Ўзбекистон Республикаси Президенти Шавкат Мирзиёев Жаноби Олийларига

Бисмиллаҳир Роҳманир Роҳим.

Ассалому алайкум ва раҳматуллоҳи ва барокатуҳ,

Муҳтарам Президент Жаноби Олийлари!

Сиз ва Сиз орқали барча юртдошларимизни мусулмон умматининг энг улуғ байрами – Қурбон ҳайити билан ҳаж ибодатини кўтаринки руҳда адо этаётган ҳамюртларимиз номидан самимий муборакбод этамиз.

Биз, ўзбекистонлик ҳожилар шундай файзли кунлар учун шукроналар айтиб, Ҳақ таолодан диёримизга қут-барака, халқимизга фаровонлик, фарзандларимизга баркамоллик сўраб дуолар қилмоқдамиз.

Имом Абу Довуд ривоят қилган ҳадиси шарифда Ҳазрати Пайғамбаримиз сaллаллоҳу алайҳи васаллам: “Арафа куни, Қурбон ҳайити куни ва (ҳожилар) Минода жам бўладиган кунлар – биз аҳли Исломнинг байрамимиздир”, дея марҳамат қилганлар.

Аллоҳ таолонинг байти жойлашган муқаддас заминга ҳаж ибодатини адо этиш учун келган мўмин-мусулмонлар Мино, Арафот, Муздалифа, Масжидул Ҳаром каби табаррук жойларда ушбу амални бажарадилар.

Дарҳақиқат, мусулмон фарзанди борки, умрида бир бора бўлса-да, Каъбатуллоҳни тавоф қилиш орзусида юради. Зотан, ҳаж – улуғ ажрларга, мукофотларга ноил қиладиган, инсон ҳаётида яхшилик сари бурилиш ясайдиган буюк ибодат. Зеро, Набий саллаллоҳу алайҳи васаллам: “Мабрур ҳажнинг мукофоти фақат жаннатдир”, дея марҳамат қилганлар. Демак, гўзал одоб, чиройли хулқ ва чин ихлос билан қилинган ҳажнинг мукофоти жаннат бўлади, инша Аллоҳ.

Ҳурматли Президент Жаноби Олийлари, ушбу фазилатли кунларда Сизга мустаҳкам соғлик, битмас-туганмас куч-қувват, оилавий бахт-саодат ва фаолиятингизда улкан зафарлар ёр бўлишини Аллоҳ таолодан сўраймиз.

Барчамиз эътироф этамизки, Сизнинг саъй-ҳаракатларингиз билан барча соҳалар қатори диний-маърифий жабҳада ҳам жуда катта ўзгаришлар амалга оширилганига халқимиз бевосита гувоҳ бўлиб, ислоҳотлар самарасини ўз ҳаётларида ҳис этмоқдалар.

Ҳақ таолога шукрки, ўлкамизда янги очилаётган масжид-мадрасалар, диёримиз бўйлаб фаолият юритаётган Қуръон курслари, обод бўлаётган қадамжолар, тадқиқ этилаётган алломалар мероси ва ҳаж-умра қилувчилар сони кескин ошаётгани барчамизни чексиз мамнун қилмоқда.

 Сиз Жаноби Олийларининг 2022 йил август ойида Саудия Арабистонига амалга оширган ташрифингиз ва олий даражадаги музокаралардан сўнг икки мамлакат ўртасидаги ҳамкорлик алоқалари жадаллик билан ривожланиб бормоқда.

Шуни алоҳида таъкидлаш лозимки, ҳаж сафари билан боғлиқ ташкилий ва хизмат кўрсатиш йўналишидаги ишлар ҳам тубдан яхшиланганига муборак заминга келган зиёратчиларимиз бевосита гувоҳ бўлмоқдалар.

Ҳаж квотаси олдинлари бир неча йиллар давомида 5 200 нафар бўлган бўлса, 2019 йилга келиб, бу кўрсаткич 7 200 нафарга етди, 2022 йилда эса 12 000 нафарни ташкил этган эди.

Саудия Арабистони томони билан олиб борилган мулоқотлардан сўнг жорий йил Ўзбекистон фуқаролари учун ҳаж квотаси 15 000 нафар этиб белгилангани кўпчиликнинг орзу умидларини амалга оширди.

Келгусида ҳажга борадиган зиёратчилар учун ягона онлайн навбат тизими жорий этилиши, ҳудудларда ҳаж марказлари ташкил қилиниши ва 2030 йилга қадар ҳаж зиёратига борадиган фуқаролар сони босқичма-босқич йилига 24 минг нафарга етказилиши эл қалбидаги айни муддао бўлди.

Сизнинг ҳаж ва умра зиёратчилари учун юқори даражадаги хизматларни ташкил этиш борасидаги ташаббусларингиз ва ғамхўрлигингиз учун Ўзбекистон ҳожилари номидан самимий миннатдорлик изҳор этамиз.

Мамлакатимизда миллий-диний қадриятларимизни қарор топтириш ва мўмин-мусулмонларимиз учун жамики шароитлар яратилгани “Инсон қадри учун” деган олижаноб ғоянинг кенг жабҳадаги намойиши бўлди.

Ҳурматли Президент Жаноби Олийлари!

Биз — ўзбекистонлик ҳожилар, Ватанимизга қайтар эканмиз, шахсий ҳаётда бошқаларга ибрат бўлиб, жамиятда аҳил-иноқликни мустаҳкамлаш, оилалар тотувлигини таъминлаш, ёшлар тарбиясини янада яхшилаш ва эҳтиёжмандларга кўмак беришдек савобли ишларга бор куч-ғайратимизни, шижоатимизни сафарбар этамиз.

Айни кунларда мабрур ҳажнинг мукофотидан умидвор бўлиб, Аллоҳ таолога ихлос билан ибодат қилаётган ҳожиларимиз Маккаи мукаррама, Арафот ва Мино каби муқаддас жойларда юртимиз ҳаққига икки дунё саодатини сўраб хайрли дуолар қилмоқдалар. Зеро, Расулуллоҳ соллаллоҳу алайҳи васаллам: «Дуоларнинг энг яхшиси Арафотда қилинган дуодир», деб хушхабар берганлар (Имом Термизий ривояти).

Ҳадиси шарифда Ҳазрати Пайғамбаримиз саллаллоҳу алайҳи васаллам: “Аллоҳ ҳузурида Арафот кунидан яхшироқ кун йўқ. Аллоҳ таоло Ер аҳли билан фахрланиб, фаришталарига айтади: “Менинг чангу ғубор босган бандаларимга қаранг! Менинг раҳматимдан умидвор бўлиб, узоқ жойлардан келдилар. Сизлар гувоҳ бўлинглар, уларнинг гуноҳларини кечирдим, дейди”, деб марҳамат қилдилар.

Шундай экан, биз, ҳожилар гуноҳлар афв этиладиган ва дуолар ижобат бўладиган Арафотда туриб, Аллоҳ таолодан Сизга мустаҳкам соғлиқ, узоқ умр ва улкан муваффақиятлар тилаб, илтижолар қиляпмиз. Аллоҳ таоло олиб бораётган хайрли ишларингизда доимо мададкор бўлсин. Юртимиздаги бошланган ислоҳотларимиз бардавом бўлишини Яратган Парвардигордан илтижо қилиб сўраймиз.

Мана шундай файзиёб дамларда уламоларимиз Шайх Зиёвуддинхон ибн Эшон Бобохон ҳамда Шайх Муҳаммад Содиқ Муҳаммад Юсуф ҳазратлари “Олий Даражали Имом Бухорий” ордени билан мукофотланганлари ҳақидаги хушхабар Арафот водийсидаги ўзбекистонлик барча ҳожиларни мамнун этди.

Айни кунларда мамлакатимизда амалга оширилаётган мана шундай тарихий жараёнлар бардавом бўлиши ва олдимизда турган муҳим воқеалар муваффақиятли ўтишини Ҳақ таолодан сўраб дуолар қиламиз. 

Аллоҳ бутун дунё мўмин-мусулмонларига Қурбон ҳайитини муборак айласин, тинчлик-хотиржамлик ато этсин, ибодатларимизни даргоҳида қабул этсин, она Ватанимизни обод, халқимиз ҳаётини янада фаровон қилсин.

Қурбон ҳайити муборак бўлсин!

Вассалому алайкум ва раҳматуллоҳи ва барокатуҳ.

Ўзбекистон ҳожилари

Макка шаҳри, Арафот водийси, 2023 йил 27 июнь

#haj2023
#tabrik

Ўзбекистон мусулмонлари идораси
Матбуот хизмати
Muslim.uz
@muslimuzportal | @Muftiy_Nuriddin_domla |@diniysavollar

Ўрта Осиё ва Қозоғистон мусулмонлари диний бошқармасининг собиқ раиси, муфтий, марҳум шайх Муҳаммад Содиқ Муҳаммад Юсуф «Олий даражали Имом Бухорий» ордени билан мукофотланди.

Шунингдек, Ўрта Осиё ва Қозоғистон мусулмонлари диний бошқармасининг собиқ раиси, муфтий, марҳум шайх Зиёвуддинхон ибн Эшон Бобохон ҳам «Олий даражали Имом Бухорий» ордени билан мукофотланди.

Бу ҳақда президент фармони имзоланди. 

Ўзбекистон мусулмонлари идораси
Матбуот хизмати
Muslim.uz
@muslimuzportal | @Muftiy_Nuriddin_domla |@diniysavollar

Муҳтарам ватандошлар!

Ер юзидаги жамики ислом уммати қатори меҳр-мурувват, эзгулик ва саховат рамзи – муборак Қурбон ҳайитини катта шоду хуррамлик билан кутиб олаётган сиз, азизларни, барча юртимиз мусулмонларини, бутун халқимизни ушбу улуғ айём билан чин қалбимдан самимий табриклаб, ўзимнинг юксак ҳурматим ва эзгу тилакларимни билдиришдан ғоят мамнунман.

Дилларимиз қувончга тўлган мана шундай қутлуғ дамларда аввало эл-юртимиз билан бирга Қурбон ҳайитига тинч-омон етказгани учун Яратганга чексиз шукроналар айтамиз.

Айни пайтда бу муқаддас байрам моҳиятида мужассам бўлган тинчлик, дўстлик ва ҳамкорлик, инсонпарварлик ғоялари бугунги кунда Янги Ўзбекистонда амалга ошираётган ислоҳотларимиз, улкан мақсад ва вазифаларимизга уйғун ва ҳамоҳанг эканини ҳис этиб, кўнгилларимиз янада шукуҳга тўлмоқда.

Юртимиздаги ҳар бир маҳалла, шаҳар ва қишлоқдаги тинчлик ва ободлик, жамиятимиздаги ўзаро ҳурмат, ҳамжиҳатлик ва бағрикенглик муҳитини мустаҳкамлашда Қурбон ҳайити сингари азалий байрам ва қадриятларимизнинг ўрни ва таъсири тобора ортиб бормоқда.

Фурсатдан фойдаланиб, ўзининг фидокорона ва олижаноб меҳнати билан ҳаётимизни янада эркин ва фаровон қилиш, инсон қадрини улуғлашдек эзгу ишларга муносиб ҳисса қўшаётган барча азиз юртдошларимизга чин дилдан самимий миннатдорчилик билдираман.

Қадрли дўстлар!

Кейинги йилларда юртимизда миллий ва диний қадриятларимизни ривожлантириш, виждон ва эътиқод эркинлигини таъминлаш борасида катта ишлар амалга оширилаётгани барчангизга яхши маълум, албатта.

Хусусан, мўмин-мусулмонларимиз учун яратилаётган қулай шароит ва имкониятлар туфайли мана шу Қурбон ҳайити кунларида 15 минг нафар ватандошимиз Маккаи мукаррамада муқаддас ҳаж зиёратини адо этмоқда.

Уларнинг барчасини бугунги улуғ айём билан қутлаб, Ватанимиз равнақи, эл-юртимиз тинчлиги ва фаровонлиги, оилаларимиз, фарзандларимизнинг бахту иқболини тилаб қилаётган дуолари ижобат бўлишини Аллоҳ таолодан сўраб қоламиз.

Ҳеч шубҳасиз, кўп миллатли ва кўп конфессияли халқимизнинг эзгу орзу-интилишларини рўёбга чиқариш, гўзал юртимизни ягона Ватан деб биладиган барча миллат ва элат вакилларининг урф-одат ва анъаналарини сақлаш ҳамда ривожлантиришга биз бундан буён ҳам алоҳида аҳамият қаратамиз.

Ишончим комил, барчамиз биргаликдаги саъй-ҳаракатларимиз билан Янги Ўзбекистонни, миллати, тили ва динидан қатъи назар, ҳар бир фуқаромиз тинч-осойишта, эркин ва фаровон яшайдиган, том маънодаги дўстлик ва бағрикенглик диёрига айлантирамиз.

Мана шу мунаввар лаҳзаларда дунёнинг узоқ-яқин ҳудудларидаги барча мўмин-мусулмонларга самимий табрикларимизни йўллаб, уларнинг мамлакатлари ва халқларига тинчлик ва тараққиёт тилаймиз.

Ҳурматли ватандошлар!

Кейинги йилларда шаклланган яхши анъанамизга мувофиқ, Қурбон ҳайити муносабати билан бу йил ҳам бир неча кундан иборат дам олиш кунлари белгиланди.

Бу хонадонларимизга, ҳаётимизга Ийд ал-адҳонинг эзгулик нури, чинакам байрам кайфиятини олиб киришга хизмат қилади, деб ишонаман.

Муқаддас масканлар, улуғ аждодларимиз қадамжоларини зиёрат қилиш, мўътабар ота-оналаримиз, қариндош-уруғларимиз, ёру биродарларимизни йўқлаш, кўмак ва ёрдамга муҳтожлар ҳолидан хабар олиш, юртимиз бўйлаб саёҳатларни амалга ошириш учун бу – яна бир қулай имконият, десак, тўғри бўлади.

Сиз, азиз юртдошларимни, бутун халқимизни Қурбон ҳайити билан яна бир бор муборакбод этиб, байрамни оила, дўстлар ва яқинлар билан бирга файзли ва мазмунли ўтказишингизни тилайман.

Илоҳим, барча пок ниятларимиз амалга ошсин!

Юртимиз тинч, халқимиз доимо омон бўлсин!

Барча эзгу ишларимизда Яратганнинг ўзи қўллаб-қувватласин!

Шавкат Мирзиёев,

Ўзбекистон Республикаси Президенти

Ўзбекистон мусулмонлари идораси Уламолар Кенгаши табриги

Яратганга шукрки, тараққиётимизнинг янги даврида амалга оширилаётган диний-маърифий соҳадаги ислоҳотлар мусулмон дунёсида юксак эътироф этилмоқда. Сўнгги йилларда, юртимизда виждон ва эътиқод эркинлиги тўла таъминланиши, араб-мусулмон мамлакатлари билан алоқалар жадал тараққий этаётгани ва нуфузлий ташкилотлар билан ҳамкорлик фаоллашаётгани фикримизнинг яққол тасдиғидир.

Яқинда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Халқаро мусулмон уламолар кенгаши аъзоси сифатида қабул қилинганлари ва ушбу халқаро ташкилот сафида фаолият бошлаганлари мана шундай салмоқли ишларининг улкан натижаси бўлди. Шунингдек, мазкур мақом Янги Ўзбекистонда амалга оширилаётган диний-маърифий соҳадаги ислоҳотларнинг халқаро эътирофи бўлиб, юртимиз уламоларининг динимиз ривожига қўшаётган ҳиссаларига берилган юксак баҳодир.

Халқаро мусулмон уламолар кенгаши раиси, профессор доктор Алий Муҳйиддин Қорадоғий томонидан Ўзбекистон мусулмонлари идорасига йўлланган хатда, жумладан, шундай дейилади:

— Халқаро мусулмон уламолар кенгаши Сизга ўзининг юксак эҳтиромини ифода этиб, доимий соғлик-саломатлик ва муваффақият тилайди. Сизга ва Ўзбекистон мусулмонлари идорасига самимий саломларим ва юксак эҳтиромимни йўллайман...

Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг Халқаро мусулмон уламолар кенгашига аъзо этиб қабул қилинганини мамнуният билан маълум қиламан.

Биз ишонамизки, муфтий Шайх Нуриддин Холиқназар ҳазратларининг Халқаро мусулмон уламолар кенгаши сафига қўшилишлари бутун дунёда Ислом ва мусулмонлар хизматидаги муштарак саъй-ҳаракатларимизни янада ривожлантиради.

Шунинг билан бирга, мазкур халқаро ташкилот раҳбари томонидан Ўзбекистон мусулмонлари идораси раиси, фазилатли Шайх Нуриддин Холиқназар ҳафизаҳуллоҳ ҳазратларига, деб бошланган алоҳида мактубда эса шундай жумлалар келтирилади:

— Халқаро мусулмон уламолар кенгаши Сизга ўзининг энг юксак ҳурмат ва эҳтиромини изҳор этиб, доимо соғ-саломатлик ва муваффақиятда бўлишингизни тилайди.

Аллоҳ таолодан Сизга ташкилотнинг фаолиятини қўллаб-қувватловчи фаол аъзолардан бўлиш, мусулмон уммати хизматида, унинг турли муаммоларини ҳал этишдаги мақсадларини рўёбга чиқаришда ўз ҳиссангизни қўшишингизда Яратганнинг Ўзи ёрдам беришини сўраймиз...

Таъкидлаш жоизки, профессор доктор Алий Муҳйиддин Қорадоғий ўз мактубларида Ўзбекистон мусулмонлари идораси ва уламолари билан ҳамкорлик қилиш имконияти пайдо бўлганидан мамнун эканини изҳор этган. Мусулмонлар ўртасида ҳамжиҳатликни мустаҳкамлаш ва мавжуд муаммоларга биргаликда ечим топишга умид боғлаган. Шунингдек, мазкур ҳамкорлик алоқалари ушбу олий мақсадлар учун мустаҳкам пойдевор бўлиб хизмат қилиши ва илмий-маърифий тажриба алмашишга асос бўлишига ишонч билдирган.

Қайд этиш керакки, Шайх Нуриддин Холиқназар ҳазратларининг ушбу нуфузли ташкилотга аъзо бўлишлари Аллоҳ таолонинг иродаси билан 35 йилдан зиёд вақт мобайнида Ислом дини маърифатини кенг ёйиш ва мўмин-мусулмонлар эҳтиёжини таъминлашдаги меҳнатлари самарасидир.

Шайх ҳазратларининг муфтийлик фаолиятларида юртимиздаги ислоҳотларга ҳамоҳанг равишда илмий-тадқиқот марказлари фаолият бошлаши, Фатво маркази ташкил этилиши, масжид-мадрасалар, Қуръон курслари очилиши, қадамжолар обод этилиши, алломалар мероси тадқиқ этилиши ҳамда ҳаж-умра қилувчилар сони кескин ошишида муносиб ҳиссалари бор, албатта.

Муфтий ҳазратларининг Саудия Арабистони, Миср Араб Республикаси, Туркия, Озарбайжон, Германия ҳамда Қозоғистон, Қирғизистонда ўтказилган халқаро анжуманларда диний-маърифий ислоҳотлар ва мўмин-мусулмонларни қийнаётган муаммоларга ечим сифатида илгари сурган таклифлари халқаро майдонда юқори баҳоланган.

Шайх ҳазратлари юртимиз ва хорижий ОАВларида мунтазам чиқишлар қиладилар. Хусусан, ижтимоий тармоқлардаги доимий кузатувчилари сони 2 миллион 200 минг нафардан зиёдни ташкил этади. Ҳазратнинг руҳий тарбия, одоб-аҳлоқ, илму маърифат, фарзанд тарбияси, ота-онани эъзозлаш, она-Ватанга муҳаббат туйғуси каби мавзулар баён қилинган 10 та китоб ҳамда CD, DVD дисклари нашр этилган.

Муфтий ҳазратлари Ўзбекистон мусулмонлари идорасининг олий бошқарув органлари — Уламолар Кенгаши, Олий ҳайъати раиси, Имом Мотуридий халқаро илмий-тадқиқот марказининг Халқаро Илмий ҳайъати раиси каби масъулиятли вазифаларга сайланганлар. Шунингдек, Ўзбекистон халқаро ислом академияси Илмий кенгаши томонидан “Фахрий доктор” илмий унвони ҳам берилган.

Навбатдаги мартаба ва мақом муфтий Шайх Нуриддин Холиқназар ҳазратларига шараф ва масъулият юклайди.

Маълумот ўрнида, Халқаро мусулмон уламолар кенгаши 2004 йилда 50 нафар уламо томонидан тузилган мустақил, нуфузли ташкилот. Бош қароргоҳи Қатар пойтахти Доҳа шаҳрида жойлашган.

Ташкилот мақсадлари: уламоларнинг жамиятдаги мавқеини ошириш, уммат олдидаги муаммоларни ҳал этиш юзасидан таклифлар ишлаб чиқиш ва амалий саъй-ҳаракатларни амалга оширишдан иборатдир.

Ташкилот вазифалари: Ислом дини маърифатини кенг тараннум этиш, замонавий ахборот воситалари ва тарғибот-ташвиқот орқали Ислом дини таълимотларини оммага етказиш, шунингдек, ҳар бир фаолиятда илм-фан ва мўътадилликка асосланиш ҳамда мўмин-мусулмонлар ҳаётидаги муҳим масалалар билан шуғулланишдир.

Ташкилот тузилмаси ва бошқарув шакли: кенгаш бош котиб ва унинг уч нафар ўринбосари томонидан бошқарилади. Шунингдек, кенгаш таркибида “Аъзоликка қабул қилиш”, “Фиқҳ ва фатволар”, “Маданият, ғоя ва тадқиқотлар”, “Исломий масалалар”, “ОАВ ва жамоатчилик билан ишлаш”, “Таржималар ва таълиф” ҳамда “Мулоқот” каби шўъбалар мавжуд.

Халқаро мусулмон уламолар кенгаши ўз тарихида бир қанча муҳим ишларни амалга оширган. Жумладан, Суданнинг Дарфур вилоятида тинчлик ўрнатилишига муносиб ҳисса қўшган.

“Одам ўғирлаш ва савдосига қарши” ва “Бегуноҳ одамларни ўлдириш оғир гуноҳлиги” ҳақида фатволарни ишлаб чиққан. Айрим мамлакатларда бўлиб ўтаётган нотинчликлар юзасидан ҳам ўз муносабати ва баёнотларини  эълон қилади.

Ҳозирги кунда Кенгашга мусулмон дунёсидаги энг кўзга кўринган 46 нафар нуфузли уламо аъзо сифатида қабул қилинган. Марҳум Шайх Муҳаммад Содиқ Муҳаммад Юсуф ҳазратлари ҳаётлик даврларида ушбу ташкилотга аъзо бўлган эдилар.

Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ушбу ташкилотга аъзо бўлишлари Ўзбекистоннинг мусулмон дунёси билан ўзаро ҳамкорлигини янада кучайтириш, олдимизда турган муаммоларга ечим топиш ва ислом умматининг бирдамлигини мустаҳкамлашда муҳим омил бўлиб хизмат қилади.

Шунингдек, мазкур аъзолик юртимиз алломалари халқаро конференцияларда муносиб иштирок этиши, дунё ҳамжамиятига уламоларимизнинг илмий меросларини янада кенг тарғиб қилиш ва жаҳолатга қарши маърифат билан курашиш йўналишидаги ишларни янги босқичга олиб чиқишга муҳим ҳисса қўшади.

Ўзбекистон мусулмонлари идораси Уламолар Кенгаши,

2023 йил 27 июнь, ҳижрий 1444 йил 9-зулҳижжа,

Тошкент шаҳри

Ўзбекистон мусулмонлари идораси 

Матбуот хизмати 

muslim.uz

Бугун, 27 июнь арафа куни юртимиз зиёратчилари ҳажнинг энг муҳим фарзини адо этиш мақсадида, Арофат майдонига етиб келдилар.

Ҳадисларда келтирилишича, Арофат улуғ манзиллардан бири бўлиб, бу ерда қилинган дуолар шак-шубҳасиз қабул бўлади. Буни яхши англаган ҳожилар ҳар дамни ғанимат билиб, бундан унумли фойдаланмоқдалар.

Ишчи гуруҳи томонидан зиёратчиларимиз хотиржам ибодат қилишлари учун кенг ва шинам чодирлар тайёрланган, совуткич ва музлаткичлар узлуксиз ишламоқда, уч маҳал иссиқ овқат, ширинлик ва салқин ичимликлар мунтазам тақдим этилмоқда.

Ҳожиларимиз Арафотда дуои хайрлар, ибодатлар билан бўлиб, пешин ва аср намозларини жам қилиб ўқийдилар. Дуо ва тазарруларда бардавом бўладилар. Аллоҳ таолодан юртимиз тинч, халқимиз ҳаёти янада фаровон бўлишини, фарзанду аржумандларимиз бахту саодатини сўраб илтижолар қиладилар.

#haj2023

Ўзбекистон мусулмонлари идораси
Матбуот хизмати
Muslim.uz
@muslimuzportal | @Muftiy_Nuriddin_domla |@diniysavollar