Бир йигит бемор ётган қариндошининг ҳолидан хабар олиш мақсадида йўлга чиқибди.Қўлида иккита нон,мева-чеваси бор.

Бирмаҳал,тутзор бўйлаб секин кетаётганида тут тагида йиғлаб ўтирган бир кимсага кўзи тушибди.

Йиғлаб ўтирган ул кимсанинг ҳоли абгор,соч-соқоли ўсган,хароб.

Бу ҳолатга бефарқ бўлиб ўтиб кетишни истамаган софдил йигит ўша бечорадан гап нимадалигини сўрабди.Шунда ҳалиги бечора:

"Аҳволим ёмон биродар! Ейишга ноним,ичишга сувим йўқ! Ўзим эса ўрнимдан туролмайман!Агар қўлингдан келса нон сув бер,уйимга элтиб қўй!..."  дея жавоб берибди.

Ноилож қолган йигит "Кел,шу бечораҳолнинг ҳожатини чиқариб кетақолай" дея рози бўлибди.

Хуллас,йигит ўша бечорага қўлидаги нон-мевасидан берибди.Елкасидан тутганча унинг айтган манзили бўйлаб орқага қараб кетаверибди.

Йўл юришибди.Узоқ далалар-у,кенг яйловлардан ҳам ўтишибди.Йўл юравериб кунни ҳам кеч қилишибди.Бу орада иккови ҳам қизғин суҳбат қурар,йигитнинг эса ҳатто нима мақсадда йўлга чиққани ҳам ёдидан кўтарилибди.

Хуллас иккови кетаверибди.Ҳар замон,ҳар замонда иккови хахолаб кулишар,гўё шу йўл бахона минг йиллик қадрдонга айланишганди улар.

Бир маҳал уларнинг олдидан қўлида овқат кўтарган ёш бола чиқиб қолибди.

Буни кўрган ҳалиги бечораҳол, йигитга қарата:"Оғайни қорин ҳам жуда очди-ку,кел шу боланинг овқатини тортиб олайлик!" дея қистабди.Йигит бошида кўнмабди,аммо боядан бери бирга келаётган "қадрдони" қўйавермагач ноилож болакайдан овқатини тортиб олибди...

Мана иккови яна йўл юришарди.Бу орада қоринлари тўқ,турли мавзуларда тинмай гаплашишарди.Бир маҳал уларнинг олдидан йўл четида жимгина ётган ит чиқиб ҳалиги бечораҳолнинг жазаваси тутибди ва йигитга тезда ўша итни ўлдиришини айтибди.Йигит бошида кўнмабди."Бегуноҳ итда нима айб?" дея рози бўлмабди.Аммо ўша ит бечораҳолга қарата акиллай бошлагач "қадрдонини" ҳимоя қилиш мақсадида йигит ноилож итни ўлдирибди.Йигитнинг бу ишидан ўша бечораҳол қадрдони шундай хурсанд бўлибдики,унга чўнтагидан қуритилган беҳи чиқариб берибди:"Олақол дўстим! Мени етаклаб келаётганинг,қорнимни тўйғизганинг ва  барча айтганларимни қилганинг учун" дебди.

Хуллас яна йўлга тушибдилар....Бир маҳал сал нарироқдан нурга ўхшаш нарса пайдо бўлиб,кўзни қамаштирибди.Йигит бечораҳол қадрдонини ерга ўтказиб ўзи секин нур томонга борибди.Бориб қараса нур бўлиб кўринган нарса одам экан! Одам бўлганида ҳам Қори-Мулла Қори бобо экан! Қори бобони кўриши билан йигит унга салом бериб,бошидан ўтган ҳамма нарсани айтиб берибди.Шунда Қори бобо ўша бечораҳолни кўриш учун сал нарироқ юрган экан....Воажаб ўша юролмайдиган бечораҳол кўздан ғойиб бўлибди.....

Кейин эса Қори бобо йигитдан ўша бечораҳол берган беҳини сўрабди.Йигит чўнтагига қўлини тиқибдида қўлига илинган нарсани кўриб кўнгли айниб кетибди...

Ҳа,ўша куни йигитнинг омади келиб,қаршисидан Қори бобо чиқиб қолди.Йўқса,ўша  "қадрдон" ЖИН оғайниси уни янада даҳшатлироқ ишларга ундаган бўлармиди?!...

Шундан сўнг йигит йўлга чиқса бетаҳорат юрмайдиган бўлди......

                                                                          Шерзод  Хайдарбеков.....

Инновацион ривожланиш вазири Иброҳим Абдураҳмонов Ислом тараққиёт банки президентининг Фан, технология ва инновациялар бўйича маслаҳатчиси профессор Ҳаят Сулаймон Синди билан учрашди. Бу ҳақда вазирлик матбуот хизмати хабар бермоқда. 

Музокаралар давомида қишлоқ хўжалиги бўйича аъзо давлатларининг ҳамкорликдаги ҳаракати концепциясини ишлаб чиқишда ИТБ имкониятларидан фойдаланиш ҳақида музокара олиб борилди. Шунингдек, юқори ишлаб чиқариш қувватига эга олтита компьютер марказларидан бирини Ўзбекистонга жойлаштириш бўйича лойиҳани амалга ошириш доирасида банк билан ҳамкорлик ўрнатиш ва шу марказ базасида Ёш олимларнинг халқаро ислом марказини яратиш масаласи кўриб чиқилди. Бундан ташқари, Ал-Хоразмий ёш математиклар халқаро олимпиадасини ташкил этиш учун молиявий-техник ва консультатив кўмак бериш ва муқобил энергия манбаларидан фойдаланиш соҳасида ҳам тажриба-инновацион, илмий-тадқиқот ишлари бўйича лойиҳаларни амалга ошириш имконияти хусусида тўхтаб ўтилди.

Синди хоним Инновация вазирлиги томонидан таклиф қилинган лойиҳаларни кўриб чиқиб, уларнинг муҳимлигига эътибор қаратар экан, ИТБ томонидан кредитлар, заёмлар, грант ёки бошқа махсус маблағлар ажратилиши мумкинлигини айтиб ўтди. ИТБ маслаҳатчиси инновацияларни ишлаб чиқаришга жорий қилиш, унинг асосида бизнес юритиш нафақат Ўзбекистон учун, балки аксарият мамлакатлар, жумладан, ИТБ аъзо-давлатлари учун янгилик эканини, ҳали кўпчилик инновацион технологияларга ҳам, новаторлик ғояларига ҳам қарши чиқишаётганини айтди. ИТБ томонидан тақдим этилаётган маблағлар мана шу тўсиқларини ёриб чиқишга кўмак беришини, новаторларни қўллаб-қувватлашга қаратилганини алоҳида таъкидлади.

Эслатиб ўтамиз, ҳозирги кунда Ислом тараққиёт банкига 57 та давлат аъзо бўлиб, ташкилот мана шу аъзо-давлатларнинг ривожланишига кўмак бериб келмоқда. Молиявий кўмак самарасини кучайтириш мақсадида банк турли соҳаларга ўз эътиборини қаратиб келмоқда, жумладан инновацион ғояларни ишлаб чиқаришга татбиқ этиш ҳам алоҳида диққат марказда бўлган йўналишлардандир. 

Ислом тараққиёт банки Engage деб номланган инновациялар билан бозор имкониятлари ва молия ресурсларига мувофиқлаштириш бўйича онлайн-платформани ишга туширган. Шу билан бир қаторда новаторлар, “старт-ап”чилар, корпорацияларга барқарор равишда молиявий маблағларни йўналтириш мақсадида махсус Transform жамғармаси ташкил этилган. Мазкур 500 миллион АҚШ долларига эга жамғарма жаҳон ривожланишининг глобал муаммоларининг инновацион ечимларини топишга қаратилган.

ЎзА

Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитада Цингапур Республикасининг Ўзбекистондаги Фавқулодда ва мухтор элчиси Зулкифли бин Баҳаруддин бошчилигидаги делегация билан учрашув ўтказилди.
Учрашувда Цингапур делегацияси билан Ўзбекистоннинг диний бағрикенглик борасидаги тажрибасини ўрганиш ва Цингапур вазирликлари билан яқиндан алоқаларни йўлга қўйиш, жумладан, зиёрат туризмини ривожлантириш доирасида ҳамкорлик масаласи муҳокама этилди.
Зулкифли бин Баҳаруддин Ўзбекистон Республикаси Президенти ташаббуси билан мамлакатимизда диний йўналишдаги илмий мактаблар фаолият бошлагани, Ўзбекистон халқаро ислом академиясининг ташкил этилгани, Ўзбекистонда ислом тадқиқотлари ва бу соҳадаги илмий меросни тадқиқ этишга алоҳида эътибор қаратилаётгани натижасида бугунги кунда аҳоли, хусусан, ёшлар ўртасида радикаллашув ҳолатининг камайиши кузатилаётганини эътироф этди.
Шунингдек, музокара чоғида Сингапур давлатидан Ўзбекистонга зиёрат туризми йўналиши бўйича сайёҳлар ташрифини ташкил этиш масаласи кўриб чиқилди.

Манба: http://www.religions.uz

1. Умидсизликка тушманг

Ноумидлик – муваффақиятга эришишга тўсқинлик қилувчи биринчи рақамли душман. Шунинг учун дарҳол умидсизликдан халос бўлишингиз зарур. Бунинг энг қулай йўли – Аллоҳ таоло сизга ато этган имкониятлар, қобилиятлар ҳақида тафаккур қилишингиздир. Олимлар айтишларича, инсон ўзига берилган имкониятларнинг фақат 10 фоизини ишлатар экан. Шундай экан, ҳозир сизда камида 90 фоиз имкониятингиз, ишлатилишини кутиб турган яширин қувватингиз бор. Агар уларни ишга сола билсангиз, муваффақиятингиз сари асосий қадамни босган бўласиз.

2. Йиқилиш – муваффақиятга эришиш йўли

Кўплаб кашфиётчилар, ишлаб чиқарувчилар жуда кўп марталаб омадсизликка учрайдилар. Лекин улар қайта-қайта уриниб кўрадилар. Бу эса охир-оқибат муваффақиятнинг сабаби бўлади. Агар бир неча марта омадсизликка учрасангиз, бу дегани сиз ҳеч қачон ютуққа эришмайсиз деганимас. Балки бу омадсизлик сиз учун тажриба, малака бўлиб, ундан келгусида юз берадиган тойилишдан сақланишни ўрганасиз. Шунинг учун ҳам “Чумоли мақсадига етиш учун 99 марта уриниб кўради ва юзинчи мартасида етади” деган гап бор.

3. Вақтни бошқариш санъати

Вақт орқага қайтмайди. Шунинг учун ҳар бир дақиқадан унумли фойдаланишга ҳаракат қилинг. Вақтни зое қилишдан эҳтиёт бўлинг! Вақт сизни муваффақият сари етаклайдиган хазинадир, фақат бир шарти бор: сиз унинг ҳар бир лаҳзасидан оқилона фойдаланишингиз керак!

4. Тўғри қарор қабул қилиш

Нотўғри қарорлар – муваффақиятдан тўсадиган энг катта омиллардан биридир. Шунинг учун бир қарор қабул қилишдан олдин узоқ ўйлаб, масаланинг ҳар тарафини ҳисобга олиб, муносиб вақтни белгилаб, энг намунали тажрибадан фойдаланиб, тўғри қарор қабул қилишингизни маслаҳат берамиз. Шу ўринда бир қоидани эслатиб ўтамиз: “Икки нуқта орасидаги энг қисқа йўл – тўғри чизиқдир”.

5. Кичик нарсаларни паст санаманг

Кичик масалаларни арзимас санаманг. Гоҳида озгина фикр катта муаммонинг ечими бўлиши мумкин. Шунинг учун муаммоингиз ҳар қанча катта бўлмасин, унинг ечими жуда оддий бўлади. Фақат бир шарти бор: тангликдан халос бўлишингиз ва муаммога кичик, ечими бор нарса деб қарашингиз керак. Ана шунда тезда ечим топилади. Муҳими шошмасдан фикрланг ва муаммога ўз ҳажмидан катта тус берманг.

6. Биринчи қадамнинг аҳамияти

Дунёдаги энг узун саёҳат ҳам биринчи қадамдан бошланади. Агар сиз шу қадамни қўймасангиз, йўлнинг охирига етолмайсиз. Шунинг учун олдингизда катта лойиҳа, қилиниши керак бўлган муҳим иш бўлса, илк қадамни қўйишга иккиланманг! Ана шунда қолган қадамлар унинг ортидан бирма-бир келади. Муҳими, сиз шу биринчи қадамни пайсалга солманг. Лойиҳани амалга оширишдаги, муваффақиятга эришишдаги муҳим омиллардан бири – биринчи қадамни қўйишдир.

7. Аниқ мақсад – муваффақият калити

Агар сизда мақсад бўлмаса, ҳеч қачон муваффақиятга эришолмайсиз. Мақсадни аниқ қилиб белгилаб олиш маррага эришишнинг ярмидир. Шунинг учун амалга оширмоқчи бўлган мақсадларингизнинг рўйхатини тузиб, унга эришишга сабаб бўладиган энг афзал йўлни ўрганиб олишингиз керак. Ана шунда Аллоҳнинг изни ила муваффақиятга эришасиз.

8. Ростгўйлик

Муваффақиятга эришмоқчи, омадли етакчи бўлмоқчи бўлсангиз, ўзаро муомалаларда ростгўйлик ва бошқаларни ҳурмат қилишни ўзингизга шиор қилиб олинг. Шунда атрофингиздаги инсонларнинг ишончини, ҳурматини қозонасиз. Айтадиган ҳар бир сўзингиз рост бўлишига эътибор беринг ва шунга урининг. Билингки, муваффақиятга эришиш ва яхши раҳбар бўлишнинг энг қисқа йўлларидан бири – ростгўйликдир.

9. Вазиятни ва ҳиссиётларингизни бошқаринг

Омадга эришишнинг энг муҳим омилларидан бири – атрофингиздаги вазиятни ва ҳиссиётингизни идора қилишингиздир. Агар шундай қилмасангиз, мавжуд вазиятнинг ўзи сизни истаган куйига солиши ва тойилтириши мумкин. Шунинг учун ҳис-туйғуларингиз ва фикрларингизни назорат қила олинг. Омадга эришишингиз учун муносиб вақт ва шароитни изланг. Ҳеч қачон тасодифан омадга эришаман деб ўйламанг!

10. Меҳнат қилиш

Ишлаш – мақсадга етишишнинг энг асосий йўлларидандир. Муваффақиятга эришган инсонларнинг таъкидлашича, омаднинг 95 фоизи мунтазам ва давомли меҳнатдир. Ақл-заковат эса муваффақиятга эришишга атиги 5 фоиз ҳисса қўшади. Шунинг учун аниқ мақсадни олдингизга қўйиб олинг-да, меҳнат қилинг, ишланг, изланинг. Яхши натижани истасангиз, тиришиб, сабр-бардош билан ишланг. Ана шундагина Аллоҳнинг изни ила меҳнатингизнинг самарасини кўрасиз.

www.kaheel7.com сайтидан

Нозимжон Иминжонов таржимаси