Бугунги кунда Ўзбекистонда туризм соҳасини янада ривожлантириш, зиёрат туризмида фойдаланилмаётган салоҳиятни намоён этиш мамлакатимиз ҳукумати олдида турган асосий масаладир.
Аввалроқ, туризмнинг мамлакатимиз иқтисодиёти учун қай даражада самарали ва фойдали экани ҳақида маълумотларни эълон қилган эдик.
Юртимизнинг зиёрат туризми соҳасидаги салоҳияти бутун мусулмон оламига намоён қилинмоқда. Буни хорижий оммавий аъборот воситаларида Ўзбекистон ва унинг туристик салоҳияти борасида чоп этилаётган хабарлар ва мақолалардан билиб олиш мумкин.
Шундай маълумотлардан бири “Islam-today.ru” нашрида эълон қилинди. Ушбу хабарда Ўзбекистоннинг Россия, Туркия, Малайзия ва Индонезия сингари мамлакатлардаги мусулмонлар учун мўлжалланган сайёҳлик маҳсулотларини ишлаб чиққани айтилган.
Ислом динига эътиқод қилувчилар учун зиёрат туризми йўналишида мусулмон уламоларнинг мақбараларига ташриф буюриш кабиларни таклиф этилаётгани қайд этилган.
Бундан ташқари, Ўзбекистон Республикаси Президенти Шавкат Мирзиёев томонидан Россия ва Ўзбекистоннинг ҳудудлари ўзаро ҳамкорликни ривожлантириши учун имконият яратилгани маълум қилинган.
Амалий ишлар натижаси сифатида эса, Татаристон Республикаси ва Самарқанд вилояти ўртасидаги ҳамкорлик ўрнатилгани келтирилган. Самарқандда Имом ал Бухорийнинг мақбараси жойлашгани қўшимча қилинган.
ЎМИ матбуот хизмати
