Муносабат: Туризм мамлакатнинг қиёфасини, одамларнинг турмуш тарзини, муомала маданиятини буткул ўзгартириб юборадиган ҳодиса.

Аввало, туристлар кўп келадиган мамлакат гуллаб кетади. Чунки сайёҳларга қулайликлар яратиш учун кўплаб меҳмонхоналар, боғлар барпо этилади, йўллар таъмирланади, кўприклар солинади. Одамларнинг муомаласи ўзгариб қаршисидаги киши билан очиқ чеҳрали тарзда мулойим гаплашишни одат қилади Узоқ-яқиндан келган меҳмонлар кўрганда уялиб қолмайлик деган андешада ҳамма жой топ-тоза қилинади, давлатга валюта тушуми ортади.

Зиёрат туризми эса, инчунун. Зеро, бунда зиёрат туризмига келган сайёҳлар ҳам, уларга хизмат кўрсатган мамлакатимиз аҳолиси ҳам савоб олади. Ўтган азизларнинг қаровсиз қолиб кетган қабрлари обод этилади. Ўша манзилларда ётган Аллоҳнинг дўстларини зиёрат этишга келганлар қабр қошида туриб тиловат қилар экан, қабристонда ётган мўмин-мусулмонларнинг ҳақларига ҳам дуо қилиб, Каломи шарифнинг фазилатидан жамики қабр аҳлининг руҳи баҳраманд бўлади.

Ушбу масала 22 февраль куни Давлатимиз раҳбари раислигида ўтказилган туризмни ривожлантиришга бағишланган видеоселекторда қуйидагича таъкидлаб ўтилди: «Юртимизда ислом дунёсида тан олинган алломаларнинг мақбаралари, табаррук қадамжолар кўп. Масалан, турли вилоятларда Нақшбандия тариқатини тарғиб қилган 12 уламонинг қабри бор. Биз ҳозир уларнинг 8таси, яъни Бухородаги «Етти пир» ва Самарқанддаги «Хўжа Аҳрор Валий» зиёратгоҳларини обод қиляпмиз. Лекин Сурхондарёдаги Муҳаммад Зоҳид Бухорий, Алоуддин Аттор ва Қашқадарёдаги Муҳаммад Дарвеш, Муҳаммад Инганакий мақбаралари таъмирга муҳтож», деди Шавкат Мирзиёев.

Давлатимиз раҳбари Сурхондарё ва Қашқадарё вилоятлари ҳокимларига ушбу қадамжоларни ободонлаштириш, уларга олиб борувчи йўллар ҳолатини яхшилаш, зиёратчилар учун барча шароитлар яратиш бўйича топшириқлар берди. Ушбу азизларнинг қабрлари, қабристоннинг атрофи обод бўлиши, ўйдум-чуқур бўлиб ётган йўлларнинг текисланиши, сайёҳлар учун яратиладиган шароитлардан сайёҳлардан ҳам кўпроқ маҳаллий аҳоли фойдаланади. Сайёҳлик манзилларига турникетлар, видеокамералар ва йўл кўрсаткичлари ўрнатилади, ахборот марказлари ташкил этиб, уларда туристларни қизиқтирувчи хизматлар йўлга қўйилади. Хизматлар кўрсатилади, савдолар ташкил этилади, сантитария-гигиена шохобчалари очилади. Бу  орқали давлат ғазнасига валюта тушуми кўпайтирилади ҳамда аҳолига ўз-ўзидан янги иш ўринлари, даромад манбалари пайдо бўлади.  

Демак, зиёрат туризми маҳаллий аҳоли учун ҳам ҳар жиҳатдан катта фойда келтиради, кишиларимизнинг турмуш шароитини яхшилайди.

Йиғилишда зиёрат туризми бўйича мамлакатимизнинг салоҳияти жуда юқори экани, бу йўналишда зарур қулайликлар яратиш мақсадида Дин ишлари бўйича қўмита таркибида Зиёрат туризмини қўллаб-қувватлаш бўлими ташкил этилгани Малайзия, Туркия, Индонезия каби давлатлар учун визасиз режим жорий этилгани таъкидланди. Шунингдек, хориж давлатлардаги элчилар мамлакатимиз, миллий қадриятларимизнинг тарғиботчилари бўлиши, бунга чет элдаги ватандошларимиз ҳам  ҳисса қўшиши зарурлиги таъкидланди. Туризм ривожи учун зарур шароитлар яратишга доир устувор йўналишлар белгилаб берилди.

Хорижга борган юртдошларимиз яхши билади: сайёҳлар кўп борадиган давлатлардаги эътиборли биноларга ёки шунга ўхшаш иншоотларнинг кўринарли жойига ушбу иншоотнинг қачон, ким томонидан барпо этилгани, қайси йилларда таъмирлангани, таъмирланганлик даражаси қанчалик даражада бўлгани ёзиб йирик-йирик ҳарфларда қўйилади. Бизда ҳам шу тажриба қўлланилса, бу – сайёҳлар учун яна бир қулайлик бўлиши баробарида уларга йўлбошловчилик қилаётганларга ҳам фойдаси тегарди.

ЎМИ Матбуот хизмати

Эртага, 25 февраль куни Сирдарё вилоятида қорилар мусобақасининг вилоят босқичи бўлиб ўтади. Ушбу мусобақада республика босқичига чиқиш учун туман босқичларида биринчи ўринни қўлга киритган 10 нафар қори, 4 нафар қория ҳаракат қилишади.

Мана, салкам бир ярим ойдирки, юртимиз бўйлаб кенг миқёсда ўтказилаётган Қуръони карим мусобақаси сабаб раҳмат нурлари таралмоқда, Аллоҳ таолонинг Каломига иштиёқманд кўнгиллар ҳидоят, раҳмат ва шифо оятларини жон қалблари билан тинглашмоқда.
Мамлакатимизда ўтказилаётган Қуръон мусобақасини кўриш, унга сомеъ бўлиб, файзу-раҳмат кечаларида иштирок этиш ниятида юртдошларимиз сони кундан-кунга ортиб бормоқда. Қуръони карим Аллоҳ таолонинг Ўз Пайғамбари Муҳаммад соллаллоҳу алайҳи ва салламга ваҳий орқали нозил қилган каломидир. Шу сабабдан ҳам Қуръон муқаддас илоҳий калом ҳисобланади. Ҳар бир мусулмон унинг ҳайбатини қалбда ҳис қилиб, ҳурматини ўз ўрнига қўйиши лозим. Мужтаҳид уламоларимиз оят ва ҳадисларга асосланиб, Қуръон ва унинг қироатига тегишли бўлган фиқҳий ҳукмларни батафсил баён қилганлар. Аллоҳ таоло бу борада Ўзининг каломида шундай марҳамат қилган: “Қуръон ўқилганда уни тинглангиз ва сукут сақлангиз! Шояд (шунда) раҳм қилингайсиз!”.
Ибн Жазвий: “Ушбу оятга кўра, Қуръонга қулоқ солувчига раҳмат ниҳоятда яқин бўлади”, деган. Мазкур қоидаларга асосан, уламоларимиз Қуръони карим тиловат қилинганда унга жим туриб, қулоқ осиш вожиблиги ҳақидаги ҳукм чиқарганлар. Баъзи уламолар Қуръон тиловатига қулоқ солмасдан бошқа гап-сўзлар билан машғул бўлиш, шариатга нисбатан одобсизлик бўлишини айтишган.
Мусулмон инсон учун гўзал овозда қироат қиладиган қоридан тиловат қилиб беришини сўраб, уни тинглаши мустаҳабдир. Имом Нававий айтадилар: “Билгинки, кўпчилик уламолар чиройли овозли қироат соҳибларидан тиловат қилиб беришларини сўрашиб, уларни тинглашар эди”.
25 февраль, якшанба куни Сирдарё вилояти бўйича Қуръон мусобақасининг вилоят босқични бўлиб ўтади. Шундай экан азизлар, дам олиш кунингизда онгу шуурларимизга қувват бўлаётган, илоҳий файзли онлардан баҳраманд бўлишга ошиқинг.
Бизнинг muslim.uz портали ва ижтимоий тармоқларни кузатиб боринг.

Ўзбекистон мусулмонлари идораси Матбуот хизмати

Тошкент шаҳри Шайҳонтохур туманида Хувайдо жоме масжиди таъмирланиб яна фойдаланишга топширилди.

Ушбу масжиднинг очилиш маросимида Ўзбекистон мусулмонлари идорасининг Масжидлар билан ишлаш бўлими мудири Раҳимберди Раҳмонов иштирок этди.

ЎМИ Матбуот хизмати

Манбаа: Vakillik.uz

Россия томони Ўзбекистоннинг март ойи охирида Тошкент шаҳрида Афғонистон бўйича «Тинчлик жараёни. Хавфсизлик соҳасида ҳамкорлик ва минтақавий шерикчилик» номи остида халқаро конференция ўтказиш ташаббусини қўллаб-қувватлайди. Бу ҳақда Россия Ташқи ишлар вазири Сергей Лавро Ўзбекистон ТИВ раҳбари Абдулазиз Комилов билан учрашув вақтида маълум қилди.

«Бундай форум ўтказиш ташаббуси ўзбекистонлик дўстларимиз томонидан январь ойида БМТ Хавфсизлик Кенгаши махсус йиғилиши вақтида илгари сурилганди. Бугун биз ушбу муҳим тадбирга тайёргарлик кўриш масалаларини муҳокама қилдик. Биз Афғонистондаги вазиятни барқарорлаштириш учун мавжуд форматларни, хусусан, Москва формати ва «ШҲТ+Афғонистон» форматини мобиллаштириш зарурлигини қайд этдик», дея Лавровнинг сўзларини келтирган ТАСС агентлигига асосланиб Kun.uz нашри хабар берди.

Россия ТИВ раҳбари «Афғоонистон муаммоси минтақадаги барча давлатлардан ташқари атрофдаги бошқа давлатларни, шунингдек, Россияни ҳам ташвишлантирадиган муаммо» эканига эътибор қаратган.

«Биз бу мамлакатда ИШИД таъсиридаги кучлар ўсиб бораётганидан ташвишдамиз. Бу кучлар айниқса Афғонистоннинг шимолий ҳудудларида, қайсики, МДҲга аъзо давлатлар билан чегара ҳудудларида тўпланмоқда. У ерларда бизнинг мамлакатларимиз фуқаролари ҳам бўлган лагерлар юзага келмоқда», деган Лавров.

Ўз навбатида Абдулазиз Комилов Ўзбекистон томони Россиядан ушбу конференция ўтказилишидаги қўлловидан миннатдор эканини маълум қилган.

«26 март куни биз Тошкентда Афғонистон масаласида халқаро конференция ўтказишни режалаштирмоқдамиз. Бу конференция Москва формати, халқаро контакт гуруҳи, Истанбул жараёни, ШҲТ-Афғонистон контакт гуруҳлари ва Афғонистон муаммосига бағишланган бошқа кўплаб гуруҳларнинг мантиқий давомчиси бўлади», деган вазир.

У Россиядан ташқари ушбу маросимга АҚШ, Хитой ва бошқа кўплаб давлатлар таклиф этилганини қўшимча қилган.

Конференцияда Покистон, Эрон, Ҳиндистон, Саудия Арабистони, БАА, Туркия ва Европанинг бошқа бир қатор давлатларидан (Буюк Британия, Германия, Франция ва Италия ушбу конференцияда иштирок этиш истагини билдирган), шунингдек, БМТ ва Европа Иттифоқидан вакиллар бўлиши кутилмоқда.

Абдулазиз Комилов Ўзбекистон томони Тошкентдаги конференциядан кейин Афғонистонда тинчлик ўрнатиш масаласида жадал ишлар олиб борилишига ишонч билдиришини қайд этиб ўтган.

ЎМИ Матбуот хизмати