Астрахан вилоятида 50 дан ортиқ масжид қайат тикланди ва бунёд этилди. Astrobl.ru маълумотларига кўра, бу ҳақда вилоят раҳбари Игор Бабушкин Россия марказий мусулмонлари идораси раиси, Россия олий муфтийси Талгат ҳазрат Тожуддин билан учрашув чоғида маълум қилди.
Томонлар вилоят ҳудудидаги анъанавий конфессиялар вакиллари ўртасидаги ўзаро муносабатларни муҳокама қилишди. Игор Бабушкиннинг қайд этишича, Астрахан ерида минтақада тинчлик ва ҳамжиҳатликда яшаётган турли конфессия вакилларининг диний туйғуларига ҳурмат билан муносабатда бўлишади.
"Ўтган бир неча йил мобайнида вилоятимизга ташриф буюрганингиз учун биласиз, Астрахан вилояти ҳудудида 50 дан ортиқ масжид қурилиб, қайта тикланди. Уларнинг базасида бир қанча мадрасалар аллақачон фаолият юритмоқда. Шунингдек, икки масжид ҳузурида Ислом коллежи очилди ва фаолият олиб бормоқда. Бу эса мусулмонларнинг ҳам марказий, ҳам минтақавий диний бошқармаларининг жуда хизмати, деб ўйлайман", - дея таъкидлади вилоят раҳбари.
Россия олий муфтийси Талгат ҳазрат Тожуддин Астрахан вилояти Россия марказий мусулмонлари идорасининг энг ишончли ва кучли мусулмон жамоаларидан бири эканлигини таъкидлади.

Ўзбекистон мусулмонлари идораси матбуот хизмати