Ўзбекистон халқи ва ҳукумати оғир жудоликка учради. Ўзбекистон Республикасининг биринчи президенти, мустақиллигимиз асосчиси, буюк давлат ва жамоат арбоби, Ўзбекистон Қаҳрамони Ислом Абдуғаниевич Каримов 78 ёшида вафот этди.

Бу хабар истисносиз бутун Ўзбекистон халқини чуқур изтиробга солди. Юртбошимизнинг бетоб экани ҳақида ахборот берилган кундан бери барча ватандошларимиз давлатимиз Раҳбарининг соғайиб кетишларини сўраб, дуолар қилиб турдилар. Аммо тақдир қалами битган иш амалга ошмай қолмайди. Тирик жон борки, ҳаммаси ўлим шарбатини тотади, боқийлик фақатгина Аллоҳ таолога хосдир.

Ислом Каримов ўзининг доно сиёсати, ўткир фаросати, ўзбекка хос ғурури, узоқни кўра билиш қобилияти ва теран тафаккури билан тарихга кирди.

Халқимиз миллий истиқлолга эришувида дастлабки оғир кунларни, ғанимлар миллатлараро низо ва фитна солишга уринаётган таҳликали даврларни бевосита Президентимизнинг мардонаворлиги ва қатъияти билан енгиб ўтди. Яратганнинг марҳамати ва Юртбошимизнинг донишмандларча юритган сиёсати туфайли халқимиз бир тану-бир жон бўлиб, тараққиёт сари юксалиб борди.

Бугун Ўзбекистон ривожланишнинг ўзига хос йўли, улкан бунёдкорлик ишлари, тинч-осойишта ҳаёти, барқарор сиёсати ва дўстона муносабатлари билан эришган ютуқлари туфайли халқаро ҳамжамиятда кўпчиликнинг ҳавасини, баъзиларнинг эса ҳасадини келтирадиган даражага етди. Буларнинг барчасига бевосита муҳтарам Президентимизнинг раҳнамолигида эришилди.

Ислом Каримов “Аллоҳ қалбимизда, юрагимизда”, деб баралла айтадиган, “Муқаддас Ислом дини бизнинг қон-қонимизга сингиб кетган, уни ҳеч қандай куч чиқара олмайди!” дея доимо таъкидлайдиган эътиқодли мусулмон сифатида динимиз равнақи учун улкан ишларни амалга оширди. Жумладан, мустақилликнинг дастлабки йиллариданоқ, муборак Рамазон ва Қурбон ҳайитлари дам олиш куни деб эълон қилинди; мусулмонларга ўз ибодатларини эмин-эркин бажаришлари учун барча шароитларни яратиб берилди, янги масжидлар, мадрасалар қурилди, мавжудлари қайта таъмирланди, кўплари янгидан барпо этилди; Тошкент ислом университети ташкил этилди; ҳар йили минглаб юртдошларимиз ҳаж ва умра ибодатларини бажаришлари учун дунё мусулмонларининг ҳавасини келтирар даражадаги қулай шароитлар яратилди. Ҳозир ҳам кўп минг мўмин-мусулмон ватандошларимиз муқаддас диёрларда ҳаж ибодатини бажариш учун ҳозирлик кўришмоқда, улар ҳам бу машъум хабардан қаттиқ қайғуга тушиб, дуолар шаксиз қабул бўладиган маконларда марҳум Юртбошимизнинг ҳаққига Аллоҳ таолодан мағфират сўрашмоқда. Биз ҳам ана шу дуоларга қўшилган ҳолда, чин кўнглимиздан, ихлос билан дуо қилайлик: Бисмиллаҳир Роҳманир Роҳим. Алҳамдулиллаҳ, васоллату вассаламу аъла Расулиллаҳ. Парвардигоро, Мустақил Ватанимиз Ўзбекистоннинг биринчи Президенти Ислом Каримовнинг пок имонларини, муқаддас динимиз равнақи, мўмин-мусулмонларнинг манфаати учун қилган барча хайрли амалларини ўзларига ҳамроҳ айлагайсан!

Ватанимиз, халқимиз тинчлиги, фаровон ҳаётимиз учун қайғуриб, шу йўлда умрини бахшида этгани ҳаққи-ҳурмати, Сен ҳам бу зотнинг борадиган манзили, ётадиган маконини тинч-осойишта айлагайсан, Ўзингнинг раҳматинг, ризолигинг билан сийлагайсан!

Ортда қолган аҳли-оиласи, фарзандлари ва бутун Ўзбекистон халқига сабри жамил ато айлагайсан! Васолли аъла Муҳаммад ва аъла алиҳи ва соҳбиҳи ажмаин. Бироҳматика ё Арҳамар Роҳимийн. Омин!

ЎМИ Матбуот хизмати

Йиллар, ойлар кунлар дақиқа ва сониялар Аллоҳ таолонинг бандага берган буюк бир неъмати ва ўз навбатида омонати ҳамдир. Зотан, банда умр деб аталмиш бу улуғ неъматни қадрлаши ва ундан унимли фойдаланиши лозим. Аллоҳнинг наздида ҳар бир ой ёки куннинг ўзига яраша аҳамияти бор. Хусусан ойлар ичида ҳижрий-қамарий йилнинг охирги ойи зулҳижжа ойи харом (уриш тақиқланган) ойлардан ҳисобланади. Мана шу ойнинг биринчи ўн куни алохида эътиборга молик. Бу кунлар тоат ва яхши амалларнинг кўпроқ қилинадиган мавсум бўлиб, ким ўзарга яхшиликларни кўпайтиш ва мусобақа қилиш лозимки, хатто баъзи уламоларимиз бу кунларнинг дунё кунларининг энг афзали деб баҳолашган. Уламо ва фузалолар мазкур кунлар ўзига жуда кўплаб яхшиликларини ўз ичига олганидан Рамазоннинг охирги ўн кунлигидан ҳам афзал деб қарашган ва  у кунларда кўпроқ солиҳ амал қилишга қаттиқ бел боғлаганлар. Нафл рўза, садақотлар ҳамда эзгу амаллар билан зийнатлашни таъкид қилганлар.

 Ибн Аббос розияллоҳу анҳудан ривоят қилинган ҳадисда: Пайғамбаримиз соллаллоҳу алайҳи васаллам: “Ҳеч бир кундаги солиҳ амал Аллоҳ учун ушбу ўн кунчалик маҳбуб эмас...”-деганлар. (Бухорий ривояти). Шу билан биргаликда Аллоҳ таоло ўзининг каломи шарифида бу куннинг улуғлиги ва фазилати кўплигидан қасам ичиб “Фажр” сурасининг 1-2-оятларида шундай марҳамат қилган:

وَالْفَجْرِ* وَلَيَالٍ عَشْرٍ

 Қасамёд этаман тонг (вақти) билан, “Ўн кеча” билан,

 Абу Ҳурайра розияллоҳу анҳудан ривоят қилинади: Набий соллаллоҳу алайҳи васаллам:”Аллоҳ учун Зулҳижжанинг ўн куничалик Унга ибодат қилишдай маҳбуброқ кун йўқ. Уларнинг бир кунлик рўзаси бир йиллик рўзага тенг. Уларнинг бир кечасини бедор ўтказиш эса, Қадр кечасини бедор ўтказишга тенгдир”-дедилар. (Термизий ривояти).

Бу кунларнинг афзалликлардан яна бири, ислом дини арконларидан бири бўлган ҳаж ибодатини шу кунларда адо этилишидадир. Албатта, Аллоҳ таоло насиб этиб ҳаж қилишган имкон топган бандалар Буюк Зотнинг меҳмони бўладилар.

Яна, бу муборак кунларда қилиш вожиб бўлган амаллардан бири, “такбири ташриқ” арафа куни бомдод намозидан зулҳижжанинг ўн учинчи куни аср номозини адо этгач, байрам такбирини айтишликдир. Ҳанафий мазҳаби уламолари йигирма уч фарз намозларидан сўнг айтишни фожиб санаганлар.

Ҳажга бормаган кишилар учун арафа кунининг нафл рўзасини тутишликка тарғиб қилинган. Абу Қатода розияллоҳу анҳудан ривоят қилинади:”Аллоҳдан умид қиламанки, Арафа кунининг рўзаси ундан олдинги сананинг ва ундан кейинги сананинг каффороти бўлур”-дедилар (Абу Довуд ривояти).

 Шу кунларда қилинадиган амаллардан яна бири ҳайит (ийд)  намозини ўқишдир.

فَصَلِّ لِرَبِّكَ وَانْحَرْ

Бас, Раббингиз учун намоз ўқинг ва (туя) сўйиб қурбонлик қилинг! (Кавсар сураси 2-оят). Бу оятдаги намоз ийд намозидир. Шунинг учун Ҳанафий мазҳабида ийд намози вожиб, дейилган.

Демак, бу муборак кунларда қилинадиган ишлардан яна бир, жонлиқ сўйишга қодир бўлган кишига қурбонлик қилиш вожиб бўлади. Унинг вақти, ҳайит намозини адо қилгандан зулҳижжани ўн иккинчи куни кун ботгунича. Оиша розияллоҳу анҳодан ривоят қилинади: Набий соллаллоҳу алайҳи васаллам: ”Одамзот сўйиш куни қон оқизишдан кўра Аллоҳга маҳбуброқ иш қилган эмас. Албатта, у ҳайвонлар қиёмат куни шохлари, жунлари ва туёқлари билан келурлар. Албатта, қон ерга тушишидан олдин Аллоҳнинг ҳузуридаги маконга етур. Уни чин кўнгилдан чиқарингиз”-дедилар. (Термизий ривояти).

Хулоса ўринида шуни айтиш ўринлики, зулҳижжани ўн кунида имкон қадар савоб, эзгу амалларни кўпайтиришга шошилиайлик, шунда жуда катта яхшиликлар соҳибига айланамиз. Яратган бу муборак кунларни халқимизга баракотли қилсин.

 Жалолиддин Ҳамроқулов,
ТИИ “Таҳфизул Қуръон” кафедраси мудири,
 “Новза” жоме масжиди имом хатиби

30 август куни Самарқанд вилояти бўйлаб жойларда «Ўзбекистон мустақиллигига 25 йил» эсдалик нишонига муносиб кўрилган номзодларнинг тақдирлаш маросими бўлиб ўтди.

Ватанимиз истиқлолининг 25 йиллигини кенг нишонлаш муносабати билан ҳамда мамлакатимиз мустақиллигини мустаҳкамлаш, унинг иқтисодий, сиёсий, ижтимоий, илмий, маънавий салоҳиятини ва мудофаа қудратини юксалтириш, давлатимиз сарҳадларининг дахлсизлигини таъминлаш, демократик ислоҳотларни амалга ошириш, жамиятимизда ҳукм сураётган миллатлараро дўстлик ва тотувликни, тинчлик ва барқарорликни асраш, миллий маданиятимиз ва санъатимизни ривожлантириш, соғлом ва баркамол авлодни вояга етказиш, ёшларимизни ватанпарварлик ва истиқлол ғояларига садоқат руҳида тарбиялаш ишларига муносиб ҳисса қўшган юртдошларимизни тақдирлаш мақсадида таъсис этилган ушбу кўкрак нишони номзодларга вилоят ҳокими, шунингдек, бунга вакил қилинган бошқа шахслар томонидан тантанали вазиятда топширилди.

Таъкидлаш лозимки, юртимизда виждон эркинлиги таъминланганининг юксак намунаси сифатида мустақиллигимизнинг 25 йиллиги муносабати билан таъсис этилган ушбу кўкрак нишонига муносиб кўрилганлар орасида диний соҳа ходимларининг борлиги қувонарлидир. Ўзбекистон мусулмонлари идораси вилоят вакиллиги тизимида хизмат кўрсатаётган қатор дин ходимлари ҳам ушбу кун кўкрак нишони тақдим этилганлар қаторидан жой олдилар. Жумладан:

Нуриддинхон Исламов – Ўзбекистон мусулмонлари идораси Самарқанд вилояти вакили, вилоят бош имом хатиби;

Зайниддин Эшонқулов – вилоят вакили ўринбосари, Имом Бухорий жоме масжиди имом хатиби;

Шоди Ҳақбердиев – Ургут туман бош имом хатиби;

Аминжон Холбобоев – Ургут туман “Чўбин” жоме масжиди мутаваллиси;

Жаҳонгир Хотамов – Самарқанд шаҳар “Хўжа Абду Мўмин” жоме масжиди имом хатиби;

Хайрулло Дўстмуродов – Каттақўрғон шаҳар бош имом хатиби;

Иззатулла Бойқобилов – Қўшработ туман бош имом хатиби;

Ғани Абиев – Қўшработ туман “Домла Омонулла Охун” жоме масжиди имом хатиби;

Нодира Ибрагимова – Самарқанд шаҳар ҳокимлиги ҳузуридаги “Аёллар маслаҳат маркази” мутахассиси, Боғишамол маҳалла отинойиси.

30 августнинг ўзида кечга яқин вилоят вакиллиги биносида кўкрак нишонга лойиқ кўрилганларни қутлаш маросими ўтказилди.

«Ўзбекистон мустақиллигига 25 йил» кўкрак нишонига лойиқ кўрилган юртдошларимизнинг барчаларини табриклаган ҳолимизда, келгусида юрт равнақи, халқ фаровонлиги йўлида янада кўплаб ишларни амалга оширишларига тилакдошмиз.

ЎМИ Самарқанд вилояти вакиллиги

Бугун 31.08.2016 й. Ўзбекистон мусулмонлари идорасининг Тошкент вилоят вакиллигида мамлакатимиз мустақиллигининг 25 йиллигига бағишланган байрам тадбири ўтказилди. Тадбирда шаҳар ва туман бош имом-хатиблари, вилоятда узоқ йиллардан буён самарали хизмат қилиб келаётган нуроний имом-хатиблар таклиф қилиндилар.

Ўзбекистон мусулмонлари идораси раиси ўринбосари Иброҳимжон Иномов йиғилганларни энг улуғ, энг азиз байрамимиз билан қутлар экан, истиқлол даврида эришилган ютуқлар, жумладан дин соҳасида олиб борилган эзгу ишлар ҳақида алоҳида тўхталиб ўтди. Истиқлол шарофати билан аждодларимизга кўрсатилган эҳтиром, уларнигнг меросини тиклаш борасида амалга оширилган ишлар, масжидларимиздаги ободонлик ва қулайликлар,  диний таълим, ҳаж ва умра борасидаги эзгу ишлар барча-барчани қувонтираётганини мамнуят билан тилга олди.

Йиғилишда сўз олган Ўзбекистон мусулмонлари идораси ходими Музаффаржон Камолов, “Зангиота” зиёратгоҳи ёдгорлик мажмуаси раиси Собиржон Муродов, Зангиота тумани “Умир” жоме масжиди имом-хатиби Нурали Мавлонов, Паркент тумани бош имом-хатиби Мансур Мансуровлар истиқлол даври ютуқларини, унда инсон қадри, дин эркинлиги, миллий қадрият ва урф одатларга эҳтиром кўрсатилганини яқин тарихий давр мисоллари асосида тушунтириб, бугун барчанинг дилида шукроналик ва мамнуят ҳисси тўлиб тошаётганининг гувоҳи бўлиб турганимизни таъкидлаб ўтдилар.

Ўзбекистон мусулмонлари идорасининг буйруғига биноан вилоятда кўп йиллар давомида имом-хатиб сифатида самарали фаолият юритган Қуйи Чирчиқ тумани бош имом-хатиби Нурулло Ҳожиев, Зангиота тумани “Абдуллоҳ ибн Аббос” жоме масжиди имом-хатиби Ғуломиддин Эргашев, Оҳангарон тумани “Пайғамбар ота” жоме масжиди имом-хатиби Абдуқодир Жакбаровларга байрам муносабати билан эсдалик совғалар топширилди.

Йиғилганларга байрам дастурхони ёзилди.

Юртимиз тинчлиги, осмонимиз мусаффолиги, истиқлолимиз абадий бўлишини тилаб дуолар қилинди.

Юртимиз мустақиллиги учун жон фидо қилган аждодларимиз, шунингдек, соҳада хизмат қилиб ўтган имом-хатибларимиз хотирланиб, уларнинг ҳақларига Қуръон таловати савоблари бахшида қилинди.

М.Насриев

29 август куни Ўзбекистон мусулмонлари идораси мажлислар залида Ўзбекистон мусулмонлари идораси ва унинг тизимида фаолият кўрсатаётган бир гуруҳ ходимларга “Ўзбекистон мустақиллигига 25 йил” эсдалик нишонларини топширишга бағишланган тадбир бўлиб ўтди.

Тадбирда Ўзбекистон мусулмонлари идораси раҳбарияти, масжид ва мадраса имом-домла ва хизматчилари, идора тизимидаги муассасалар ходимлари, Вазирлар Маҳкамаси ҳузуридаги Дин ишлари бўйича қўмита вакиллари иштирок этди. 

Ўзбекистон мусулмонлари идораси раиси, муфтий Усмонхон Алимов ўз нутқида Аллоҳнинг инояти, қолаверса, доно Юртбошимизнинг саъй-ҳаракатлари билан ҳукм сураётган тинчлик, осойишталикнинг ҳар бир лаҳзасини қадрига етиш ҳақида сўзлаб ўтдилар. Бундан ташқари, мустақиллик туфайли тарихан қисқа вақт ичида диёримиз фаровон давлатлардан бирига айланиб, дунёнинг жадал ривожланаётган давлатлари қаторидан ўрин эгаллагани яна бир бор таъкидлаб ўтилди.  

Истиқлол шарофати билан миллий анъана ва қадриятларимизни асраб-авайлаш, равнақ топтиришга оид эзгу ишлар халқимиз, қолаверса, ёшлар маънавиятини юксалтиришда муҳим аҳамият касб этаётгани айтиб ўтилди.

Шундан сўнг, “Ўзбекистон мустақиллигига 25 йил” эсдалик нишонлари ўз эгаларига тантанали равишда топширилди. Ушбу қўлга киритилган олий мукофот диний идорамизда сидқидилдан фаолият олиб бораётган барча хизматчиларнинг ютуғи эканлиги эътироф этилди.

Шунингдек, энг улуғ, энг азиз айём – истиқлолимизнинг 25 йиллиги муносабати билан Ўзбекистон мусулмонлари идораси тизимида фаолият кўрсатаётган бир қатор фахрий, фаол ҳамда ўзгаларга намуна бўлаётган ишчи, ходимлар идоранинг қимматбаҳо совғалари билан тақдирландилар.

ЎМИ Матбуот хизмати