Жиноятчилик – инсонларни бир-биридан узоқлаштирадиган, жамият бирдамлигига раҳна солувчи, ривожланишнинг оёғига тушов, ёшларнинг эртасини барбод этувчи иллат.
15 ноябрь куни муҳтарам Президентимиз раислигида ўтказилган видеоселектор ҳам айнан мамлакатимизда ҳуқуқбузарликлар профилактикаси ва жиноятчиликка қарши курашиш борасида белгиланган вазифалар ижроси, бу борада мавжуд муаммолар ва уларни ҳал этишга бағишланган эди.
Йиғилишда Юртбошимиз томонидан жиноятларнинг олдини олишда имом-хатибларга билдирилган ишончни оқлаш мақсадида бугунги кунда ушбу иллатга қарши курашиш борасида ҳар қачонгидан ҳам кўпроқ курашилмоқда. Жойларда аҳоли орасига кириб, уйма-уй юрган ҳолда муаммони барвақт аниқлаш, иллат бўлиб газак олмасидан бартараф этиш бўйича қатор ишлар амалга ошириб келиняпти.
Самарқанд вилояти бош имом-хатиби Зайниддин Эшонқулов, ўринбосарлар, вакиллик ходимлари ва имом-хатиблар жойлардаги масъуллар билан биргаликда, айнан, ижтимоий оғир аҳволдаги, нотинч, турли муаммолар исканжасида қолган оилаларни аниқлаб, улар билан ўрганиш ишларини олиб бормоқдалар. Ҳар бир имом-хатиб масжид ҳудудидаги маҳаллалар раислари билан биргаликда бу борада махсус режалар ишлаб чиқмоқда. Ўтган ҳафта давомида 100 дан зиёд хонадонларга кириб, аксариятининг ижобий ҳал этилишига эришилди.
Ўрганишлар натижасида мерос масаласида келиша олмаётган туғишганлар, эр-хотин, қайнона-келин, қўни-қўшнилар орасидаги можаролар ислоҳ этиб бориляпти. Тайинли иши йўқ, ичкиликка рўжу қўйган, жиноят қилиш эҳтимоли борларга алоҳида эътибор қаратиляпти.
Ўз жонига қасд қилишга урунганлар билан суҳбат асносида уларнинг руҳий кечинмалари, қалб изтироблари тингланиб, ушбу жирканч ишга ундаган сабаблар ахтариляпти. Руҳий-маънавий озуқа бериш орқали иродасини мустаҳкамлаб олишига кўмаклашиляпти.
Таъкидлаш лозимки, уйма-уй юрган ҳолда олиб борилаётган ўрганиш ишлари ижобий натижа бермоқда ва талай муаммоларни аниқлаб, уларни бартараф этиш чоралари кўрилмоқда.
“Менинг маҳалламда жиноят содир бўлмаслиги керак” деган шиор бош мақсадимизга айланган.
Ўзбекистон мусулмонлари идорасининг
Самарқанд вилояти вакиллиги
