Жорий йилнинг 13 январь куни диний идорада “Ўзбекистон қуръон мусобақаси-2018” ташкилий ишлари борасида мажлис бўлиб ўтди. Унда Қуръон мусобақасини ўтказиш бўйича ташкилий қўмита раиси Абдулҳаким қори Матқулов, қўмита раиси ўринбосари Ҳасанхон қори Абдулмажидов, қўмита аъзолари ва Қуръон мусобақаси ҳакамлар ҳайъати иштирок этишди.
Мажлисни ташкилий қўмита раиси А.Матқулов кириш сўзи билан очиб, вилоятлардаги тайёргарлик жараёнларни янада жадаллаштириш, ҳар бир ҳудудга бириктирилган ташкилий қўмита аъзолари ва ҳакамларни жойларга ўз вақтида етиб боришлари ва ишларига талабчанлик билан ёндошишларини таъкидлади.
Сўнгра қўмита раиси ўринбосари Ҳ. Абдулмажидов қўмита аъзолари ва ҳакамларни белгиланган ҳудудларга тақсимотини эълон қилди.
Ҳакамларга иштирокчиларнинг балларини ҳисоблаб бориш учун алоҳида ходимлар бириктирилди. Қуръон мусобақасининг туман-шаҳар босқичи очилиш маросими Жиззах вилояти Зомин туманидаги “Маърифатли” жомеъ масжидида ўтказилиши, ундаги тадбир жараёни ҳақида маълумот берилди ва очилиш маросимида қатнашиш учун “зийнат” қорилар танлаб олинди.
ЎМИ Матбуот хизмати
