Икки кундирки юртимизда катта байрам тантанаси давом этаётир. Кеча муҳташам пойтахтимизнинг Талабалар шаҳарчасидаги “Ёшлар маркази”да Ўзбекистон Қуръон мусобақасининг Республика босқичи бошланади. Каломи шарифнинг тиловати шарофати ила Аллоҳ таоло юртимиз узра ёғдириб турган раҳмати ва баракотини янада зиёда қилаётир.
Буни билган биляпти, билмаган билмаяпти. Аммо марҳамати кенг Парвардигоримиз ана ўша билмаганларнинг боши узра ҳам файзу баракотларни билганларни – Қуръонга ошиқ қалбларни сабабчи қилиб сероб қилиб қўймоқда.
Кеча Ўзбекистон мусулмонлари идораси раиси, муфтий ҳазратлари Усмонхон Алимов мусобақанинг очилиш маросимида сўзлаган нутқида таъкидлаганидек, “Юртимиз узра яхшиликлар, илоҳий раҳматлар ёғилиб турган дамларда Сиз азизлар билан Ўзбекистон Қуръон мусобақаси Республика босқичининг очилиш маросимида жамланиб турибмиз. Ушбу мусобақанинг якуний босқичи «Расулуллоҳ ойи» дея таъриф берилган Шаъбон ойида бўлиб ўтишида ҳам ўзига хос ҳикмат бор. Чунки бу ой Қуръон нозил бўлган ойга тайёргарлик кўриш, Каломуллоҳни кўпроқ тиловат қилиш, такрорлаш ойи ҳисобланади. Бу эса, албатта, мусобақа файзига файз қўшади, иншоаллоҳ”.
Дарҳақиқат, Қуръон мусобақаси Республика босиқичининг айни кунларга тўғрилаб ўтказилиши, Пайғамбаримиз ойи саналган шаъбон ойи киришига тўғрилаб ўтказилиши тасофидий ҳодиса эмас, балки Ўзбекистон мусулмонлари идораси қарори ва бошқа ташкилотчиларнинг қўллаб-қувватлаши ила муқаддас рамазон ойига тайёргарлик ойи саналувчи шаъбон ойига – Каломуллоҳни кўпроқ тиловат қилиш, такрорлаш ойига тўғриланган.
Бунинг яна бир ҳикмати шундаки, қишнинг чилласида бошланган мусобақада бутун республикамиз бўйлаб Қуръони каримни бехато ўқийдиган энг кучли қорилар танлаб олинди. Бугунги мусобақада тиловат қилаётган қориларнинг тажвиди тўғри, тартиласи жойида, тиловати гўзал, овози ёқимли. Улар тиловат қилганда тинглаган кишининг руҳи юксалади, аъзойи бадани ором олади. Шаъбон ойига ана шундай ажойиб қорилар танлаб олиниб, уларнинг яна қаерда денг, толиби илмлар маскани бўлган Талабалар шаҳарчасида ўтказилиши олдиндан донишмандлик ила қабул қилинган қарор асосида бўлмоқда ва ушбу тиловатларга сомеъ бўлганлар ҳам катта-катта ажру савоблар олмоқда.
ЎМИ Матбуот хизмати
