muslimuz
O‘zbekiston diniy-maʼrifiy soha vakillari Janubiy Koreyada vatandoshlar bilan uchrashdi
Mamlakatimizning Koreya Respublikasidagi elchixonasi tashabbusi bilan 1-8 iyul kunlari O‘zbekiston musulmonlari idorasi vakillaridan iborat delegatsiyaning ushbu mamlakatga tashrifi tashkil qilindi, deb xabar bermoqda “Dunyo” AA muxbiri.
Ushbu tashrifni tashkil etishdan maqsad Janubiy Koreyada bo‘lib turgan fuqarolarimizga Islom dinining asl mohiyati to‘g‘risida maʼlumot berish va yurtimizda diniy sohada amalga oshirilayotgan islohotlar samarasi bilan tanishtirishdan iborat.
Safar davomida O‘zbekiston diniy ulamolari ishtirokida vatandoshlarimiz zich yashaydigan shaharlarda bir qator maʼnaviy-maʼrifiy tadbirlar uyushtirildi.
Imom-xatiblarimiz yurtdoshlarimiz bilan kechgan suhbatlar chog‘ida O‘zbekistonda diniy-maʼrifiy jabhada amalga oshirilayotgan islohotlar, fuqarolarimizning diniy erkinlarini taʼminlash yo‘lidagi saʼy-harakatlar to‘g‘risida maʼlumot berdilar. Yurtdoshlarimizning, xususan, yoshlarimizning yot g‘oyalar va turli diniy ekstremistik tashkilotlar domiga tushib qolmasliklari bo‘yicha tushuntirishlar berildi. Islomning mazmun-mohiyati alohida urg‘ulandi.
Bundan tashqari, bo‘lib o‘tgan tadbirlarda Koreya Respublikasida vaqtincha mehnat faoliyatini amalga oshirib kelayotgan muhojirlar va talabalar ushbu davlatda masʼuliyat bilan faoliyat yuritishlari, mehnat orqali topilayotgan mablag‘larini to‘g‘ri yo‘lda sarflashlari, oila aʼzolari bilan muntazam bog‘lanib turishlari va vatanga yangi ilm, hunar, sarmoya va g‘oyalar bilan qaytishlari maqsadga muvofiq ekanligi taʼkidlandi.
O‘zbekiston diniy ulamolarining Koreya Respublikasiga tashrifi ushbu davlatda istiqomat qilayotgan vatandoshlarimiz tomonidan iliq qabul qilindi. Kelajakda bunday tadbirlarni doimiy ravishda tashkil etish bo‘yicha kelishib olindi.
O'zbekiston musulmonlari idorasi
Matbuot xizmati
Ҳадис илми мактабида қабул жараёни якунланди
#Қабул_2023
▪️2023-2024 ўқув йили учун Ҳадис илми мактабига абитуриентлардан ҳужжат қабул қилиш 10 июль куни соат 18:00 да тўхтатилди.
? Қабул қилинган аризалар сони жами 123 та.
? Қабул имтиҳонлари ўтказиш санада тўғрисида маълумот muhaddisuz (https://t.me/muhaddisuz) телеграм манзили орқали берилади.
muhaddis.uz
Ҳожиларнинг илк гуруҳи кутиб олинди
“Жидда – Наманган” йўналиши бўйича парвоз қилган “Uzbekistan airways” авиакомпаниясининг “Boeing-767” русумли ҳаво лайнери 247 нафар зиёратчи билан Наманган халқаро аэропортига келиб қўнди.
Қувонарлиси, “Ҳаж-2023” дастури доирасида квоталар сони оширилиб, вилоятдан 1 минг 648 киши Ислом оламидаги бешинчи муқаддас арконни бажариш бахтига муяссар бўлди. Ҳожиларимиз юқори шоду хуррамлик билан кутиб олинди.
– Муборак Ҳаж зиёрати ҳар бир мусулмон учун катта орзу. Улуғ сафар давомида ватандошларимиз Саудия Арабистонининг Мадина ва Макка шаҳарларида бўлиб, Ҳаж амалларини мукаммал адо этишди. Арафот тоғи, Мино ва Муздалифа водийларида ибодатлар чоғида бугунги саодатли кунлар учун шукроналар айтиб, Аллоҳдан юртимизга файзи барака, халқимизга фаровонлик, эртанги умидимиз бўлган фарзандларимиз бахти, камолини сўраб, дуолар қилишди, – дейди Ўзбекистон Мусулмонлар идорасининг Наманган шаҳридаги вакили Мусохон қори Аббосиддинов. – Шуни алоҳида эътироф этиш керак, Ҳаж зиёратини кўтаринки руҳда ўтказиш учун барча ташкилий чора-тадбирлар кўрилди. Ватандошларимиз икки муаззам шаҳарлардаги кўркам меҳмонхоналардан жой олишди.
– Ўттиз йилдан зиёд Наманган тумани Ровустон қишлоғидаги 34-умумтаълим мактабида бошланғич синф ўқувчиларига сабоқ бердим. Бир ўғил ва уч қизни тарбияладим. Муаллималик қилаётган икки дилбандим касбимни давом эттирмоқда, – дейди 72 ёшли кекса педагог Турсунхон ая Собирова. – 2007 йилдан бери Ҳаж зиёратига боришни орзу қилардим. Бу бахт бугун насиб қилди. Араб заминида ибодатлар пайтида асло қийинчилик кўрмадик. Президентимизнинг Саудия Арабистони подшоҳлиги билан келишувлари натижасида ўзбекистонлик ҳожиларга юксак савияда муносабатда бўлишди, барча имкониятлар ҳозирланди. Ҳаждан қайтган инсон зиммасида ижобий томонга ўзгаришдек катта масъулият юкланади. Барча яқинларим ва маҳалладошларга панд насиҳатларимиз, эзгу фазилатларимиз билан ибрат намунасини кўрсатишни ўз олдимга мақсад қилдим.
Яхши кайфиятда юртимизга қайтган ҳожиларимиз автобусларга чиқиб, белгиланган манзилларга келиб, оила-аъзолари ва яқинлари билан дийдорлашди. Эслатиб ўтамиз, “Ҳаж-2023” дастури доирасида жорий йилнинг 14 июлига қадар ҳожиларимизни кутиб олиш мақсадида “Жидда – Наманган” йўналишида 14 та авиақатнов амалга оширилиши режалаштирилган.
Оқилхон Дадабоев, Ҳотам Мамадалиев (сурат), ЎзА
Гуноҳ ва хатоларга тавба қилиш
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам дедилар: «Намоз намозгача бўлган гуноҳларга каффоратдир. Рамазон рўзаси Рамазон рўзасигача бўлган гуноҳларга каффоратдир. Лекин учта гуноҳ бундан мустасно:
Аллоҳга ширк келтириш;
Суннатни тарк қилиш;
Келишувни бузиш.
Бунга ўхшаш лафзларнинг саноғи йўқ. Уларни битта доирада жамлаш мушкул. Улар доимо мубҳам бўлиб қолаверади.
Ҳидоятга етиш йўли эса фақат тавба биландир. Аллоҳ кўксига иймонни мустаҳкам жойлаган инсонлар ҳар қадамларида ўзларини ислоҳ қилиб, нафсларини тергаб, у билан курашадилар ва нафсларини енгадилар. Аллоҳ кимнинг қалбини Исломга очиб саодатманд этган бўлса, у Парвардигори томонидан бўладиган нур устидадир. Уларнинг қалби Қуръон ва иймон нури билан ёғду сочади.
Бу ҳақда Аллоҳ таоло Қуръони Каримда шундай марҳамат қилади:
ﰁ ﰂ ﰃ ﰄ ﰅ ﰆ
«Ва жаннат тақводорларга узоқ бўлмаган жойга яқинлаштирилди» (Қоф сураси, 31-оят).
Жаннат қиёмат куни тақводор бандаларга яқин келтирилиб, кўзларига кўрсатилишининг ўзи уларга бўлган катта башоратдир. Ушбу шарафга кимлар эришади ва қайси сифатлар етказади?
ﰇ ﰈ ﰉ ﰊ ﰋ ﰌ ﰍ
«Бу сизга ваъда қилинган нарсадир, ҳар бир сертавбага ва муҳофаза қилувчига... » (Қоф сураси, 32-оят).
Мужоҳид раҳимаҳуллоҳ ушбу оят ҳақида: «Сертавба ва муҳофаза қилувчи ким эканига далолат қилайинми? У холи қолганда гуноҳини ёдга олади ва у учун истиғфор айтади» деди.
ﰎ ﰏ ﰐ ﰑ ﰒ ﰓ ﰔ ﰕ
«Роҳмандан ғойибона қўрққан ва қайтувчи қалб ила келган кимсага» (Қоф сураси, 33-оят).
Демак, қиёмат куни жаннат аҳлига жаннатни яқинлаштириб, олиб келинади ва:
«Бу сизга ваъда қилинган нарсадир…» – дейилади.
Яъни, «Бу дунёда ким иймон билан ибодат қилиб юрса, жаннатга киради», деб ваъда қилинган эди, ана ўша ваъда қилинган жаннат шу.
Ундан сўнг жаннат аҳлига қувонч устига қувонч бўлиши учун, жаннат кимларга ваъда қилингани алоҳида санаб чиқилади:
«…ҳар бир сертавбага ва муҳофаза қилувчига, Роҳмандан ғойибона қўрққан ва қайтувчи қалб ила келган кимсага».
«сертавба...»
Қилган гуноҳларига зудлик билан қайта-қайта тавба қилиб юрган шахслар. Тавбанинг аҳамиятини шундан билса ҳам бўлади.
«муҳофаза қилувчи...»
Оятда «муҳофаза қилувчи» деб қўйилганининг ўзи ғоят улкан маънони англатади. Нимани сақлаш керак бўлса, шуни сақловчилар ушбу маънонинг ичига киради. Жумладан, шариат чизиб қўйган чегарани сақловчи, Аллоҳга берган аҳду паймонини сақловчи ва ҳоказо. Бу ҳам жаннатийларнинг сифатларидан бири экан.
«Роҳмандан ғойибона қўрққан...»
Роҳман – Аллоҳнинг сифатларидан бири, ғойибона қўрқиш – Уни кўрмасдан қўрқишдир. Албатта, бу сифат жуда ҳам зарур бўлиб, Аллоҳ таолодан ғойибона қўрқмай туриб, жаннатга киришни хаёлга ҳам келтирмаслик керак.
«қайтувчи қалб ила келган...»
Аллоҳнинг ҳузурига қалби касал бўлмай келувчи. Қалбнинг саломатлиги энг муҳим сифатлардан экани ҳаммага маълум. Аллоҳ барчамизга қалб саломатлигини насиб этсин.
Аллоҳим, биз Сендан барча гуноҳ ва хатоларга истиғфор сўраймиз.
Хуршид Маъруф
Менинг билганимни билганингизда эди...
Абу Зар розияллоҳу анҳудан ривоят қилинади. Расулуллоҳ соллаллоҳу алайҳи ва саллам дедилар: “Албатта, мен сиз кўрмаган нарсаларни кўраман ва сиз эшитмаган нарсаларни эшитаман. Осмон ингради ва унинг инграши ҳақ эди. Унда тўрт панжа сиғадиган ҳар бир жойда битта фаришта Аллоҳга сажда қилиб пешонасини қўйган. Аллоҳга қасам, агар менинг билганимни билганингизда эди, албатта, оз кулиб, кўп йиғлаган бўлардингиз. Тўшакларда аёллар билан ишрат қилмаган бўлардингиз. Дашту саҳроларга чиқиб, Аллоҳга зорланган бўлардингиз! Қани эди, кесилиб ташланадиган дарахт бўлсам”, дедилар» (Имом Термизий ривояти).
Пайғамбаримиз соллаллоҳу алайҳи ва салламнинг шу ва бошқа бир неча ҳадисларида кўпчилик инсонлар кўра олмайдиган нарсаларни кўриб, аксарият одамлар эшита олмайдиган нарсаларни эшитишларини таъкидлаганлар. Набий алайҳиссаломга берилган бу хислат Аллоҳнинг у зотга улуғ инъомидир. Ана шу инъом туфайли Расулуллоҳ кўплаб инсонларнинг иймон билан шарафланишига сабабчи бўлганлар.
Мазкур ҳадис тўлиғича тақво, зуҳд, вараъ ҳақидадир. Уни ўқиб, англаб, Набий алайҳиссалом биз эшита олмаган, кўра олмаган, билмаган нарсаларимизни билишини англаш орқали у зотга меҳримиз, муҳаббатимиз янада ошиб бораверади. Тақводор ва зоҳид бўлиш учун инсон ўта ҳассос, кўпчилик ҳис қилмайдиган нарсаларни ҳис қилиши керак.
Шу билан бирга, “Ҳақиқатан, Биз Қуръонни зикр (эслатма) учун осон қилиб қўйдик. Бас, эслатма олувчи борми?!” (Қамар сураси, 17-, 22-, 32- ва 40-оятлар) оятига мувофиқ Қуръони каримни тадаббур қилишимиз, Раббимиз яратган махлуқотларни тафаккур қилишимиз лозим. Ана шу йўлни тутган баъзи кишилар ўз ибодатлари ва саъй-ҳаракатлари билан муайян даражага эришиши мумкин.
Набий алайҳиссалом: “Албатта, мен сиз кўрмаган нарсаларни кўраман ва сиз эшитмаган нарсаларни эшитаман”, деб ўша нарсалар нима эканини ҳам баён қилмоқдалар: “Осмон ингради ва унинг инграши ҳақ эди”. Осмон худди уловга оғир юк юкланганда, уни кўтаришда қийналиб кучаниб овоз чиқаргандек овоз чиқарди. Осмоннинг инграшига сабаб шуки, “Унга фаришталар тўрт панжа сиғадиган жой ҳам қолдирмай тўлдилар. Ҳаммалари Аллоҳга сажда қилиб пешоналарини қўйдилар”. Шу издиҳом ва оғирлик осмоннинг инграшига сабаб бўлди.
“...Аллоҳга қасам, агар менинг билганимни билганингизда эди, албатта, оз кулиб, кўп йиғлар эдингиз...” Биз Ислом уммати кўп нарсаларни билмаганимиз учун кўп кулиб, оз йиғлаймиз. Аллоҳ таоло Қуръони каримда огоҳлантиради: “Бас, қилган касблари туфайли оз кулиб, кўп йиғласинлар” (Тавба сураси, 82-оят).
“Тўшакларда аёллар билан ишрат қилмаган бўлар эдингиз”. Чунки билмаган нарсаларимизнинг даҳшати бизни бошқача қилиб қўяди. Шу боис ҳою ҳавасни йиғиштириб қўйиб, ҳар бир нарсани меъёрида бажариш лозим. Шундагина “...дашту саҳроларга чиқиб Аллоҳга зорланган бўлардингиз...” сўзига риоя қилиб, Аллоҳ таолодан ўзга паноҳ йўқлигини англаб етамиз.
Фатҳ сурасининг 2-: “(Бу фатҳ) Сиз учун Аллоҳнинг олдинги ва кейинги гуноҳларингизни кечиши... учундир” оятига мувофиқ олдинги ва кейинги гуноҳлари афв этилган бўлса-да, Набий соллаллоҳу алайҳи ва саллам: “Қани эди, кесилиб ташланадиган дарахт бўлсам”, деб орзу қилганлар.
Бундан Пайғамбаримиз алайҳиссалом кўрган ва билган нарсалар жуда даҳшатли экани аёнлашади. Биз буни унутмаслигимиз лозим. Чунки мўмин киши хавф (қўрқув) ва ражо (умид) орасида бўлиши керак. Шунда Аллоҳ таоло ният ва ихлосимизга яраша мақом ва даражаларимизни кўтаради, иншоаллоҳ.
Манбалар асосида
Толибжон НИЗОМ тайёрлади.
Янгиликлар
