muslim.uz
Пайғамбаримизнинг Рамазон ойидаги амаллари
Ҳар қандай мусулмон борки, Пайғамбаримиз Муҳаммад саллаллоҳу алайҳи васалламнинг сийратларига эргашишга ва унга тўлиқ амал қилишга уринади. Чунки Аллоҳ таоло ўз ояти каримасида у зотни мақтаб шундай дейди:
لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا
Батаҳқиқ, сизлар учун – Аллоҳдан ва охират кунидан умидвор бўлганлар учун ва Аллоҳни кўп зикр қилганлар учун Расулуллоҳда гўзал ўрнак бор эди (Аҳзоб сураси 21-оят).
Росулуллоҳ соллаллоҳу алайҳи васаллам Рамазон ойида қандай амаллар билан машғул бўлганлар?
Қуйида сизга у зотнинг бу ойда қилган амалларнинг баъзиларини келтириб ўтамиз:
— Саҳарликни охирги вақтигача кечиктирар, ифторликни тезлаштирар эдилар. Саҳобаларни ҳам шундай қилишга буюрар эдилар. Яъни ифторликни Қуёш ботиши билан қилар эдилар. Лекин баъзи мусулмонларда ифторликни шом намозидан кейин ҳатто хуфтон намозигача кечиктириб хатога йўл қўядилар. Худди шунингдек, Пайғамбаримиз соллаллоҳу алайҳи васаллам саҳобаларни саҳарлик қилишга ундар эдилар.
— Қуёмул Лайл (тунги намоз)ни кўпайтирар эдилар.
— Қуръон қироат қилишни зиёда қилар эдилар. Ҳар Рамазон ойида Қуръони каримни Жаброил алайҳиссаломга бир маротаба ўқиб берар эдилар.
— Аллоҳ йўлида кўплаб Хайр-эҳсон қилар эдилар. Ваҳоланки, Расулуллоҳ соллаллоҳу алайҳи васаллам инсонларнинг энг сахийси эдилар. Лекин у зотнинг сахийликлари бу ойда яна ҳам зиёда бўлар эди.
— Фитр садақасини ийд намозига чиқишдан олдин берар ва саҳобаларни ҳам шунга буюрар эдилар.
Ибн Умар розияллоҳу анҳудан ривоят қилинади: “Расулуллоҳ соллаллоҳу алайҳи васаллам фитр садақасини қулга ҳам, ҳур инсонга ҳам, эркак-аёл, катта-кичик мусулмонларга бир соъ ҳурмо ва арпадан беришни фарз қилдилар” (Имом Бухорий ривояти).
— Охирги ўн кунликни кўпроқ ибодат билан ўтказар эдилар.
Оиша розияллоҳу анҳодан ривоят қилинади: “Расулуллоҳ саллаллоҳу алайҳи васаллам Рамазоннинг охирги ўн кунлиги кирганда кечаларни бедор ўтказар, аҳлларини ҳам уйғотар ва изорларини шимарар эдилар” (Имом Муслим ривояти).
Баъзилар ҳадисдаги «изорларини шимарар эдилар» деган гапни, ибодатга кўпроқ вақт бўлиши учун аёлларидан тийилар эдилар деб тафсир қилишган. Баъзилар эса ибодатга қаттиқ киришганларидан киноя тарзда келтириляпти, деганлар.
— Охирги ўн кунлигида эътикоф ўтирар эдилар. Бу пайт аёллардан ва барча ишлардан узоқлашиб, вақтларини зикр, тавба ва ибодатлар билан ўтказар эдилар.
Тошкент Ислом институти талабаси
Муҳаммад Али Муҳйиддин тайёрлади
Германиялик Ислав Исломга қандай кирди?
21 ёшлик Германия фуқароси Кацпер Влад Ислав яқин дўстининг бувиси мисолидан илҳомланиб, Исломни қабул қилди.
Анадолу агентлигига кўра, Исломни қабул қилиш маросими Марказий Туркиянинг Кайсери вилояти муфтиятида бўлиб ўтган.
Тадбирда сўз олган муфтий Шаҳин Гювеннинг айтишича, сўнгги беш йил ичида 30 га яқин шундай маросим ўтказилган. Жумладан, ўтган икки йил мобайнида кўпроқ ёшлар исломни қабул қилган.
Гювен Иславнинг Исломни қандай қилиб қабул қилганини айтиб берди. Унинг айтишича, Германияда қўшнисининг бувиси ва Иславнинг яқин дўсти Ҳаниф Чери уни тез-тез меҳмонга таклиф қилган. Аёл Иславни ўз неварасидек яхши кўрар ва у билан доим гаплашарди.
"Ҳанифнинг бувиси ўтган ҳафта оламдан ўтди. У Иславнинг мусулмон бўлишга қарор қилишида муҳим рол ўйнаган. Ислав аллақачон шаҳада ўқиб, мусулмон бўлган. Мактабни тугатгач, Германияга қайтиб, ҳуқуқшунос бўлмоқчи", - дейди Гювен.
Гювеннинг қўшимча қилишича, Ҳанифа Чери доим Кацперни Али Усмон деб чақирган. Йигит исломни қабул қилгач, ушбу исмни ўзи учун танлади.
Ислав, ўз навбатида, Ҳанифнинг раҳматли бувиси уни доимо Аллоҳга яқинроқ бўлишга чорлаган. "Ислом сизга аввалгидан кўра яхшироқ ҳаёт бағишлайди", – дерди у.
Йигитнинг сўзларига кўра, унинг оиласи исломнинг мухолифлари кўп бўлган Польшада яшайди.
"Улар ҳам менинг янги динимга қарши эдилар. Бироқ, асосий нарса менинг эътиқодим. Мен муқаддас Қуръонда қидирган ҳамма нарсамни топдим. Намоз менга куч беради", - деди у.
Ислав шоҳадани ўқиб, исломни қабул қилди. Гювен кейин унга немис тилидаги Қуръон нусхасини тақдим этди.
Ўзбекистон мусулмонлари идораси матбуот хизмати
Огоҳ одам — оқил одам
Одамнинг қорни бир коса овқатга тўйиши мумкин. Жуда кўп эшитганмиз «қорним роса тўйиб кетди», деган сўзларни. Айниқса, бугунги маъмурчилик даврида, тўқчилик замонида бу оддий ҳолатга айланиб улгурди. Раббимизга беҳисоб шукрлар бўлсин. Лекин «меҳрга тўйдим» деган сўзни ҳеч қачон эшитмаганмиз. Меҳрга ким ҳам тўяди?!
Бу сўзларни бежиз келтирмаяпман. Бугун шахсан мен меҳрга ташна, тинчликка зор, хотиржамликка интиқ юртдошларимизнинг юзу кўзларига боқиб, меҳр, тинчлик-хотиржамлик қанчалик улуғ неъматлар эканини яна бир карра ҳис этдим. Шу билан бирга, тинч юртда, фаровон ҳаётда танти халқ билан бирга яшаётганим учун Яратганга шукроналар келтирдим.
Муҳтарам Президентимиз Шавкат Мирзиёев ташаббуслари ва бевосита топшириқлари билан куни кеча «Меҳр 5» операцияси доирасида Суриянинг жанговар ҳаракатлар давом этаётган қисмидан жами 93 нафар юртдошимиз – 24 нафар аёл ва 69 нафар бола – Ватанимизга қайтарилди.
Аввалроқ, «Меҳр 1», «Меҳр 2», «Меҳр 3» ва «Меҳр 4» гуманитар операциялари доирасида 320 дан ортиқ ватандошларимиз Ўзбекистонга қайтарилган эди.
Юртимизда давлатимиз томонидан яратилган шарт-шароитларга қаноат қилмай, ҳукуматимизнинг, диний идораларнинг, имом-хатибларимизнинг огоҳлантиришларига қулоқ солмай, чет элларга бориб, қўли қонга ботган разил кимсаларнинг, инсонийлик қиёфасини йўқотган одам шаклидаги иблисларнинг тазйиқларига гирифтор бўлган юртдошларимиз хатоларини кеч англаб етишяпти, кўзлари кеч очиляпти.
Улар муқаддас динимизнинг асл моҳиятини англаб етмагани, амалдаги қонунларимизга риоя этмагани, халқимизнинг минг йиллик қадриятларини топтагани учун ана шундай кўргуликларга дучор бўлмоқда.
Шунча огоҳлантиришлар, танбеҳларга қарамай, ҳали-ҳануз экстремистик ташкилотларнинг тузоғига тушиб қолаётган юртдошларимиз, наҳотки, пайғамбаримиз Муҳаммад соллаллоҳу алайҳи ва салламнинг: «Мўмин киши бир тешикдан икки марта чақилмайди» (Имом Бухорий ривояти), деган муборак ҳадисларини ёки халқимизнинг «Кўр ҳассасини бир марта йўқотади» деган мақолини эшитмаган бўлса?!
Ахир, бугун ойнаи жаҳон орқали, ижтимоий тармоқлар, интернет сайтларида ёт ғояларнинг таъсирига тушиб қолиб, қилмишини кеч англаб етган юртдошларимизнинг тақдири намойиш этилган кўрсатувлар, мақолалар, хабарларни кўрмаган, ўқимаган киши бўлмаса керак.
Ҳар биримиз, аввало, ўзимиздан, фарзандларимиздан огоҳ бўлишимиз шарт. Лоқайдлик ва эътиборсизлик кўп балоларнинг бошидир. Халқимиз бежизга «Сўнгги пушаймон – ўзингга душман», демайди. Пушаймон бўлмаслик учун, аввало, сергак ва огоҳ бўлиш талаб этилади.
Бугун ҳар қадамда фитналар уруғини сочишни касб қилиб олган ғаламисларнинг «сохта ҳижрат» тушунчаларидан жуда эҳтиёт бўлишимиз шарт. Бу хоинлар, манфур, бузғунчи кимсалар дин номидан гапириб, соф эътиқодимиз ва қадриятимизни қоралашга зўр бермоқда. Уларнинг асл мақсади мусулмонларнинг орасини ислоҳ қилиш эмас, балки нифоқ чиқаришдир.
Аллоҳ таоло улар ҳақида: «Улар ўзларининг (ёлғон) қасамларини қалқон қилиб олиб, (одамларни) Аллоҳнинг йўлидан тўсдилар. Бас, улар учун (охиратда) хор қилувчи азоб бордир»(Мужодала сураси, 16-оят), деб марҳамат қилади.
Қолаверса, турли томондан ёғилиб келаётган мафкуравий, диний, таҳдидлардан огоҳ бўлишимиз шарт. Улуғ бобомиз Алишер Навоий ҳазратларининг қуйидаги доно сўзлари ҳамон долзарбдир:
Эрурсен шоҳ ‒ агар огоҳсен сен,
Агар огоҳсен сен ‒ шоҳсен сен.
Суриядан келтирилган юртдошларимиз орасида 7 нафар чин етимнинг ҳам борлиги юрак-бағримизни эзиб юборди. Пайғамбаримиз соллаллоҳу алайҳи ва саллам: «Мен ва етимни кафиллигига олган киши жаннатда мана шундай бўлади», дедилар ва кўрсаткич ҳамда ўрта бармоқларига ишора қилиб, бу бармоқлари орасини бир-бирига яқин тутдилар» (Имом Бухорий ривояти), деб марҳамат қилганлар.
Бошқа бир ҳадисда: «Мусулмонларнинг уйи ичида энг яхшиси етимга яхши муносабатда бўлинган уйдир. Мусулмонларнинг уйи ичида энг ёмони етимга ёмон муносабатда бўлинган уйдир» (Имом Ибн Можа ривояти), дейилган.
Одамларга яхшилик қиламан, меҳр кўрсатаман деб жонини ҳалокатга қўйиб бўлса ҳам уруш ўчоқларидан ўз юртдошларини суғуриб олиб келган кишиларни, бу ишнинг бошида турган раҳбарлар, айниқса, муҳтарам Юртбошимиз БУГУННИНГ ҚАҲРАМОНЛАРИдир.
Аллоҳ таоло бу хайрли ишларга бош қўшаётган барча-барчани Ўз паноҳида асрасин. Қилган савобли ишларининг ажрларини кўпайтириб берсин. Ҳар доим соғ-саломат қилсин. «Меҳр» операциялари, ўйлайманки, юртдошларимизни янада ҳушёрроқ бўлишга, турли оқимлар таъсирига тушиб қолмасликка чорлайди.
Нуриддин домла ХОЛИҚНАЗАРОВ,
Тошкент шаҳар бош имом-хатиби
Макка ва Мадинада аёл офицерлар хизмат қилмоқда
Макка ва Мадинадаги Исломнинг муқаддас жойлари хавфсизлик хизматларига юзлаб аёл зобитлари хизмат қилишга киришди.
Жумладан, Пайғамбар алайҳиссалом масжидида фақат аёллардан иборат 113 нафар ҳарбий хизматчининг бир қисми жойлаштирилган. Офицерлар масжидда хавфсизлик, қонун ва тартибни таъминлаб, 18 нафар ходимдан 4 сменада навбатчилик қилишади.
Офицерларнинг ташқи кўринишига эътибор қаратилади. Саудия ҳарбий хизматчилари кенг бичимли шим ва тизза бўйи туник ҳамда берет, қора рўмол ва қора тўқимачилик ҳимоя ниқобидан иборат мокко рангли форма кийишган, дея хабар бермоқда IslamNews ArabNewsга таяниб.
27 ёшли офицер Ханан ал-Рашидийнинг сўзларига кўра, у 8 ойдан бери армияда бўлиб, инсонпарварлик сабабларга кўра хизматга қўшилган. Ал-Рашидий: "Мен учун Пайғамбар масжидида ишлаш ва Аллоҳнинг меҳмонларига хизмат қилиш шарафдир", дейди.
– Бу аёлларнинг даври. Энди аёллар армияга қўшилиб, узоқ вақтдан бери ишлашни истаган бошқа секторларда ҳам фаолият юритиши мумкин", - дейди Рим. 27 ёшли Рим Ал-Маҳжуб 6 ойдан бери Мадинада ҳарбий хизматни ўтайди.
Ўзбекистон мусулмонлари идораси матбуот хизмати
Мақолалар
