Мисрнинг "Ал-Хабар ал-Ёвм" ("Кун янгиликлари") газетаси "АҚШ Давлат департаменти Ўзбекистонни диний эркинликни бузган давлатлар рўйхатидан чиқариб ташлади" сарлавҳаси остида мақола чоп этди, деб хабар бермоқда "Дунё"ахборот агентлиги.
Мақола муаллифи-мисрлик журналист Фотима Бадавийнинг хабар беришича, жорий йил 7 декабрь куни Америка Қўшма Штатлари Давлат департаментининг расмий баёноти эълон қилинди. Унга кўра Давлат котиби Майкл Помпео Ўзбекистонни диний эркинликлар соҳасидаги “Махсус назорат рўйхати”дан чиқарди ва шу орқали мамлакат эътиқод эркинлигини таъминлаш соҳасида улкан ўсишга эришганини эътироф этди.
Ўзбекистон эндиликда дин эркинлиги тўлиқ таъминланадиган мамлакат сифатида баҳоланади.
Давлат департаментининг қарори асосий қонун – Конституциямиз қабул қилинганлигининг 28 йиллиги билан бир кунга тўғри келганлиги ҳам чуқур рамзий маънога эга. Бу Президент Шавкат Мирзиёев бошлаб берган фуқароларнинг ҳуқуқ ва эркинликларини таъминлаш ҳамда миллатлараро ва конфессиялараро тотувликни мустаҳкамлашга йўналтирилган чуқур демократик ислоҳотларнинг тан олинишидир.
Майкл Помпео ўз баёнотида Ўзбекистон ҳукуматининг сўнгги йилда эришган “улкан ва аниқ ўсиши” натижасида мамлакатимизнинг “Махсус назорат рўйхати”дан чиқарилганлигини қайд этди.
АҚШнинг Халқаро диний эркинликлар соҳасидаги махсус топшириқлар бўйича элчиси Сэм Браунбек Давлат котибининг қарори Президент Шавкат Мирзиёевнинг эътиқод эркинлигини таъминлаш соҳасидаги мустаҳкам иродаси, унинг бевосита раҳбарлигида амалга оширилган кенг кўламли фаолият, ўзгаришлар ва ислоҳотларнинг натижаси эканлигини таъкидлади, қайд этади газета.

Ўзбекистон мусулмонлари идораси матбуот хизмати

ЎМИ матбуот хизмати

— Бир ёшли ва уч ёшли фарзандларим бор. Улар асосан қорни билан ухлашади. Уйғоқ пайтларида ҳам қорни билан ётишади. Бу мумкин эмаслигини ўқиганман. Албатта, болаларни тўғри ётқизишга ҳаракат қиламан, лекин барибир шундай ётишяпти. Нима қилсам бўлади?

— Динимиз қорин билан ётишдан қайтаришини фарзандларингизга аста-секин ўргатиб боринг. Тихфатул Ғифорий розияллоҳу анҳу айтадилар: “Расулуллоҳ соллаллоҳу алайҳи васаллам масжидда чалқанча ҳолатда ухлаб ётганимни кўриб қолдилар. Оёқлари билан туртиб: “Бу уйқу нимаси?! Буни Аллоҳ ёмон кўради”, дедилар” (Имом Ибн Можа ривояти).

Қолаверса, бундай ётиш инсон саломатлиги учун ҳам зарар бўлиб, буни дунё мутахассислари илмий исботладилар. Юзтубан ухлашда инсон кўкрак қафаси тўлиқ нафас ололмайди. Бўйин мушаклари мускулга айланиши оқибатида қон томирлари шикастланади. Бел қисмининг эгилиши ички органларга кучли босим ўтказади.

Муҳаммад Айюб ҲОМИДОВ

Шу йилнинг 12 декабр куни Нукус Муҳаммад ибн Аҳмад ал-Беруний ўрта махсус билим юртида билим юрти талабалари ўртасида «Фақиҳлар билимдони» беллашуви бўлиб ўтди.

Унда билим юрти талабаларидан ташкил топган «Ансорийлар», «Ҳилол», «Мужтаҳидлар», «Аҳли сунна», «Фақиҳлар» жамоалари қатнашиб, ўз билимларини синовдан ўтказишди.

Ҳар бир хайрли иш Қуръон тиловати билан бошлангани каби, ушбу тадбир ҳам Қуръони карим тиловати билан бошланди ва хайрли дуолар қилинди.

Беллашув учта шартдан иборат бўлиб, унда қатнашувчи жамоалар ўзларига берилган саволларга аниқ ва тўғри жавоб беришлари керак эди. Жамоаларнинг иштироки саволларга берилган жавоблар бўйича ҳакамлар ҳайъати томонидан баҳолаб борилди.

Бугунги беллашув давомида қобилиятли талабалар томонидан гўзал саловат ва нашидлар ижро этилди.

Шунингдек, тадбир давомида қисқа – блиц савол-жавоб ўйинлари ўтказилиб борди ва энг кўп тўғри жавоб эгалари кимматбаҳо совғалар ва китоблар билан тақдирланди.

Беллашув якунига кўра тўртинчи босқич талабаларидан ташкил топган «Мужтаҳидлар» жамоаси биринчи, «Ҳилол» жамоаси иккинчи, «Ансорийлар» жамоаси учинчи ўринни эгаллади. Ғолиб жамоаларга билим юрти томонидан тайёрланган фахрий ёрлиқ ва совғалар топширилди. Шунингдек, ўзларининг фаол иштироки билан кўзга кўринган талабаларга ҳам эсдалик совғалари топширилди.

Тадбир сўнгида билим юрти устозлари талабалар ҳаққига дуо қилар экан, илмлари бундан ҳам зиёда бўлишини, илм олишдан ҳеч қачон чарчамаслигини ва тўхтамаслигини тилади. Биз ҳам илмингиз бундан ҳам зиёда бўлсин, деб қоламиз ҳурматли талабалар!

Билим юрти маънавият ва маърифат

ишлари бўйича мудир ўринбосари

Адилбай Ережепов