Яқинда «Оила» илмий-маркази томонидан юртдошларимиз ўртасида оилалар бузилиб кетишининг асл сабаблари ҳақида ижтимоий сўров ўтказилди. Сўровнома натижаларига кўра, оилаларнинг 22,5 фоизи бир-бирини тушунмаслик ёки тушунишни хоҳламаслик, фарзандсизлик оқибатида, 15,6 фоизи оилага ўзгаларнинг аралашуви, 15 фоизи ўзаро жанжаллар, 11 фоизи сурункали пиёнисталик туфайли бузилиши маълум бўлган.

Чиндан ҳам бугунги кунда, никоҳ дея аталмий муқаддас ва илоҳий риштанинг узулишига кўплаб сабаблар, жумладан: оила қурувчиларда оила ва оилавий муносабатлар ҳақида билимнинг етишмаслиги, ароқхўрлик ва гиёҳвандлик, ёш оилага ота-онанинг беҳуда аралашуви, эр-хотинларнинг бир-бирлари билан бўлаётган алоқаларида сабр ва бағрикенгликнинг етишмаслиги асосий омил бўлмоқда.

Навоий вилояти Қизилтепа тумани бош имом-хатиби Завқиддин домла Орипов кўплаб ажрим низоли, ажрим ёқасига келиб қолган оилаларни ислоҳ қилиб келади. Эр-хотинлар, қайнона-қайноталарга динимизнинг кўрсатмасини етказади, насиҳат қилади. Йил давомида тумандаги имомлар билан биргаликда маҳалларда жами 403 та оила ислоҳ қилиниб, яраштирилганлиги қувонарли ҳол.

Шундай хайрли ишлардан бири куни кеча, 18 декабрь куни Тавоис қишлоғида истиқомат қилувчи Каримовлар оиласини яраштириш билан якун топди. Томонлар тингланганда, арзимас сабаб, яъни қайнона-келин муносабатларидаги совуқлик, феъл-атворларига мослаша олмаслик экани аён бўлди.

Имом домла ўн бир йилдан буён бирга истиқомат қилаётган қайнона-келиннинг ҳамон инсофга келмаслиги, адоватда бўлиши бу жоҳиллик, нодонлик эканини уқтирди.

Дунёдаги барча махлуқотларга оид нарсаларнинг чегараси бўлгани каби, ота-она ҳаққининг ҳам чегараси бор. Банданинг Аллоҳнинг амрига зид бўлган хоҳиши рад қилинади. Холиққа маъсият бўладиган нарсада махлуққа итоат қилинмайди.

Ислом таълимотида иложи борича оилани мустаҳкамлашга амр қилинган. Бошқа бировнинг, агар ўша биров ота-она бўлса ҳам, хоҳишига биноан оилани бузишга рухсат йўқ. Бу ҳақиқатни барча уламолар ўзларининг қадимги ва янги китобларида таъкидлаганлар.

Имом-хатиблар, отинойилар деярли ҳар куни ана шундай нотинч оилаларни ислоҳ қиладилар, муросага келтириш йўлида хизмат қиладилар. Бу уларнинг дин, миллат, юрт олдидаги масъулиятли вазифаларидир. Биз юқоридаги маълумот билан қайсидир оиланинг муаммосини ошкор қилиш ниятидан йироқмиз. Мақсадимиз, бу каби воқеалардан арзимас сабаблар билан жанжал кўтарётган, турмушига қаноат қилмаётган ёхуд оғзининг бир четидан бемалол ўзича “талоқ” лафзини айтиб Аллоҳ таолонинг Аршини ларзага келтираётган эр ва хотинлар, қайнона ва қайнота, қуда-андалар ибрат олсинлар, ўйлаб кўрсинлар. Имом етказса,  шариатни етказади.  Ҳеч бир нарса беҳикмат содир бўлмайди, балки Аллоҳ ана шундай оилаларга тўғри йўлни, ечимни эслатиш учун илм аҳлини рўпара қилади. Қиёматда эса етказилган эслатмаларни олган ёки олмаганлигидан қаттиқ сўралади.

Ўзбекистон мусулмонлари идораси Масжидлар бўлими

Halifa-Al Nahaian Аqmeshitі жоме масжиди ташаббуси билан Чимкент кўчаларида "Ўқи! Аллоҳ номи билан" деб номланган акция ташкил этилди. Акцияда муқаддас Қуръони китоблари аҳолига бепул тарқатилган.

muftyat.kz сайтига кўра, ушбу йирик акцияда Иммиграцион департамент раҳбарининг ўринбосари Аҳмаджон ҳожи Керимбек ва Қувайтдаги Бутунжағон хайрия жамғармаси ваколатхонасининг бошлиғи доктор Ясир Мохаммед Али иштирок этган.

Ўзбекистон мусулмонлари идораси Матбуот хизмати

Жорий йилнинг 13 декабрь жума куни Ўзбекистоннинг Америка Қўшма Штатлари пойтахтидаги элчихонаси АҚШ ғарбий соҳилидаги энг катта масжид - Виржиния штати, Стерлинг шаҳридаги Даллес мусулмон жамоатчилик маркази (ADAMS Center)да брифинг ўтказди. Бу ҳақда kun.uz нашри хабар беради.

Ушбу тадбир жума намози доирасида ташкил этилди. Унда 800 нафардан ортиқ киши иштирок этган.

Жума намозида мамлакатнинг АҚШдаги элчиси Жавлон Ваҳобов чиқиш қилиб, Қўшма Штатлар мусулмонлари учун Ўзбекистондаги зиёрат туризмининг улкан имкониятлари ҳақида сўзлаб берди. Ўзбекистонлик дипломат жума намозида мамлакатнинг бой тарихий-маданий мероси, анъанавий исломий қадриятларни жамиятда сақлаш ва тарғиб қилиш, шунингдек, мамлакатда диний эркинликни таъминлаш бўйича кўрилаётган чора-тадбирлар тўғрисида батафсил маълумот тақдим этди.

Масжид бош имоми, ADAMS маркази раҳбари Имом Мажид намозхонларга мурожаат қилиб, республика раҳбарияти томонидан ислом дини ғояларини тарғиб қилишга катта аҳамият берилаётганини эътироф этди. «Ўзбекистон исломнинг асл моҳиятини сақлаб қолиб, уни ўқитишнинг илғор тажрибаларини жорий этиш, малакали мутахассислар - исломшунос олимлар тайёрлаш бўйича кучли ўзбек мактабини яратишга муваффақ бўлган мамлакат сифатида жаҳон ҳамжамияти учун намуна», - деди у.

Имом Мажиднинг таъкидлашича, «Ўзбекистон асрлар давомида бунёд этиш муҳити ҳукмрон бўлган, етакчи олимлар ишлаган, илғор илмий ишлар ишлаб чиқилган ислом цивилизациясининг марваридидир». У Имом ал-Бухорийнинг, Ал-Хоразмийнинг, Ибн Синонинг ҳиссасини алоҳида қайд этиб ўтди.

Америкалик имомга кўра, АҚШ мусулмонлар жамоатчилиги орасида миллий туристик брендни янада оммалаштириш учун мустаҳкам асос бўлган бир қатор омиллар мавжуд.

Биринчидан, Ўзбекистон қадимий шаҳарларнинг бой меъморий меросига эга.
Иккинчидан, мамлакатда кўплаб бебаҳо қўлёзмалар сақланмоқда, шу жумладан Усмон Мусҳафи.
Учинчидан, республикада исломий таълимотнинг институционал асослари яратилди.
Тўртинчидан, ҳукумат зиёрат туризмини ривожлантириш механизмларини фаол жорий этмоқда.
Бешинчидан, «Ўзбекистон дунёга кенг очилмоқда».

Жума намозидан сўнг Имом Мажид билан алоҳида учрашув бўлиб ўтди. Музокаралар чоғида амалий ҳамкорликни ривожлантириш масалалари муҳокама қилинди. Жумладан, америкалик мусулмонлар гуруҳларини мунтазам равишда Ўзбекистонга юбориш масаласи кўриб чиқилди.

Ўзбекистон мусулмонлари идораси Матбуот хизмати

Ўзбекистон Республикаси Президенти маслаҳатчиси Рустам Қосимов ва Бош вазир ўринбосари Элёр Ғаниев бошчилигидаги делегация 2019 йил 19-21 декабрь кунлари Малайзияга ташриф буюради. Бу ҳақида Ташқи ишлар вазирлиги матбуот хизмати хабар берди.

Мамлакатимизнинг Малайзиядаги Элчихонаси берган маълумотга кўра ташриф чоғида Ўзбекистон делегацияси “Миллий суверенитетни қўлга киритишда тараққиётнинг роли” мавзусидаги Куала-Лумпур саммитида иштирок этади.

Саммит 2014 йилдан бери ўтказиб келинади. Унда мамлакат етакчилари, турли давлатларнинг жамоатчилик, ишбилармонлик, академик ва илмий доиралари вакиллари иштирок этиб, мусулмон олами олдида турган таҳдидларни бартараф этиш, бу борада илғор тажрибаларни алмашиш ҳамда ислом тамаддунини ривожлантиришнинг энг мақбул йўлларини излаб топиш бўйича фикр алмашади.

Малайзия Бош вазири Маҳатҳир Моҳаммад Саммитнинг раиси ҳисобланади.

Тадбир ишида Осиё ва Яқин Шарқнинг давлат ва ҳукумат раҳбарлари ҳамда бошқа мамлакатлар ҳукуматларининг юқори мансабдорлари иштирок этиши режалаштирилган.

Ўзбекистон делегацияси ташрифи дастурида Куала-Лумпур шаҳрида қатор вазирлик ва идоралар, Малайзиянинг йирик компаниялари раҳбарлари билан икки томонлама муносабатларни янада ривожлантириш истиқболларини муҳокама қилиш мақсадида учрашувлар ўтказиш ҳам кўзда тутилган.

Ўзбекистон Халқаро ислом академиясининг Малайзиянинг қатор етакчи ислом университетлари ва илмий-тадқиқот марказлари билан амалий ҳамкорлиги тўғрисида битим имзолаш ҳам режалаштирилган.

Ўзбекистон мусулмонлари идораси Матбуот хизмати