Ҳадис илмида дунё имоми, ҳадис мулкининг амири  номларини олган Имом Бухорий раҳматуллоҳи алайҳнинг қўним топган равзалари Ислом оламида юксак эътиборга эга бўлган масканлардан ҳисобланади. У зотни зиёрат қилиш учун бутун ислом оламидан зиёратчилар, олиму талабалар ташриф буюрадилар.

8 ноябрь куни юртимизга келган ҳадис устози, аллома, муҳаддис, танқидчи шайх муфтий Абдуллоҳ ибн Умар Башир Маъруфий ал-Аъзомий ал-Ҳиндий бошчилигидаги меҳмонлар Ўзбекистон бўйлаб сафар қилмоқдалар. Бугун, 11 ноябрь куни меҳмонлар Ислом оламида катта ҳурмат билан тилга олинадиган Имом ал-Бухорийнинг қабрлари жойлашган зиёратгоҳ ва ҳадис мактабида бўлдилар. Аввал Имом Бухорий ҳазратларининг қабрлари зиёрат қилинди. Тиловат ва дуолардан сўнг мажмуа ёнида жойлашган ҳадис мактабида бўлиб, бу масканда таҳсил олаётган талабалар билан учрашув бўлиб ўтди. Учрашув жараёнида муҳаддис, танқидчи шайх муфтий Абдуллоҳ ибн Умар Башир Маъруфий ҳадис илмидан мавъизалар қилди.

Меҳмонларнинг ушбу ташрифи чоғида уларга ҳадис мактаби ректори Олимхон Юсупов ва устоз Маҳмуджон домла Ибодуллаев ҳамроҳлик қилди.

Шунингдек, юртимизда меҳмон бўлиб турган доктор Джанади Бимо Пракосо бошчилигдаги Индонезия мамлакатининг турзимни ривожлантириш бўйича делегацияси ҳам Имом Бухорий мажмуасига ташриф буюрди. Меҳмонлар буюк бобокалонимизнинг мақбараларини зиёрат қилди.

ЎМИ Самарқанд вилоят вакиллиги

Sabq электрон газетасининг маълум қилишича, 32 йил давомида покистонлик муслима Насим Ахтар томонидан матога тўқиб тайёрланган Қуръони карим кўргазмада намойиш учун жойланди. Ушбу ягона нусхадаги Мусҳаф Жабал Омар Қуръон кўргазмасига қўйилган бўлиб, ҳар куни минглаб инсонлар ушбу кўргазмадан баҳраманд бўлиш учун ташриф буюришлари қайд этилган.

Маълумотларга кўра, 1987 йилда 30 ёшида бўлган покистонлик муслима Қуръони каримни тўқишни бошлаган ва 2018 йил январида у ноёб Мусҳафни кўчиришни тугатган.

Ушбу Мусҳафни яратишда 300 метрдан ортиқ мато ва 25 минг метрданортиқ ип ишлатилган. Қуръони карим 10 томдан иборат бўлгани, ҳар бир қисмда 3 жуздан иборат экани айтилган.

Муслима тўқиш билан пешин намозидан кейин бўш вақтида шуғулланган.

Ўзбекистон мусулмонлари идораси Матбуот хизмати

Россиянинг Санкт-Петербург ва Шимоли-ғарбий минтақа мусулмонлари идораси томонидан шаҳар марказий жоме масжидида Мавлид тадбири ташкил этилди.

Мавлидда иштирок этиш учун 1,5 минг нафардан ортиқ мусулмонлар ташриф буюришгани қайд этилган. Тадбир Қуръони карим тиловати билан бошланиб, саловат ва нашидлар ижро этилган. Тадбирда қатнашган Санкт-Петербург ва Шимоли-ғарбий минтақа мусулмонлари идораси муфтийси Равил ҳазрат Панчеев йиғилганларга мурожаат қилиб, бундай учрашувларни ташкил этишнинг муҳимлиги ҳақида фикр билдирган.

Ўзбекистон мусулмонлари идораси Матбуот хизмати

12 ноябрь куни Навоий вилоятида фаолият юритаётган отинойилар ташаббуси билан Мавлид ойи муносабати билан "Қосим Шайх" жоме масжидида имконияти чекланган (эшитиш ва гапириш қобилиятида нуқсони бўлган) шахслар учун эҳсон дастурхони ёзилди.

Отинойилар йиғилганларга Робиъул аввал ойининг фазилати, Пайғамбаримиз соллаллоҳу алайҳи вассаламнинг ҳаёт йўллари, сийратлари, сифатлари, инсониятга ибрат бўладиган ахлоқ - одоблари тўғрисида сурдо таржимонлари орқали тушунтирилиб бердилар. Эҳсон дастурхонига маҳалланинг кекса нуроний онахонлари ҳам таклиф этилдилар.

Дастурхонга миллий таомимиз бўлмиш - ош тортилди ва ниҳоясида Сарвари олам Пайғамбаримиз соллаллоҳу алайҳи вассаллам ва ўтган аждодларимиз ҳақларига Қуръон тиловат қилиниб, дуолар қилдилар. 

"Бундай тадбирлар вилоятимизнинг барча туманларида навбатма - навбат ўтказилиб келинмокда"- дейди Навоий вилояти бош отинойиси Умида Холова.

Эслатиб ўтамиз, "Қосим Шайх" жоме масжидида ҳафтанинг ҳар Якшанба кунлари имконияти чекланган фуқаролар учун имом-хатиблар иштирокида махсус диний-маърифий суҳбатлар ўтказилиб келинади. 

ЎМИ Навоий вилояти вакиллиги

Жамият оилалардан таркиб топади, оилалар бахтли бўлса, жамият ҳам бахтли бўлади. Оила ва жамият тушунчалари бир-бирига бевосита чамбарчас боғлиқдир. Шундай экан, келажаги порлоқ жамият қуриш учун унинг негизи бўлган оилани маънан соғломлаштириш талаб қилинади. Ислом манбаларида оилани мустаҳкамлашга қанчалик чақирилган бўлса, уни бузилишидан шунчалик қайтарилган. Иқтисодий етишмовчилик, ғийбат, туҳмат, турли гап-сўзлар сабаб юзага келувчи оилавий келишмовчилик, сабрсизлик, енгил ҳаёт иштиёқида никоҳни бузиш исломда қаттиқ қораланган. Бу борада ҳадиси шарифларда: “Ҳалол ва рухсат этилган нарсаларнинг ичида Аллоҳ таолога хуш келмайдигани – талоқдир”, деб таъкидланган. 

Самарқанд шаҳар “Лаҳутий” жоме масжиди ходимлари маҳалла фаоллари билан “Олтин аср” маҳалласида яшовчи бир оиланинг барбод бўлишини олдини олди. Оиладаги айрим важлар туфайли гулдек оила вайрон бўлиши мумкин эди. Ўз вақтида жамоатчилик, маҳалла ва масжид жамоаси ушбу масалага эътибор қаратиб, уларнинг орасини ислоҳ этди.

Дарҳақиат, жамиятнинг муҳим бўғини бўлган оилаларни асраш, бузилишига йўл қўймаслик, фарзанд тарбияси учун муносиб муҳит ва шарт-шароит яратиш юрт истиқболини белгиловчи муҳим омиллардан эканини унутмасак, жамият фаровон, фарзандлар бахтли бўлади, албатта.

ЎМИ Самарқанд вилоят вакиллиги