Бугун, 10 июнь куни Ўзбекистон мусулмонлари идораси раиси, муфтий Усмонхон Алимов ҳазратлари, Президент маслаҳатчиси Шоазим Минаваров, Дин ишлари бўйича қўмита раиси Содиқжон Тошбоев Бўстон туманидаги “Бурҳониддин Марғилоний” марказий масжидида бўлаётган қурилиш ишлари билан яқиндан танишдилар. Бу ерда хизмат қилаётган ишчиларга бир бош қўй сўйилиб, дуои-хайрлар қилинди. Меҳмонларга Андижон вилояти бош имом-хатиби Мирзамақсуд Алимов ва Диний идора ишбошқарувчиси Рустам Жамилов ҳамрохлик қилмоқда.

Шунингдек, диний соҳа раҳбарлари масжид қурилиши бўйича топшириқ ва тавсияларини бердилар, мўмин-мусулмонларнинг ибодат қилиши, илм-маърифат ҳосил қилиши учун барча шарт-шароитлар ҳозирлаш зарурлигини таъкидладилар.

Муфтий ҳазратларининг суҳбатларидан баҳраманд бўламан, дуоларини оламан, деб келган аҳоли вакиллари билан самимий, дилдан суҳбат қилдилар. Айниқса, уларнинг орасидаги имконияти чекланган болага алоҳида эътибор бериб, илиқ сўзлар билан унинг кўнглини кўтардилар, ҳаққига хайрли дуолар қилдилар. Ҳудуд аҳли ҳам ташрифдан мамнунликлари ва хурсандчиликларини изҳор қилдилар.

Андижон сафари давом этмоқда.

Ўзбекистон мусулмонлари идораси матбуот хизмати