Мир Араб ўрта махсус ислом билим юрти мударриси

Тожиддинов Абдусамад

Мисрнинг Порт-Саид шаҳрида V Халқаро Қуръони карим ва нашид айтиш бўйича мусобақа 18 февраль куни бошланади. Унга Миср Араб Республикаси Бош вазири Мустофо Мадбули раҳбарлик қилади.

Эрондаги “Иқна” Қуръон сайти “Достор” сайти хабарига таяниб берган маълумотига кўра, унда 66 араб, Африка, Европа давлатлари ҳамда АҚШ ва Канада вакиллари иштирок этади. .

Танлов давомида учта нуфузли ислом арбоби танлаб олинади. Мусобақа ижрочи директори Адил Масилаҳий: “Иштирокчилар тўрт йўналиш бўйича беллашади. “Қорилар учун икки йўналиш: Қуръонни тўлиқ ёддан ўқиб бериш ва Қуръонни тажвид қоидаси асосида чиройли тиловат қилиш”, “Қория аёл-қизлар учун Қуръони каримни ёддан ўқиб бериш”, 4-йўналишда “нашид” ва диний мадҳия шеърлар айтиш. Мазкур мусобақа доирасида масжид имом-хатиблари танловини ҳам ўтказиш режалаштирилган”, деди.

Порт-Саид шаҳрида бўлиб ўтадиган ушбу мусобақага Миср Араб Республикасидаги Қуръони Карим тафтиш қўмитаси раиси Абдулкарим Солиҳ ва қўмитанинг бошқа аъзолари, жумладан, аудиоэксперт Абдулфаттоҳ Торутий, етук қори ва мунашшид Тоҳа Абдулваҳҳоб, нашид ва мадҳ шеърлар айтиш мутахассиси Ҳоссам Сақр ҳамда Бирлашган Араб Амирликлари, Яман, Ливия ва Малилик мутахассислардан иборат халқаро қўмита аъзолари раислик қилади.

Мазкур мусобақа шу йил 18-22 февраль кунлари бўлиб ўтади.

Халқаро алоқалар бўлими ходими
Илёс Аҳмедов тайёрлади

Саидаҳмад домла Сайдаралиев

Ўзбекистон элчиси Улуғбек Мақсудов Саудия Арабистони Миллий ривожланиш компанияси бош директори Носир бин Ҳаммад ал-Жаийдий билан музокаралар ўтказди, деб хабар бермоқда «Дунё» АА.

Учрашувда Ўзбекистон ва Саудия Арабистони ўртасида икки томонлама алоқаларни янада чуқурлаштириш масалалари муҳокама қилинди.

Ўзбекистонда хорижий инвесторлар учун яратилган шарт-шароитлар ва уларга тақдим этилаётган имтиёзлар тўғрисида батафсил сўзлаб берилди.

Суҳбатдошлар Ўзбекистонда ўз фаолиятини олиб бориш истагида бўлган саудиялик инвесторлар сонининг ортиб бораётгани икки мамлакат ўртасида савдо-иқтисодий ва сармоявий соҳалар ривожига салмоқли ҳисса қўшаётганини қайд этди.

Носир ал-Жаийдий Ўзбекистонни жуғрофий жиҳатдан қулай ҳудудда жойлашгани хорижий ивесторлар учун жуда муҳим эканини таъкидлади. У республика раҳбарияти томонидан мамлакатда ишлаш ниятида бўлган хорижий инвесторлар учун яратиб берилган имкониятларни юқори баҳолади.

– Ўзбекистонда ишлаб чиқарилаётган барча турдаги маҳсулотлар сифат жиҳатидан ажралиб туради, - деди Носир ал-Жаийдий. - Бу хорижий инвестицияларни фаол жалб қилишда муҳим ўрин тутади. Бизнинг компанияда ҳам Ўзбекистон билан соғлиқни сақлаш, таълим, кимё, қишлоқ хўжалиги, туризм ва бошқа бир қатор соҳаларда ҳамкорлик қилиш истаги мавжуд.

Музокаралар якунида Саудия Арабистони Миллий ривожланиш компанияси бошқарув кенгашининг навбатдаги мажлисида элчихона вакиллари томонидан Ўзбекистон, хусусан, Қорақалпоғистон Республикаси, Қашқадарё, Наманган, Фарғона ва Тошкент вилоятларидаги инвестицион лойиҳаларининг тақдимотини ўтказиш тўғрисида келишиб олинди.

Ўзбекистон мусулмонлари идораси матбуот хизмати