Аллоҳ таоло жуда кўп неъматларни биз бандалар учун яратди. Неъматларнинг баъзиларини тановул қилсак, баъзиларини кўриб қувонамиз. Яна баъзилари оғиримизни енгил қилса, бошқалари узоғимизни яқин қилади. Аллоҳ таоло Ўз каломи шарифида марҳамат қили:

وَالْخَيْلَ وَالْبِغَالَ وَالْحَمِيرَ لِتَرْكَبُوهَا وَزِينَةً وَيَخْلُقُ مَا لَا تَعْلَمُونَ 

 Ушбу ояти каримада Аллоҳ таоло инсонларга минишлари учун ҳайвон уловларни яратганини билдирганидан сўнг инсонлар билмайдиган нарсаларни яъни уловларни яратишини маълум қилди. Муфассир уламоларимиз оятдаги бу қисмни шундай тафсир қилганлар:

“Бу оят ҳозирги кунимиздаги сув, ҳаво ва қуруқликдаги транспорт воситаларининг яратилишига ишорадир. Негаки, ўша транспорт воситаларини ихтиро қилиш Аллоҳ таолонинг инсонларга берган имконияти, ақл-заковат ва куч-қудрати билан  амалга ошган, Аллоҳ таолонинг ўзи инсонларни мана шу ишга муваффақ айлаган. Аллоҳ  таоло бу борада Ўз каломи шарифида шундай марҳамат қилади:

 وَاللَّهُ خَلَقَكُمْ وَمَا تَعْمَلُونَ 

“Ҳолбуки, сизларниҳам, сиғинаётган бутларингизни ҳам Аллоҳ яратган-ку?!” (Соффат сураси, 96 оят).

Шундан келиб чиқиб, инсонлар қўли билан ясалганига қарамай, еру кўкдаги барча транспорт воситалари Аллоҳ таолонинг инсонларга берган улкан неъмати деб  айта оламиз.

Ҳар бир неъматнинг масъулияти бўлганидек, транспорт воситаларидан фойдаланишда ҳам ўзига яраша масъулиятли жиҳатлар мавжуд. Биринчи навбатда ўша транспортдан фойдаланиш борасидаги илмларни мукаммал эгаллаш муҳим. Кейинги ўринларда эса мазкур неъматнинг шукри, уни яхши ишларга сафарбар қилиш каби мезонлар туради.

Ҳар яхшининг бир ёмони бор деганларидек, бугунги кунимизда мана шу транспорт воситалари иштирокида кўплаб кишиларнинг ҳаётига якун ясаётган ҳалокатлар ҳақида эшитяпмиз, баъзида  ўзимиз ҳам ўшандай ҳодисаларнинг гувоҳи бўлаяпмиз.

Бундай фалокатларнинг аксар қисми биз юқорида айтган масъулиятларни ҳамда йўл ва унга боғлиқ одоб-ахлоқ ҳамда қонун-қоидаларни  билмаслик, йўл транспорт воситаларидан нотўғри фойдаланиш, қонун-қоидаларга риоя қилмаслик оқибатида келиб чиқмоқда, десак хато қилмаган бўламиз.

Баъзида одамлар орасида йўл ҳаракати қоидаларига риоя қилиш динимизда йўқ, фақат Қуръон ва суннатдаги ҳукмларга бўйсуниш керак холос, бошқасига амал қилинмайди, деганини эшитиб қоламиз. Улар бу гапларни қайси диний асосга кўра айтаётганидан ҳайрон қоласан киши. Уларнинг йўл-ҳаракат қоидаларига амал қилмаслигининг ўзи ҳам динимиздаги буйруқларга итоат этмаслигининг нишонидир. Биринчидан, улар йўл-ҳаракат қоидаларига риоя қилмаслиги оқибатида аввало ўзларининг ҳаётига хавф туғилади. Бу борада Қуръони каримда:

...وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ  

“...ва ўз қўлларингиз билан ўзларингизни ҳалокатга ташламангиз!..”  (Бақара сураси, 195 оят) деб буюрилган. Иккинчидан, бошқаларнинг ҳаётига хавф туғдиради, бировларнинг умрига зомин бўлиши мумкин. Инсонларнинг жонини эса динимиз ҳимоя қилган. Аллоҳ таоло ўз каломи шарифида бошқаларни умрига зомин бўлганларга нисбатан шундай оят нозил қилган:

مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَنْ قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ...

“...Бирор жонни ўлдирмаган ёки Ерда (бузғунчилик ва қароқчилик каби) фасод ишларини қилмаган инсонни ўлдирган одам худди ҳамма одамларни ўлдирган кабидир. Унга ҳаёт бахш этган (ўлимдан қутқариб қолган) одам эса барча одамларни тирилтирган кабидир...” (Моида сураси, 32 оят).

Йўл-ҳаракат қоидаларга амал қилмаслик “иш боши” яъни бошлиқларга ҳам итоат қилмасликдир. Бу эса Аллоҳ таолонинг:

 يَا أَيُّهَا الَّذِينَ آَمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ ... 

“Эй, имон келтирганлар! Аллоҳга итоат этингиз, Пайғамбарга ва ўзларингиздан (бўлмиш) бошлиқларга итоат этингиз!..” (Нисо сураси, 59) оятига тескаридир.

Бундан ташқари, динимизда йўл борасида алоҳида кўрсатмалар мавжуд. Ўша кўрсатмалар асоси Расулуллоҳ соллаллоҳу алайҳи васалламнинг қуйидаги ҳадиси шарифларида жамланган:

Абу Саъид Худрий розияллоҳу анҳудан ривоят қилинади: “Расулуллоҳ соллаллоҳу алайҳи васаллам: “Йўлда ўтиришдан сақланинглар”, дедилар. Шунда саҳобаи киромлар: “Ё, Расулуллоҳ, бизни бундан бошқа суҳбатлашиб ўтирадиган жойимиз йўқ”, дедилар. Расулуллоҳ соллаллоҳу алайҳи васаллам: “Агар йўлни танласангиз унинг ҳаққини адо этиб қўйинглар!”, дедилар. Саҳобаи киромлар: “Эй, Аллоҳнинг Росули, йўлнинг ҳаққи нима?”дедилар. Расулуллоҳсоллаллоҳу алайҳи васаллам: “Кўзни юмиш, озор беришдан тийилиш, саломга алик олиш ва яхшиликка буюриб, ёмонликдан қайтариш”, деб жавоб бердилар (Имом Бухорий ривояти).

Уламоларимиз ҳам транспорт воситаларини ҳайдовчи мусулмонларга йўл билан боғлиқ бир қанча одоб-ахлоқ ва кўрсатмалар бериб ўтганлар. Энди, ўша кўрсатмаларга назар солсак.

Аввало, ҳайдовчи киши Аллоҳ таоло буюрган нарсаларни қилиш, қайтарган ишлардан сақланиш ила Аллоҳга тақво қилмоғи лозим. Зеро, барча ишлар тақво туфайли гўзал хотима топади. Қийинчиликлардан чиқиш йўли ҳам, енгиллик сабаби ҳам тақво билан бўлади. Аллоҳ таоло бу борада Қуръони каримда шундай деб ваъда беради:

وَمَنْ يَتَّقِ اللَّهَ يَجْعَلْ لَهُ مَخْرَجًا 

“...Кимки Аллоҳга тақво қилса, У унга (ташвишлардан) чиқиш йўлини (пайдо) қилур”(Талоқ сураси, 2 оят).

وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًا

“...Кимки Аллоҳга тақво қилса, (Аллоҳ) унинг ишини осон қилур”. (Талоқ сураси, 4 оят).

Иккинчидан, уловни минаётганда ёки уйдан чиқаётганда тақдирга Аллоҳдан эканини ҳис қилиб, кучли таваккал қилиш. Чунки ким Аллоҳга таваккал қилса Аллоҳнинг ўзи унга ёрдам беришда етарлидир. Сабабларни ҳам қилиб қўйишлик гўзал таваккалнинг аломатидир. Анас ибн Молик розияллоҳу анҳудан ривоят қилинган ҳадиси шарифда Расулуллоҳ соллаллоҳу алайҳи васаллам марҳамат қиладилар:

“Агар бирор киши уйидан чиқаётганда “бисмиллаҳи таваккалту ъалаллоҳи, ла ҳавла ва ла қуввата илла биллаҳ” деб айтса бир фаришта у учун “ҳидоят қилиндинг, кифоя қилиндинг, ҳимоя қилиндинг” дейди. Шайтон ундан қочиб кетади. Шунда бошқа шайтон у(шайтонга) қараб: қандайқилиб сенга ҳидоят қилинган, кифоя қилинган ва ҳимоя қилинган киши (томон)га  йўл бўлсин, дейди” (Абу Довуд ривояти.)

Учинчидан, уловга минишда ва сафарга чиқишда албатта, дуоларини доимо ўқиб юришлик. Мазкур дуолар сабабли улуғ баракотлар бўлади, бироқ буни кўпчилик ҳайдовчилар билмайдилар.

Тўртинчидан, ҳайдовчилик вақтида ҳаром қилинган ишлар, шаҳватни қўзғатадиган турли мусиқалар, спиртли ичимликлар ичишдан сақланиш лозим. Чунки бу гуноҳлар Аллоҳ таолонинг ҳимоясидан узоқлаштиради, Унинг азобини тезлаштиради. Аллоҳ таоло Ўз каломи шарифида инсонларни  гуноҳлари туфайли тутишни қуйидагича баён қилган:

 فَكُلًّا أَخَذْنَا بِذَنْبِهِ ...

“Биз (уларнинг) ҳар бирини ўз гуноҳи билан тутдик...” (Анкабут сураси, 40 оят).

Бешинчидан, бомдод намозини жамоат билан адо қилишлик. Банда бу иши билан Аллоҳнинг зиммасига ўтади. Зеро, ҳадиси шарифда “Ким бомдод намозини жамоат билан адо қилса, у Аллоҳнинг зиммасида бўлади”, деб бежизга айтилмаган.

Олтинчидан, “Зуҳо” намозини ҳам ўқиб юриш. Чунки, Аллоҳ таоло  мазкур намозни адо қилган кишини сақлашни ҳадиси қудсийда қуйидагича ваъда қилган:

“Эй одам боласи, куннинг аввалида тўрт ракаат (намозни адо қилишдан) ожиз қолма!(Агар шуни қилсанг) куннинг охиригача сенга Ўзим кифоя қиламан”.

Еттинчидан, мусулмон кишининг қони, моли ҳаром қилинганини доимо ёдда сақлаб туриш, бировга озор бериб қўйишдан сақланиш.

Саккизинчидан, миниб юрган уловининг ҳам Аллоҳ таолонинг неъмати эканини ёдда тутиш, унинг шукрини адо қилиш.

Тўққизинчидан, уловни минишдан ёки у билан сафарга чиқишдан олдин яхшилаб текшириб, кўздан кечирмоқ . Бу шаръан матлуб сабабларни қилиш ҳисобланади.

Ўнинчидан, ҳайдовчилик, йўл-ҳаракати қонун-қоидалари ва илмларига қатъий риоя қилмоқ. Чунки бунда мусулмонларга кўплаб фойдали жиҳатлари ҳам мавжуд.     

Мазкур кўрсатмалар ҳар бир мусулмон киши билиши, амал қилиши керак бўлган билимларнинг асосийлари холос. Бундан ташқари, яна бир қанча йўлда ҳаракатланишга доир динимиз тақозо этадиган  одоб-ахлоқ қоидалари бўлиб, ҳайдовчиларнинг аксари буларни билишади.

Кимда ким ўз улови бировнинг ҳаётига якун ясовчи қуролга айланишини, у сабаб оилалар бошлиқсиз, аёллар эрсиз, болалар ота-онасиз, ота-оналар фарзандсиз қолишини хоҳламаса, йўл ҳаракати қоидаларини яхши билмоғи, энг асосийси ўша билим ва кўникмаларига амал қилмоғи лозим.

Аллоҳ таоло барчаларимизни Ўзининг тўғри йўлига ҳидоят қилиб, доимо бошқаларга манфаати етадиган инсонлардан айласин.

Жалолиддин Ҳамроқулов,

Тошкент ислом институти

 “Таҳфизул Қуръон” кафедраси мудири

Викинглар даврига тааллуқли қабристонда тадқиқот олиб бораётган швециялик олимлар “Аллоҳ” ва “Али” исмлари ёзилган кийимларни топишди.

“Викинглар Исломнинг жаннатдаги абадий ҳаёт тушунчасидан таъсирланган бўлса керак”, дейди Упсала университети тадқиқотчиси Аника Ларсон. 

Кўфийда ёзилган ушбу сўзлар Швециянинг тарихий Бирка шаҳридаги викинглар қабристонидан топилди. Улар қайиқ қабр ва ёпиқ қабрдаги ипак либосларга битилган экан.

“Қуръони каримда “Жаннат аҳллари ипак либослар кияди” деб айтилган. Айнан ана шу ҳақиқат викинглар даврида ипак либосларнинг кенг тарқалишига сабаб бўлган деб тахмин қилинмоқда”, дея гапини давом эттирди тадқиқотчи.   

Университет хабарида “Шунга ўхшаш куфий ёзувлар Марказий Осиёдаги қабр тошларидан ҳам топилган”,  дейилади.

Эслатиб ўтамиз, 2015 йил Стокгольм университети  тадқиқотчилари викинглар қабридан IX асрга оид узук топган эди ва узукда “Аллоҳ учун” деган ёзув бор эди.  

Викингларнинг машҳур савдо шаҳри – Биркадан узук ва “Аллоҳ” ва “Али” сўзлари битилган ипак буюмлар Швеция ва Ислом тамаддуни ўртасида дўстона муносабатлар бўлганидан дарак беради. 

Хабар The Muslim News сайтидан олинди.

Таржимон Алишер САТТОРОВ

Эроннинг илм, тадқиқот ва технология ишлари вазири ўринбосари Абдул Ҳусайн Фарайдун Эрон Ислом Республикаси илм-фан ривожланиши поғонасида 18-ўринни эгаллаб турганини айтди.

 “Ҳозирда Эронда 235 дан ортиқ хорижий давлатлар билан қўшма корхоналар доирасида фундаментал илмий лойиҳалар амалга оширилмоқда”, - деди Абдул Ҳусайн Фарайдун. Шунингдек, Абдул Ҳусайн Эрондаги илмий-технологик ташкилотларнинг бугунги кундаги фаолияти борасида 39 та илмий-технологик боғлар фаолият юритаётганини ва уларнинг маҳсулотлари мамлакатга 215 миллион АҚШ доллари миқдорида фойда келтираётганини таъкидлади.

Эрон нанотехнология соҳасида ҳам сезиларли ютуқларга эришди. Ферейдуннинг айтишича, нанотехнологияларни ишлаб чиқиш борасида Эрон Ислом Республикаси жаҳон миқёсида 6 ўринга чиққан. 

Моҳира Зуфарова

Халқаро алоқалар бўлими

Бугун Ўзбекистон мусулмонлари идорасида Президент Шавкат Мирзиёевнинг Бирлашган Миллатлар Ташкилоти Бош Ассамблеясида сўзлаган нутқига бағишланган анжуман бўлиб ўтди.

Унда Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси, Ислом академияси, Ислом цивилизация маркази, “Мовароуннаҳр” нашриёти ходимлари, Тошкент ислом институти, “Кўкалдош” ўрта махсус ислом билим юрти, “Хадичаи Кубро” аёл-қизлар ўрта махсус ислом билим юрти ўқитувчилари ва талабалари ҳамда оммавий ахборот воситалари вакиллари иштирок этди.

Анжуманда Ўзбекистон мусулмонлари идораси раиси, муфтий Усмонхон Алимов нутқ сўзлади:

Бисмиллоҳир Роҳманир Роҳийм.

– Муҳтарам Президентимизнинг БМТ Бош Ассамблеясида сўзлаган нутқини кенг жамоатчилик қизғин муҳокама қилмоқда. Ушбу маърузада дунёнинг ўткир муаммолари бўлган глобал масалаларга эътибор қаратилди. Муаммолар ечими юзасидан билдирилган аниқ, ҳаётий таклифларни сессия иштирокчилари якдиллик билан қўллаб-қувватлади.

Ушбу тарихий нутқда алоҳида эътибор берилган масалалардан бири – ислом маърифати масаласи бўлди. Юртбошимиз нуфузли минбардан туриб, қуйидаги муҳим ташаббусни илгари сурдилар: «Бугунги сессия иштирокчиларига БМТ Бош Ассамблеясининг «Маърифат ва диний бағрикенглик» деб номланган махсус резолюциясини қабул қилиш таклифи билан мурожаат қилмоқчиман. Бу ҳужжатнинг асосий мақсади – барчанинг таълим олиш ҳуқуқини таъминлашга, саводсизлик ва жаҳолатга барҳам беришга кўмаклашишдан иборат».

Динимизнинг мўътабар манбаларида маърифатли бўлиш ҳақида кўплаб ривоятлар келган. Жумладан, ҳазрати Пайғамбаримиз Муҳаммад Мустафо соллаллоҳу алайҳи васаллам бундай марҳамат қилганлар:

"مَن أَرَادَ الدَّنيَا فَلِيَتَّجِرْ وَ مَن أَرَادَ الآخِرَةَ فَلِيَتَزَهَّدْ وَ مَن أَرَادَهُمَا فَلِيَتَعَلَّمْ

яъни, “Ким дунёни хоҳласа тижорат қилсин, кимки охиратни хоҳласа зоҳид бўлсин ва кимки иккисини ҳам хоҳласа илм олсин”.

Яна бир ҳадиси шарифда, Набий соллаллоҳу алайҳи васаллам:

"إِنَّ اللَّهَ وَمَلائِكَتَهُ وَأَهْلَ السَّمَوَاتِ وَالأَرْضِ حَتَّى النَّمْلَةَ فِي جُحْرِهَا وَحَتَّى الْحُوتُ فِي الْبَحْرِ لَيُصَلُّونَ عَلَى مُعَلِّمِ النَّاسِ الْخَيْرَ"

яъни, “Албатта, Аллоҳ таоло, Унинг фаришталари, осмонлару ер аҳли, уясидаги чумоли,  ҳаттоки, денгиздаги балиқ ҳам одамларга яхшиликни таълим берувчи олимга салавот айтадилар” (Имом Термизий ривояти).

Муҳтарам Президентимиз ўз нутқида муборак Ислом динимизнинг асл инсонпарварлик моҳиятини жаҳон афкор оммасига етказиш олдимизда турган муҳим вазифа эканини алоҳида қайд этдилар. Шунингдек, Давлатимиз раҳбари аслида Ислом дини эзгулик ва тинчликка, асл инсоний фазилатларга риоя этишга даъват этишини алоҳида таъкидлар экан, жумладан, шундай дедилар: «Биз бутун жаҳон жамоатчилигига Ислом динининг асл инсонпарварлик моҳиятини етказишни энг муҳим вазифа, деб ҳисоблаймиз. Биз муқаддас динимизни азалий қадриятларимиз мужассамлигининг ифодаси сифатида беҳад қадрлаймиз. Биз муқаддас динимизни зўравонлик ва қон тўкиш билан бир қаторга қўядиганларни қатъий қоралаймиз ва улар билан ҳеч қачон муроса қила олмаймиз. Ислом дини бизни эзгулик ва тинчликка, асл инсоний фазилатларни асраб-авайлашга даъват этади”.

Нутққа хорижий мамлакатларнинг кўплаб таниқли вакиллари ўз муносабатларини билдирмоқда. Жумладан, Латвия Фанлар академияси Иқтисодиёт илмий-тадқиқот институти директори Нина Линде хоним шундай деган: “Ўзбекистон етакчисининг мазкур нутқини катта қизиқиш билан ўқиб чиқдим. Ўзбекистон неча-неча асрлар давомида анъанавий, инсонпарвар ҳамда бағрикенг исломнинг маркази бўлиб келган. Шу боис Шавкат Мирзиёевнинг ислом динининг асл қадриятлари халқаро ҳамжамият томонидан теран англаниши муҳимлиги ҳақидаги таклифлари мутлақо мантиқлидир.

Бу ислом динига нисбатан сабрли ва ҳурматда бўлиш, Европа жамоатчилигини бир қолипдаги қарашлардан халос этишга кўмаклашиш имконини берган бўлур эди”.

Малайзия Ислом цивилизацияси институти директори Моҳд Юсуф Усмон эса бундай дейди: “Бугунги кунда турли бузғунчи кучлар одамлар онгини заҳарлашнинг кўп қиррали услубларидан кенг фойдаланмоқдаки, бунда улар ҳар бир инсон учун муқаддас бўлган динни ниқоб қилишдан ҳам тап тортишмаётир. Бундай вазият, аксарият ҳолларда, мусулмон бўлмаган мамлакатлар вакилларининг ҳақиқий ислом қадриятларини тўла тушунмаслигига олиб келаётгани баробарида, ислом динига асоссиз маломатлар ёғилишига ҳам сабаб бўляпти. Шу нуқтаи назардан, Ўзбекистон Президенти Шавкат Мирзиёевнинг бу муқаддас динни зўравонлик ва хунрезлик билан бир қаторга қўймаслик зарурлиги, исломнинг асл инсонпарварлик моҳиятини жаҳон жамоатчилигига етказиш тўғрисидаги даъватлари жуда долзарбдир”.

Дарҳақиқат, ана шундай мураккаб бир шароитда муҳтарам Президентимиз дунёнинг энг юксак минбарида туриб Ислом динининг асл моҳияти инсонпарварлик ва тинчлик экани, уни қораловчилар билан ҳеч қачон муроса қилинмаслигини баралла айтиши мустаҳкам эътиқод, катта шижоат, чинакам жасоратдир. Буни кўплаб давлатлар раҳбарлари ҳам, нуфузли сиёсатчилар ҳам эътироф этмоқда. Дунёда, айниқса, мусулмон оламида Ўзбекистоннинг дўстлари янада кўпаймоқда.

Ўрни келганда айтиб ўтиш керакки, муҳтарам Президентимиз ҳар бир чиқишларида “Жаҳолатга қарши маърифат билан курашиш” шиорини илгари суриб, олимларнинг кўпайиши жуда ҳам фазилатли ҳодиса эканини таъкидлаб келадилар. Ана ўша фикрларини умумлаштириб, юқори минбардан туриб, барчанинг таълим олиш ҳуқуқини таъминлашга, саводсизлик ва жаҳолатга барҳам беришга кўмаклашадиган “Маърифат ва диний бағрикенглик” борасида махсус ҳужжат қабул қилиш зарурлигини баралла айтиб ўтдилар.

Дарҳақиқат, динимиз манбарларида, хусусан, ҳазрати Пайғамбаримиз Муҳаммад Мустафо соллаллоҳу алайҳи васалламнинг муборак ҳадиси шарифларида ҳам олимнинг ҳатто обиддан ҳам афзаллиги тўғрисида ривоятлар келган. Жумладан, Абу Дардо розияллоҳу анҳудан ривоят қилинган ҳадисда Пайғамбар соллаллоҳу алайҳи васаллам: 

«Ким илм талаб қилиш йўлига юрса, Аллоҳ унга жаннат йўлини осон қилиб қўяди. Албатта, фаришталар толиби илмни рози қилиш учун қанотларини қўяди. Албатта, олимга осмондаги мавжудотлар, ердаги мавжудотлар, ҳатто сувдаги балиқлар ҳам истиғфор айтади. Олимнинг обиддан фазли ҳудди тўлин ойнинг бошқа юлдузлардан фазлига ўхшайди. Албатта, олимлар пайғамбарларнинг меросхўрларидир. Албатта, пайғамбарлар динорни ҳам, дирҳамни ҳам мерос қолдирмаганлар. Албатта, улар илмни мерос қолдирганлар. Ким ўшани олса улуғ насибани олибди», деганлар» (Абу Довуд ва Термизий ривояти).

Президентимиз нутқи якунлангандан кейин залда ўтирганларнинг олқишлари хийла вақт давом этди. Кўплаб давлат раҳбарлари муҳтарам Президентимизни табриклаб, ўз фикрларини билдирди. Хусусан, Туркия президенти Ражаб Тойиб Эрдўған ҳеч ким ислом динининг қадриятларини бу қадар жасорат билан ҳимоя қилмагани, ҳеч қачон Имом Бухорийдек улуғ алломанинг номини тилга олмаганини алоҳида таъкидлаб, таҳсинлар айтди.

Мисрнинг “Ал-Вафд” газетасида “Ўзбекистон Президенти БМТ минбаридан туриб ёшлар ҳақида ташаббус билан чиқди” сарлавҳали катта мақоласини эълон қилди. Унда Ўзбекистон Президенти БМТнинг йиғинида ёшлар ҳуқуқини таъминлаш хусусида қонунни ишлаб чиқиш борасидаги таклифига юқори баҳо берилган. Шунингдек, ҳозирда ёшлар учун мос бўлган шароитларни яратиш ва экстремистик ғоялар қаршисида тўсиқ қўйиш жуда ҳам аҳамиятли иш экани таъкидланган. Бу нарсага эришишнинг бирдан бир йўли, ёш авлодни қўллаб-қувватлаш ва ҳақ-ҳуқуқларини ҳимоя қилиш экани таъкидланган.

“Аш-Шарқул ал-Авсат” ахборот агентлигининг хабарида, дунёда террорга қарши куч ишлатиш унчалик манфаат бермаётгани таъкидланган. Ўз навбатида Ўзбекистон бу борада фаол иш олиб бориб, тинч йўл билан яъни, маърифат билан кураш олиб боришга барчани даъват этаётгани алоҳида эътироф қилинган.

Ғарб нашрларида муҳтарам Президентимизнинг “энди фуқаролар давлат ташкилотларига эмас, давлат ташкилотлари фуқароларга хизмат қилиш керак” деган гапларига урғу берилган. Шунингдек, уларда Ўзбекистон халқи учун ҳозирги давр – жадал тараққиёт даври эканини таъкидланиб, тез суръатлар билан қадамлар ташланиши Президент томонидан ишончни мустаҳкамланганини таъкидлаган.

Биз мўмин-мусулмонлар ана шундай эътироф ва таҳсинлардан юксак ифтихор туйғусини юракдан ҳис этиб, қалбларимизнинг энг нозик нуқталари ҳам таъсирланганини очиқ-ойдин айтишимиз керак. Бунинг учун Яратган Парвардигорга чексиз шукроналар келтиришимиз даркор.

Ислом цивилизацияси маркази раҳбари Шоазим Мунавваров ўз нутқида ёшларни пухта илм олишга тарғиб этиб, очилаётган янги марказлар, олий билим юртлари, академия-ю марказлар... уларнинг барча-барчаси Президентимиз нутқида алоҳида урғу берилган маърифатли бўлиш воситалари экани, бу даргоҳлар пухта илм эгаллаган ёшларни қучоқ очиб кутиб олишини айтиб, ёшларни илм сирларини яхши ўзлаштиришга даъват этди.

Ислом академияси ректори, академик Неъматулло Иброҳимов домла мустабид тузум даврида диний олимлар қандай машаққатлар остида илм қилганини ёшларга ибрат учун сўзлаб берди.

Вазирлар Маҳкамаси ҳузуридаги Дин ишлари бўйича қўмита раҳбари Ортиқбек Юсупов ҳамда Ислом институти ректори Уйғун Ғафуровлар Президентимизнинг “Жаҳолатга қарши маърифат билан курашиш” шиори тўғрисида сўз юритиб, агар одамлар ёшлигидан илм ўрганса, оқ-қорани таниб вояга етса, ҳар бир инсон ўзининг  фикрида собит тура оладиган шахс сифатида шаклланса, бундай жамиятда нафақат террорчилик, балки бошқа муаммолар ҳам ўз-ўзидан барҳам топиб кетиши ҳақида сўз юритдилар.

Шундан кейин ёшлар вакили сифатида сўзга чиққан Тошкент ислом институти талабаси Улуғбек Ҳусанов Давлатимиз раҳбарининг ҳатто БМТ Бош минбарида туриб ҳам ёшларни ўйлаганлари, нафақат Ўзбекистонимиз ёшлари, балки дунё ёшлари ҳақида қайғурганини кўриб ниҳоятда тўлқинланиб кетганини изҳор қилди ҳамда муҳтарам Президентимиз ишонч билдирганидек, малакали мутахассис бўлиб етишиш учун астойдил илм олишда давом этишини маълум қилди.

Анжуман сўнгида муфтий ҳазратлари юртимизга тинчлик, юртбошимизга омонлик, юртдошларимизга фаровонлик, ёшларимизга илму ирфон сўраб дуога қўл очдилар.

Дамин ЖУМАҚУЛ

Шу йилнинг 7-11 октябрь кунлари  Саудия Арабистони Подшоҳлигининг Маккаи мукаррама шаҳрида XXXIX  Халқаро Қуръони карим мусобақаси ўтказилади. Вакилларимиздан Тошкент ислом институти битирувчиси Сайдуллоҳ қори Тоҳиров ва “Кўкалдош” ўрта махсус ислом билим юрти талабаси Абдулбасир қори Камолов мазкур мусобақада иштирок этиш учун 2 октябрь куни Саудия Арабистонига жўнаб кетишди. 

Ушбу мусобақада 50 дан ортиқ давлатдан келган, 200 га яқин қорилар иштирок этади. Мусобақа шартлари қуйидагилардан иборат:

1. Қуръон каримни тажвид қоидаси билан тўлиқ ёддан ўқиб бериши билан бирга Қуръони каримдаги ояти карималарнинг тафсирини билиши.
2. Қуръон каримнинг 30 порасини тажвид қоидаси билан ёддан ўқиб бериши.
3. Қуръон каримнинг 15 порасини тажвид қоидаси билан ёддан ўқиб бериши.
4. Қуръон каримнинг 5 порасини тажвид қоидаси билан ёддан ўқиб бериши.

Вакилларимиз мусобақанинг 2 ва 3 шартлари бўйича иштирок этади.

Шунингдек, шу йилнинг 7 – 9  октябрь кунлари Россия Федерациясининг пойтахти Москва шаҳрида XVIII Халқаро Қуръони карим мусобақаси бўлиб ўтади. Ҳар йили дунёнинг шарқ ва ғарб мамлакатлари вакиллари ушбу мусобақада иштирок этиб келмоқда.  Ҳозирда мазкур мусобақада қатнашиш учун 32 та мамлакат  вакиллари ташриф буюришди. Қувонарли жиҳати шундаки, ушбу мусобақада юртимиз вакили  Тошкент шаҳар, Учтепа туманидаги “Ҳазрати Умар” жоме масжиди имоми ноиби Азимбоев Валихон қори ҳам қатнашади.  Вакилимиз сўзига кўра, Россия Федерациясида ўтказиладиган XVIII Халқаро Қуръони карим мусобақаси шартлари Қуръони каримни тажвид қоидаси билан ўқиш ва уни чиройли талаффуз қилишдан иборат. Қориларимизга мазкур халқаро нуфузли мусобақаларда олий ўринларни эгаллашини Аллоҳдан сўраб қоламиз. 

Ўзбекистон мусулмонлари идораси

Халқаро алоқалар бўлими ходими,

А.Парпиев