Олдин хабар берганимиздек, бугун, 10 апрель куни Самарқанд вилояти Пахтачи туманидаги “Хўжа Зиёвуддин” жоме масжидининг очилиш маросими бўлиб ўтди. Унда Ўзбекистон мусулмонлари идораси раиси, муфтий Усмонхон Алимов ҳазратлари, Диний идора ишбошқарувчиси Рустам ҳожи Жамилов, Самарқанд вилоят бош имом хатиби Зайниддин домла Эшонқулов, вилоят ҳокими ўринбосари Д.Мамадқулов, Пахтачи тумани ҳокими М.Ҳамдамов ва масжид жамоати иштирок этди. Меҳмонлар аввал масжид янги биноси билан танишди.
Тадбир анъанага кўра Қурони карим тиловати ва хайрли дуолар билан бошланди. Унда Муфтий ҳазратлари йиғилганларни янги жоме ва келаётган Рамазон ойи билан муборакбод этдилар. Ватанимиз ривожи ва халқимиз фаровонлиги йўлида қилинаётган хайрли ишлар ҳақида тўхталиб, тинчлик ва саломатлик неъматининг қадрига етиш кераклиги, соғлиқни сақлаш ходимларининг кўрсатмаларига амал қилиш кераклигини таъкидладилар. Масжиднинг бунёд этилишига бош-қош бўлган мутасадди вакиллар, масжид ҳодимлари, саховатпеша инсонлар, барча ҳиссадорларга ташаккур айтиб, уларнинг ҳақига хайрли дуолар қилдилар.
Шундан сўнг масжиднинг янги биносида йиғилган мўмин-мусулмонлар жамоат бўлиб пешин намозини адо этдилар.
Аллоҳ таоло ушбу масжидни барчага муборакбод айлаб, қиёматга қадар мўмин-мусулмонларга хизмат қилишини насиб этсин!
Ўзбекистон мусулмонлари идораси матбуот хизмати
