Ҳиндистоннинг Керала штатидаги “Сунний маданият маркази”да ҳар йили Пайғамбаримиз соллаллоҳу алайҳи васаллам мавлидлари кенг нишонланади. Юқори даражада ташкил қилинадиган тадбирда бутун дунё уламолари йиғилади, юз минглаб кишилар қатнашади.
Бу йилги анжуманда Устоз Саййид Раҳматуллоҳ домла Термизий қатнашиб, “Одамлар орасида унсу-улфат ҳосил қилиш йўли ва бу борада Пайғамбаримиз соллаллоҳу алайҳи васаллам қандай таълим берганлар” мавзусида маъруза қилади.
Анжуман 13 ноябрь куни соат 14:00 да бошланади. Ушбу тадбирни ҳамюртларимиз онлайн кўриши мумкин.
Эслатиб ўтамиз, жорий йил 16 октябрь куни Ўзбекистон мусулмонлари идораси Тошкент шаҳар Юнусобод тумани бош имом-хатиби, “Мирза Юсуф” жоме масжиди имом-хатиби Саййид Раҳматуллоҳ домла Термизий Россия мусулмонлари диний идораси, Шимолий Кавказ мусулмонлари мувофиқлаштириш маркази раиси, муфтий, шайх Исмоил Бердиев томонидан “Уммат олдидаги хизматлари учун” ордени билан тақдирланган эди.
Ўзбекистон мусулмонлари идораси Матбуот хизмати
