Президент ташрифидан сўнг
Тошкент шаҳар Олмазор тумани Қизил кўчасида жойлашган “Имом ат-Термизий” жоме масжиди 1876 йил Исмоил сувоқчи томонидан ҳашар йўли билан қурилган. Масжид аввал “Тахтапул” номи билан фаолият олиб борган.
Мустақиллик йилларида унга “Имом ат-Термизий” жоме масжиди номи берилди.
Мазкур масжид маданий мерос тарихий ёдгорликлари рўйхатига киритилиб, давлат муҳофазасига олинган.
Президентимиз Шавкат Мирзиёев 2017 йил 21 апрель куни Тошкент шаҳрининг Олмазор туманига ташрифи чоғида бу масжидни реконструкция қилиш бўйича топшириқ берган эди.
Қисқа вақт ичида янги қиёфага кирган масжид 2018 йилнинг 16 май куни фойдаланишга топширилди. Бу ерда мўмин-мусулмонлар ибодат қилиши учун барча шарт-шароитлар яратилган. Унинг хонақоҳи 1800 кишига мўлжалланган. Масжидда кутубхона, ошхона ва бир қанча маъмурий хоналар мавжуд.
Хуршид Қодиров, Оқил Ғуломов (сурат) ЎзА
