Элимизда ҳамон Ийди Қурбон байрами ўзгача руҳ, ўзгача кайфиятда нишонланмоқда. Байрам муносабати билан фуқароларга беш кун дам олиш берилгани барчамизга эзгу амалларни тўла-тўкис бажаришга кенг имкониятлар яратиб бераяпти.

     Динимизда муқаддас байрам кунларида ўтганларни хотирламоқ, уларнинг руҳларига дуои фотиҳалар қилмоқ, ҳаётлигида амалга оширган савобли амалларини ёдга олмоқ, бошқаларни ҳам шу каби эзгу амалларга даъват қилмоқ қадим анъаналаримиздан ҳисобланади.

     Аҳли донишлар айтмиш:”Дин ишларига куч-қувват бермоқ, Аллоҳ таолонинг фарзи, расулнинг суннатларини ижро этмоққа шарт-шароитлар яратиш, уламо аҳлини эъзозлаш ва иззатда тутиш ҳукмдорлар учун вожиб-шартдир!” Шу маънода муҳтарам Президентимизнинг улуғ байрам арафасида марҳум шайх Муҳаммад Содиқ Муҳаммад Юсуф ҳазратларини “Олий даражадаги Имом Бухорий” ордени билан тақдирлаганликлари нур устига аъло нур бўлди.

      Шайх Муҳаммад Юсуф Муҳаммад Содиқ ҳазратлари бутун умрини дини ислом ривожига баҳшида қилган зотдир. У киши ўз ҳаётларида давомида, бир қанча китобу рисолалар ёздилар. Қуръони Каримни тафсир қилишга бел боғлаган, бунга тўла маънода муваффақ бўлиб, ўттизга яқин тафсир китоблари кўп минг нусхаларда мунтазам чоп қилиниб, аҳли мўминлар қалбидан жой олган эди. Эътиборли томони, сўнгги асрда Қуръони Карим тафсирига қўл урган саноқли уламолардан  бириси бўлдилар.

    “Тоғларнинг салобати узоқдан кўринади”, деган доно гап бор. Шайх ҳазратлари гарчи орамизда бўлмасаларда у кишининг миллатимизга –бутун дунё мусулмонларига қилган хизматлари вақт ўтган сари бор бўйи-салобати билан кўринмоқда. Бундай бахтга мушарраф бўлиш ҳар кимга ҳам насиб қилавермайди.

     Муҳтарам Юртбошимизнинг шайх ҳазратлари хотирасини улуғлаб, ул зотни юксак нишон билан тақдирлаганлари барчамизни беҳад қувонтирди. Бу эҳтиром қадим юртимиздан келгусида имом Бухорий  ва алломанинг муносиб вориси шайх Муҳаммад Юсуф Муҳаммад Содиқ каби  улуғ зотлар етишиб чиқишларига бўлган ишонч белгисидир.

     Жойлардаги жомеъ масжидларида Ийди Қурбон куни ўқилган ҳайит намозларида элимиз тинчлиги, осмонимиз мусаффолиги, миллатлараро ва динлараро аҳиллик, буюк келажак қуриш йўлида фидоийлик кўрсатаётган ҳамюртларимизга куч-қувват, улуғ ислоҳотлар бошида турган муҳтарам Юртбошимизга соғлик тилаб, дуои фотиҳалар қилинди.

    Яқиндагина умумхалқ референдуми орқали қабул қилинган Бош қомусимизнинг янги лойиҳасида виждон эркинлиги, диний бағрикенглик тамойиллари янада такомиллаштирилиб, ҳар бир фуқаронинг бу борадаги ҳақ-ҳуқуқлари кафолатлангани –юртимизда тизимли равишда амалга оширилаётган ислоҳотларнинг пойдевори бўлиб хизмат қилиши, ҳеч шубҳасиз!

      Айни дамда барча фуқароларимизга яқинда бўлиб ўтадиган президентлик сайловларида фаол бўлишлари, ўзлари ва фарзандларига келажагига бефарқ бўлмасликлари –бу барчамиз учун ўта муҳим сиёсий жараён эканлигини ҳам таъкидлаш жоиздир.

Ҳасанбой КЕНЖАЕВ,

Урганч шаҳар бош имом хатиби

Миср Вақфлар ва Ислом ишлари вазири доктор Муҳаммад Мухтор Жума Қуръони карим учун ўзларининг ширин ва таъсирли тиловатлари билан Ислом оламини бойитган Мисрнинг буюк қорилари шарафига ўтказилиб келинаётган навбатдаги 30-халқаро Қуръони карим мусобақасини ўтказиш санасини 2023 йил 2 декабрда бўлишини тасдиқлади.

Миср Вақфлар ва Ислом ишлари вазири бўйича ушбу 30- халқаро Қуръони Карим мусобақасига Қуръони каримга бўлган хизматларини эътиборга олган ҳолда Шайх Маҳмуд Aли Aл-Банно раҳимаҳуллоҳ номини беришга қарор қилди.

Мусобақа қуйидаги йўналишларда ўтказилади:

1. Қуръони каримни тажвид қоидаси асосида тафсири билан ёдлаш, унда имом-хатиблар Қуръон илмлари устозлари ва уларнинг ёрдамчилари бўлмаслиги, иштирокчининг ёши 35 дан ошмаслиги;

2. Араб тилида сўзлашмайдиган давлатлар вакиллари учун Қуръони каримни тажвид қоидаси асосида тўлиқ ёддан ўқиб бериш, унда иштирокчини ёши 30 ёшдан ошмаслиги;

3-йўналиш (ёшлар учун): Қуръони каримни тўлиқ ёддан билиш, луғавий маъноларини тушуниш ва Юсуф алайҳиссалом сурасидаги оятлар маъноларини изоҳли таржима қилиш, унда иштирокчини ёши 12 ёшдан ошмаслиги;

4. Қуръони каримни тўлиқ ёддан тиловат қилиб бериш билан бирга Каломуллоҳ маъноларининг таржимаси ва Қуръон илмларини тадбиқ этиш қоидаларини билиши. Бу йўналишда имом-хатиблар, Қуръон илмлари устозлари ва мударрисларига ҳам қатнашишга рухсат этилади. Иштирокчининг ёши 40 ёшдан ошмаслиги шарт қилинади.

5. Имконияти чекланганлар иштирокида Қуръони каримнинг умумий маъно ва мақсадларини тушунган ҳолда ёддан ўқиб бериш. Унда иштирокчини ёши 30 ёшдан ошмаслиги шарт қилинади.

6. Оилавий Қуръони каримни ёд олган ҳофизлар оиласи иштирокида Қуръони каримнинг умумий маъно ва мақсадларини тушунган ҳолда тўлиқ ёддан ўқиб бериш, агар ҳифзни ўзлаштирган оила аъзолари сони уч нафардан кам бўлса, оила илгари биринчи ўринни эгаллаб, ғолиб бўлмаган бўлиши лозим.

Мусобақанинг барча йўналишлари ҳар икки жинс вакиллари учун ҳам очиқ экани таъкидланиб, иштирокчи илгари бирорта ҳам танлов бўлимида ўтган йили биринчи ёки иккинчи ўринни қўлга киритмаган бўлса, мусобақада иштирок этади.

Маълумот учун, Шайх Маҳмуд Aли Aл-Банна 1926 йил 17-декабрда Мануфия вилоятидаги Шибинул-Кум маркази Шабробос қишлоғида туғилган. У Қуръони каримни қишлоқ мактабида ўқиб юрган кезларида 11 ёшида ёд олган. Кейин у Aҳмадий масжидида шариат илмларини ўрганиш учун Танта шаҳрига кўчиб ўтди ва у ерда имом Иброҳим ибн Салом ал-Маликий қўлида таҳсил олди.

Шайх Aл-Банно 1945-йилда Қоҳирага кўчиб ўтиб, таниқли Қуръон ҳофизи сифатида шуҳрат қозонди, мақомот илмларини ўрганди, 1948 йил декабрида радиога таклиф қилиниб, “Ҳуд” сурасини эфирга ўқиб берди. Сўнг бир неча йил у Мисрдаги энг машҳур қорилардан бирига айланди.

Шайх Маҳмуд Aл-Банно ҳаётининг сўнги йилларида 1984 йил “Қуръон қорилари ва устозлари уюшмаси”га асос солинишида ҳам муҳим роль ўйнади. У ўша даврда Миср ҳукуматининг раҳбари бўлиб турган Анвар Садатнинг олдига шу масалани кўтариб кирди. Анвар Садат Шайх Маҳмудни қаттиқ эҳтиром қилар, у билан дўстона суҳбатлашарди. У бу таклифни дарҳол қабул қилди. Шайх Маҳмуд ушбу уюшмага раҳбар этиб тайинланди.

Шайх Маҳмуд Али Ал-Банно 1405/зулқаъда/03 ҳижрий, 20/07/1985 милодий санада шанба куни вафот этди. У кишининг жанозаси “Имом Ҳусайн” масжидида ўқилди. Жанозада васиятга мувофиқ, шайх Мутавалли Шаъровий имом бўлди. Шайх Маҳмуд ўзининг васиятига кўра, киндик қони тўкилган қишлоғи Шабробосдаги ўзи қурдирган масжид ёнидаги мақбарасига дафн қилинди.

Интернет материаллари асосида
Ўзбекистон мусулмонлари идораси ходими
И.Аҳмедов тайёрлади.

Вақтни бекорчи суҳбатлар билан ўтказишни яхши кўриш ҳам нафс касалликларидан ҳисобланади.

 Муолажа услуби

Инсон бир кун келиб бефойда суҳбатлар билан вақтини ўтказган дўстлари уни тарк этишини унутмаслиги лозим. Расулуллоҳ соллаллоҳу алайҳи васаллам айтадилар: «Ҳузуримга Жаброил алайҳиссалом келиб бундай деди: “Эй Муҳаммад, хоҳлаганингизча яшанг, барибир бир куни вафот этасиз. Истаган кишингизни яхши кўринг, барибир бир куни ундан ажраласиз. Хоҳлаган нарсангизга амал қилинг, барибир ўша бажарган ишингизга мукофот (ёки жазо) оласиз. Билингки, мўминнинг шарафи кечасини (баъзисини ибодат ила) бедор қилишидадир. Азизлиги эса, одамлардан (ҳеч нарса сўрамасдан) беҳожат бўлишидадир”» (Имом Байҳақий ривояти).

Абулқосим Исҳоқ ибн Муҳаммад ибн Исмоил Ҳаким Самарқандий раҳимаҳуллоҳ айтади: “Дўстлик адоватга айланади, агар унда самимият бўлмаса. Бойлик бахтсизлик келтиради, агар унда камбағалларнинг ҳаққи адо этилмаса”.

Абул Аббос Саҳл ибн Саъд ас-Соъидий розияллоҳу анҳудан ривоят қилинади. Бир киши Набий соллаллоҳу алайҳи васалламнинг ҳузурларига келиб: “Ё Аллоҳнинг Расули! Мени шундай бир амалга далолат қилинки, агар уни қилсам, Аллоҳ ҳам, одамлар ҳам мени яхши кўрсин”, деди. Шунда Расулуллоҳ соллаллоҳу алайҳи васаллам: “Дунёдан юз ўгир, Аллоҳ сени севади. Одамларнинг қўлидаги нарсадан юз ўгир, одамлар сени яхши кўради”, дедилар (Ибн Можа ривояти).

Абу Абдураҳмон ас-Суламийнинг

“Нафс иллатлари ва уларнинг муолажаси” китобидан

Даврон НУРМУҲАММАД таржимаси.

26 июнь – Халқаро гиёҳвандликка қарши кураш куни

Инсонга зарар келтирувчи нарсалардан, айниқса, энг улуғ неъмат саналмиш ақлни кетказувчи, баданни бўшаштирувчи ва сусайтирувчи нарса динимизда ҳаром қилинган.

Бу ҳақда Умму салама разияллоҳу анҳодан ривоят қилинади, у зот айтадилар:

"نَهَى رَسُولُ اللَّهِ صَلَّى اللَّهُ عَلَيهِ وَسَلَّمَ عَنْ كُلِّ مُسْكِرٍ وَمُفْتِرٍ

(رواه الإمام ابو داود)

яъни: “Расулуллоҳ саллаллоҳу алайҳи васаллам ҳар қандай маст қилувчи, баданни бўшаштирувчи ва сусайтирувчи нарсаларни истеъмол қилишдан қайтардилар” (Имом Абу Довуд ривоятлари).

Ҳозирда айрим ёшлар орасида психотроп дори воситалари истеъмолига одатланиш ҳолатлари учрамоқда. Ваҳоланки, бу дори воситаларида гиёҳванд моддаларидаги каби ўзига ўргатиб қўйишдек хусусият бор.

Табиийки, бу гиёҳвандликнинг янгича кўринишини пайдо қилади. Динимизда ҳар қандай бўшаштирувчи ва маст қилувчи воситалар ҳаром қилинган!

Пайғамбаримиз саллаллоҳу алайҳи васаллам бошқа бир ҳадисда бундай деганлар:

كُلُّ مُسْكِرٍ خَمْرٌ، وَكُلُّ مُسْكِرٍ حَرَامٌ

رواه الإمام مُسلم عَن ابْن عمرَ رَضِيَ اللَّهُ عَنْهما

яъни: “Ҳар бир маст қилувчи нарса хамрдир ва ҳар қандай маст қилувчи ҳаромдир”  (Имом Муслим ривоятлари).

Ўзбекистон мусулмонлари идораси
Матбуот хизмати