Айни кунларда Макка шаҳрида тоат-ибодатда бўлиб турган ҳожиларимиз билан маърифий суҳбатлар ўтказилмоқда.

Ана шундай мазмунли учрашув Жиззах вилоятининг 8 та (1-8) гуруҳидаги 400 га яқин зиёратчи учун ташкил этилди. Унда ҳожилик мақоми ва унга муносиб бўлиш каби мавъизалар билан бирга юртимизда амалга оширилаётган хайрли ишлар мазмун-моҳияти, уларнинг барчаси инсон қадри учун амалга оширилаётгани, ҳожиларимиз Ватанга қайтгандан сўнг маҳаллалар ҳаётида фаол иштирок этиши, ўзи яшаётган жойда одамларга намуна бўлиши, ёшларга тўғри йўл-йўриқ кўрсатиши, нотинч бўлиб турган оилаларга соғлом муҳитни олиб кириши, бир сўз билан айтганда, эзгулик тарғиботчиси, маҳалла фаоли ва суянчи бўлиши лозимлиги таъкидланди.

Суҳбат давомида ҳожилар ҳам сўз олиб “Ҳаж – 2022” мавсуми жуда гўзал бўлгани, ишчи гуруҳи, элликбошилар юқори даражада хизмат кўрсатишгани эътироф этилиб, бунинг учун Юртбошимиз ва мутасаддиларга миннатдорчилик изҳор этишди. Шунингдек, диёрга қайтгач, одамларни яхшиликка чорлаш, ёмонликдан қайтаришда фаол бўлишларини таъкидлашди. Якунда хайрли дуолар қилинди.

Эслатиб ўтамиз, зиёратчиларимизнинг юртга қайтиб келишлари 4 августга қадар давом этади.

Ўзбекистон мусулмонлари идораси Матбуот хизмати
Muslim.uz
#Ҳаж2022
@muslimuzportal | @mp3muslim | @diniysavollar

Куни кеча узоқ йиллар диний соҳада мазмунли хизмат қилган марҳум шайх Абдулғани домла Абдуллоҳ Абу Исо Термизийнинг шоҳ асари – «Саҳиҳи Термизий»нинг асл нусхасидан танлаб олинган ҳадислар тўплами таржимаси нашрдан чиқди.

Китобда матнларни араб ва ўзбек тилида берилиши ўқувчига ҳадисларни янада чуқур ўрганишга имкон яратади.

Китобхонлар ушбу мўътабар таржимадан динимиз арконларига оид ҳадислар ва ўнлаб саҳобалар ва айрим тобеинлар ҳақидаги фойдали маълумотларни олади, иншааллоҳ.

 Аллоҳ таоло ушбу китобни юртимиз мўмин-мусулмонларига манфаатли қилсин!

 Марҳум шайх Абдулғани домла Абдуллоҳнинг руҳларини шод, охиратларини обод айласин!

Ўзбекистон мусулмонлари идораси Матбуот хизмати
Muslim.uz
@muslimuzportal | @mp3muslim | @diniysavollar

Макка шаҳридаги “Аброж ал-Ҳидоя” меҳмонхонасида Тошкент ислом институтининг катта устози Муҳаммад Айюб домла Ҳомидов ҳамда Фатво маркази директор ўринбосари Ғуломиддин домла Холбоев муборак ҳаж ибодатини адо этиб юртимизга қайтиш арафасидаги бир гуруҳ ҳожилар билан "Ҳожилик мақоми ва масъулияти" мавзусида суҳбатларни давом эттирмоқдалар.

Суҳбат давомида улуғ ҳаж ибодатига етказгани учун Ҳақ таолога шукрда бардавом бўлиш, ҳожилик мақомига муносиб бўлиш учун ибодатларни ихлос билан адо этиш, одамлар билан ўзаро муомалада гўзал одобли бўлишга ҳаракат қилиш лозимлигини таъкидланди.

Шу билан бирга, уламолар ҳожилар машаққат чекиб қилинган ибодатлари мукаммал бўлиши учун умр бўйи ҳаракатда бўлиши, хусусан, ибодат ва яхши амалларни кўпайтириш, қўни-қўшни, маҳалласи ва қавми-қариндошлари билан чиройли муносабатда бўлиб, атрофдагиларга намунали ва тартиб-интизом билан ўрнак бўлиши, бева-бечоралар, ногиронлар ва касалманд кишилар ҳолидан хабардор бўлиб, ён-атрофидагиларга насиҳат қилиб, яхшиликка буюриш, инсонлар ўртасида меҳр-оқибат ришталарини мустаҳкамлашга ўз ҳиссаларини қушишлари лозимлиги уқтирилди.

Ўзбекистон мусулмонлари идораси Матбуот хизмати

Ўзбекистонлик ўқувчилар Халқаро биология ва математика олимпиадаларида совриндор бўлди. Бу ҳақда Халқ таълими вазирлиги Матбуот хизмати хабар берди.
Ўзбекистонлик ўқувчилар 10-18 июл кунлари Aрманистонда ўтказилган 33-Халқаро биология олимпиадасида қатнашди. Дунёнинг 64 давлатидан 256 нафар ўқувчи қатнашган мазкур олимпиадада Тошкент педиатрия институти академик лицейи ўқувчиси Aзиза Aбдувалийева бронза медалини қўлга киритди.

Шунингдек, 6-16 июль кунлари Норвегиянинг Осло шаҳрида ўтказилган 63-Халқаро математика олимпиадасида ҳам ўзбекистонлик ўқувчи медалга эга чиқди. Дунёнинг 104 та давлатидан 589 нафар ўқувчи қатнашган мазкур Олимпиадада юртимиз шарафини ҳимоя қилган Қоракўл Халқаро математика мактаби ўқувчиси Лазизбек Ражаббойевга бронза медали насиб этди.

Белгиланган тартибга кўра, медаль соҳиби олий таълим муассасасига тест синовларисиз, давлат гранти асосида қабул қилинади.
Бронза медали учун ўқувчига 60 млн. сўм, унинг ўқитувчисига эса 45 млн. сўм пул мукофоти билан тақдирланади.

Эслатиб ўтамиз, 2021 йилда Португалияда ўтказилган 32-Халқаро биология олимпиадасида дунёнинг 76 давлатидан 304 нафар иқтидорли ўқувчилар иштирок этган бўлишига қарамай, улар орасида ТПТИ академик лицейи 1- босқич ўқувчиси Азиза Абдувалиева ҳам бор эди. У мазкур олимпиаданинг олтин медалини қўлга киритган эди.

Ўзбекистон мусулмонлари идораси Матбуот хизмати