизмати

Озарбайжонда “Ҳалол” сертификатини тақдим этиш механизми ишлаб чиқилади ва ҳаётга тадбиқ этилади. Бу ҳақда islam.az сайти, "Озарбайжон Республикасининг 2019-2025 йилларга мўлжалланган озиқ-овқат хавфсизлиги бўйича давлат дастури"га иқтибосан хабар бермоқда.

Ҳужжатга кўра, ушбу фаолият Давлат монополияга қарши курашиш ва истеъмолчилик бозори устидан назорат қилиш агентлиги, Озиқ-овқат хавфсизлиги агентлиги ва мамлакат иқтисодиёт вазирлиги томонидан амалга оширилади.

Кавказ мусулмонлар идорасига ушбу механизмни тайёрлашда иштирок этиш тавсия этилган. Механизмни шакллантириш 2020 йилда якунланиши кўзда тутилмоқда.

Ўзбекистон мусулмонлари идораси Матбуот хизмати

Яқин Шарқдаги энг йирик Arabian Travel Market халқаро туризм кўргазмасида Ўзбекистон Республикаси Туризмни ривожлантириш давлат қўмитаси вакиллари ва туроператорлар миллий стенд билан иштирок этишди. Кўргазма доирасида ўзбекистонлик ватандошлар ва хорижий инвесторлар билан музокаралар ўтказилди.

Ўзбекистоннинг БААдаги бош консуллиги билан ҳамкорликда араб давлатида турли соҳаларда фаолият юритаётган ватандошларимиз билан учрашув бўлиб ўтиб, у ерда мамлакатимизнинг туристик салоҳиятини кенг тарғиб қилишга доир келишувларга эришилди.

Таъкидлаш жоизки, Ўзбекистонда туризм соҳасида олиб борилаётган ислоҳотлар ҳақида намойиш қилинган тақдимот ватандошларимиз томонидан катта қизиқиш билан кутиб олинди. Қизиқарли ва савол-жавобларга бой ўтган учрашувда туризм салоҳиятини тарғиб қилиш, диаспора вакиллари ва БАА фуқароларини Ўзбекистонга жалб қилиш масалалари ҳамда келгусида ҳамкорликда олиб бориладиган ишлар муҳокама қилинди. БААдаги ватандошларимиз ҳар қандай тарғибот ишларини қўллаб-қувватлаш ва Ўзбекистон равнақига ўз ҳиссаларини қўшишга тайёр эканликларини таъкидлашди.

Ярмарка доирасида, шунингдек, Ўзбекистонда туризм соҳасига инвестиция киритишни истаган, жойлашув воситаларини қуриш истагида бўлган бир неча сармоядорлар билан музокаралар олиб борилди. Осиё давлатларида Ўзбекистоннинг сайёҳлик салоҳиятини кенг тарғиб қилиш учун қатор блогерлар ва телешоулар тайёрловчи хусусий корхоналар вакиллари билан ҳам келишувларга эришилди.

Туризмни ривожлантириш давлат қўмитаси матбуот хизмати билдиришича, Arabian Travel Market 2019 кўргазмасида иштирок этувчилар асосан меҳмонхона бизнеси вакиллари, туроператорлар, транспорт компаниялари, меҳмондорчилик саноати мутахассислари, ўқув муассасалари ва ихтисослашган оммавий ахборот воситалари бўлиб, бундай нуфузли кўргазмада иштирок этиш янги бозорларга чиқиш, янги мижозлар орттириш ҳамда мавжуд алоқаларни мустаҳкамлаш, янги маҳсулотларни йўлга қўйиш имконини берди.

B2B форматидаги учрашувлар натижасида, бутун дунё сайёҳлари ва туроператорлари учун 2800 дан ортиқ туристик маҳсулот ва йўналишлар намойиш қилинди. Кўргазма 28 апрелдан 1 майга қадар ўтказилди.

Ўзбекистон мусулмонлари идораси Матбуот хизмати